គណបក្ស ប្រឆាំង បង្ហាញជំហរ មិនបោះបង់ចោល វប្បធម៌សន្ទនា ជាមួយ បក្សកាន់អំណាច
RFA / វិទ្យុ អាស៊ី សេរី | ១៩ សីហា ២០១៥
មន្ត្រីជាន់ខ្ពស់គណបក្សសង្គ្រោះជាតិ និងជាអ្នកនាំពាក្យ
លោក យឹម សុវណ្ណ (ឆ្វេង) និងមន្ត្រីជាន់ខ្ពស់គណបក្សប្រជាជនកម្ពុជា លោក
ព្រំ សុខា ធ្វើសន្និសីទកាសែតក្រោយបញ្ចប់កិច្ចចរចានៅរដ្ឋសភា
នៅថ្ងៃទី៥ វិច្ឆិកា ឆ្នាំ២០១៣។ RFA/Tin Zakariya
មន្ត្រីជាន់ខ្ពស់ គណបក្ស សង្គ្រោះជាតិ អះអាង ថា, គេ មិនលុបចោល វប្បធម៌សន្ទនា ជាមួយ គណបក្ស កាន់អំណាចទេ។ វប្បធម៌សន្ទនានេះ នៅតែ បន្តសកម្មភាព របស់ខ្លួន ដូចដែលមានចែង នៅក្នុងកិច្ចព្រមព្រៀង កាលពីថ្ងៃ ទី២២ ខែកក្កដា ឆ្នាំ២០១៤ ព្រោះថា, វប្បធម៌សន្ទនានេះ មានប្រយោជន៍ ដល់ជាតិ។ ការបង្ហាញជំហរ របស់ បក្សក្រៅរដ្ឋាភិបាល នៅពេលនេះ នៅបន្ទាប់ ពីលោក ហ៊ុន សែន ព្រមាន លុបវប្បធម៌នេះ ចោល។
អ្នកនាំពាក្យគណបក្សសង្គ្រោះជាតិ លើកឡើងថា គណបក្សប្រជាជនកម្ពុជា និងគណបក្សសង្គ្រោះជាតិ មិនអាចគ្មានវប្បធម៌សន្ទនាបានទេ ទោះស្ថិតក្នុងកាលៈទេសៈណាក៏ដោយ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ឲ្យដឹងនៅថ្ងៃទី១៩ ខែសីហា ថា គណបក្សសង្គ្រោះជាតិ កំពុងតែធ្វើរឿងគ្រប់យ៉ាង ដើម្បីឲ្យមានការបង្រួបបង្រួមជាតិ ប៉ុន្តែលោកថា ការរិះគន់តែងតែមាននៅក្នុងសង្គមប្រជាធិបតេយ្យ។ ផ្ទុយពី លោក ហ៊ុន សែន ដែលព្រមានលុបបំបាត់វប្បធម៌សន្ទនាចោល លោក យឹម សុវណ្ណ បញ្ជាក់ថា វប្បធម៌សន្ទនាជាអ្វីដែលគណបក្សសង្គ្រោះជាតិ ត្រូវការ និងជាអ្វីដែលប្រជាពលរដ្ឋចង់ឃើញមេដឹកនាំខ្មែរ មានការបង្រួបបង្រួមជាតិពិតប្រាកដ៖ «ធម្មតាការសន្ទនាកើតឡើងចេញមកពីពីរភាគី។ រាល់ថ្ងៃនេះ តំណាងរាស្ត្រទាំងពីរគណបក្ស សន្ទនារាល់ថ្ងៃហើយតើ!»
លោកនាយករដ្ឋមន្ត្រី ហ៊ុន សែន ថ្លែងប្រាប់សារព័ត៌មានក្នុងស្រុកមួយកាលពីថ្ងៃទី១៧ ខែសីហា ថា នឹងរំលាយវប្បធម៌សន្ទនាចោល ប្រសិនគណបក្សសង្គ្រោះជាតិ មិនកែតម្រូវសកម្មភាពរបស់ខ្លួនដែលចង់បំផ្លាញរដ្ឋាភិបាលទេនោះ។
អ្នកសិក្សាស្រាវជ្រាវការអភិវឌ្ឍសង្គម លោក កែម ឡី លើកឡើងថា ទោះជាមាន ឬគ្មានវប្បធម៌សន្ទនា មិនសំខាន់ឡើយ ព្រោះគណបក្សកាន់អំណាចយកវប្បធម៌នេះដើម្បីបំបាក់បក្សប្រឆាំង មិនឲ្យរិះគន់ចំណុចខ្សោយរបស់ខ្លួនប៉ុណ្ណោះ។ លោកបន្តថា យន្តការរបស់រដ្ឋ ជាពិសេសគឺរដ្ឋសភា តំណាងរាស្ត្រ ឬប្រធានគណបក្សទាំងពីរ អាចនិយាយគ្នា ជជែកគ្នា ដើម្បីដោះស្រាយបញ្ហាជាតិ៖ «យន្តការរដ្ឋសភាមានហើយ ប្រធានរដ្ឋសភានិយាយជាមួយអនុប្រធានរដ្ឋសភា ប្រធានគណៈកម្មការរដ្ឋសភា និយាយជាមួយប្រធានគណៈកម្មការរបស់រដ្ឋសភានោះ។ សភានិយាយជាមួយក្រសួងទំនាក់ទំនងរដ្ឋសភា ជាដើមនោះ។»
វប្បធម៌សន្ទនា បានចាប់កំណើតក្រោយពីគណបក្សជាប់ឆ្នោតទាំងពីរ បានបញ្ចប់ការជាប់គាំងនយោបាយរយៈពេល ១ឆ្នាំ គឺគណបក្សប្រជាជនកម្ពុជា និងគណបក្សសង្គ្រោះជាតិ មានកិច្ចព្រមព្រៀងនយោបាយរួមកាលពីថ្ងៃទី២២ ខែកក្កដា ឆ្នាំ២០១៤។
វប្បធម៌សន្ទនានេះ បានធ្វើឲ្យគណបក្សសង្គ្រោះជាតិ ឈានដល់ការសម្រេចចិត្តដ៏ធំមួយ គឺយល់ព្រមចូលអង្គុយធ្វើការនៅក្នុងសភា ក្នុងការបញ្ចប់ការរិះគន់ថា សភាឯកបក្សក្រោយពីការបោះឆ្នោតកាលពីឆ្នាំ២០១៣។ ក្រៅពីសម្រេចចិត្តសភានោះ មេដឹកនាំគណបក្សទាំងពីរ ប្ដេជ្ញាថានឹងលុបបំបាត់វប្បធម៌ទឹកឡើងត្រីស៊ីស្រមោច ទឹកហោចស្រមោចស៊ីត្រី មិនឲ្យមានក្នុងសង្គមនយោបាយខ្មែរតទៅទៀត។ ប៉ុន្តែនៅរយៈពេលចុងក្រោយនេះ ស្ថានភាពនយោបាយហាក់ឡើងកម្ដៅឡើងវិញ ក្នុងពេលតំណាងរាស្ត្រគណបក្សសង្គ្រោះជាតិ ចុះទៅពិនិត្យមើលតំបន់ព្រំដែនកម្ពុជា-វៀតណាម។
វប្បធម៌សន្ទនារវាងគណបក្សទាំងពីរ ហាក់ដូចជាងាកខ្នងដាក់គ្នា និងលេចឡើងវិញនូវវប្បធម៌ចាប់ចងសកម្មជននយោបាយ សកម្មជនបរិស្ថាន និងព្រះសង្ឃ ជាដើម។ ដែលវប្បធម៌ចាប់ចង បានស្ងប់ស្ងាត់ប្រមាណជាងមួយឆ្នាំ ក្រោយពីគណបក្សទាំងពីរសន្យាថា ប្រើយន្តការសន្ទនាក្នុងការដោះស្រាយបញ្ហាប្រទេសជាតិនោះ។
រីឯសាស្ត្រាចារ្យផ្នែកវិទ្យាសាស្ត្រនយោបាយ លោកបណ្ឌិត រស់ រ៉ាវុធ យល់ឃើញថា វប្បធម៌សន្ទនានៅតែដើរតួសំខាន់ចំពោះគណបក្សទាំងពីរ ដោយលោកជំរុញឲ្យប្រមុខបក្សទាំងពីរ ត្រូវតែងាកមកនិយាយគ្នា។ លោកថ្លែងទៀតថា ទោះបីជាតំណាងរាស្ត្រទាំងពីរគណបក្ស អាចនិយាយគ្នានៅក្នុងសភា ប៉ុន្តែស្ថានការណ៍កម្ពុជា សព្វថ្ងៃ ពុំទាន់មានប្រព័ន្ធយុត្តិធម៌ឯករាជ្យនៅឡើយ៖ «វប្បធម៌សន្ទនានេះ ការដំណោះស្រាយនយោបាយបន្ទាន់មួយដែលគណបក្សទាំងពីរ ជជែកគ្នាជាលក្ខណៈគ្រួសារខ្មែរ។»
ជាការកត់សម្គាល់ មន្ត្រីជាន់ខ្ពស់គណបក្សសង្គ្រោះជាតិ និងតំណាងរាស្ត្រគណបក្សប្រឆាំងមួយចំនួនដែលបានធ្វើសកម្មភាពទាក់ទង បញ្ហាព្រំដែនកម្ពុជា-វៀតណាម ឥឡូវនេះបានចាកចេញពីប្រទេសស្ងាត់ៗ ស្របពេលសកម្មជនគណបក្សនេះមួយចំនួន ត្រូវបានចាប់ខ្លួន ក្នុងនោះដែរ លោក សម រង្ស៊ី និងលោក កឹម សុខា ដែលជាមេដឹកនាំគណបក្សប្រឆាំង ក៏មានបេសកកម្មនៅក្រៅប្រទេសដែរ នៅខណៈសម្ព័ន្ធភាពរវាងគណបក្សជាប់ឆ្នោតទាំងពីរ កំពុងប្រេះឆា។ ប៉ុន្តែអ្នកនាំពាក្យគណបក្សសង្គ្រោះជាតិ អះអាងថា ការចាកចេញរបស់មេដឹកនាំរបស់ខ្លួននេះ ជាដំណើរទស្សនកិច្ចដែលគ្រោងទុកតាំងពី ៣ខែមុនមកម្ល៉េះ៕
No comments:
Post a Comment