លោក ហ៊ុន សែន រិះគន់ អ្នកធ្វើបាតុកម្ម ថា, មិនគិត ពីប្រយោជន៍ សង្គម
RFA / វិទ្យុ អាស៊ី សេរី | ៣ សីហា ២០១៥
តំណាងពលរដ្ឋនៃសហគមន៍បឹងកក់ បុរីកីឡា ៣មករា
និងសហគមន៍ព្រលានយន្តហោះ (SOS) ប្រមូលផ្ដុំនៅមុខវិមានរដ្ឋសភា
នៅព្រឹកថ្ងៃទី៦ ខែកក្កដា ឆ្នាំ២០១៥។ RFA/Uon Chhin
ប្រមុខ រាជរដ្ឋាភិបាល កម្ពុជា រិះគន់ អ្នកធ្វើបាតុកម្ម និងអង្គការ សង្គមស៊ីវិល មួយចំនួន ថា, មិនគិតគូរ ពីប្រយោជន៍ សេដ្ឋកិច្ច និងសង្គមជាតិ ដោយគិតតែ ពីការធ្វើបាតុកម្ម គ្រប់ពេលវេលា។ ផ្ទុយ ពីការលើកឡើងនេះ, មន្ត្រី អង្គការ សង្គមស៊ីវិល និងសកម្មជន បានអះអាង ថា, ពួកគេ ធ្វើអ្វី គ្រប់បែបយ៉ាង គឺ ដើម្បី ទាមទារ នូវសិទ្ធិសេរីភាព និងកម្មសិទ្ធិ របស់ខ្លួន តែប៉ុណ្ណោះ។
លោកនាយករដ្ឋមន្ត្រី ហ៊ុន សែន បានរិះគន់ដោយចំហទៅលើសកម្មជនតវ៉ាមួយចំនួន ថាមានចេតនាក្នុងការប្រឌិតរឿងតវ៉ានឹងរដ្ឋាភិបាល ដើម្បីទទួលបានពានរង្វាន់ពីសហគមន៍អន្តរជាតិ៖ «ផលប្រយោជន៍ សេដ្ឋកិច្ច ផលប្រយោជន៍សង្គម អត់គិតទេ។ មួយថ្ងៃៗ ឆ្កឹះត្រង់នេះ ឆ្កឹះត្រង់នោះ តាមចិត្តគេចង់ មិនមែនថាគ្មានរឿងទេ ខ្ញុំព្រះករុណាខ្ញុំទទួលស្គាល់ថាមានរឿង ប៉ុន្តែមួយឲ្យដឹងមួយ ពីរឲ្យដឹងពីរ ឲ្យវាច្បាស់ទៅមើល ដើម្បីវាងាយដោះស្រាយ។ ដល់វាច្រើនអ៊ីចឹង ដោះស្រាយមិនចេញទេ។»
លោក ហ៊ុន សែន មិនបានបញ្ចេញឈ្មោះអ្នកតវ៉ា ឬសហគមន៍ដែលតែងចេញមុខតវ៉ានោះទេ ប៉ុន្តែលោកទំនងជាសំដៅទៅលើសកម្មជនដីធ្លីនៃសហគមន៍បឹងកក់ ពីព្រោះពួកគេតែងចេញមុខតវ៉ារាល់ពេលដែលមានព្រឹត្តិការណ៍អ្វីមួយ ដែលចាត់ទុកថាជាការរំលោភសិទ្ធិមនុស្សពីសំណាក់អាជ្ញាធរ។
ក្រៅពីសកម្មជនតវ៉ា លោក ហ៊ុន សែន ក៏វាយប្រហារជាពាក្យសម្ដីដល់អង្គការសង្គមស៊ីវិលមួយចំនួន អំពីការគាំទ្រ ឬជួយជ្រោមជ្រែងអ្នកធ្វើបាតុកម្មផងដែរ។ លោកបានអះអាងថា អង្គការទាំងនោះយកជំនួយរបស់ខ្លួនមកសម្រាប់តែការជួយគាំពារបាតុករ ផ្ទុយពីសមភាគីចិន របស់លោក ដែលជំនួយផ្ដោតសំខាន់ទៅលើការអភិវឌ្ឍ៖ «ចិន ក៏គ្មានទម្លាប់មកជ្រៀតជ្រែកកិច្ចការផ្ទៃក្នុងរបស់អ្នកណាទេ។ លោកជំទាវក៏មិនបានមករវល់ជាមួយខ្ញុំពីរឿងសិទ្ធិមនុស្ស ពីរឿងប្រជាធិបតេយ្យ ពីរឿងស្អីដែរ។ លោកជំទាវគ្រាន់តែមករវល់ជាមួយពួកយើងខ្ញុំរឿងបញ្ហាអភិវឌ្ឍ សេដ្ឋកិច្ច សង្គម និងកាត់បន្ថយភាពក្រីក្រ និងការលំបាករបស់ប្រជាជនកម្ពុជា តែប៉ុណ្ណោះ។ ប៉ុន្តែមានអ្នកខ្លះរវល់តែខាងជំនាញរឿងបង្រៀនធ្វើបាតុកម្ម។ ដាក់លុយមកស្រុកខ្មែរ ដាក់លុយមកបង្រៀនធ្វើបាតុកម្ម។»
ឆ្លើយតបនឹងការរិះគន់នេះ អ្នកស្រី ទេព វន្នី ជាសកម្មជនដីធ្លីដែលបានចំណាយពេលជាច្រើនឆ្នាំក្នុងការទាមទារនូវ សិទ្ធិស្របច្បាប់ ក្នុងការកាន់កាប់ដីរបស់ខ្លួននៅតំបន់បឹងកក់ បានបញ្ជាក់ថា អ្នកស្រី និងសកម្មជនដទៃទៀត មិនមានបំណងទាមទារដើម្បីបានពានរង្វាន់ណាមួយនោះទេ ប៉ុន្តែសកម្មភាពទាំងអស់ ត្រូវបានធ្វើឡើងដើម្បីកុំឲ្យមានការរំលោភបំពានដីធ្លី និងផ្ទះសម្បែងរបស់ប្រជាសហគមន៍ពីសំណាក់អាជ្ញាធរតែប៉ុណ្ណោះ៖ «កន្លង មកនៅពេលដែលពលរដ្ឋរងនូវភាពអយុត្តិធម៌ ហើយយើងទៅរកអន្តរាគមន៍ យើងមិនដែលទទួលបាននូវភាពកក់ក្តៅ ឬដំណោះស្រាយយុត្តិធម៌ណាមួយពីអាជ្ញាធរទេ។ យើងតែងរងនូវការដាក់សម្ពាធ ឬលាបពណ៌ ជាពិសេសយើងរងនូវការប្រើអំពើហិង្សាពីសំណាក់សមត្ថកិច្ច និងការប្រើប្រាស់ប្រព័ន្ធតុលាការពីសំណាក់រដ្ឋាភិបាល យកពួកយើងទៅឃុំខ្លួនម្តងហើយម្តងទៀត។»
ចំណែក លោក អំ សំអាត មន្ត្រីស៊ើបអង្កេតជាន់ខ្ពស់នៃសមាគមសិទ្ធិមនុស្សលីកាដូ (Licadho) ដែលបានចូលរួមអង្កេតដោយផ្ទាល់ទៅលើការតវ៉ារបស់សកម្មជននាពេល កន្លងមក បានបញ្ចេញទស្សនៈថា ការផ្តល់ពានរង្វាន់ដល់សកម្មជនពីសំណាក់សហគមន៍អន្តរជាតិ កើតឡើងពីការតាមដានដោយយកចិត្តទុកដាក់លើការតវ៉ារបស់ពលរដ្ឋ ដែលរងគ្រោះដោយភាពអយុត្តិធម៌ និងដែលហ៊ានងើបឡើងតស៊ូនឹងការរំលោភបំពាន។ ក្រៅពីនេះ លោកបានបញ្ជាក់ជំហរថា អង្គការសង្គមស៊ីវិលមិនបានគាំទ្រការតវ៉ាណាមួយ ប្រឆាំងរដ្ឋាភិបាលនោះទេ ប៉ុន្តែជាការជួយរដ្ឋាភិបាលដើម្បីលើកស្ទួយសិទ្ធិសេរីភាពរបស់ ប្រជាពលរដ្ឋ៖ «អ្វីដែលយើងធ្វើ គឺយើងចង់ពង្រឹង ១ ការអនុវត្តសិទ្ធិ ២ ការអនុវត្តច្បាប់ ៣ ស្វែងរកដំណោះស្រាយដោយសន្តិវិធី លើកលែងតែ អ៊ិន.ជី.អូ (NGOs) ណាដែលឲ្យប្រជាពលរដ្ឋធ្វើដោយហិង្សា ឬខុសច្បាប់ ទើបយើងចាត់ទុកថាជាទង្វើខុសច្បាប់។»
នេះមិនមែនជាលើកទី១ ទេ ដែលលោកនាយករដ្ឋមន្ត្រី ហ៊ុន សែន ថ្លែងរិះគន់សកម្មជនតវ៉ា និងអង្គការសង្គមស៊ីវិល។ កន្លងមក លោកធ្លាប់រិះគន់សកម្មជនដីធ្លីម្នាក់ ថាបានតវ៉ារហូតទទួលពានរង្វាន់ ដែលគេអាចដឹងថា ម្នាក់នោះ គឺជាអ្នកស្រី ទេព វន្នី តំណាងសហគមន៍បឹងកក់ ដែលទទួលបានពានរង្វាន់ស្ត្រីភាពជាអ្នកដឹកនាំពិភពលោកពីអង្គការ វ៉ាយថល វ៉យស៍ (Vital Voices) នៅសហរដ្ឋអាមេរិក នៅឆ្នាំ២០១៣។ បន្ថែមពីនេះ លោកក៏ធ្លាប់រិះគន់អង្គការក្រៅរដ្ឋាភិបាលមួយចំនួនទៀតដែរថា មាននិន្នាការទៅរកគណបក្សប្រឆាំង និងនៅពីក្រោយខ្នងសកម្មភាពតវ៉ារបស់សកម្មជនដីធ្លី និងនយោបាយ៕
No comments:
Post a Comment