វៀតណាម អូសបន្លាយ, មិនទាន់ លុបស្រះ នៅព្រំដែន ខេត្តរតនគិរី
RFA / វិទ្យុ អាស៊ី សេរី | ១៣ កក្កដា ២០១៥
សហគមន៍ជនជាតិដើមចារ៉ាយ ភូមិឡំ ឃុំប៉ក់ញ៉ៃស្រុកអូរយ៉ាដាវ
ខេត្តរតនគិរី នាំគ្នាទៅមើលស្រះ
និងរណ្ដៅដាំកាហ្វេដែលពលរដ្ឋវៀតណាម ជីកនៅតំបន់ព្រំដែនហាមឃាត់
កាលពីថ្ងៃទី១ ខែមិថុនា ឆ្នាំ២០១៥។ រូបថតសហគមន៍
កិច្ចព្រមព្រៀង លុបស្រះ នៅតំបន់ ព្រំដែន ហាមឃាត់ ខេត្ត រតនគីរី ជាប់ នឹងខេត្ត យ៉ាឡាយ ប្រទេស វៀតណាម នៅអូសបន្លាយ នៅឡើយ បើ ទោះបី អាជ្ញាធរ ស្រុក អូរយ៉ាដាវ បានជួបពិភាក្សា ជាមួយ តម្រួតព្រំដែន វៀតណាម ជំរុញ ឲ្យអនុវត្តកិច្ច ព្រមព្រៀងនេះ ក៏ដោយ។ ចំណែក អ្នកនាំពាក្យ សាលាខេត្ត រតនគិរី អះអាងថា, នឹងសុំ ការណែនាំ ពីអាជ្ញាធរ ថ្នាក់ជាតិ បន្តទៀត ដើម្បី ជំរុញ ឲ្យភាគី វៀតណាម អនុវត្ត កិច្ចព្រមព្រៀង នេះ។
មន្ត្រីជាន់ខ្ពស់សាលាខេត្តរតនគិរី សម្ដែងសុទិដ្ឋិនិយមថា អាជ្ញាធរថ្នាក់ជាតិនឹងផ្តល់ការណែនាំក្នុងពេលឆាប់ៗនេះ ទាក់ទិនទៅនឹងការអនុវត្តកិច្ចព្រមព្រៀងលុបស្រះទឹកដែលវៀតណាម ជីកនៅតំបន់សរវាងកម្ពុជា និងវៀតណាម។
អ្នកនាំពាក្យ និងជាអភិបាលរងខេត្តរតនគិរី លោក ញ៉ែម សំអឿង ថ្លែងបែបនេះបន្ទាប់ពីបញ្ចប់កិច្ចប្រជុំនៅក្រសួងមហាផ្ទៃ នៅថ្ងៃទី១៤ ខែកក្កដា និងបានទទួលផ្ទាំងផែនទីតំបន់ព្រំដែនខេត្តរតនគិរី ជាប់នឹងប្រទេសវៀតណាម ពីអាជ្ញាធរថ្នាក់ជាតិច្រើនផ្ទាំង ដើម្បីស្វែងយល់ពីព្រំដែនខេត្តឲ្យបានជាក់លាក់។ លោកថា អាជ្ញាធរខេត្តរង់ចាំការណែនាំពីគណៈកម្មការចម្រុះកិច្ចការព្រំដែន ថ្នាក់ជាតិ ដើម្បីជំរុញឲ្យភាគីវៀតណាម អនុវត្តកិច្ចព្រមព្រៀងលុបស្រះឲ្យបានឆាប់៖ «ដំបូងយើងគិតថា ធ្វើលិខិតមួយដាក់ទៅខាងវៀតណាម ដើម្បីជួបជុំដាក់ពេលវេលាលុបអ៊ីចឹងទៅ ប៉ុន្តែព្រឹកមិញ ឯកឧត្តម វ៉ា គឹមហុង លោកថាយើងអាចលុបបី ឬលុប៤ ទៀត។ អ៊ីចឹងយើងត្រូវរង់ចាំការពន្យល់ណែនាំពីថ្នាក់ជាតិទៅទៀត។»
សេចក្ដីប្រកាសព័ត៌មានរបស់ក្រសួងការបរទេសកម្ពុជា ចេញកាលពីថ្ងៃទី១០ កក្កដា ឲ្យដឹងថា កម្ពុជា ស្នើសុំឲ្យវៀតណាម លុបស្រះចំនួន ៨កន្លែង ដែលក្រសួងការបរទេស ធ្វើកំណត់ទូតតវ៉ាពីរដងកាលពីថ្ងៃទី១២ និងថ្ងៃទី១៤ ខែមិថុនា ឆ្នាំ២០១៥។ ចំណែកអនុរដ្ឋមន្ត្រីការបរទេសវៀតណាម សន្យាថានឹងលុបស្រះចំនួនបីនេះចោលវិញ រីឯស្រះ ៥ ទៀត ក្រុមបច្ចេកទេសចម្រុះនៃគណៈកម្មការព្រំដែនប្រទេសទាំងពីរ នឹងចុះទៅពិនិត្យមើលជាក់ស្ដែង តែក្នុងនោះមានស្រះ ២ ជាស្រះចាស់យូរមកហើយ។
មន្ត្រីឃ្លាំមើលសិទ្ធិមនុស្សនៃសមាគមអាដហុក (adhoc) ខេត្តរតនគិរី លោក ឆាយ ធី កត់សម្គាល់ថា ស្រះដែលភាគីវៀតណាម ជីកក្នុងតំបន់ហាមឃាត់មានរហូត ៨ ក្នុងនោះស្រះ ៦ ជីកនៅអំឡុងខែមេសា ឬខែឧសភា ថ្មីៗនេះ ចំណែកស្រះពីរទៀត ជីកប្រមាណ ១ឆ្នាំកន្លងទៅនេះ។ លោកថា ភាគីវៀតណាម ដឹងច្បាស់ណាស់ថា ស្រះណាជីកខុសច្បាប់ក្នុងតំបន់ហាមឃាត់ ហេតុនេះចម្លើយរបស់តម្រួតព្រំដែនវៀតណាម គឺមានចេតនាអូសបន្លាយពេលវេលាលុបស្រះទាំងនេះវិញ៖ «មាន កិច្ចព្រមព្រៀងយល់ព្រមលុបហើយ បែរជាវៀតណាម បញ្ជាក់ថាមិនដឹងលុបស្រះមួយណា។ មន្ត្រីថ្នាក់មូលដ្ឋានគាត់ចុះត្រួតពិនិត្យ ដើម្បីធ្វើរបាយការណ៍ទៅថ្នាក់ខេត្ត និងជាតិវៀតណាម មិនទាន់បានលុបស្រះ។»
ទោះជាយ៉ាងនេះក្តី អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន រំពឹងថា មន្ត្រីជាន់ខ្ពស់គណៈកម្មាធិការចម្រុះកិច្ចការព្រំដែនជាតិ នឹងជំរុញឲ្យមានដំណោះស្រាយអនុវត្តកិច្ចព្រមព្រៀងលុបស្រះនៅសប្ដាហ៍ ក្រោយនេះ។ លោកថា ការលុប ឬមិនលុបរបស់ភាគីវៀតណាម ជារឿងមួយ ក៏ប៉ុន្តែរាល់សកម្មភាពទាំងឡាយដែលរំលោភទៅលើប្រកាសរួម ហាមមិនឲ្យប៉ះពាល់ទៅដល់តំបន់ដែលកំពុងជជែកគ្នាអំពីរឿងខ្សែខណ្ឌ សីមានោះ គឺជាការរំលោភ៖ «ឯកឧត្តមទេសរដ្ឋមន្ត្រី វ៉ា គឹមហុង លោកទើបអញ្ជើញមកពីស្រុកថៃ ដូច្នេះអាទិត្យក្រោយហ្នឹង ខ្ញុំជឿថា នឹងចាត់វិធានការបន្តបន្ទាប់។ នៅថ្ងៃនេះដែរ យើងឃើញក្រសួងមហាផ្ទៃ ឯកឧត្តមក្រឡាហោម លោកបានប្រជុំវាយតម្លៃ ហើយពង្រឹងការងារទៅមុខទៀតដែលពាក់ព័ន្ធបញ្ហាព្រំដែន។»
កាលពីថ្ងៃទី១២ ខែកក្កដា អាជ្ញាធរស្រុកអូរយ៉ាដាវ មានគ្នាប្រមាណ ២៥នាក់ បានជួបពិភាក្សាជាមួយតម្រួតព្រំដែនវៀតណាម មានគ្នា ១០នាក់ នៅចំណុចមានទំនាស់ជីកស្រះ ក៏ប៉ុន្តែក្នុងជំនួបនេះមិនមានលទ្ធផលអ្វីទេ ពីព្រោះតម្រួតព្រំដែនវៀតណាម អះអាងថា រង់ចាំអាជ្ញាធរខេត្តទាំងពីរជួបគ្នាពិភាក្សាបញ្ហានេះ ជាពិសេសស្រះបីដែលភាគីវៀតណាម ព្រមព្រៀងលុប ពួកគេមិនដឹងស្រះមួយណា ហេតុនេះលុះត្រាគណៈកម្មការព្រំដែនប្រទេសទាំងពីរចុះពិនិត្យ ជាក់ស្តែងជាមុនសិន៕
No comments:
Post a Comment