ពលរដ្ឋ មួយចំនួន បារម្ភ ពីស្ថានភាព នយោបាយ ក្រោយការចាប់ សកម្មជន បក្សប្រឆាំង
RFA / វិទ្យុ អាស៊ី សេរី | ៧ សីហា ២០១៥
លោក សៀង ហៃ
ជាប្រជាពលរដ្ឋនៅទីក្រុងភ្នំពេញផ្ដល់បទសម្ភាសន៍ដល់វិទ្យុអាស៊ីសេរី
ថា បញ្ហាស្ថានភាពនយោបាយនៅកម្ពុជា ពិតជាគួរឲ្យព្រួយបារម្ភ
និងភ័យខ្លាច កាលពីថ្ងៃទី៦ ខែសីហា ឆ្នាំ២០១៥។ RFA/Morm Moniroth
ពលរដ្ឋមួយចំនួនក្នុងរាជធានីភ្នំពេញ បញ្ជាក់ថា ពួកគេមានការព្រួយបារម្ភជាខ្លាំងចំពោះស្ថានភាពនយោបាយនៅកម្ពុជា នាពេលបច្ចុប្បន្ននេះ។ ការបញ្ជាក់ជំហរបែបនេះរបស់ប្រជាពលរដ្ឋរស់នៅក្នុងទីក្រុងភ្នំពេញ នៅចំពេលសម្ពាធនយោបាយបានឡើងកម្ដៅសាជាថ្មី។ គិតមកដល់ពេលនេះ តុលាការបានឃុំសកម្មជនគណបក្សសង្គ្រោះជាតិ ៣នាក់បន្ថែមទៀតហើយក្នុងចំណោម ៥នាក់ ដែលសមត្ថកិច្ចកំពុងតាមរកចាប់ខ្លួន ពាក់ព័ន្ធបទចោទចូលរួមអំពើកុបកម្ម ប្រព្រឹត្តកាលពីថ្ងៃទី១៥ ខែកក្កដា ឆ្នាំ២០១៤។
ប្រជាពលរដ្ឋបានហៅការចាប់ខ្លួនសកម្មជនគណបក្សជំទាស់ជាហូរហែ ក្នុងដំណាក់កាលចុងក្រោយដោយប្រញាប់ប្រញាល់ ក្រោយពីលោកនាយករដ្ឋមន្ត្រី ហ៊ុន សែន ប្រតិកម្មភ្លាមនេះថា ជាការជំរុញឲ្យស្ថានការណ៍នយោបាយមានការប្រែប្រួលដ៏គួរឲ្យព្រួយ បារម្ភ។
ទាក់ទិនករណីនេះ កាលពីថ្ងៃទី៤ សីហា ចៅក្រមស៊ើបសួរនៃតុលាការក្រុងភ្នំពេញ លោក កែវ មុនី បានចេញដីកាភ្លាមៗដោយបញ្ជាឲ្យតាមចាប់ខ្លួនយុវជនគណបក្សសង្គ្រោះ ជាតិ ៥នាក់បន្ថែមទៀត។ ដីកាចាប់ខ្លួនរបស់អនុប្រធានតុលាការក្រុងភ្នំពេញនេះ ធ្វើឡើងតែប៉ុន្មានម៉ោងបន្ទាប់ពី លោក ហ៊ុន សែន ប្រតិកម្មជុំវិញអំពើហិង្សាកាលពីថ្ងៃទី១៥ ខែកក្កដា ឆ្នាំ២០១៤ កន្លងទៅ។ ស្ថិតក្រោមហេតុផលនេះហើយ មជ្ឈដ្ឋានទូទៅកត់សម្គាល់ថា បើទោះជាលោកនាយករដ្ឋមន្ត្រី ហ៊ុន សែន ព្យាយាមបញ្ជាក់ពីភាពស្អាតស្អំរបស់លោកថា ពុំបានលូកដៃចូលកិច្ចការផ្ទៃក្នុងរបស់តុលាការក្តី ក៏គេសង្កេតឃើញតុលាការ តែងអនុវត្តភ្លាមៗរាល់ពេល លោក ហ៊ុន សែន ប្រតិកម្ម។
ប្រជាពលរដ្ឋរស់នៅក្នុងទីក្រុងភ្នំពេញ បានអះអាងប្រហាក់ប្រហែលគ្នានៅថ្ងៃទី៦ សីហា ថា ការប្រែប្រួលនៃកម្ដៅនយោបាយដ៏លឿនបែបនេះ ជាសញ្ញាបញ្ជាក់ថា រដ្ឋាភិបាលដែលគ្រប់គ្រងដោយគណបក្សប្រជាជនកម្ពុជា នោះ ទំនងជាចង់បញ្ចប់ជីវិតនយោបាយគណបក្សជំទាស់ហើយមើលទៅ។ លើសពីនេះទៀត ការចាប់សកម្មជនដោយតុលាការក្រុងភ្នំពេញ ពួកគេចាត់ទុកថា ជាការអនុវត្តតាមបទបញ្ជារបស់មេដឹកនាំច្រើនជាងធ្វើតាមនីតិវិធី។ ពួកគាត់បន្តថា «បើតាមខ្ញុំឲ្យមានតម្លាភាពសងខាង លុះត្រាតែហៅទាំងសងខាង ទៅតទល់គ្នានៅតុលាការ។ ខ្ញុំដែលតាមឃើញមកតុលាការនៅស្រុកខ្មែរ ពិបាកទុកចិត្តណាស់។ ខ្ញុំក៏មិនសូវយល់ដែរបញ្ហាតុលាការ ប៉ុន្តែយើងពិនិត្យមើលជាក់ស្ដែងទៅ ការទាមទារហ្នឹងដើម្បីសេរីភាពរបស់ប្រជាពលរដ្ឋ»។
កាលពីថ្ងៃទី៥ សីហា គណបក្សសង្គ្រោះជាតិ ក៏បានចេញលិខិតបន្ទាន់មួយដែរ ដោយអំពាវនាវឲ្យមានការដោះលែងសកម្មជនរបស់ខ្លួនដោយគ្មានលក្ខខណ្ឌ និងបញ្ឈប់ការប្រើប្រាស់តុលាការចាប់មនុស្សតទៅទៀត។ ការអំពាវនាវនេះ ស្របពេលសកម្មជនរបស់ខ្លួន ៣នាក់បន្ថែមទៀត ក្នុងចំណោម ៥នាក់ ត្រូវបានបញ្ជូនទៅឃុំខ្លួននៅពន្ធនាគារព្រៃស បណ្ដោះអាសន្ន កាលពីថ្ងៃទី៥ សីហា ក្រោយពីបញ្ចប់ការសាកសួរប្រហែល ៦ម៉ោង ដោយចៅក្រមស៊ើបសួរ លោក កែវ មុនី រួចមក។ នេះជាការចាប់ខ្លួនសកម្មជនគណបក្សជំទាស់លើកទីពីរហើយ បន្ទាប់មនុស្ស ១១នាក់មុន ត្រូវបានតុលាការចោទប្រកាន់ និងកំពុងឃុំខ្លួននៅគុកព្រៃស ជុំវិញបទល្មើសដែលចៅក្រមនៃសាលាដំបូងរាជធានីភ្នំពេញ ចោទប្រកាន់ថា បានដឹកនាំ និងអំពើចូលរួមកុបកម្មនៅទីលានប្រជាធិបតេយ្យ។
លោក អំ សំអាត អ្នកសម្របសម្រួលបច្ចេកទេសផ្នែកឃ្លាំមើលសិទ្ធិមនុស្សនៃអង្គការ លីកាដូ (Licadho) ចាត់ទុកថា ដីកាចាប់ខ្លួននេះពិបាកជឿថា ធ្វើឡើងដោយផ្អែកតាមនីតិវិធីណាស់។ លោកបន្តថា រយៈពេលនៃសំណុំរឿងបានអូសបន្លាយជាង ១ឆ្នាំមកហើយដែលតុលាការមិនអើពើ ស្រាប់តែ លោក ហ៊ុន សែន ប្រតិកម្មភ្លាម ចៅក្រមក៏ចេញដីកាតាមចាប់ខ្លួនភ្លាមដែរ។ ហេតុនេះ លោកយល់ឃើញថា ទោះចង់មិនចង់ រូបភាពនេះ គឺលោកនាយករដ្ឋមន្ត្រីទំនងជាស្ថិតនៅពីក្រោយនៃចំណាត់ការនេះ។ លោកបន្តថា «បើសិនជាតុលាការគាត់ដំណើរពីយូរមកហើយមានអី។ នេះមិនបញ្ហាទេ ប៉ុន្តែដល់ពេលស្រែកភ្លាម ចំណាត់ការភ្លែត ចាត់ការភ្លាម នេះមិនចាំបាច់ថាសង្គមស៊ីវិលទេ ប្រជាពលរដ្ឋសាមញ្ញក៏គេមើលឃើញថាវាជារឿងនយោបាយដែរ»។
សំណុំរឿងជាច្រើនដែលមជ្ឈដ្ឋានទូទៅមានមន្ទិលថា តុលាការនៅក្រោមសម្ពាធរបស់ លោក ហ៊ុន សែន។ ភ្លាមៗពេលលោកនាយករដ្ឋមន្ត្រីប្រតិកម្មរឿង ឧកញ៉ា ថោង សារ៉ាត់ ប្រធានតុលាការក្រុងភ្នំពេញ លោក អាំង មាលតី របូតកៅអីភ្លាមដែរ។ បញ្ហានេះ នៅមិនគិតដល់សំណុំរឿងឧកញ៉ា សុខ ប៊ុន និងប្រតិកម្មជុំវិញរឿងអតីតអភិបាលក្រុងបាវិត លោក ឈូក បណ្ឌិត នៅឡើយផង។
ពាក់ព័ន្ធករណីនេះ មន្ត្រីនាំពាក្យរបស់តុលាការក្រុងភ្នំពេញ លោក លី សុផាន់ណា បានបដិសេធក្នុងការឆ្លើយតប ដោយបញ្ជាក់យ៉ាងខ្លីមុនដាក់ទូរស័ព្ទចុះថា លោកជាប់រវល់នៅថ្ងៃទី៦ សីហា។
មេធាវីការពារក្ដីឲ្យជនត្រូវចោទ គឺលោក សំ សុគង់ និយាយតាមទូរស័ព្ទកាលពីថ្ងៃទី៦ សីហា ថា ការចាប់ខ្លួនកូនក្ដីរបស់លោកនេះ ទំនងធ្វើឡើងដោយផ្អែកលើខ្សែអាត់វីដេអូច្រើនជាង ហើយឈានទៅកំណត់មុខសញ្ញាតែម្ដង។ បន្ថែមពីលើនេះ លោកអះអាងថា អាចនឹងមានមនុស្សច្រើនជាងនេះទៀតដែលនឹងត្រូវចាប់ខ្លួន។ ជុំវិញបញ្ហានេះ មិនត្រឹមតែសកម្មជនគណបក្សជំទាស់នៅថ្នាក់ក្រោមជាតិទេដែលជាប់ បណ្ដឹងនៅតុលាការ ជាងនេះទៀត សកម្មជនមួយចំនួនទៀត ត្រូវជាប់ឃុំនៅពន្ធនាគារ សូម្បីអ្នកតំណាងរាស្ត្រ និងមន្ត្រីជាន់ខ្ពស់របស់បក្សប្រឆាំង ក៏ជាប់បណ្ដឹងនៅតុលាការនៅឡើយដែរ៕
No comments:
Post a Comment