លោក សម រង្ស៊ី ពុំបាន ថ្លែងសារ នយោបាយ អ្វីឡើយ ពេលមកដល់ កម្ពុជាវិញ
RFA / វិទ្យុ អាស៊ី សេរី | ១៣ កញ្ញា ២០១៥
ប្រធានគណបក្សសង្គ្រោះជាតិ លោក សម រង្ស៊ី (ពាក់វ៉ែនតា) ត្រឡប់មកដល់ប្រទេសកម្ពុជា នៅថ្ងៃទី១៣ ខែកញ្ញា ឆ្នាំ២០១៥។ RFA/Morm Moniroth
ប្រធាន គណបក្ស សង្គ្រោះជាតិ ត្រឡប់ មកដល់ ប្រទេសកម្ពុជា វិញហើយ បន្ទាប់ ពីលោក បានចំណាយពេល បំពេញទស្សនកិច្ច នៅប្រទេស អូស្ត្រាលី និងប្រទេស ណូវែល ហ្សេឡង់ដ៍ (New Zealand)។
ការវិលត្រឡប់ លើកនេះ របស់ លោក សម រង្ស៊ី គឺ លោក ពុំបានបញ្ចេញ សារនយោបាយ អ្វី, សូម្បី មួយម៉ាត់ ដូចលើក មុនៗ ឡើយ។ ភាពស្ងប់ស្ងាត់នេះ ត្រូវ បានអ្នកវិភាគ សង្គម យល់ឃើញ ថា, អាច ជាជម្រើស ល្អ និងអាច ជាជម្រើស មិនល្អសម្រាប់ គណបក្ស ជំទាស់ មួយនេះ។
អ្នកវិភាគស្ថានការណ៍នយោបាយលើកឡើងថា ការមិនធ្វើអត្ថាធិប្បាយអ្វីសោះរបស់ លោក សម រង្ស៊ី ជាមួយអ្នកសារព័ត៌មាន នៅពេលលោកបានវិលមកពីបរទេសវិញនៅពេលនេះ គឺជាកាយវិការមួយដែលមេដឹកនាំគណបក្សប្រឆាំង ចង់ឲ្យស្ថានភាពនយោបាយដែលកំពុងតែឡើងកម្ដៅនោះ ស្ងប់ស្ងាត់ទៅវិញ ក៏ប៉ុន្តែអ្នកវិភាគពន្យល់ថា ប្រសិនបើមេដឹកនាំគណបក្សនេះបន្តជ្រើសរើសការស្ងប់ស្ងាត់គ្រប់ សភាពការណ៍ អាចនឹងធ្វើឲ្យគណបក្សជំទាស់នេះមានវិបត្តិទៅវិញ ឬអាចធ្លាក់ចុះនៃការគាំទ្រក៏ថាបាន។
បន្ទាប់ពីជើងយន្តហោះបានដល់ដីភ្លាមនៅម៉ោងប្រមាណ ១ និង ១០នាទី នៅថ្ងៃទី១៣ កញ្ញា លោក សម រង្ស៊ី ពុំបាននិយាយអ្វីទាល់តែសោះ គ្រាន់តែនិយាយយ៉ាងខ្លីថា អាចនឹងមានសន្និសីទកាសែតមួយថ្ងៃ ឬពីរថ្ងៃបន្ទាប់ ហើយធ្វើដំណើរយ៉ាងលឿនចូលរថយន្ត រួចក៏ចេញដំណើរពីព្រលានយន្តហោះអន្តរជាតិភ្នំពេញភ្លាមៗ ដោយលោកហាក់មិនខ្វល់នឹងសំណួររបស់អ្នកសារព័ត៌មានឡើយ។
បញ្ហានេះ ត្រូវបានអ្នកវិភាគនយោបាយយល់ឃើញខុសៗគ្នាចំពោះការប្ដូរជំហរដែល ពុំសូវធ្លាប់មានរបស់គណបក្សជំទាស់នេះ ថាអាចមានជម្រើសពីរ គឺគណបក្សនេះប្រហែលជាអាចនៅរក្សាប្រជាប្រិយភាពរបស់ខ្លួនបាន ឬអាចនិយាយម្យ៉ាងទៀតថា នឹងត្រូវប្រឈមបាត់បង់ការគាំទ្រនៅក្នុងការបោះឆ្នោតខាងមុខ។
លោក សម រង្ស៊ី ជាមេដឹកនាំគណបក្សប្រឆាំង ដែលតែងតែហ៊ានរិះគន់រដ្ឋាភិបាលឥតសំចៃមាត់ក្នុងជីវិតនយោបាយរបស់ លោកជាង ២០ឆ្នាំមកនេះ ក៏ប៉ុន្តែស្ថានភាពនយោបាយនៅក្នុងអាណត្តិទី៥ នេះ ពេលខ្លះ លោក សម រង្ស៊ី ហាក់ដូចជាបន្ទន់ឥរិយាបថ និងអះអាងពីការយកវប្បធម៌សន្ទនាជាការដោះស្រាយបញ្ហា ជាដើម។
លោក អ៊ូ វីរៈ ប្រធានអង្គការនៃវេទិកាអនាគត យល់ឃើញថា ការស្ងប់ស្ងាត់នេះប្រហែលជាមេដឹកនាំគណបក្សប្រឆាំង ខ្លាចការគំរាមរបស់ លោក ហ៊ុន សែន។ ជាងនេះទៀត គណបក្សសង្គ្រោះជាតិ អាចនឹងត្រូវបាត់បង់ជំនឿចិត្តពីអ្នកគាំទ្រ ប្រសិនបើមេដឹកនាំគណបក្សជំទាស់ដ៏ធំមួយនេះ បន្តស្ងប់ស្ងាត់ស្ទើរគ្រប់របៀបវារៈនៃកម្មវិធីនយោបាយ និងបញ្ហានៅក្នុងសង្គម។ លោកបន្តថា «បើសិនជាឥតមានបញ្ហានៃការ ឃោសនារឿងផ្សេងទេ ខ្ញុំមើលទៅនឹងបាត់បង់ប្រជាប្រិយភាពម្ដងបន្តិចៗ ប៉ុន្តែបើគាត់គ្រាន់តែស្ងប់ស្ងាត់រឿងព្រំដែន គាត់ទៅបន្តតវ៉ារឿងអីផ្សេង រួមទាំងដឹកនាំកម្មករប្រាក់ខែ ទាក់ទងរឿងកាត់ដេរអី បើសិនជាគាត់ធ្វើអ៊ីចឹងបាន ប្រហែលជានៅថែរក្សាប្រជាប្រិយភាព។»
ផ្ទុយពីនេះ លោក រស់ រ៉ាវុធ បណ្ឌិតវិទ្យាសាស្ត្រនយោបាយវិញចាត់ទុកថា ការមិនប្រតិកម្មណាមួយរបស់មេដឹកនាំជាន់ខ្ពស់នៃគណបក្សប្រឆាំងនៅ ពេលនេះ អាចជាមធ្យោបាយល្អទៅវិញ។ ការស្ងប់ស្ងាត់នេះ ត្រូវបាន លោក រស់ រ៉ាវុធ ហៅថាជាវិធីដកឃ្លា ដើម្បីបន្ថយកម្ដៅនយោបាយ វាពុំមែនបានន័យថា ជាការចុះចាញ់ទេ។ ម្យ៉ាងវិញទៀត ការប្ដូរយុទ្ធសាស្ត្រនេះ នឹងជួយរក្សាស្ថិរភាពនយោបាយឲ្យមានភាពល្អប្រសើរទៅវិញថែមទៀតផង ជាពិសេសបង្ហាញថា អ្នកនយោបាយ គឺមានភាពចាស់ទុំជាងមុន និងការប្រកួតប្រជែងដោយភាពស្ងប់ចិត្ត ទុកឲ្យអ្នកគាំទ្រសម្លឹងលើមាគ៌ានៃគោលនយោបាយ ជាជាងជំរុញក្នុងការសម្រេចចិត្តដោយហិង្សា។ លោកបន្តថា «បញ្ហា នេះ គឺជាល្អមួយសម្រាប់អ្នកនយោបាយខ្មែរដែលប្រជាពលរដ្ឋលោកមើលឃើញតទៅ មុខទៀត ថាតើអ្នកណាដែលលោកពេញចិត្ត ថាតើអ្នកណាដែលបានចុះជួយប្រជាពលរដ្ឋ ថាតើអ្នកដែលប្រជាពលរដ្ឋអាចជឿជាក់បាន។ បញ្ហានេះគឺអាស្រ័យលើអ្នកនយោបាយ។»
លើសពីនេះទៅទៀត លោក រស់ រ៉ាវុធ មើលឃើញថា គណបក្សសង្គ្រោះជាតិ នៅតែអាចរក្សាភាពខ្លាំងរបស់ខ្លួនបាន ដោយហេតុថា គណបក្សជំទាស់មួយនេះពុំមែនចូលរួមក្នុងការបង្កើតរដ្ឋាភិបាលដូច គណបក្សហ៊្វុនស៊ិនប៉ិច ទេ ក៏ប៉ុន្តែការចូលសភានេះ គឺជាការកែទម្រង់ទៅវិញ។
បើទោះជាបែបណា ការបន្ថយកម្ដៅនយោបាយនៅពេលនេះរបស់គណបក្សជំទាស់ នៅពេលគណបក្សប្រជាជនកម្ពុជា ជាពិសេស លោក ហ៊ុន សែន បន្តគំរាមចាប់ខ្លួនដែលអ្វីគណបក្សកាន់អំណាចហៅថា ជាមធ្យោបាយការពារភាពស្របច្បាប់របស់ខ្លួន និងបានចាប់មន្ត្រីជាន់ខ្ពស់ និងសកម្មជនគណបក្សសង្គ្រោះជាតិ ជាបន្តបន្ទាប់។
ពាក់ព័ន្ធរឿងនេះ លោក កឹម សុខា អនុប្រធានគណបក្សសង្គ្រោះជាតិ ថ្លែងកាលពីថ្ងៃទី៩ កញ្ញា ថា គណបក្សប្រឆាំងមិនគិតថានេះជាវិធីដកថយ ឬចុះចាញ់ទេ ក៏ប៉ុន្តែអ្វីដែលសំខាន់នៅពេលនេះ ការចាប់ខ្លួននឹងមិនអាចបញ្ចប់បញ្ហា និងបញ្ចប់ការតស៊ូមតិដើម្បីសិទ្ធិសេរីភាពបានឡើយ។ លោកបន្តថា «ទេមិនមែនរឿងបន្ធូររឿងបន្ថយអីទេ ដូចខ្ញុំបានជម្រាបអ៊ីចឹង វាមិនដែលការចាប់ខ្លួនមនុស្សវាឥតដែលចប់បញ្ហាទេ។»
អ្នកវិភាគនយោបាយយល់ឃើញថា ការប្រើប្រាស់យន្តការក្តៅស៊ីរាក់ត្រជាក់ស៊ីជ្រៅរបស់គណបក្ស សង្គ្រោះជាតិ នៅពេលនេះ អាចជាជម្រើសដ៏ល្អសម្រាប់ដោះស្រាយបញ្ហាកំពុងកើតមាន និងជាការធ្វើកំណែទម្រង់គោលនយោបាយណាមួយ៕
No comments:
Post a Comment