កម្ពុជា ថ្កោលទោស វៀតណាម ចំពោះ អំពើហិង្សា នៅតំបន់ ព្រំដែន ខេត្តស្វាយរៀង
RFA / វិទ្យុ អាស៊ី សេរី | ២៧ មិថុនា ២០១៥
តំណាងរាស្ត្រមកពីបក្សប្រឆាំង លោក រៀល ខេមរិន្ទ្រ
(លត់ជង្គង់) រងរបួលពេលប៉ះទង្គិចគ្នានឹងពលរដ្ឋវៀតណាម
នៅចំណុចភូមិធ្លក ឃុំត្នោត ស្រុកកំពង់រោទិ៍ ក្នុងខេត្តស្វាយរៀង
នៅថ្ងៃទី២៨ ខែមិថុនា ឆ្នាំ២០១៥។ ភាគីកម្ពុជា ថ្កោលទោស ចំពោះ អំពើហិង្សា ក្នុងការ ប៉ះប្រយុទ្ធគ្នា មួយប្រាវ រវាង ពលរដ្ឋ វៀតណាម និងខ្មែរ នៅតំបន់ ព្រំដែន ខេត្ត ស្វាយរៀង កាលពីរសៀល ថ្ងៃទី២៨ មិថុនា។ ទាំងមន្ត្រី រដ្ឋាភិបាល និងបក្សប្រឆាំង អំពាវនាវ ឲ្យខ្មែរ រួមគ្នា ដើម្បី ប្រយោជន៍ខ្មែរ។
ប្រធានគណបក្សសង្គ្រោះជាតិ លោក សម រង្ស៊ី នៅព្រឹកថ្ងៃទី២៩ មិថុនា ថ្កោលទោសវៀតណាម ដែលប្រើហិង្សាបង្ករបួសដល់ពលរដ្ឋខ្មែរ និងតំណាងរាស្ត្រគណបក្សសង្គ្រោះជាតិ នៅព្រំដែនខេត្តស្វាយរៀង នៅថ្ងៃទី២៨ មិថុនា។
លោក សម រង្ស៊ី ថ្លែងក្នុងសន្និសីទសារព័ត៌មានបន្ទាប់ពីប្រជុំសភា ថ្ងៃទី២៩ មិថុនា ដោយលោកអះអាងថា ពលរដ្ឋខ្មែរ ព្រះសង្ឃ និងអ្នកតំណាងរាស្ត្រទាំងនោះ ឋិតនៅក្នុងទឹកដីខ្មែរដែលគ្រាន់តែទៅសួរសុខទុក្ខអ្នកភូមិបាត់ ស្រែ និងពិនិត្យមើលបង្គោលព្រំដែនដែលបានបោះគួរឲ្យសង្ស័យ តែត្រូវបានពលរដ្ឋ និងអាជ្ញាធរវៀតណាម ហាមឃាត់។ លោកបញ្ជាក់ថា លោកនឹងប្ដឹងទៅអាជ្ញាធរពាក់ព័ន្ធអំពីបញ្ហានេះ៖ «យើងគិតគូរប្ដឹង ថ្នាក់ជាតិ ថ្នាក់អន្តរជាតិ សុំធ្វើម៉េចកុំឲ្យមានអំពើហិង្សាមកលើប្រជាពលរដ្ឋខ្មែរដែលអត់ មានកំហុសអីទាល់តែសោះ គ្រាន់តែទៅការពារបូរណភាពទឹកដីប្រទេសកម្ពុជា ទៅលើកទឹកចិត្តជនរងគ្រោះនៅតាមដងព្រំប្រទល់ដែន ឃើញថាប្រទេសជិតខាងគេមានឆន្ទៈវាតទីយ៉ាងខ្លាំង ហើយចង់ឲ្យអាជ្ញាធរនៅប្រទេសកម្ពុជា យើង ឲ្យប្រជារាស្ត្រទាំងអស់រួមកម្លាំងគ្នា ដើម្បីទប់ទល់កុំឲ្យបរទេសមើលងាយខ្មែរ កុំឲ្យបរទេសចេះធ្វើបាបជនជាតិខ្មែរ មកលេបត្របាក់កម្មសិទ្ធិដីធ្លីរបស់ប្រជាពលរដ្ឋខ្មែរនៅតាមដង ព្រំប្រទល់ដែន។»
បន្ថែមលើប្រតិកម្មនេះ លោកយល់ថា រដ្ឋាភិបាលខ្មែរគួរតែណែនាំអាជ្ញាធរមូលដ្ឋាន ឲ្យចេះការពារសុវត្ថិភាពប្រជាពលរដ្ឋខ្មែរពេលចុះពិនិត្យព្រំដែន។
ឆ្លើយតបបញ្ហានេះ អ្នកនាំពាក្យរដ្ឋបាលខេត្តស្វាយរៀង ចេញសេចក្ដីប្រកាសព័ត៌មាននៅថ្ងៃទី២៩ មិថុនា ថា អាជ្ញាធរខេត្តមិនទទួលខុសត្រូវចំពោះហេតុការណ៍ប៉ះទង្គិចគ្នានៅ តំបន់ព្រំដែនកម្ពុជា-វៀតណាម នៅថ្ងៃទី២៨ មិថុនា នោះទេ។ សេចក្ដីប្រកាសព័ត៌មាននេះបន្តថា ដំណើរមកពិនិត្យព្រំដែនរបស់គណបក្សសង្គ្រោះជាតិ ដែលដឹកនាំដោយ លោក រៀល ខេមរិន្ទ្រ តំណាងរាស្ត្រគណបក្សសង្គ្រោះជាតិ មិនបានជូនដំណឹងមកអាជ្ញាធរ និងសមត្ថកិច្ចពាក់ព័ន្ធ ដើម្បីរៀបចំការពារសន្តិសុខ សុវត្ថិភាព និងជូនដំណឹងទៅភាគីវៀតណាម ជាមុន ដើម្បីបញ្ចៀសហេតុការណ៍ផ្សេងៗកើតឡើងឡើយ។ អ្នកនាំពាក្យបន្តថា នៅពេលទៅដល់ព្រំដែន សមត្ថកិច្ចកម្ពុជា បានព្យាយាមពន្យល់ និងហាមឃាត់មិនឲ្យក្រុមពលរដ្ឋទាំងនោះ ទៅពិនិត្យព្រំដែនទេ ព្រោះបារម្ភពីបញ្ហាសុវត្ថិភាព ប៉ុន្តែពួកគាត់នៅតែជម្នះទៅពិនិត្យតំបន់ព្រំដែនដោយចិត្តឯង។
នាយកប្រតិបត្តិសហគមន៍ខ្មែរកម្ពុជាក្រោម លោក ថាច់ សេដ្ឋា ថ្លែងថា អាជ្ញាធរនៅតំបន់នោះអះអាងចំពោះលោកថា ទីនោះជាដីរបស់ខ្មែរមុនពេលពួកលោកចូលទៅ៖ «យើងនៅលើដីរបស់យើង យើងអត់មានរុលទៅទេ ហើយយើងបានសួរបានអាជ្ញាធរនៅនេះដែរថា នៅទីនោះជាដីរបស់យើង ហើយគាត់ឲ្យដើរតាមហ្នឹង ហើយយួន នៅទីហ្នឹងក្នុងដីយើង នាំគ្នាវាយយើងតែម្ដង។»
ដោយឡែកភាគីវៀតណាម គឺប្រធានការិយាល័យនយោបាយនៃអង្គភាពការពារព្រំដែនប្រចាំខេត្តឡុងអាន លោក ង្វៀន វ៉ាន់គ្វាន់ (Nguyen Van Quan) ឆ្លើយតបថា តំបន់នោះជាទឹកដីវៀតណាម៖ «បង្គោលព្រំដែនដែលពួកអ្នកឯងចង់ទៅ ពិនិត្យស្ថិតនៅជ្រៅក្នុងដីដែលវៀតណាម គ្រប់គ្រងនៅឡើយទេ ដូច្នោះហើយពួកខ្ញុំអាចកំណត់ថា ទីតាំងនេះជាទីតាំងក្រោមការគ្រប់គ្រងរបស់វៀតណាម។ ហើយក្នុងពេលអនាគត ប្រសិនបើកំណត់ព្រំដែនច្បាស់លាស់ហើយ វាក៏ស្ថិតក្នុងបូរណភាពទឹកដីរបស់វៀតណាម ដដែល។ កន្លែងនេះត្រូវការកំណត់ជាទឹកដីរបស់វៀតណាម រួចទៅហើយ ឃុំ ប៊ិញហ័រតី ស្រុកម៉ុកហ័រ។»
ទន្ទឹមគ្នានេះដែរ មន្ត្រីនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា តំបន់ដែលប៉ះទង្គិចគ្នានោះ គឺគណៈកម្មការព្រំដែននៃប្រទេសទាំងពីរ មិនទាន់ដោះស្រាយចប់នៅឡើយទេ ហើយក្រសួងការបរទេស ក៏ធ្លាប់ធ្វើកំណត់ទូតទៅវៀតណាម ដែរ។ ទោះយ៉ាងនេះក្ដី លោកសោកស្ដាយ និងថ្កោលទោសចំពោះការប្រើអំពើហិង្សានៅជិតតំបន់ព្រំដែននោះ។ លោកកោតសរសើរចំពោះស្មារតីស្នេហាជាតិរបស់ពលរដ្ឋខ្មែរ ក្នុងការការពារព្រំដែន និងបូរណភាពទឹកដី ប៉ុន្តែការប្រើហិង្សា និងអាវុធ រឹតតែធ្វើឲ្យបញ្ហាស្មុគស្មាញមិនអាចដោះស្រាយបាន។ លោក ខៀវ សុភ័គ បន្តថា មានតែការចរចាតាមច្បាប់អន្តរជាតិទេ ដែលអាចដោះស្រាយបានប្រយោជន៍ជាតិរៀងខ្លួន៖ «ខ្ញុំឆ្លៀតឱកាសនេះ តាមវេទិកា ឬក៏វិទ្យុអាស៊ីសេរី បងប្អូនមិត្តអ្នកស្ដាប់ ចំពោះបញ្ហាព្រំដែននេះ ខ្ញុំសុំសំណូមពរតែមួយទេ សុំឲ្យរួមជាមួយរាជរដ្ឋាភិបាលរបស់យើង។ រាជរដ្ឋាភិបាលដែលមានសម្ដេចអគ្គសេនាបតីតេជោជាប្រមុខនេះ គឺយើងបាន និងកំពុងធ្វើកិច្ចការព្រំដែនហ្នឹងជាយូរលង់ណាស់មកហើយ ជាមួយបណ្ដាមិត្តប្រទេសជិតខាងហ្នឹង។ ចៀសវាងការធ្វើដោយដាច់ជាដុំ ម្ដងអ្នកនេះទៅ ម្ដងបក្សនេះទៅ ម្ដងក្រុមនេះទៅ អាហ្នឹងខ្ញុំជឿថាវាអត់ខ្លាំង។ វាខ្លាំងដែរ ប៉ុន្តែវាមិនបានប្រមូលផ្ដុំជាកម្លាំងជាតិតែមួយ។ យើងសុំឲ្យរួមគ្នាធ្វើបញ្ហា បានយើងខ្លាំង។ យើងទៅមួយរយពីររយនាក់វាច្រើនណាស់ ប៉ុន្តែបើជាតិទាំងមូល កាន់តែធ្ងន់ខ្លាំងជាងហ្នឹងទៀត។»
នៅថ្ងៃទី២៨ មិថុនា លោក ថាច់ សេដ្ឋា នាយកប្រតិបត្តិសហគមន៍ខ្មែរកម្ពុជាក្រោម សហការជាមួយសម្ព័ន្ធយុវជនខ្មែរដើម្បីលទ្ធិប្រជាធិបតេយ្យ ដឹកនាំយុវជន ព្រះសង្ឃ តំណាងរាស្ត្រ និងពលរដ្ឋប្រមាណ ២០០អង្គ និងនាក់ ទៅពិនិត្យបង្គោលព្រំដែនលេខ២០៣ ត្រង់ចំណុចភូមិធ្លក ឃុំត្នោត ស្រុកកំពង់រោទិ៍ ក្នុងខេត្តស្វាយរៀង ដែលគេសង្ស័យថា វៀតណាម រំកិលចូលដីខ្មែរ។ ចំណុចព្រំដែននេះ គឺនៅទល់មុខនឹងស្រុកម៉ុកហ័រ ខេត្តឡុងអាន (Moc Hoa district, Long An provine) ប្រទេសវៀតណាម។ ការប៉ះទង្គិចគ្នា គឺពេលដែលពលរដ្ឋ និងកងទ័ពវៀតណាម រារាំងពលរដ្ឋខ្មែរមិនឲ្យទៅមើលទីនោះ។ ក្រោយការប៉ះទង្គិច មានពលរដ្ឋខ្មែររងរបួសជាង ១០នាក់ និងវៀតណាម របួស ៥នាក់។ វៀតណាម ហៅការប៉ះទង្គិចនេះថាជាការមិនយល់គ្នា៕
No comments:
Post a Comment