ក្រុមការងារ អឺរ៉ា នឹងដាក់អនុសាសន៍ មួយចំនួន ទៅ គ.ជ.ប.
RFA / វិទ្យុ អាស៊ី សេរី | ៨ កក្កដា ២០១៥
តំណាងសម្ព័ន្ធកំណែទម្រង់ការបោះឆ្នោតអឺរ៉ា លោក គល់ បញ្ញា
ផ្ដល់បទសម្ភាសន៍ដល់អ្នកកាសែតកាលពីថ្ងៃទី៣០ ខែមេសា ឆ្នាំ២០១៥។ RFA/Tin Zakariya
ក្រុមការងារ អឺរ៉ា (ERA), តំណាង គណបក្ស នយោបាយ, និងមន្ត្រី ស្ថានទូត មួយចំនួន ប្រជុំ ពិគ្រោះ យោបល់គ្នា ដើម្បី ដាក់អនុសាសន៍ ទៅ គ.ជ.ប. ឲ្យកែសម្រួល ចំណុចខ្លះ នៃការចុះ បញ្ជីបោះឆ្នោត និងកាត់បន្ថយ តួនាទី របស់ ស្មៀនឃុំ ក្នុងការចុះបញ្ជី ឈ្មោះបោះឆ្នោត។
ទាក់ទងសំណើនេះ អ្នកនាំពាក្យ គ.ជ.ប ស្វាគមន៍រាល់គំនិតនានារបស់សង្គមស៊ីវិល ដើម្បីធ្វើឲ្យដំណើរការនៃការចុះបញ្ជីឈ្មោះអ្នកបោះឆ្នោត កាន់តែមានភាពល្អប្រសើរ។
ក្រោយពីពិភាក្សារកឃើញចំណុចមួយចំនួនត្រូវកែលំអ ទាក់ទងការចុះបញ្ជីឈ្មោះអ្នកបោះឆ្នោត ការស្នើមិនឲ្យកែឈ្មោះអ្នកបោះឆ្នោតក្រោយចុះបញ្ជីពីថ្នាក់ក្រោម និងការកាត់បន្ថយតួនាទីស្មៀនឃុំ ក្នុងការងារបោះឆ្នោត ក្រុមការងារអឺរ៉ា នឹងដាក់អនុសាសន៍ទាំងនោះទៅស្ថាប័ន គ.ជ.ប។
កិច្ចប្រជុំនៅល្ងាចថ្ងៃទី៧ ខែកក្កដា អ្នកចូលរួមមកពីបណ្ដាគណបក្សនយោបាយ សង្គមស៊ីវិល និងតំណាងស្ថានទូត ស្នើមិនឲ្យស្មៀនធ្វើជាអនុប្រធានក្រុមការងារចុះឈ្មោះបោះឆ្នោត ដោយលើកហេតុផលថា ស្មៀនឃុំមានការងាររដ្ឋបាលច្រើន និងជាមនុស្សម្នាក់មានឥទ្ធិពលលើពលរដ្ឋក្នុងឃុំ។
ប្រធានកម្មវិធីនៃមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក សេង រិទ្ធី ថ្លែងក្នុងកិច្ចពិគ្រោះនោះថា សព្វថ្ងៃនេះស្មៀនឃុំមាននិន្នាការរើសអើងប្រជាពលរដ្ឋ ដែលមានគោលនយោបាយផ្សេងពីខ្លួន។ លោកថ្លែងបន្តទៀតថា ការងារចុះឈ្មោះបោះឆ្នោតកន្លងមក តែងតែបង្កការលំបាកដល់ពលរដ្ឋ៖ «យើង ឃើញច្រើនណាស់ស្មៀននៅទីជនបទ គាត់មានឥទ្ធិពលលើប្រជាពលរដ្ឋច្រើនណាស់ បើយកល្អខ្ញុំយល់ថា មិនគួរប្រើប្រាស់ស្មៀនជាអនុប្រធានក្រុមការងារចុះឈ្មោះបោះឆ្នោត ទេ។»
កិច្ចពិគ្រោះនេះ ស្របពេល គ.ជ.ប កំពុងប្រជុំពិគ្រោះយោបល់ជាមួយមន្ត្រីជំនាញផ្នែកបោះឆ្នោតនៃ ស្ថានទូតប្រទេសជប៉ុន និងមន្ត្រីសហភាពអឺរ៉ុប ចាប់ពីថ្ងៃទី៧ ខែកក្កដា ដល់ថ្ងៃទី១០ ខែកក្កដា។
នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) លោក គល់ បញ្ញា លើកឡើងថា ការងាររបស់ស្មៀនរាល់ថ្ងៃកំពុងរវល់ស្រាប់ ហើយផ្តល់តួនាទីជាអនុប្រធានក្រុមចុះឈ្មោះបោះឆ្នោត គឺរឹតតែធ្វើឲ្យស្មៀនមានការងារកាន់តែស្មុគស្មាញបន្ថែមទៀត។ លោក គល់ បញ្ញា បន្តថា អឺរ៉ា នឹងយកអនុសាសន៍ទាំងនោះដាក់ទៅ គ.ជ.ប នៅក្នុងអំឡុងខែកក្កដា ជាសំណើមួយស្របពេលដែល គ.ជ.ប កំពុងធ្វើការងារ៖ «យើងនឹងខិតខំជួប គ.ជ.ប ប្រាប់ពីមូលហេតុដែលយើងចង់កែប្រែនីតិវិធីលម្អិតមួយចំនួន។»
ក្រុមចុះឈ្មោះបោះឆ្នោតមានសមាសភាព ៣នាក់។ តាមច្បាប់បោះឆ្នោតជ្រើសតាំងអ្នកតំណាងរាស្ត្រ តម្រូវឲ្យប្រធានក្រុមការងារបោះឆ្នោតជាមន្ត្រីរបស់ គ.ជ.ប ជាប្រធាន។ ស្មៀនឃុំ ជាអនុប្រធានក្រុម។ សង្គមស៊ីវិលលើកឡើងថា កន្លងមកស្មៀនឃុំជាមនុស្សសំខាន់ក្នុងការងារចុះឈ្មោះបោះឆ្នោត រួមមានធ្វើការងារប្រតិបត្តិ សរសេរបង្កាន់ដៃចុងក្រោយ សរសេរឯកសារឲ្យពលរដ្ឋ។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោកបណ្ឌិត ហង្ស ពុទ្ធា យល់ថា នេះជាមតិនៃក្រុមដែលយកចិត្តទុកដាក់លើការបោះឆ្នោតនៅកម្ពុជា។ លោកថា សប្ដាហ៍ក្រោយ គ.ជ.ប នឹងផ្ញើសេចក្តីព្រាងបទបញ្ជា និងនីតិវិធីនៃការរៀបចំបញ្ជីឈ្មោះ និងការបោះឆ្នោតឡើងវិញទៅសង្គមស៊ីវិល ដែលធ្វើការងារទាក់ទងការបោះឆ្នោត៖ «យើងនឹងផ្ញើសេចក្តីព្រាង និងនីតិវិធីទៅអង្គការសង្គមស៊ីវិល និងស្ថាប័នពាក់ព័ន្ធ ដូច្នេះខ្ញុំរំពឹងថា សម្ព័ន្ធអឺរ៉ា នឹងបានប្រើប្រាស់អ្វីជាអនុសាសន៍របស់ខ្លួន។»
យ៉ាងណាក៏ដោយចុះ តំណាងមកពីគណបក្សសង្គ្រោះជាតិ លោក កែវ ភិរម្យ យល់ថា ការស្នើសុំឲ្យកាត់បន្ថយតួនាទីស្មៀនក្នុងការងារបោះឆ្នោត មិនអាចកាត់បន្ថយបានទេ។ តំណាងគណបក្សប្រឆាំងរូបនេះយល់ថា អ្វីដែលត្រូវកែប្រែ គឺបន្ថែមសមាសភាពរបស់សមាជិកក្រុមបោះឆ្នោត៕
No comments:
Post a Comment