រដ្ឋាភិបាល កម្ពុជា ថ្លែងអំណរគុណ ចក្រភពអង់គ្លេស ដែលនឹងសហការ ឲ្យខ្ចីផែនទី
RFA / វិទ្យុ អាស៊ី សេរី | ២៥ សីហា ២០១៥
ក្រុមស្រាវជ្រាវបញ្ហាព្រំដែន នៃរាជបណ្ឌិត្យសភាកម្ពុជា
បង្ហាញផែនទីដែលបានពីភាគីពាក់ព័ន្ធដល់អ្នកសារព័ត៌មាន
នារាជបណ្ឌិត្យសភាកម្ពុជា កាលពីថ្ងៃទី១១ ខែសីហា ឆ្នាំ២០១៥។
RFA/Tin Zakariya
រដ្ឋាភិបាល កម្ពុជា បានផ្ញើលិខិត ថ្លែងអំណរគុណ ដល់នាយក រដ្ឋមន្ត្រី នៃចក្រភព អង់គ្លេស ដែលបាន ឆ្លើយតប ថា នឹងផ្ដល់ កិច្ចសហការ ឲ្យរដ្ឋាភិបាលខ្មែរ ខ្ចីផែនទី មកប្រើប្រាស់ ដើម្បី ផ្ទៀងផ្ទាត់ បញ្ជាក់ ពីភាពប្រក្រតី សម្រាប់ កំណត់ព្រំដែន ជាមួយ ប្រទេស ជិតខាង។
នៅក្នុងលិខិតដែលចេញផ្សាយដោយទីស្ដីការគណៈរដ្ឋមន្ត្រី ចុះហត្ថលេខាដោយលោកនាយករដ្ឋមន្ត្រី ហ៊ុន សែន ថ្ងៃទី២៤ សីហា ថា នាយករដ្ឋមន្ត្រីនៃចក្រភពអង់គ្លេស លោក ដេវីដ ខាម៉ឺរូន (David Cameron) បានផ្ដល់កិច្ចសហការក្នុងការស្វះស្វែងរកផែនទីប្រទេសកម្ពុជា តាមការស្នើសុំរបស់រដ្ឋាភិបាល។ ថ្វីត្បិតតែមានការបញ្ជាក់ពីនាយករដ្ឋមន្ត្រីនៃចក្រភពអង់គ្លេស ថានឹងស្វែងរកផែនទីតាមការស្នើសុំនោះ មិនត្រូវបានរកឃើញក៏ពិតមែន ក៏ប៉ុន្តែទន្ទឹមនឹងគ្នានេះ ក្នុងចំណោមផែនទីទាំងបីបោះពុម្ពដោយក្រុមភូមិសាស្ត្រឥណ្ឌូចិន ដែលនាយករដ្ឋមន្ត្រីនៃចក្រភពអង់គ្លេសបានបញ្ជាក់ថា មាននៅក្នុង ប្រ៊ីតធីស ឡាយប្រារី (British Library) សម្រាប់សាធារណជននោះ អាចនឹងមានផែនទីមួយចំនួនដែលមានប្រយោជន៍សម្រាប់ការងារផ្ទៀងផ្ទាត់ ផែនទីរបស់រដ្ឋាភិបាលកម្ពុជា។
រដ្ឋាភិបាលកម្ពុជា បានដាក់លិខិតស្នើសុំខ្ចីផែនទីពីប្រទេសមហាអំណាចទាំង៣ គឺសហរដ្ឋអាមេរិក ប្រទេសបារាំង ប្រទេសអង់គ្លេស នៅអំឡុងពេលដែលខ្លួនបានខ្ចីផែនទីពីអង្គការសហប្រជាជាតិ កាលពីខែកក្កដា ឆ្នាំ២០១៥។
នៅថ្ងៃទី២៦ ខែសីហា រដ្ឋាភិបាលកម្ពុជា នឹងប្រគល់ផែនទីទាំង ១៨ផ្ទាំង ជូនមន្ត្រីអង្គការសហប្រជាជាតិវិញ ក្រោយពីខ្លួនបានខ្ចីយកមកផ្ទៀងផ្ទាត់រួចរាល់ហើយនោះ៕
No comments:
Post a Comment