HRW ដាក់សម្ពាធ ក្រុមហ៊ុន បញ្ជាទិញ របស់ អាល្លឺម៉ង់ ឲ្យគោរព លក្ខខណ្ឌការងារ និងសិទ្ធិកម្មករ
RFA / វិទ្យុ អាស៊ី សេរី | ២៩ មិនា ២០១៥
ក្រុមសហជីពកម្មករលើកបដាទាមទារឲ្យក្រុមហ៊ុនអ្នកបញ្ជាទិញ
អេច្ឆ.អេន.អឹម (H&M) ពិចារណាដំឡើងប្រាក់ឈ្នួលគោលកម្មករ
១៧៧ដុល្លារ នៅថ្ងៃទី១៩ ខែកញ្ញា ឆ្នាំ២០១៤។ RFA/Leng Maly
អង្គការ ឃ្លាំមើល សិទ្ធិមនុស្ស អន្តរជាតិ បានចេញរបាយការណ៍ផ្ទួនៗគ្នា នៅកំឡុងខែមីនានេះ ដែលគេបានរកឃើញថា វិស័យកាត់ដេរសំលៀកបំពាក់ដែលទ្រទ្រង់កំណើនសេដ្ឋកិច្ចកម្ពុជា មានការរំលោភសិទ្ធិមនុស្សធ្ងន់ធ្ងរ នៅក្នុងសង្វាក់ផលិតកម្មរបស់ខ្លួន។ អង្គការដដែលនេះ បានក្រើនរំលឹកដល់រោងចក្រដែលផ្គត់ផ្គង់ទៅអ្នកបញ្ជាទិញធំៗ នៅលើទីផ្សារអន្តរជាតិនោះ ជាពិសេសរោងចក្ររបស់អាល្លឺម៉ង់ ដែលផ្គត់ផ្គង់ម៉ាកសំខាន់ៗដូចជា អាឌីដាស់ ជាដើម ត្រូវលើកកម្ពស់ការគោរពសិទ្ធិមនុស្ស និងសុវត្ថិភាពតាមរយៈការធានាឲ្យសង្វាក់ផ្គត់ផ្គង់ឲ្យមានតម្លាភាព។
ប្រធានអង្គការឃ្លាំមើលសិទ្ធិមនុស្សរបស់អាល្លឺម៉ង់ លោក វិនហ្សែល មិសាលស្គី (Wenzel Michalski) មានប្រសាសន៍ស្របពេលបញ្ចេញរបាយការណ៍ កាលពីថ្ងៃទី២៧ មីនាថា ម៉ាកផលិតផល អាឌីដាស គឺ ម៉ាកល្បីរបស់អាល្លឺម៉ង់ ដែលម្ចាស់គ្រប់គ្រងត្រូវតែលើកកម្ពស់សិទ្ធិកម្មករ និងធានាលក្ខខណ្ឌការងារឲ្យកាន់តែប្រសើរ នៅក្នុងប្រតិបត្តិការផលិតចែកចាយលក់នៅលើទីផ្សាររបស់ខ្លួន។
ម៉្យាងវិញទៀត ការអនុវត្តច្បាប់ការងារធូររលុង គឺជាមូលហេតុចម្បងនាំឲ្យមានការរំលោភសិទ្ធិការងារនៅក្នុងវិស័យ កាត់ដេរសំលៀកបំពាក់។ រោងចក្រកាត់ដេរនៅប្រទេសកម្ពុជា ជាច្រើន បានផ្ដល់កិច្ចសន្យាការងាររយៈពេលខ្លី ដើម្បីគេចវេះលើការផ្ដល់អត្ថប្រយោជន៍បន្ថែមចំពោះកម្មករ។ កម្មករដែលទទួលបានកិច្ចសន្យាការងារខ្លីទាំងនោះ ត្រូវបានគេរារាំងមិនឲ្យបង្កើតសហជីព ឬទាមទារឲ្យថៅកែ គោរពសិទ្ធិដល់ពួកគេ នឹងមិនត្រូវគេឲ្យបន្ត កិច្ចសន្យាការងារជាថ្មីឡើយ។ បន្ថែមលើនេះ របាយការណ៍របស់អង្គការឃ្លាំមើលសិទ្ធិមនុស្សអន្តរជាតិ បានរកឃើញថា ផលិតផលរោងចក្រកាត់ដេរសំខាន់ជាច្រើន ពុំមានវិធានការគ្រប់គ្រាន់និងជាក់លាក់ ដើម្បីបញ្ចប់លើការផ្ដល់កិច្ចសន្យាការងាររយៈខ្លី។
ផ្ទុយពីការលើកឡើងនេះ មន្ត្រីជាន់ខ្ពស់នៃសមាគមរោងចក្រកាត់ដេរកម្ពុជា លោក ជាតិ ខេមរា មានប្រសាសន៍ថា ទោះបីជាកិច្ចសន្យាការងារខ្លី ក៏មិនមានផ្ដល់ការងារថ្មីដល់កម្មករទៀតឡើយ ព្រោះស្ថានភាពបញ្ជាទិញទំនិញពីអន្តរជាតិធ្លាក់ចុះ។ ម៉្យាងវិញទៀត លោកបញ្ជាក់ថា កត្តាប្រាក់ឈ្នួលអប្បបរមាខ្ពស់ គឺជាមូលហេតុចម្បងមួយដែលធ្វើឲ្យអ្នកបញ្ជាទិញមួយចំនួនងាកទៅ ទិញពីប្រទេសដទៃ ជំនួសទិញពីប្រទេសកម្ពុជា៖ «ទម្លាក់ ថ្លៃ អាណាថោក គេទិញអាហ្នុងហើយ។ ហ្នឹងល្បិចរកស៊ី របៀបរបបរកស៊ី។ …មួយៗអត់ចង់រើសកម្មករទៀតទេ រោងចក្រមួយៗនៅទ្រឹងទាំងអស់។»
ទោះជាយ៉ាងណាក៏ដោយ ការស្រាវជ្រាវនានា បានរកឃើញថា រោងចក្រកាត់ដេរនៅកម្ពុជា គួរតែផ្ដល់លក្ខខណ្ឌការងារសមរម្យសម្រាប់កម្មករ ដោយសារតែកម្មករម្នាក់អាចរកចំណូល ឲ្យថៅកែរោងចក្រ យ៉ាងហោចណាស់ ២០០ដុល្លារអាមេរិកក្នុងមួយខែ ជាពិសេសរោងចក្រដែលផ្គត់ផ្គង់ម៉ាកផលិតផលល្បីរបស់អាល្លឺម៉ង់ បើទៅជាអ្នកគ្រប់គ្រងរោងចក្រនោះ ភាគច្រើនជាជនជាតិចិន ហុងកុង និងតៃវ៉ាន់ ក៏ដោយ។
បន្ថែមលើនេះ យោងតាមគោលការណ៍សិទ្ធិមនុស្ស និងធុរកិច្ចរបស់អង្គការសហប្រជាជាតិបានបញ្ជាក់ថា ក្រុមហ៊ុននានាត្រូវតែទទួលខុសត្រូវលើការការពារអំពីផលប៉ះពាល់នៃ ការរំលោភសិទ្ធិមនុស្ស ពាក់ព័ន្ធនឹងប្រតិបត្តិការផលិត និងចែកចាយផលិតផលរបស់ខ្លួន។
ប្រធានអង្គការឃ្លាំមើលសិទ្ធិមនុស្សរបស់អាល្លឺម៉ង់ លោក វិនហ្សែល មិសាលស្គី អះអាងថា ការគោរពសិទ្ធិមនុស្ស ត្រូវតែចាប់ផ្ដើមពីក្រុមហ៊ុនបញ្ជាទិញរបស់អាល្លឺម៉ង់ ដើម្បីធានាបទដ្ឋានសុវត្ថិភាព ថាផលិតផលរបស់ខ្លួនជាផលិតផលស្អាតស្អំសម្រាប់អតិថិជន៕
No comments:
Post a Comment