លោក ហ៊ុន សែន ចោទលោក កឹម សុខា ថា ជាក្រុម បាតដៃ ទីបី ដែលចង់ ផ្ដួលរំលំ រដ្ឋាភិបាល
RFA / វិទ្យុ អាស៊ី សេរី | ១៨ មិនា ២០១៥
លោក នាយករដ្ឋមន្ត្រី ហ៊ុន សែន
ថ្លែងក្នុងពិធី សម្ពោធបើក ការដ្ឋាន សាងសង់ ផ្លូវជាតិ លេខ៥៨
នៅក្រុង ប៉ោយប៉ែត, ខេត្ត បន្ទាយមានជ័យ កាលពីព្រឹកថ្ងៃ ទី១៨ ខែមីនា
ឆ្នាំ២០១៥។ RFA/Hum Chamroeun
លោក នាយករដ្ឋមន្ត្រី ហ៊ុន សែន អះអាង ថា, លោក រកមុខ អ្នកនៅ ពីក្រោយ ក្រុមបាតដៃ ទីបី ឃើញហើយ, គឺ ជាអនុប្រធាន ទី១ នៃរដ្ឋសភា និងជាអនុប្រធាន គណបក្ស សង្គ្រោះជាតិ។ ស្របពេលគ្នានេះ, លោក ប្រកាសថា, នឹងស្នើ ឲ្យចាត់វិធានការ ផ្លូវច្បាប់ ជុំវិញ ករណីនេះ។
ទាក់ទង នឹងបញ្ហានេះ, មន្ត្រីអ្នកនាំពាក្យ គណបក្ស សង្គ្រោះជាតិ បដិសេធ ចំពោះ ការចោទប្រកាន់នេះ ថា, ជារឿង មិនពិតឡើយ។
លោក ហ៊ុន សែន ថ្លែង នៅក្នុងពិធី បើកការដ្ឋាន សាងសង់ ផ្លូវជាតិ លេខ៥៨ នៅក្រុង ប៉ោយប៉ែត, ខេត្ត បន្ទាយមានជ័យ នៅព្រឹកថ្ងៃ ទី១៨ មីនា ថា, លោក កឹម សុខា ជាអ្នក ដែលប៉ង ផ្ដួលរំលំ រដ្ឋាភិបាល នៃគណបក្ស ប្រជាជនកម្ពុជា នាពេលកន្លងមក, តែ មិនបានសម្រេច។
លោក នាយករដ្ឋមន្ត្រី មានប្រសាសន៍ ថា, លោក កឹម សុខា បានសារភាព ទៅកាន់ ប្រជាពលរដ្ឋ នៅទីក្រុង ឡុងប៊ិច (Long Beach) នៃសហរដ្ឋ អាមេរិក កាលពីថ្ងៃ ទី១៣ មីនា ថា, ខ្លួន ជាអ្នកនៅ ពីក្រោយខ្នង នៃគម្រោងការ ផ្ដួលរំលំ រដ្ឋាភិបាល កម្ពុជា ប៉ុន្តែ បរាជ័យ, ហើយ លោក បានសុំទោស ប្រជាពលរដ្ឋ នៅសហរដ្ឋ អាមេរិក។ លោក ហ៊ុន សែន ប្រៀបប្រដូច អនុប្រធាន គណបក្សប្រឆាំង ទៅនឹងមេចោរ, ហើយ ថា, បើ មេចោរ បានសារភាព បែបនេះ ទៅហើយ, តើ យើង គួរចាត់វិធានការ តាមផ្លូវច្បាប់ បែបណាទៅ?៖ «អាបាតដៃ ទីបី ក៏មាន, អាបាតដៃ ទី២, គេ ថ្លែង នៅឯទីក្រុង ឡុងប៊ិច, ឥឡូវ គិត យ៉ាងម៉េច? ការស្លាប់ប៉ុន្មាន អីប៉ុន្មាន? គេ បានសារភាព ខ្លួនគេ, មិនចាំបាច់ នរណាទេ។ ហើយ កុំថា និយាយ នៅអាមេរិក លាក់ អ្នកនៅស្រុកខ្មែរ បាននោះ។ គេ បង្ហោះ តាមហ្វេសប៊ុក ពេញទឹក ពេញដី អស់ហើយ។ រឿងតុលាការ, ទុក ឲ្យតុលាការ; រឿងខ្ញុំ គឺខ្ញុំ។ ប៉ុន្តែ អ្នកណា ជាប់គុក គឺ នៅបន្ត ក្នុងគុក ហ្នឹងទៅ។»
ឆ្លើយតប នឹងការលើកឡើង របស់លោក នាយករដ្ឋមន្ត្រី បែបនេះ, មន្ត្រីនាំពាក្យ គណបក្ស សង្គ្រោះជាតិ លោក យ៉ែម បុញ្ញឫទ្ធិ មានប្រសាសន៍ បញ្ជាក់ថា, កន្លងមក ថ្នាក់ដឹកនាំ គណបក្ស សង្គ្រោះជាតិ ពុំបាននិយាយ ចង់ផ្ដួលរំលំ រដ្ឋាភិបាល ស្របច្បាប់ នោះឡើយ។ លោក ថា, ក្នុងករណីនេះ លោក ហ៊ុន សែន ចង់ ឲ្យមហាជន យល់ច្រឡំ ទៅវិញទេ៖ «ខ្ញុំ យល់ឃើញថា, ក្រែង អ្នកស្ដាប់ គាត់ យកទៅបំភ្លៃ បន្ថែមទេ, ក៏ប៉ុន្តែ ដូចខ្ញុំ បញ្ជាក់ម្ដងហើយ ម្ដងទៀត, ឯកឧត្ដម សម រង្ស៊ី និងឯកឧត្ដម កឹម សុខា, យើង កំណត់ ក្នុងនាម គណបក្ស យកគោលការណ៍ មួយ ដោយការ ផ្លាស់ប្ដូរ ដោយសន្តិវិធី និងអហិង្សា តាមរយៈ ការបោះឆ្នោត ដោយយុត្តិធម៌។ នោះ ជាពាក្យ ដែលថ្នាក់ដឹកនាំ គណបក្ស សង្គ្រោះជាតិ តែងតែ និយាយបាទ។»
អ្នកស្រាវជ្រាវ សង្គម លោកបណ្ឌិត កែម ឡី មានប្រសាសន៍ ថា, ការឌឺដង ដាក់គ្នា ទៅវិញទៅមក នៃថ្នាក់ដឹកនាំ គណបក្ស ជាប់ឆ្នោត ទាំងពីរនេះ គ្រាន់តែ ជាការនិយាយ លាបពណ៌ ដាក់គ្នា ប៉ុណ្ណោះ, ហើយ ការនិយាយ ឌឺដង ដាក់គ្នានេះ បានក្លាយ ជាវប្បធម៌ របស់ អ្នកនយោបាយ របស់ខ្មែរ ទៅហើយ៖ «រដ្ឋាភិបាល នៅក្នុងសង្គមប្រជាធិបតេយ្យ មិនត្រូវប្រកាន់ក្នុងការប្រើពាក្យពេចន៍ទេ សំខាន់គឺទង្វើទៅវិញទេ ដែលអាចយកមកធ្វើការចោទប្រកាន់។ ហើយការចោទប្រកាន់ដោយយកតុលាការក្នុងការចាប់ខ្លួន គឺរឿងមិនល្អឡើយ ហើយគួរតែបោះបង់ចោលក្នុងទីលានប្រកួតប្រជែងចេញ។»
នៅមុន និងក្រោយការបោះឆ្នោតសភាតំណាងរាស្ត្រនីតិកាលទី៥ នាពេលកន្លងទៅ គណបក្សប្រឆាំងតែងប្រើពាក្យថា ដូរៗទៅដល់សាធារណជនទូទៅ គឺមានន័យថា ដូរមេដឹកនាំចាស់ចេញ ដាក់មេដឹកនាំថ្មីជំនួស តាមរយៈការបោះឆ្នោតដោយស្របច្បាប់ ប៉ុន្តែមិនបានសម្រេចនៅឡើយ។ គណបក្សប្រឆាំងធ្លាប់អះអាងថា ខ្លួនមិនអស់ចិត្តចំពោះការចាញ់ឆ្នោតនាពេលកន្លងទៅនេះទេ។ ក្រោយមក គណបក្សនេះចង់ឲ្យមានការបោះឆ្នោតឡើងវិញ ដើម្បីរកយុត្តិធម៌ជូនម្ចាស់ឆ្នោត និងទាមទារឲ្យកែទម្រង់គណៈកម្មការជាតិរៀបចំការបោះឆ្នោត ឲ្យល្អ ធ្វើយ៉ាងណាដើម្បីឲ្យអ្នកឈ្នះៗដោយយុត្តិធម៌ និងអ្នកចាញ់ៗដោយអស់ចិត្ត។
លោក ហ៊ុន សែន បដិសេធ មិនអន្តរាគមន៍ ដោះលែងមន្ត្រី និងសកម្មជន គណបក្ស សង្គ្រោះជាតិ
លោក ហ៊ុន សែន ប្រកាសបដិសេធមិនធ្វើអន្តរាគមន៍ដោះលែងមន្ត្រី និងសកម្មជននយោបាយគណបក្សសង្គ្រោះជាតិ ដូចដែលមន្ត្រីគណបក្សសង្គ្រោះជាតិ ធ្លាប់អះអាងថា អាចនឹងមានការសម្របសម្រួលនយោបាយនៅក្នុងអំឡុងពិធីបុណ្យចូលឆ្នាំ ខ្មែរខាងមុខនេះទេ។ការបដិសេធនេះ ធ្វើឡើងបន្ទាប់ពី លោក កឹម សុខា អនុប្រធានគណបក្សសង្គ្រោះជាតិ អះអាងថា លោក សម រង្ស៊ី ប្រធានគណបក្សនឹងជួបជាមួយ លោក ហ៊ុន សែន ដើម្បីពិនិត្យដោះស្រាយបញ្ហាសកម្មជនគណបក្សសង្គ្រោះជាតិ មួយចំនួនដែលកំពុងជាប់ពន្ធនាគារ។ លោក កឹម សុខា អះអាងថា ដំណោះស្រាយនយោបាយនៅមិនទាន់បញ្ចប់ទេ នៅពេលដែលសកម្មជនគណបក្សប្រឆាំងត្រូវរងការចោទប្រកាន់ផ្នែកនយោបាយ និងជាប់ពន្ធនាគារជាបន្តបន្ទាប់នោះ។
លោក ហ៊ុន សែន បញ្ជាក់ថា លោកនឹងមិនលូកដៃចូលប្រព័ន្ធតុលាការក្នុងករណីសកម្មជនបក្សប្រឆាំង ទេ ហើយថា ការអះអាងពីជំនួបលោក និងលោក សម រង្ស៊ី ក៏មិនមែនជាការពិតឡើយ៖ «ម្សិលមិញថាឲ្យ លោក សម រង្ស៊ី លើកជាមួយខ្ញុំក្រោយបោះឆ្នោត។ ថាគ្មានទេរឿងតុលាការ ទុកឲ្យតុលាការរឿងខ្ញុំ គឺខ្ញុំ។ កុំបោកគេទៀត អ្នកណាជាប់គុកបន្តជាប់គុកហ្នឹងទៅ។ ខ្ញុំមិនធានាជូនទេ អត់ធានាជំងឺទេ។ អ្នកឯងរក ហ៊ុន សែន ស្អី រឿងហ្នឹងជារឿងតុលាការ។»
ពាក់ព័ន្ធនឹងការអនុម័តសេចក្តីព្រាងច្បាប់បោះឆ្នោត និងការរៀបចំគណៈកម្មាធិការជាតិរៀបចំការបោះឆ្នោត (គ.ជ.ប) វិញ លោក ហ៊ុន សែន ស្នើឲ្យតំណាងរាស្ត្រពីគណបក្សទាំងពីរត្រូវតែអនុម័តសេចក្តីព្រាង ច្បាប់ទាំងពីរឲ្យចប់នៅថ្ងៃព្រហស្បតិ៍ ទី១៩ មីនា នេះ។ លោក ហ៊ុន សែន ក៏រិះគន់ពីការខ្វែងគំនិតគ្នារវាង លោក សម រង្ស៊ី និងលោក កឹម សុខា ជុំវិញការគាំទ្រសេចក្តីព្រាងទាំងពីរនោះ៖ «ស្អែកនេះជាថ្ងៃ ប្រជុំរដ្ឋសភាអនុម័តច្បាប់ពីរ ស្អែកគណបក្សទាំងពីរស្រុះស្រួលគ្នា ឯកឧត្តម សម រង្ស៊ី ថាគាត់ពេញចិត្ត ដល់អនុប្រធានគាត់ថាអត់ពេញចិត្តទេ។ រឿងពេញចិត្ត ឬមិនពេញចិត្តរឿងរបស់គាត់ទេ។ ខ្ញុំអត់ដឹងផ្ទៃក្នុងគាត់ទេ។ ត្រង់បុគ្គលអត់ពេញចិត្តបែបណានោះ សមាជិកសភាត្រូវប្រជុំទាល់តែចប់ហ្នឹង។ នាំគ្នាវេចបាយទៅប្រជុំ។»
ទោះបីជាយ៉ាងណាក៏ដោយ លោក ហ៊ុន សែន បន្ថែមទៀតថា លោកកំពុងធ្វើការនឹង លោក សម រង្ស៊ី ដើម្បីរៀបចំសមាជិក គ.ជ.ប ថ្មី ដែលគ្រោងបង្កើតឲ្យបាននៅថ្ងៃទី១៣ មេសា ខាងមុខ។
ក្នុងខណៈពេលដែលលោកនាយករដ្ឋមន្ត្រី ហ៊ុន សែន ទុកចិត្តខ្លួនឯងថា លោកមានប្រៀបជាងដៃគូនយោបាយរបស់លោក បន្ទាប់ពីគណបក្សប្រឆាំងព្រមចូលក្នុងសភាជាតិបំពេញភាពស្របច្បាប់ ពេញលេញជូនលោកហើយ។ លោកក៏មិនភ្លេចផ្តែផ្តាំទៅអង្គការក្រៅរដ្ឋាភិបាលក្រៅស្រុក និងក្នុងស្រុកថា ពួកគេត្រូវតែគោរពសេចក្តីសម្រេចចិត្តរបស់រដ្ឋសភាខ្មែរ ដែលលោកអះអាងថា ជាស្ថាប័នមួយគត់តំណាងឲ្យប្រជាពលរដ្ឋកម្ពុជា៕
No comments:
Post a Comment