ប្រជាសហគមន៍ ខេត្ត ត្បូងឃ្មុំ ចោទអាជ្ញាធរ ថា, គំរាមកំហែង រឿងកាន់កាប់ ដីធ្លី
RFA / វិទ្យុ អាស៊ី សេរី | ១៣ កញ្ញា ២០១៥
ផែនទីខេត្តត្បូងឃ្មុំ
Photo: RFA
ប្រជាពលរដ្ឋ នៅស្រុក តំបែរ, ខេត្ត ត្បូងឃ្មុំ ចោទប្រកាន់ អាជ្ញាធរ មានសមត្ថកិច្ច ថា, មានបំណង បង្ខំ ឲ្យពួកគាត់ ប្រគល់ ដីព្រៃ សហគមន៍ ទៅឲ្យ ភាគី ទំនាស់ ជាដើមបណ្ដឹង។ ការលើកឡើង នេះ ព្រោះ សមត្ថកិច្ច កោះហៅ ពលរដ្ឋ ឲ្យចូលបំភ្លឺ ជាបន្តបន្ទាប់ តាមពាក្យបណ្ដឹង របស់ ឈ្មួញដី ស្របពេល ដីនោះ គឺ ជាដីព្រៃ សហគមន៍ ដែលពលរដ្ឋ ខំប្រឹង ទាមទារ ដាក់ ជាសម្បត្តិរួម។
ប្រជាសហគមន៍ យល់ថា, ការអនុវត្ត ច្បាប់ របស់ អាជ្ញាធរ មានសមត្ថកិច្ច នៅមិនទាន់ អនុវត្ត ឲ្យបាន ស្មើភាពគ្នា នៅឡើយ។ ជាក់ស្តែង ប្រជាសហគមន៍ ទាំងនោះ បានដាក់ ពាក្យប្ដឹង ទៅអាជ្ញាធរ មានសមត្ថកិច្ច ជាច្រើនលើក ច្រើនសា ឲ្យចាត់ វិធានការ លើឈ្មួញដី និងបុគ្គល មានប្រាក់ មួយចំនួន ដែលបាន គ្រប់គ្រង ដីព្រៃ សហគមន៍ ឃុំ ត្រពាំងព្រីង ជាច្រើន ពាន់ហិកតារ, ប៉ុន្តែ កម្រឃើញ អាជ្ញាធរ មានសមត្ថកិច្ច កោះហៅ អ្នកទាំងនោះ ណាស់។ តែ នៅពេលឈ្មួញ ដាក់ពាក្យប្ដឹង ពលរដ្ឋវិញ សមត្ថកិច្ច ចាត់វិធានការ គ្មាន បង្អន់ឡើយ។
ប្រជាពលរដ្ឋនៅឃុំសេដា អ្នកស្រី គង់ ធាវុធ ត្រូវបានសមត្ថកិច្ចស្រុកតំបែរ កោះហៅឲ្យចូលបំភ្លឺជុំវិញរឿងជម្លោះដីធ្លីនៅតំបន់ព្រៃសហគមន៍ ត្រពាំងព្រីង។ ក្នុងនោះ សមត្ថកិច្ចឲ្យអ្នកស្រីចូលបំភ្លឺនៅព្រឹកថ្ងៃទី១២ កញ្ញា ពាក់ព័ន្ធសំណុំរឿងបំផ្លាញដំណាំកៅស៊ូប្រមាណជិត ១០ដើមរបស់ឈ្មួញម្នាក់កាលពេលថ្មីៗនេះ។ អ្នកស្រី គង់ ធាវុធ មានប្រសាសន៍ថា ដីប្រមាណ ៥ហិកតារដែលអ្នកស្រីកាន់កាប់ ពុំមែនជាដីរបស់ឈ្មួញទេ ប៉ុន្តែវាដីសហគមន៍។ ចំណែកការចោទប្រកាន់ថា អ្នកស្រីបានបំផ្លាញដំណាំកៅស៊ូក៏មិនពិតដែរ ប៉ុន្តែវាអាចជាចេតនាគាបសង្កត់អ្នកស្រី ឲ្យយល់ព្រមប្រគល់ដីធ្លាប់គ្រប់គ្រងទៅឲ្យឈ្មួញច្រើនជាង៖ «មាន ហេតុការណ៍គេនៅច្រងេងច្រងាងមានកាំបិតមានអីនៅក្នុងដី ខ្ញុំតេហៅសមត្ថកិច្ចឲ្យទៅមើល តែគេគ្មានទៅអីណា ប៉ុន្តែនៅពេលមានហេតុការណ៍ជនប្រព្រឹត្តិលើខ្ញុំ គេបែរជាទៅ។»
ដីព្រៃសហគមន៍ក្នុងឃុំត្រពាំងព្រីង និងសហគមន៍ក្នុងឃុំផ្សេងទៀតនៅស្រុកតំបែរ ដែលជាដីព្រៃធ្លាប់ពលរដ្ឋអាស្រ័យផលប្រមាណ ៥ពាន់ហិកតារ ត្រូវបានឈ្មួញអ្នកមានប្រាក់ និងមានអំណាចកាន់កាប់មួយភាគធំនាពេលបច្ចុប្បន្ន ហើយចំណែកដីខ្លះទៀត គឺប្រជាពលរដ្ឋកាន់កាប់។ យ៉ាងណា ប្រជាពលរដ្ឋអះអាងថា ពួកគាត់នឹងប្រគល់ដីនោះឲ្យរដ្ឋវិញ ព្រមទាំងចង់ឲ្យរាជរដ្ឋាភិបាលប្រមូលដីសហគមន៍ទាំងអស់ ដាក់ជាសម្បត្តិរួមដូចកាលពីដើម។
វិទ្យុអាស៊ីសេរី មិនអាចទាក់ទងអធិការស្រុកតំបែរ លោក ប៉េង អេងហាក់ ដើម្បីឆ្លើយតបការលើកឡើងរបស់ពលរដ្ឋបានទេនៅថ្ងៃទី១២ កញ្ញា។
យ៉ាងណា លិខិតកោះហៅ អ្នកស្រី គង់ ធាវុធ ឲ្យចូលបំភ្លឺនៅអធិការដ្ឋានស្រុកតំបែរ គឺដើម្បីសាកសួរទាក់ទងការបំផ្លាញផលដំណាំរបស់អ្នកដទៃ ប៉ុន្តែមិនបានបញ្ជាក់ថា ជារបស់ជនណាឡើយ។
ក្រៅពីការហៅ អ្នកស្រី គង់ ធាវុធ កន្លងទៅ ក៏មានការកោះហៅតំណាងពលរដ្ឋជាបន្តបន្ទាប់ដែរ ពិសេសទាក់ទងសំណុំរឿងរបស់អ្នកមានប្រាក់ និងមានអំណាចជាមួយប្រជាសហគមន៍តែម្ដង។
តំណាងប្រជាសហគមន៍នៅឃុំត្រពាំងព្រីង អ្នកស្រី ហម ច្រិប យល់ថា ការដោះស្រាយបញ្ហាដីព្រៃសហគមន៍ទាំងមូល អាជ្ញាធរមានសមត្ថកិច្ច គឺមិនយកចិត្តទុកដាក់ឡើយ ប៉ុន្តែបើរឿងបុគ្គលវិញ ពួកគេហាក់ខ្នះខ្នែងសម្បើមណាស់៖ «សហគមន៍ពួកខ្ញុំកំពុងតែប្ដឹង ចុះអាជ្ញាធរគាត់វាយ៉ាងម៉េចបានជាគាត់មិនចូលរួមដោះស្រាយក្នុង សហគមន៍ បែរជាគាត់ដោះស្រាយឲ្យបុគ្គលជនល្មើសទៅវិញ។»
ទាក់ទងបញ្ហានេះ មេឃុំត្រពាំងព្រីង លោក មុំ សាប៊ុន មានប្រសាសន៍ថា ភាគច្រើនទំនាស់ដីព្រៃសហគមន៍ គឺកើតចេញពីបុគ្គលមានប្រាក់មួយចំនួននៅទីនោះ ដែលបានកាន់កាប់ចំណែកដីយ៉ាងច្រើន ហើយបានបង្វែរដីខ្លះទៅជួលឲ្យពលរដ្ឋ ដោយមិនមានអាជ្ញាធរទទួលស្គាល់អ្វីទាំងអស់។ លើសពីនេះ រាល់ការទិញដូរដីនៅទីនោះ គឺអាជ្ញាធរមិនបានទទួលស្គាល់ទេ ព្រោះជាដីរបស់សហគមន៍។ យ៉ាងណា លោកបារម្ភខ្លាចក្រែងតែមានបញ្ហាអសន្តិសុខនៅក្នុងតំបន់ កើតឡើងរវាងពលរដ្ឋជាមួយឈ្មួញដីទាំងនោះ ប្រសិនរាជរដ្ឋាភិបាលនៅតែមិនព្រមដោះស្រាយបញ្ហានេះឲ្យបាន ច្បាស់លាស់៖ «ពិបាកណាស់រាល់ថ្ងៃហ្នឹង វានៅតែទំនាស់រហូត ហើយភាគច្រើនពលរដ្ឋបានតិច តែឈ្មួញបានច្រើន។»
បន្ថែមលើនេះ មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តត្បូងឃ្មុំ លោក នាង សុវ៉ាត មានប្រសាសន៍ថា រាល់ការកាន់កាប់របស់ឈ្មួញក្តី របស់មន្ត្រីអាជ្ញាធរក្តី ឬពលរដ្ឋ គឺសុទ្ធតែខុសច្បាប់ទាំងអស់ ព្រោះដីនោះនៅជាដីរបស់រដ្ឋ ឬជាសម្បត្តិរួម។ លើសពីនេះទៀត សំណុំរឿងដីសហគមន៍ជាង ៥ពាន់ហិកតារនេះ គឺកំពុងជាប់ពាក្យបណ្ដឹងទៅតុលាការថែមទៀត។ លោកកត់សម្គាល់ឃើញថា អាជ្ញាធរក្តី តុលាការក្តី ហាក់បែងចែកការដោះស្រាយបញ្ហារវាងអ្នកមាន និងអ្នកក្រ៖ «ប្ដឹងទៅព្រះរាជអាជ្ញាហើយ ដាក់ចំឈ្មោះហើយ ប៉ុន្តែប្រាំមួយប្រាំពីរខែហើយអត់មានអ្នកណាហៅទេ។»
មន្ត្រីសិទ្ធិមនុស្សដដែលយល់ថា ការកោះហៅប្រជាសហគមន៍ជាបន្តបន្ទាប់ គឺជារូបភាពគំរាមកំហែងមួយ ដែលអាចធ្វើឲ្យពលរដ្ឋលែងមានចិត្តចង់ការពារដីសហគមន៍តទៅទៀត។ ជាមួយគ្នានេះ វានឹងធ្វើឲ្យពលរដ្ឋលែងមានជំនឿលើអាជ្ញាធរ ឬប្រព័ន្ធតុលាការ ប្រសិនបើការអនុវត្តរបស់ពួកគេ នៅតែបង្ហាញពីភាពលម្អៀងទៅរកអ្នកមានទៀតនោះ៕
No comments:
Post a Comment