បក្សប្រជាជន កម្ពុជា បណ្ដុះ សមាជិក បក្ស ឲ្យដឹង ពីនយោបាយ ឈ្នះៗ
RFA / វិទ្យុ អាស៊ី សេរី | ២៤ ឧសភា ២០១៥
ប្រធានកិត្តិយសបក្សប្រជាជនកម្ពុជា លោក ហេង សំរិន (ឆ្វេង)
និងអនុប្រធានគណបក្ស លោក ហ៊ុន សែន ក្នុងថ្ងៃប្រារព្ធខួបទី៣៦
នៃថ្ងៃ៧ មករា (១៩៧៩-២០១៥) នាទីស្នាក់ការគណបក្សរាជធានីភ្នំពេញ
កាលពីព្រឹកថ្ងៃ៧ មករា ២០១៥។ RFA/Brach Chev
គណបក្ស ប្រជាជន កម្ពុជា បានពង្រឹង ជំហរ និងរំលឹក ដល់សមាជិក សមាជិកាបក្ស ឲ្យកាន់តែ ច្បាស់ថែមទៀត អំពី នយោបាយ ឈ្នះៗ របស់ខ្លួន នៅព្រឹកថ្ងៃ ទី២៤ ខែឧសភា នាទីស្នាក់ការ គណបក្ស ប្រជាជន កម្ពុជា (គ៨៥) ក្នុងក្រុង ភ្នំពេញ។
អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ មានប្រសាសន៍ថា ខ្លឹមសារនៃបាឋកថារបស់លោកនាយករដ្ឋមន្ត្រី ហ៊ុន សែន នេះ គឺនិយាយអំពីនយោបាយឈ្នះៗ ដែលជានយោបាយគោលមួយនាំអោយកម្ពុជា មានសន្តិភាពពេញលេញ ចាប់ពីឆ្នាំ១៩៩៨ មក។
លោកបន្តថា បើទោះបីជាមានកិច្ចព្រមព្រៀងសន្តិភាពទីក្រុងប៉ារីស នៅឆ្នាំ១៩៩១ ក៏ដោយ ប៉ុន្តែការបែកបាក់ជាតិ សង្គ្រាមហែកហួរ និងការបង្កើតតំបន់អបគមន៍ នៅតែបន្តកើតមាននៅក្នុងប្រទេសកម្ពុជា ដដែល ដូច្នេះហើយទើបគណបក្សប្រជាជនកម្ពុជា ប្រើប្រាស់នយោបាយឈ្នះៗ ដើម្បីបញ្ចប់ជម្លោះរវាងខ្មែរ និងខ្មែរបានទាំងស្រុង ពោលគឺគ្មានការលូកដៃពីបរទេសឡើយ។
ក្រុមមន្ត្រីសិទ្ធិមនុស្សលើកឡើងថា ការពង្រឹងសមាជិករបស់គណបក្សប្រជាជនកម្ពុជា ដើម្បីអនុវត្តគោលនយោបាយឈ្នះៗ ដើម្បីឲ្យកម្ពុជា ទទួលបានសន្តិភាពជារឿងមួយល្អ ប៉ុន្តែការបង្កើតតំបន់អបគមន៍ណាមួយនោះ គឺជារឿងរដ្ឋាភិបាលខ្លួនឯងទេ ដែលបានចោទប្រកាន់ទៅលើប្រជាពលរដ្ឋរងគ្រោះដីធ្លីនៅខែត្រក្រចេះ កាលពីឆ្នាំ២០១២។ កាលណោះ មានកងកម្លាំងចម្រុះបានទៅឡោមព័ទ្ធចាប់ប្រជាពលរដ្ឋមានជម្លោះដីធ្លី នៅឃុំដំរីផុង ស្រុកឆ្លូង ខែត្រក្រចេះ។
កន្លងមក លោក ហ៊ុន សែន ក៏បានភ្ជាប់វប្បធម៌សន្ទនាជាមួយគណបក្សសង្គ្រោះជាតិ ទៅនឹងយុទ្ធសាស្ត្រឈ្នះៗ របស់លោកដែរ។ លើសពីនេះទៀត លោកបង្ហាញជំនឿចិត្តយ៉ាងខ្លាំងថា វប្បធម៌សន្ទនានឹងក្លាយទៅជាជោគជ័យមួយទៀតនៅក្នុងសម័យកាលរបស់លោក៕
Win win to what?
ReplyDelete