លោក គល់ បញ្ញា៖ របៀបជ្រើសរើស អគ្គលេខាធិការ គ.ជ.ប. ថ្មី មិនច្បាស់លាស់
VOD / វីអូឌី | ១០ មិនា ២០១៥
|
លោក គល់ បញ្ញា (កណ្តាល) នាយកប្រតិបត្តិអង្គការខុមហ្វ្រែល ក្នុងសន្និសីទសារព័ត៌មានមួយកាលពីម្សិលមិញ (រូបថត៖ ទេព សូនី)អ្នកជំនាញ ខាងកិច្ចការ បោះឆ្នោត លើកឡើង ថា, ការបំពេញ ការងារ របស់ គ.ជ.ប. ថ្មី អាចមិនមាន ប្រសិទ្ធិភាពទេ ឬ ឈាន ដល់មាន ជម្លោះទៀត ដោយសារ របៀប នៃការជ្រើសរើស អគ្គលេខាធិការ មិនមានភាព ច្បាស់លាស់។
នាយកប្រតិបត្តិ អង្គការ ខុមហ្វ្រែល លោក គល់ បញ្ញា លើកឡើង ថា, នីតិវិធី ក្នុងការជ្រើស អគ្គលេខាធិការ មិនមាន ភាពច្បាស់លាស់ បើកទូលាយ ឲ្យសាធារណជន បានដឹងទេ។ លោក បន្តថា, ចំណុច ដែលមិន មានចែង ច្បាស់លាស់នេះ គឺ ជា ចំណុច ខ្វះចន្លោះ ទុក ឲ្យគណបក្ស ទាំងពីរ ដណ្តើមគ្នា បញ្ចូលមន្ត្រី របស់ខ្លួន។ លោក បញ្ជាក់ថា «រកមនុស្ស ខ្លួនឯង ចែកគ្នាទៅ។ គណបក្សនេះ ចែកប៉ុន្មាន, គណបក្សនោះ ចែកប៉ុន្មាន, ហើយ អ្នកណា យកអគ្គលេខា, អ្នកណា យកអគ្គលេខា រងអី។ ដូចពីមុន យើង ធ្វើអញ្ចឹង, ហើយ ដ៏ពេលទៅ ក៏វា ខ្វះតម្លាភាព។ អញ្ចឹង វា ធ្វើ ឲ្យការងារ អគ្គលេខាធិការដ្ឋាន ហ្នឹង វា អត់រឹងមាំ, វា អត់រើសបាន អ្នក ដែលគេ អាចធ្វើការបាន ការងារ ប្រតិបត្តិ។ »
មាត្រា៥៥នៃសេចក្តីព្រាងសេចក្តីស្នើច្បាប់ ស្តីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោតចែងថា អគ្គលេខាធិការ និង អគ្គលេខាធិការរង ត្រូវតែង តាំងដោយព្រះរាជក្រឹត្យ តាមសំណើរបស់ គ.ជ.ប បន្ទាប់ពីមានសំឡេងភាគច្រើនដាច់ខាតនៃ គ.ជ.ប.។ អគ្គលេខាធិការត្រូវមានឋានៈ និង បុព្វសិទ្ធិស្មើនឹងរដ្ឋខាធិការនៃក្រសួងស្ថាប័ននានា។
លោក គល់ បញ្ញា យល់ថា អាចនឹងមានជម្លោះកើតឡើងថែមទៀត ប្រសិនបើបក្សទាំងពីរ មិនមានការស្រុះស្រួលគ្នាការបែងចែក តួនាទីក្នុងអគ្គលេខាធិការដ្ឋាននោះ។ លោក បន្តថា អគ្គលេខាធិការដ្ឋាន មានតួនាទីសំខាន់ ហើយបើដំណើរការក្នុងការជ្រើសរើសមិនបានត្រឹមត្រូវនោះ ការបំពេញការងារក៏មិនមានប្រសិទ្ធិភាពដែរ។ លោកបញ្ជាក់ថា «ការងារអគ្គលេខាធិការដ្ឋាន វាគឺជាការងារប្រតិបត្តិរបស់ គ.ជ.ប បើនិយាយឲ្យចំគឺចាប់ពីអ្នកប្រតិបត្តិហ្មង។ បើថាការងារចាត់តាំងវិញដូចនាយកប្រតិបត្តិ មាននាយករងអ៊ឹចឹងទៅ អាហ្នឹងគេហៅថាការងារប្រតិបត្តិហ្មង គឺប្រតិបត្តិធ្វើការងារ ហើយបើរើសការងារប្រតិបត្តិហ្នឹងមិនប្រសិទ្ធភាពទេ ការងារ គ.ជ.ប ហ្នឹង ក៏អាចហានិភ័យនឹងធ្វើការទៅមិនមានប្រសិទ្ធភាព មិនបានលទ្ធផលអីល្អដែរ។»
មាត្រា៥៤ នៃសេចក្តីព្រាង សេចក្តីស្នើច្បាប់ ស្តីពី ការរៀបចំ និង ការប្រព្រឹត្តទៅ នៃគណៈកម្មាធិការជាតិរៀបចំការបោះឆ្នោតចែងថា អគ្គលេខាធិការ និង អគ្គលេខាធិការង ត្រូវមានលក្ខណៈសម្បត្តិដូចជា មានសញ្ញាតិខ្មែរពីកំណើតនិងសញ្ញាតិខ្មែរតែមួយគត់ អាយុយ៉ាងតិច៣០ឆ្នាំ មានសិទ្ធិបោះឆ្នោត មានសញ្ញាបត្រចាប់ពីឧត្តមសិក្សាឡើងទៅ មានបទពិសោធន៍៥ឆ្នាំយ៉ាងតិច មិនមែនជាសហព័ន្ធ ឬញាតិលោហិត ឬ ញាតិពន្ធរហូតដល់ថ្នាក់ទី៣របស់ប្រធាន អនុប្រធានគណបក្សនយោបាយ ដែលចូលរួមប្រកួតប្រជែងក្នុងកិច្ចការបោះឆ្នោត។
សង្គមស៊ីវិលជាតិ និងអន្តរជាតិ រិះគន់សេចក្តីព្រាង សេចក្តីស្នើច្បាប់ ស្តីពីការរៀបចំ និង ការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត និង សេចក្តីព្រាងច្បាប់ស្តីពី ការបោះឆ្នោតជ្រើសតាំងតំណាងរាស្ត្រ ដែលគណបក្សប្រជាជនកម្ពុជា និង គណបក្សសង្គ្រោះជាតិថា រៀបចំឡើងមិនត្រឹមត្រូវតាមបទដ្ឋានជាតិ និង អន្តរជាតិ។ តែមន្ត្រីបក្សទាំងពីរអះអាងថា ច្បាប់នោះមានភាពត្រឹមត្រូវឆ្លងការសិក្សា ពីទម្រង់ការនៃការបោះឆ្នោតរបស់ប្រទេសនានាក្នុងពិភពលោក។
No comments:
Post a Comment