ជ្រូក ឈឺងាប់ ជាបន្តបន្ទាប់ ដោយសារ ជំងឺ ត្រចៀកខៀវ ក្នុងស្រុក ពីរ នៅខេត្ត សៀមរាប
RFA / វិទ្យុ អាស៊ី សេរី | ៤ កញ្ញា ២០១៥
កសិដ្ឋានចិញ្ចឹមជ្រូកមេនៅខេត្តតាកែវ។ RFA/Ouk Savborey
ប្រជាពលរដ្ឋ មួយចំនួន បានអះអាង ថា, មានសត្វជ្រូក ចិញ្ចឹម រាប់ពាន់ក្បាល នៅស្រុក សូទ្រនិគម និងស្រុក ជីក្រែង, ខេត្ត សៀមរាប បានងាប់ ជាបន្តបន្ទាប់ និងជាច្រើន រយក្បាលទៀត កំពុង កើតមានជំងឺ បន្ទាប់ ពីកើតមាន ចេញរោគសញ្ញា អុចៗ ពណ៌ក្រហម នៅខ្លួន របស់វា។ បញ្ហានេះ ប្រជាពលរដ្ឋ បានអំពាវនាវ ឲ្យអាជ្ញាធរ ពាក់ព័ន្ធ ចាត់វិធានការ ការពារ និងទប់ស្កាត់ ឲ្យបាន ទាន់ពេល។
មន្ត្រីជំនាញផ្នែកបសុព្យាបាលនៃក្រសួងកសិកម្ម បានប្រកាសជាចំហថា មានករណីផ្ទុះជំងឺម្យ៉ាងហៅថាជំងឺត្រចៀកខៀវចំពោះសត្វជ្រូក នៅក្នុងស្រុកមួយចំនួននៃខេត្តសៀមរាប ដែលមន្ត្រីពាក់ព័ន្ធ កំពុងអនុវត្តសកម្មភាពកុំឲ្យរីករាលដាល។
ប្រធាននាយកដ្ឋានលទ្ធកម្ម និងបសុព្យាបាលនៃក្រសួងកសិកម្ម រុក្ខាប្រមាញ់ និងនេសាទ លោក តាន់ ផាន់ណារ៉ា មានប្រសាសន៍ថា លោកបានប្រកាសឲ្យមន្ត្រីជំនាញខេត្ត រៀបចំអនុវត្តទៅតាមគោលការណ៍ ដើម្បីការពារទប់ស្កាត់លើបញ្ហានេះហើយ។ លោកបញ្ជាក់ទៀតថា ប្រភពនៃជំងឺនេះ មិនមែនចម្លងមកពីប្រទេសជិតខាងនោះទេ ពីព្រោះប្រទេសថៃ ដែលនៅជាប់ព្រំដែនខេត្តនេះ មិនមានផ្ទុះជំងឺប្រភេទនេះឡើយ។
ទោះយ៉ាងណា លោកកំពុងមានការសង្ស័យ និងត្រូវការពេលវេលាតាមដានបន្តទៀតថា ជំងឺនេះអាចកើតឡើងដោយសារមានមេរោគនៅកន្លែងផ្ទុះជំងឺផ្ទាល់ ឬអាចមកពីការចាក់វ៉ាក់សាំងការពារជំងឺនានាពីអ្នកចិញ្ចឹមដោយ ខ្លួនឯង៖ «ខ្ញុំបានប្រាប់ទៅខេត្តឲ្យមានវិធានការ ពីព្រោះអីជំងឺត្រចៀកខៀវនេះ យើងមិនអាចចាក់វ៉ាក់សាំងទេ គេហៅថា ឡាយវ៉ាក់សាំង (Life vaccine) គឺមេរោគ (Virus) ហ្នឹងវារស់កាលណាយើងចាក់ទៅវាអាចគ្រោះថ្នាក់បន្ថែមទៀត។ យើងត្រូវបាញ់ថ្នាំរម្ងាប់មេរោគនៅកន្លែងផ្ទុះជំងឺ នៅកន្លែងអត់ផ្ទុះជំងឺអីហ្នឹងអ៊ីចឹងទៅណា។»
ការអះអាងនេះ បន្ទាប់ពីមានករណីជ្រូកងាប់ជាបន្តបន្ទាប់នៅស្រុកជីក្រែង ខេត្តសៀមរាប មុនដំបូងដែលមន្ត្រីបសុព្យាបាលខេត្ត បានយកវត្ថុវិភាគទៅមន្ទីរពិសោធន៍ជាតិ កាលពីថ្ងៃទី១៨ ខែសីហា។
របាយការណ៍ពីការិយាល័យលទ្ធកម្ម និងបសុព្យាបាល ខេត្តសៀមរាប ឲ្យដឹងថា នៅស្រុកជីក្រែង ជ្រូកឈឺមានជិត ២ពាន់ក្បាល (១.៧២៥ក្បាល) ក្នុងនោះបានងាប់ជិត ៦០០ក្បាល (៥៨៣ក្បាល) ខណៈព្យាបាលបានជាង ១ពាន់ក្បាល (១.៣២០ក្បាល) និងបាញ់ថ្នាំការពារជំងឺនៅផ្ទះពលរដ្ឋចំនួន ៥៥៧គ្រួសារ។ ចំណែកនៅស្រុកសូទ្រនិគម សត្វជ្រូកឈឺមានជិត ១ពាន់ក្បាល (៩៣៦ក្បាល) ហើយងាប់ជាង ៤០០ក្បាល (៤១៨ក្បាល) ព្យាបាលជាង ៧០០ក្បាល (៧២៩ក្បាល) និងបាញ់ថ្នាំសម្លាប់មេរោគនៅតាមផ្ទះពលរដ្ឋចំនួន ៣៧១គ្រួសារ។
ពលរដ្ឋនៅភូមិបេង ឃុំពង្រក្រោម ស្រុកជីក្រែង លោក ឌឿន នឿន ថ្លែងថា ជ្រូកពូជរបស់លោកចំនួន ៤ក្បាល ក៏បានងាប់ដោយវាមានចេញរោគសញ្ញាអុចៗពណ៌ក្រហមនៅលើដងខ្លួន និងក្អកក្អួត ដែលធ្វើឲ្យលោកខាតបង់ប្រាក់អស់ជាង ៣ពាន់ដុល្លារ៖ «ជ្រូក ខ្ញុំមេបួនកូនពីរសម្បុកងាប់អស់រលីង។ មុនដំបូងជ្រូកនោះអត់ទាន់ឈឺទេ ចាប់ផ្ដើមឈឺភ្លាមបានមួយថ្ងៃពីរថ្ងៃ ងាប់ម្ដងពីរម្ដងបី ចុងបញ្ចប់បានឃើញចេញក្រហមតាមខ្លួន។ បើមេធំងាប់ម្ង៉ៃមួយៗ កូនមានម្ង៉ៃប្រាំក៏មានដែរ ក្អួតមកចេញខៀវៗ។»
ពលរដ្ឋដដែលអះអាងថា ជ្រូកដែលងាប់នោះ លោកបានយកធ្វើផ្អកទុកហូប និងលក់ដើម្បីទប់ទល់នឹងការខាតបង់។ ចំណែកជ្រូកណាដែលលោកឃើញសភាពជំងឺឈឺធ្ងន់ធ្ងរចេញស្នាមអុចក្រហម ច្រើនពេក លោកបានកប់ចោល។ យ៉ាងណាក៏ដោយ ទាក់ទងបញ្ហានេះ លោកពុំទាន់ឃើញមន្ត្រីជំនាញពាក់ព័ន្ធ ចុះទៅដល់មូលដ្ឋានលោក ដើម្បីអន្តរាគមន៍ករណីផ្ទុះជំងឺនេះនៅឡើយទេ។
ឆ្លើយតបបញ្ហានេះ ប្រធានការិយាល័យលទ្ធកម្ម និងបសុព្យាបាលនៃមន្ទីរកសិកម្មខេត្តសៀមរាប លោក ព្រហ្ម វិច មានប្រសាសន៍ថា លោកបានកោះប្រជុំពេទ្យសត្វភូមិ អ្នកចិញ្ចឹមជ្រូក និងអ្នកធ្វើអាជីវកម្ម ចូលរួមក្នុងការងារអន្តរាគមន៍ការផ្ទុះជំងឺនេះនៅក្នុងស្រុក សូទ្រនិគម និងស្រុកជីក្រែង ដែលកំពុងផ្ទុះជំងឺផ្ទាល់។ លោកបញ្ជាក់ថា ជំងឺនេះមិនប៉ះពាល់ដល់សុខភាពមនុស្សនោះទេ ប៉ុន្តែវាអាចឆ្លងរវាងសត្វ និងសត្វ ដែលទាមទារឲ្យមានវិធានការទប់ស្កាត់ជាបន្ទាន់៖ «សម្រាប់ជំនាញទី១ យើងពង្រឹងសមត្ថភាពពេទ្យសត្វភូមិគ្រប់ភូមិទាំងអស់ បាញ់ថ្នាំសម្លាប់មេរោគនៅតាមកសិដ្ឋានចិញ្ចឹមសត្វ ឬកន្លែងចិញ្ចឹមសត្វ។ ទី២ គឺស្នាក់ការយើងក៏ដូចជាខាងផលិតកម្ម និងបសុព្យាបាល ផ្ដល់សម្ភារៈដូចជាថ្នាំ ធុងបាញ់ថ្នាំ សឺរ៉ាំងម្ជុល និងសម្ភារៈមួយចំនួនទៀតដែលពាក់ព័ន្ធ និងការអន្តរាគមន៍ទៅឲ្យភ្នាក់ងារសុខភាពសត្វភូមិ។ ចំណុចមួយទៀត គឺបាញ់ថ្នាំសម្លាប់មេរោគលើមធ្យោបាយដឹកជញ្ជូនសត្វ ពិសេសអាជីវករដែលគាត់ជាអ្នកដើរទិញសត្វតាមភូមិតាមឃុំ បាញ់លើម៉ូតូ និងស្បែកជើងគាត់ កុំឲ្យគាត់ជាភ្នាក់ងារចម្លងជំងឺពីតំបន់មួយទៅតំបន់មួយ។»
ជុំវិញការផ្ទុះជំងឺត្រចៀកខៀវ ដែលបណ្ដាលឲ្យជ្រូកឈឺងាប់នេះ មន្ត្រីជំនាញបញ្ជាក់ថា កិច្ចអន្តរាគមន៍នេះ កំពុងធ្វើទៅដល់ស្រុកចំនួនបីថែមទៀតដែលនៅជាប់គ្នានោះ គឺស្រុកស្វាយលើ ស្រុកបន្ទាយស្រី និងស្រុកប្រាសាទបាគង។
មន្ត្រីបសុព្យាបាលរំឭកថា ជំងឺត្រចៀកខៀវដែលកើតទៅលើសត្វជ្រូកនេះ នៅកម្ពុជា ធ្លាប់កើតមានម្ដងរួចមកហើយកាលពីឆ្នាំ២០០៩៕
No comments:
Post a Comment