គណបក្ស សង្គ្រោះជាតិ បង្ហាញជំហរ មិនតបត ចំពោះ ការគំរាម របស់លោក ហ៊ុន សែន
RFA / វិទ្យុ អាស៊ី សេរី | ៩ កញ្ញា ២០១៥
លោក កឹម សុខា អនុប្រធានគណបក្សសង្គ្រោះជាតិ
និងជាអនុប្រធានទី១ រដ្ឋសភា ថ្លែងទៅកាន់អ្នកកាសែត
នាអាកាសយានដ្ឋានអន្តរជាតិភ្នំពេញ
ពេលត្រឡប់ពីបំពេញទស្សនកិច្ចនៅក្រៅប្រទេស នៅថ្ងៃទី៩ ខែកញ្ញា
ឆ្នាំ២០១៥។ RFA/Morm Moniroth
គណបក្ស ជំទាស់ ដែលធ្លាប់ តែ វាយប្រហារ គូប្រកួត របស់ខ្លួន តាមរយៈ សារ នយោបាយ ជាហូរហែ កន្លងទៅ ស្ទើរតែ ងើបមុខ មិនរួច ក្នុងឆាក នយោបាយ នោះ នៅពេលនេះ បែរ ជាបន្ទន់ឥរិយាបថ, ហើយ អះអាងថា ចង់បន្ថយ កម្ដៅនយោបាយ។
លោក កឹម សុខា អះអាងថា, ការធ្វើដូចនេះ គឺ ដើម្បី ធ្វើឲ្យមាន ភាពស្ងប់ស្ងាត់ និងស្ថានការណ៍ នយោបាយ វិលទៅរក ភាពត្រជាក់ ឡើងវិញ។ ចំណែក អ្នកវិភាគ នយោបាយ យល់ឃើញ ថា, ការបន្ទន់ ឥរិយាបថ របស់ មេដឹកនាំ គណបក្ស ជំទាស់ នៅពេលនេះ បង្ហាញថា, ជាសញ្ញាល្អ សម្រាប់ ជម្រើសអនាគត នៃនយោបាយ ដ៏វែងឆ្ងាយ ទៅមុខទៀត។
សាធារណជនតែងតែរំពឹងថា ក្រោយពេលជើងយន្តហោះរបស់មេដឹកនាំគណបក្សប្រឆាំងជាន់ដល់ដីហើយ អាចនឹងមានសារនយោបាយឌឺដង ឬប្រតិកម្មតបណាមួយប្រឆាំងការថ្លែងរបស់លោក ហ៊ុន សែន ដែលលោកព្រមានខ្លួនឯងថា នឹងចុះចេញពីតំណែងបើផែនទីដែលផ្ទៀងផ្ទាត់នោះមិនពិតប្រាកដ ហើយរឹតតែធ្ងន់ធ្ងរជាងទៅទៀតនោះ គឺគំរាមចាប់អ្នកដែលចេះតែចោទរដ្ឋាភិបាលជុំវិញការកំណត់ព្រំដែន វៀតណាម ថា អាចធ្វើឲ្យកម្ពុជា ត្រូវបាត់បង់ទឹកដី។
ក៏ប៉ុន្តែ បន្ទាប់ពីអនុប្រធានគណបក្សសង្គ្រោះជាតិ ដល់ប្រលានយន្តហោះ កាលពីព្រឹកថ្ងៃទី៩ ខែកញ្ញា ភ្លាម លោកបានផ្ដល់បទសម្ភាសន៍ដល់អ្នកកាសែតតាមច្រក វី.អាយ.ភី (VIP) ថា គណបក្សជំទាស់ទទួលបានការគាំទ្រ និងបានបង្កើតសាខាបក្សជាច្រើនតំបន់នៅប្រទេសអូស្ត្រាលី និងនូវែលហ្សេឡង់។
លោក កឹម សុខា ដែលធ្លាប់ជាគូប្រកួតមួយដែលមិនចេះចុះញ៉មជាមួយគណបក្សប្រជាជន ហើយលោកថែមទាំងមានសារនយោបាយមួយឃ្លាថា "ទិញមិនលក់សម្លុតមិនខ្លាច" ផងនោះ នៅពេលនេះវិញ លោកបានបន្ទន់ឥរិយាបថដោយបញ្ជាក់ថា មិនធ្វើអត្ថាធិប្បាយអ្វីវែងឆ្ងាយឆ្លើយតបការគំរាមរបស់លោក ហ៊ុន សែន អំពីរឿងព្រំដែននេះទេ។ ផ្ទុយទៅវិញ លោកអះអាងថា អ្វីដែលគណបក្សជំទាស់ត្រូវគិត និងបន្តធ្វើទៅមុខទៀតនៅពេលនេះ គឺយុទ្ធសាស្ត្រនយោបាយសម្រាប់ត្រៀមបោះឆ្នោតប៉ុណ្ណោះ។ លោកបន្តថា «ឥឡូវ យើងកុំអាលចាំយើងជជែកគ្នា សំខាន់បើយើងនាំគ្នាងាកមកជជែកគ្នារឿងបោះឆ្នោតវិញសិន។ អានេះជាយោបល់របស់ខ្ញុំ ហើយធ្វើឲ្យត្រជាក់វិញ ដើម្បីយើងដោះ។ យើងកុំប្រមូលយករឿងច្រើនពេកវាក្ដៅទៅៗ ដោះឥតចេញ។»
មុនការវិលត្រឡប់របស់លោក កឹម សុខា មួយថ្ងៃ លោក ហ៊ុន សែន ឯណេះវិញបានបង្អួតសាច់ដុំ និងយុទ្ធនាការកណ្ដាប់ដៃដែករបស់លោក ដោយចេញបញ្ជាយ៉ាងម៉ឺងម៉ាត់ និងចាប់មិនរើសមុខអ្នកដែលចោទរដ្ឋាភិបាលប្រើផែនទីក្លែងក្លាយ។ លោកបន្តថា «ការភូតកុហកដែលមានចរិតគ្រោះថ្នាក់ឲ្យជាតិ គឺជាឧក្រិដ្ឋកម្មដ៏ធ្ងន់ធ្ងរ។ ខ្ញុំព្រះករុណាខ្ញុំប្រើពាក្យថាជាការប្រព្រឹត្តឧក្រិដ្ឋកម្ម ហើយជាឧក្រិដ្ឋជនតែម្ដង។»
ការវិលត្រឡប់លើកនេះ របស់លោក កឹម សុខា វាហាក់ចម្លែកបន្តិច នៅប្រលានយន្តហោះសម្រាប់ច្រកធម្មតា គឺមានកម្លាំងប៉េអឹម ប្រមាណ ៤នាក់ អមដោយឆ្កែប៊ែកហ្សេ ២ក្បាលផង ត្រូវបានគេដាក់ពង្រាយនៅក្បែរច្រកចេញរបស់អ្នកដំណើរដែលពុំធ្លាប់ មានពីមុនមក។ ដោយឡែកសម្រាប់ច្រកចេញ វី.អាយ.ភី ឯណោះវិញ គឺសន្តិសុខ ត្រូវបានគេរឹតបន្តឹង ខុសពីថ្ងៃធម្មតា។
ការជ្រើសរើសពេលវេលានៃការបញ្ចេញសារនយោបាយ អំពីរឿងផែនទី និង ព្រំដែននេះ មុនមួយថ្ងៃនៃការមកដល់របស់មេដឹកនាំគណបក្សប្រឆាំង ទំនងជាលោកនាយករដ្ឋមន្ត្រី ចង់គំរាមទុកជាមុនក្រែងមានការបកស្រាយ ដែលផ្ទុយពីអ្វីដែលរដ្ឋាភិបាល កំពុងតែធ្វើត្រូវហើយតាមមើល។
លោក រស់ រ៉ាវុធ បណ្ឌិតវិទ្យាសាស្ត្រនយោបាយយល់ឃើញថា ការបន្ទន់ឥរិយាបថផ្នែកនយោបាយរបស់គណបក្សជំទាស់នៅពេលនេះ គឺជាជម្រើសដ៏ល្អ ហើយការបញ្ចៀសហិង្សាផ្នែកនយោបាយកាន់តែឆ្ងាយ ដោយងាកមករៀបចំកម្មវិធីនយោបាយវិញ គឺជាយុទ្ធសាស្ត្រក្ដៅស៊ីរាក់ត្រជាក់ស៊ីជ្រៅ និងអាចធ្វើឲ្យគណបក្សនេះចំណេញថែមទៀតផង។ លោកបន្តថា «គណបក្ស ប្រឆាំងនៅពេលក៏មិនមានការថមថយណាមួយ ដែលគួរឲ្យកត់សម្គាល់នោះទេ។ អ៊ីចឹងទេការស្វែងរកយុទ្ធសាស្ត្រ ដើម្បីទាញយកសំឡេងឆ្នោតនៅពេលខាងមុខនេះ គឺជាការចាំបាច់សម្រាប់គណបក្សនីមួយៗ មិនមែនតែគណបក្សក្រៅរដ្ឋាភិបាលទេ។ អ៊ីចឹងទេការបន្ទន់ឥរិយាបថនេះ ការបន្ទន់ឥរិយាបថនេះ គឺមិនមែនមានន័យថាសុខចិត្តចុះចាញ់ ឬក៏សុខចិត្តឲ្យគេមើលងាយ។»
ក្នុងថ្ងៃតែមួយនៃការត្រឡប់ពីបំពេញបេសកកម្មវិញ លោក កឹម សុខា បានចូលជួបសកម្មជន និងមន្ត្រីជាន់ខ្ពស់របស់ខ្លួនដែលកំពុងជាប់ឃុំនៅពន្ធនាគារព្រៃស ភ្លាមដែរ។ បើទោះជាយ៉ាងណា អនុប្រធានទីមួយនៃរដ្ឋសភារូបនេះ ពុំទាន់ហ៊ានបញ្ជាក់ជំហរនៅឡើយទេថា នឹងអាចរកច្រកចេញ ឬការចរចាផ្នែកនយោបាយបែបណា ដើម្បីដោះលែងអ្នកដែលកំពុងជាប់ពន្ធនាគារបាននៅពេលណានោះទេ៕
No comments:
Post a Comment