តុលាការ កាត់ទោស លោក អ៊ុក ពេជ្រ សំណាង ឲ្យជាប់គុក ២ឆ្នាំ ក្នុងសំណុំរឿង ផ្សេងមួយទៀត
RFA / វិទ្យុ អាស៊ី សេរី | ១០ កញ្ញា ២០១៥
លោក អ៊ុក ពេជ្រសំណាង ក្នុងសំលៀកបំពាក់អ្នកទោសពណ៌ទឹកក្រូច ពេលនាំមកសាលាឧទ្ធរណ៍ នៅថ្ងៃទី ១២ ធ្នូ ២០១៤។ Photo: Provided
សាលាដំបូង រាជធានីភ្នំពេញ នៅថ្ងៃ ទី១០ ខែកញ្ញា បានប្រកាស ផ្ដន្ទាទោស លោក អ៊ុក ពេជ្រ សំណាង សកម្មជន គណបក្ស សង្គ្រោះជាតិ ជាប់ពន្ធនាគារ ២ឆ្នាំ, ពិន័យ ជាប្រាក់ ៤លាន រៀល, និងសំណង ១០លាន រៀល ក្នុងសំណុំរឿង ថ្មីមួយទៀត ពាក់ព័ន្ធ ទៅនឹងការចូលរួម របស់លោក ជាមួយ ក្រុមអ្នកតវ៉ា ដីធ្លី មកពីខេត្ត ព្រះវិហារ កាលពីខែតុលា ឆ្នាំ២០១៤។
មន្ត្រីការពារសិទ្ធិមនុស្សអង្គការលីកាដូ (LICADHO) លោក អំ សំអាត ឲ្យដឹងនៅថ្ងៃទី១០ កញ្ញា ថា ក្នុងសំណុំរឿងនេះ លោក អ៊ុក ពេជ្រសំណាង ត្រូវបានតុលាការចោទប្រកាន់ពីបទហិង្សាដោយចេតនា មានស្ថានទម្ងន់ទោស និងបទប្រឆាំងអ្នករាជការសាធារណៈ។ ចំណែក ២បទល្មើសផ្សេងទៀត គឺធ្វើឲ្យខូចខាតដោយចេតនាមានស្ថានទម្ងន់ទោស និងបទចូលរួមសមាគមនៃជនទុច្ចរិត ត្រូវបានតុលាការទម្លាក់ចោល។
កាលពីថ្ងៃទី២០ ខែតុលា ឆ្នាំ២០១៤ ពលរដ្ឋដែលមានបញ្ហាដីធ្លីនៅឃុំកន្ទួត ស្រុកជាំក្សាន្ត ខេត្តព្រះវិហារ ជិត ១០០នាក់ នាំគ្នាយកលិខិតសុំអន្តរាគមន៍ដោះស្រាយទំនាស់ដីធ្លី ទៅដាក់នៅខុទ្ទកាល័យលោកនាយករដ្ឋមន្ត្រី ហ៊ុន សែន ប៉ុន្តែពួកគេត្រូវបានកងសន្តិសុខរារាំងនៅសួនច្បារនាគបាញ់ទឹក ខាងកើតវិមានឯករាជ្យ ដើម្បីរារាំងក្បួនអ្នកតវ៉ាមិនឲ្យចូលទៅជិតផ្ទះលោកនាយក រដ្ឋមន្ត្រីឡើយ។ ក្នុងពេលរារាំងនោះ កងសន្តិសុខខណ្ឌដូនពេញ បានវាយបំបែកអ្នកតវ៉ា ហើយបានបណ្ដាលឲ្យមនុស្សប្រមាណ ២០នាក់រងរបួស។
លោក អំ សំអាត មានប្រសាសន៍ថា ការផ្ដន្ទាទោស លោក អ៊ុក ពេជ្រសំណាង ពេលនេះ គឺជារឿងអយុត្តិធម៌ ព្រោះលោកថា ក្នុងពេលសមត្ថកិច្ចបំបែកនោះ លោក អ៊ុក ពេជ្រសំណាង ត្រូវបានកងសន្តិសុខវាយឲ្យរបួសក្បាល ប៉ុន្តែលោកមិនត្រូវបានតុលាការរកយុត្តិធម៌ឲ្យនោះទេ។ ផ្ទុយទៅវិញ តុលាការបែរជាផ្ដន្ទាទោស លោក អ៊ុក ពេជ្រសំណាង ពីបទបង្ករបួសស្នាមដល់កងសន្តិសុខទៅវិញ៖ «ក្នុងសវនាការការ ដេញដោលជនរងគ្រោះទាំង ៥នាក់អត់ដឹងថា អ្នកណាធ្វើឲ្យខ្លួនរបួសនោះទេ មិនបានចង្អុលទៅ លោក អ៊ុក ពេជ្រសំណាង ទេ ហើយបើសិនទាក់ទងនឹងការប្រឆាំងមន្ត្រីរាជការសាធារណៈ ទាំងវីដេអូឃ្លីប ទាំងសាក្សី គ្មានអ្នកណាបានដាក់បន្ទុកទៅលើគាត់ទេ ការសម្រេចរបស់តុលាការព្រឹកមិញនេះ វាជារឿងមួយយើងសោកស្ដាយ និងអយុត្តិធម៌សម្រាប់គាត់ណាស់។»
សាលាដំបូងរាជធានីភ្នំពេញ កាលពីខែកក្កដា ឆ្នាំ២០១៥ បានផ្ដន្ទាទោស លោក អ៊ុក ពេជ្រសំណាង ម្តងរួចហើយឲ្យជាប់ពន្ធនាគារចំនួន ៧ឆ្នាំពីបទចូលរួមកុប្បកម្មនៅលើស្ពាននាគ ក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤៕
No comments:
Post a Comment