អតីត ពិធីកា រិនីទូរទស្សន៍ ទទូច ឲ្យអាជ្ញាធរ តាមចាប់ ឧកញ៉ា ប្រើហិង្សា មកផ្ដន្ទាទោស
RFA / វិទ្យុ អាស៊ី សេរី | ១០ កក្កដា ២០១៥
អតីតពិធីការិនីទូរទស្សន៍ កញ្ញា ឯក សុជាតា ហៅ សាសា។ Photo provided
កញ្ញា ឯក សុជាតា ហៅ សាសា អតីត ពិធីការិនី ទូរទស្សន៍ ស៊ីធីអិន (CTN) ដែលជាជន រងគ្រោះ និងក្រុមគ្រួសារ មានក្តីឈឺចាប់ ចំពោះ ទង្វើ របស់ លោកឧកញ៉ា សុខ ប៊ុន នាយកក្រុមហ៊ុន សុខ ប៊ុន ហ្គ្រូប (SBG) និងក្រុមហ៊ុន វាយតម្លៃ អចលនវត្ថុ នៅកម្ពុជា ដែលបាន ប្រើអំពើហិង្សា លើរូបនាង កាលពីរំលង អធ្រាត្រ ថ្ងៃទី២ ខែកក្កដា កន្លងទៅ។
កញ្ញា សាសា និងក្រុមគ្រួសារបានទទូចឲ្យតុលាការ និងអាជ្ញាធរតាមចាប់ជនល្មើសរូបនេះមកដាក់ទោសតាមផ្លូវច្បាប់។
អតីតពិធីការិនីទូរទស្សន៍ ស៊ី.ធី.អិន កញ្ញា ឯក សុជាតា ហៅ សាសា បានប្រាប់វិទ្យុអាស៊ីសេរី នៅថ្ងៃទី៩ កក្កដា ថា រហូតមកដល់ពេលនេះ របួសរបស់កញ្ញាមិនទាន់ធូរស្បើយនៅឡើយ ដោយមុខ និងភ្នែកដែលរងការវាយដំខ្លាំងជាងគេកាន់តែមានស្ថានភាពធ្ងន់ធ្ងរ ជាងមុន។ កញ្ញាឲ្យដឹងថា បើសិនជារបួសមិនបានធូរស្បើយ កញ្ញានឹងត្រៀមខ្លួនទៅព្យាបាលនៅប្រទេសថៃ៖ «របួសខ្ញុំខ្លាំងគឺដៃជើង ភ្នែក ហើយឥឡូវ ត្រចៀករបស់ខ្ញុំចាប់ហ៊ឹងទៀត។»
អតីតពិធីការិនីទូរទស្សន៍ ស៊ី.ធី.អិន រូបនេះ បានសម្ដែងការឈឺចាប់នឹងទង្វើរបស់ឧកញ៉ានេះថា មិនសាកសមជាគំរូរបស់ពលរដ្ឋឡើយ៖ «ខ្ញុំឈឺចាប់ណាស់! នេះជាលើកទីមួយដែលកើតឡើងមកលើជីវិតខ្ញុំ។ តាំងពីកើតមកឪពុកម្ដាយរបស់ខ្ញុំមិនដែលទាំងហ៊ានលាដៃវាយខ្ញុំ ផង ទង្វើនេះខ្ញុំទទួលយកអត់បានទេ ហើយនៅពេលក្រុមគ្រួសារ ពុកម្ដាយរបស់ខ្ញុំឲ្យតែគាត់ឃើញស្ថានភាពរបួសខ្ញុំ ពួកគាត់យំអាណិតខ្ញុំ។ សម្រាប់ខ្ញុំនិងគ្រួសាររបស់ខ្ញុំ មិនចង់បានអីក្រៅពីសំណាញ់ច្បាប់ រកយុត្តិធម៌ឲ្យខ្ញុំ រឿងសំណងរឿងអីខ្ញុំមិនត្រូវការទេ ដើម្បីឲ្យគាត់ដឹងថា ច្បាប់ស្រុកខ្មែរយុត្តិធម៌នៅមានសម្រាប់ពលរដ្ឋខ្មែរ។»
ឪពុកជនរងគ្រោះ លោក អ៊ុត ធី ឲ្យដឹងថា ក្រោយកើតហេតុ លោកបានដាក់ពាក្យប្ដឹងទៅកាន់នាយកដ្ឋានព្រហ្មទណ្ឌក្រសួងមហាផ្ទៃ និងកងរាជអាវុធហត្ថ ដើម្បីអន្តរាគមន៍លើរឿងនេះ។ លោកបានសម្ដែងការសោកស្ដាយចំពោះសកម្មភាពហិង្សាមកលើកូនស្រីលោក ដែលជារឿងនឹកស្មានមិនដល់។ លោកដាក់ពាក្យប្ដឹង និងក្រោយមានការផ្សព្វផ្សាយវីដេអូ តាមបណ្ដាញសង្គមរួចមក ឧកញ៉ា សុខ ប៊ុន មិនព្រមចូលខ្លួនមកបំភ្លឺតាមការកោះហៅពីសមត្ថកិច្ចឡើយ តែបែរជាពឹងពាក់អ្នកមានអំណាចនានា ឲ្យជួយអន្តរាគមន៍។ លោកថា កាលពីថ្ងៃទី៨ ខែកក្កដា ឧកញ៉ា សុខ ប៊ុន បានបញ្ជូនមេធាវីរបស់ខ្លួនមកធ្វើការចរចាជាមួយលោក ដោយផ្ដល់សំណងចំនួន ៤ម៉ឺនដុល្លារ ដើម្បីចេញថ្លៃព្យាបាល និងបញ្ចប់រឿង។
លោកថា គ្រួសារលោកមិនស្រឡាញ់លុយជាងច្បាប់នោះទេ ដូច្នេះតុលាការ អាជ្ញាធរ ពិសេសរដ្ឋាភិបាល សូមដាក់ទោសចំពោះជនល្មើសរូបនេះឲ្យសក្ដិសមនឹងទម្ងន់ទោសដែលខ្លួន បានប្រព្រឹត្ត៖ «កាលពីថ្ងៃទី៨ គេមកនិយាយជាមួយខ្ញុំសុំចេញថ្លៃព្យាបាល និងបញ្ចប់រឿងចំនួន ៤ម៉ឺនដុល្លារ តែខ្ញុំថា ខ្ញុំមិនត្រូវការទេ លុយ ៤ម៉ឺនដុល្លារខ្ញុំមានហើយ ខ្ញុំមិនយកលុយជនល្មើសដែលធ្វើបាបគេនោះទេ។»
វិទ្យុអាស៊ីសេរី មិនអាចទាក់ទងទៅសាលាដំបូងរាជធានីភ្នំពេញ ដើម្បីសួរអំពីសំណុំរឿងឧកញ៉ា សុខ ប៊ុន ដែលត្រូវបានបញ្ជូនទៅស្ថាប័នអយ្យការអមសាលាដំបូងរាជធានីភ្នំពេញ បាននៅឡើយនៅរសៀលថ្ងៃទី៩ ខែកក្កដា។ ប៉ុន្តែបើតាមជនរងគ្រោះបានឲ្យដឹងថា កាលពីថ្ងៃទី៨ ខែកក្កដា ស្ថាប័ននេះបានចេញដីកាកោះហៅលោកឧកញ៉ា សុខ ប៊ុន ដែលជាជនសង្ស័យឲ្យចូលខ្លួនមកបំភ្លឺតាមនីតិវិធី។
វិទ្យុអាស៊ីសេរី មិនអាចស្វែងរកការបំភ្លឺពីលោកឧកញ៉ា សុខ ប៊ុន បាននៅឡើយទេ នៅថ្ងៃទី៩ ខែកក្កដា។ តែបើតាមប្រព័ន្ធផ្សព្វផ្សាយនៅក្នុងស្រុកមួយចំនួនបានឲ្យដឹងថា ក្រោយមានរឿងនេះ ឧកញ៉ា សុខ ប៊ុន បានគេចខ្លួនទៅកាន់ប្រទេសសិង្ហបុរី។
ប្រធានសមាគមសិល្បករខ្មែរ លោក សុះ ម៉ាច បានសម្ដែងការសោកស្ដាយចំពោះទង្វើអ្នកមានអំណាចប្រព្រឹត្តមកលើ សិល្បករខ្មែរថា សកម្មភាពហិង្សា ការសម្លាប់ ការប្រមាថ ការគំរាមកំហែង ការជះទឹកអាស៊ីដ និងសកម្មភាពរំលោភបំពានផ្សេងៗ តែងតែកើតមានចំពោះសិល្បករខ្មែរ ដែលបញ្ហានេះបណ្ដាលឲ្យសិល្បករដែលរងគ្រោះតែងទទួលភាពអយុត្តិធម៌ពី សង្គម។
លោកថា ក្នុងនាមលោកជាប្រធានសមាគមសិល្បករខ្មែរ លោកសូមទទូចឲ្យអាជ្ញាធរពាក់ព័ន្ធ ពិសេសតុលាការត្រូវដោះស្រាយបញ្ហានេះប្រកបតម្លាភាព និងសុចរិតភាព៖ «ខ្ញុំសូមអំពាវនាវដល់ស្ថាប័នពាក់ព័ន្ធ និងអាជ្ញាធរ ត្រូវជួយរកយុត្តិធម៌ឲ្យនាង បើទោះជារឿងនេះកើតឡើងយ៉ាងណាក៏ដោយ។»
ប្រធានផ្នែកសិទ្ធិមនុស្ស និងជំនួយផ្នែកច្បាប់នៃសមាគមការពារសិទ្ធិមនុស្សអាដហុក (Adhoc) លោក នី ចរិយា ឲ្យដឹងថា ទង្វើនេះ គឺជាបទល្មើសព្រហ្មទណ្ឌដែលដែលមានទោសរហូតដល់ជាប់ពន្ធនាគារ។ លោកបន្តថា ក្នុងនាមខ្លួនជាឧកញ៉ា អាងខ្លួនមានអំណាច ប្រើហិង្សា គឺជាការរំលោភបំពានសិទ្ធិ និងជាសកម្មភាពដែលធ្វើឲ្យសីលធម៌សង្គមធ្លាក់ចុះ ដូច្នេះសមត្ថកិច្ចមិនគួរបណ្ដែតបណ្ដោយចំពោះរឿងនេះនោះទេ៖ «សីលធម៌នៃអ្នកមានលុយមានអំណាច មកលើជនធម្មតា ដែលនេះគឺជាអំពើនិទណ្ឌភាពដែលតែងតែកើតឡើងក្នុងសង្គមខ្មែរ។»
កញ្ញា សាសា បានឲ្យដឹងថា កញ្ញាមិនដែលបានស្គាល់លោកឧកញ៉ា សុខ ប៊ុន ដែលបានប្រើអំពើហិង្សាមកលើរូបនាងនោះទេ។ នៅមុនពេលកើតហេតុ កញ្ញាបានអង្គុយលេងធម្មតា ហើយមិត្តភ័ក្ដិរបស់កញ្ញាជាថៅកែហាងជាជនជាតិជប៉ុន បានអង្វរឲ្យកញ្ញាអង្គុយកំដរ ពេលនោះភ្ញៀវក៏បានចេញពីក្នុងហាងអស់ហើយ ប៉ុន្តែស្រាប់តែបុរសពីរនាក់ដែលជាភ្ញៀវ ក៏បានត្រឡប់មកក្នុងហាងវិញ ដោយបានចាប់អូសមិត្តភក្តិរបស់នាងទាំងបង្ខំ ដើម្បីយកចេញទៅក្រៅ រហូតមិត្តភក្តិនាងយំ និងបានស្រែកឲ្យនាងជួយ ហើយនាងក៏បានប្រាប់ទៅបុរសនោះ កុំឲ្យចាប់បង្ខំមិត្តភ័ក្ដិនាង ស្រាប់តែអង្គរក្សម្នាក់នោះ បានស្រែកជេរនាង កុំឲ្យចេះដឹង។ នៅពេលនោះនាងបានតមាត់ទៅវិញ ក៏ស្រាប់តែឧកញ៉ា សុខ ប៊ុន ស្ទុះមកវ៉ៃនាងតែម្ដង។ ហេតុការណ៍នេះកើតឡើងកាលពីវេលាយប់រំលងអធ្រាត្រថ្ងៃទី២ ខែកក្កដា ក្នុងហាងមួយនៅមជ្ឈមណ្ឌលកម្សាន្តកោះពេជ្រ។
វីដេអូឃ្លិប (Video Clip) ដែលត្រូវបានបណ្ដាញព័ត៌មានសង្គមហ្វេសប៊ុក (Facebook) ដែលបង្ហាញអំពីសកម្មភាពហិង្សារបស់ឧកញ៉ា និងអង្គរក្សប្រព្រឹត្តអំពើហិង្សាទៅលើកញ្ញា សាសា ត្រូវបានអ្នកប្រើប្រាស់បណ្ដាញសង្គមរិះគន់ និងថ្កោលទោសយ៉ាងខ្លាំងទៅលើលោកឧកញ៉ា រូបនោះ។
ទន្ទឹមនឹងនេះដែរ តំណាងរាស្ត្រមណ្ឌលបាត់ដំបង អ្នកស្រី មូរ សុខហួរ ក៏បានសរសេរបង្ហោះលើបណ្ដាញសង្គមដែរថា អ្នកស្រីសោកស្ដាយនឹងទង្វើនេះ ហើយបើតុលាការគិតថា កម្ពុជា ជានីតិរដ្ឋមែននោះ គួរតែចាត់វិធានការពេញលេញដើម្បីផ្ដន្ទាទោសលោកឧកញ៉ា សុខ ប៊ុន ឲ្យខាងតែបាន៕
No comments:
Post a Comment