ទស្សនៈ ពលរដ្ឋខ្មែរ រស់នៅ ក្បែរព្រំដែន វៀតណាម ជុំវិញ ការផ្ទៀងផ្ទាត់ ផែនទី
RFA / វិទ្យុ អាស៊ី សេរី | ៨ កញ្ញា ២០១៥
ប៉ូលិសព្រំដែនខ្មែរអន្តរាគមន៍ខ្លាចពលរដ្ឋខ្មែរប៉ះទង្គិច
ខ្លាំងជាមួយប៉ូលិសព្រំដែនវៀតណាម នាភូមិជើង ឃុំជាំ ស្រុកមេមត់
ខេត្តត្បូងឃ្មុំ នៅថ្ងៃទី៣១ ឧសភា ឆ្នាំ២០១៥។ RFA/Uon Chhin
តើ រាជរដ្ឋាភិបាល គប្បី ធ្វើការងារ ដូចម្ដេច ដើម្បី អាចឱ្យ ប្រជាពលរដ្ឋស្ ងប់ចិត្ត?
ការងារផ្ទៀងផ្ទាត់ផែនទីដែលរាជរដ្ឋាភិបាលកម្ពុជា ប្រើប្រាស់បច្ចុប្បន្ន ជាមួយបណ្ដាផែនទីដែលមានប្រភពមកពីប្រទេសបារាំង ពីអង្គការសហប្រជាជាតិ ពីគណបក្សប្រឆាំង គឺធ្វើឡើងជាបន្តបន្ទាប់។ ដំណើរការនោះបង្ហាញថា ផែនទីដែលយកផ្ទៀងផ្ទាត់ គឺត្រូវគ្នាជាមួយផែនទីដែលរាជរដ្ឋាភិបាលកំពុងប្រើប្រាស់ បច្ចុប្បន្ន។
យ៉ាងនេះក្ដី ប្រជាពលរដ្ឋនៅតាមបណ្ដោយព្រំដែនកម្ពុជា-វៀតណាម ក្នុងខេត្តត្បូងឃ្មុំ ខ្លះរីករាយចំពោះដំណើរការផ្ទៀងផ្ទាត់ផែនទី ប៉ុន្តែអ្នកខ្លះទៀត គឺមិនសប្បាយចិត្តឡើយ ខណៈរដ្ឋាភិបាលអះអាងថា ជាផែនទីត្រឹមត្រូវ រីឯផ្ទៃដីរបស់ពលរដ្ឋធ្លាប់កាន់កាប់ចេះតែរងការរំលោភបំពានពី សំណាក់ភាគីវៀតណាមនោះ។
ប្រជាពលរដ្ឋរស់នៅភូមិជើង ឃុំជាំ ស្រុកមេមត់ លោក គង់ វើក មានប្រសាសន៍ថា ត្បិតតែលោកមិនសូវតាមដានពីបញ្ហាផែនទីនោះក៏ដោយ ប៉ុន្តែលោកយល់ថា រឿងផែនទី និងរឿងទឹកដី រាជរដ្ឋាភិបាលត្រូវធ្វើការងារនេះឱ្យបានច្បាស់លាស់ និងត្រឹមត្រូវ៖ «ខ្ញុំគ្រាន់តែសុំខាងរដ្ឋាភិបាលយើងហ្នឹងឱ្យវែកញែក ផ្ទៀងផ្ទាត់ឱ្យបានត្រឹមត្រូវ កុំចេះតែស្មានៗ។»
ប្រជាពលរដ្ឋភូមិជើង ឃុំជាំ ហាក់បារម្ភជាងគេជុំវិញរឿងទឹកដី ព្រោះប្រជាកសិករខ្មែរខ្លះធ្លាប់រងការធ្វើបាបពីសំណាក់ភាគីវៀតណាម ជារឿយៗ។ ជាក់ស្តែងកងកម្លាំងអាជ្ញាធរវៀតណាម មកបាញ់ថ្នាំពុលបំផ្លាញដំណាំរបស់ពួកគាត់ ហើយពួកគេចូលមកដកបន្លែបង្ការរបស់អ្នកភូមិ និងបញ្ជាឱ្យពលរដ្ឋខ្មែរបំផ្លាញដំណាំរបស់ខ្លួនឯងជាដើម។
មិនខុសគ្នានេះ ប្រជាពលរដ្ឋមួយរូបទៀត លោក ចាន់ យឿន ហាក់រីករាយនៅពេលឮថា ការផ្ទៀងផ្ទាត់ផែនទីភាគច្រើនត្រូវគ្នា ប៉ុន្តែលោកបារម្ភខ្លាចក្រែងតែភាពត្រឹមត្រូវនោះមានតែនៅលើក្រដាស រីឯផ្ទៃដីជាក់ស្តែង គឺខុសគ្នាទៅវិញ។ លោកស្នើឱ្យយកផែនទីត្រឹមត្រូវមកពិនិត្យលើដីជាក់ស្ដែងទើបជាការ ល្អ។
ជាមួយគ្នានេះ មេឃុំជាំ លោក ប្រាក់ វន្នី មានប្រសាសន៍ថា ខាងរដ្ឋាភិបាលគឺបានបង្ហាញពីតម្លាភាពរបស់ខ្លួនតាមរយៈការ ផ្ទៀងផ្ទាត់ផែនទីរួមគ្នា ក៏ប៉ុន្តែពលរដ្ឋនៅក្នុងឃុំរបស់លោកបច្ចុប្បន្នវិញ គឺចង់ឱ្យរាជរដ្ឋាភិបាលបង្ហាញការពិតជុំវិញរឿងទឹកដីរបស់ពួកគាត់។ បើមិនដូច្នេះ ពួកគាត់នៅតែរស់នៅក្នុងភាពមិនស្ងប់ចិត្តរហូត៖ «ចង់ ឱ្យបង្ហាញការពិត តើព្រំប្រទល់ពិតនៅត្រឹមណា? អ៊ីចឹងគាត់ចង់ដឹងណាស់។ គាត់ស្ដាប់រឿងផែនទី និងផ្ទៃដីនោះ គឺគាត់ចង់សំណូមពរទៅរដ្ឋាភិបាលដើម្បីបង្ហាញការពិត។»
លោកបញ្ជាក់ថា លោកមិនអាចរារាំងកិច្ចការបោះបង្គោលព្រំដែនរបស់រដ្ឋាភិបាលបានឡើយ ប៉ុន្តែលោកចង់ឱ្យរដ្ឋាភិបាលបំពេញការងារដោយតម្លាភាព និងការទទួលខុសត្រូវខ្ពស់។
ដោយឡែកប្រជាពលរដ្ឋនៅឃុំទ្រាក លោក ស៊ូ យ៉េន យល់ថា រឿងទឹកដីគឺជារឿងជាតិទាំងមូល ហើយលោកមិនពេញចិត្តទេចំពោះការងាររបស់រាជរដ្ឋាភិបាលធ្វើសព្វថ្ងៃ ព្រោះការផ្ទៀងផ្ទាត់ផែនទីកន្លងមក គឺធ្វើឡើងតែនៅលើក្រដាស ឬលើតុច្រើនជាង ដែលជាហេតុធ្វើឱ្យពលរដ្ឋស្ទើរទូទាំងនគរនៅតែងឿងឆ្ងល់។ មិនតែប៉ុណ្ណោះ ការវាស់វែង ឬបោះបង្គោលមួយចំនួននៅតំបន់លោករស់នៅកន្លងមក គឺនៅមានភាពលាក់លៀម ពោលគឺនៅពេលបោះបង្គោលព្រំដែន ពេលខ្លះឃើញតែភាគីវៀតណាម ជាអ្នកធ្វើ។
លោក ស៊ូ យ៉េន៖ «ប្រសិនបើនៅតែលើក្រដាស ខ្ញុំមិនអាចទទួលយកបានទេ ព្រោះមិនដឹងភាពជាក់លាក់មួយណា ខ្ញុំមិនអាចទទួលយកបាន។»
កាលពីពេលថ្មីៗនេះ លោក សម រង្ស៊ី ប្រធានគណបក្សសង្គ្រោះជាតិ សរសេរលើទំព័របណ្ដាញសង្គមហ្វេសប៊ុក (Facebook) របស់លោកនៅថ្ងៃទី៦ ខែកញ្ញា ថា ការផ្ទៀងផ្ទាត់ផែនទីតែមួយ គឺមិនគ្រប់គ្រាន់ទេ។ ដូចនេះ ត្រូវពិនិត្យមើលលើដីជាក់ស្ដែងថែមទៀត។
ទាក់ទងបញ្ហាទាំងនេះ អនុប្រធានគណៈកម្មាធិការព្រំដែនចម្រុះកម្ពុជា អ្នកស្រី កុយ ពិសី មានប្រសាសន៍ថា ការលើកឡើងរបស់ប្រជាពលរដ្ឋក្តីរបស់លោក សម រង្ស៊ី ក្តី គឺជារឿងមិនអាចទៅរួច ព្រោះសកម្មភាពបោះបង្គោលព្រំដែនរបស់រាជរដ្ឋាភិបាលដែលសម្រេចបានជាង ៨០ភាគរយ គឺត្រឹមត្រូវ ដោយអនុលោមតាមផែនទីបោនខ្នាត ១/១០០.០០០ បោះពុម្ពដោយក្រុមភូមិសាស្ត្រឥណ្ឌូចិន ហើយមានចែងក្នុងរដ្ឋធម្មនុញ្ញទៀតផង។ លើសពីនេះទៀត ការផ្ទៀងផ្ទាត់ផែនទីកន្លងមក គឺបង្ហាញថា ផែនទីរបស់រដ្ឋាភិបាលប្រើ គឺពិតជាត្រឹមត្រូវ។ ដូច្នេះ មិនមានអ្វីខុសទៅនឹងផ្ទៃដីជាក់ស្តែងទេ លើកលែងតែតំបន់ខ្លះដែលរដ្ឋាភិបាលទាំងពីរសម្រួលដល់ការរស់នៅរបស់ ប្រជាពលរដ្ឋ ដោយតម្រូវឱ្យមានការដោះដូរដីគ្នាតែប៉ុណ្ណោះ។
អ្នកស្រី កុយ ពិសី៖ «ធ្វើរាល់ថ្ងៃនេះ ខ្ញុំធ្វើនៅលើដីជាក់ស្ដែងហើយៗ ហើយបើឱ្យយើងខ្ញុំទៅផ្ទៀងផ្ទាត់ជាមួយអ្នកណាទៀត គឺយើងខ្ញុំគ្មានភារកិច្ចទៅផ្ទៀងផ្ទាត់នោះទេ។»
អ្នកស្រីបដិសេធចំពោះការលើកឡើងថា សកម្មភាពបំពេញការងារ ឬការបោះបង្គោលព្រំដែនពីសំណាក់ភាគីទាំងពីរ ថាមិនមានតម្លាភាព ឬមានតែភាគីវៀតណាម ជាអ្នកធ្វើឡើងនោះ អ្នកស្រីថា គឺជារឿងមិនអាចទទួលយកបាន៖ «យើងចូលរួមជាមួយគ្នាគ្រប់សកម្មភាពទាំងអស់ឱ្យទាក់ទងរឿងបង្គោលព្រំដែន គឺទ្វេភាគី។ ដាច់ខាត គឺទ្វេភាគី។»
មន្ត្រីកិច្ចការព្រំដែនដដែលបន្ថែមថា ក្នុងចំណោមប្រជាពលរដ្ឋដែលមានការយល់ដឹងត្រឹមត្រូវ គឺពួកគេនឹងស្ងប់ចិត្តចំពោះការងារដែលរដ្ឋាភិបាលកំពុងធ្វើ ក៏ប៉ុន្តែ មានប្រជាពលរដ្ឋខ្លះដែលមានអ្នកនៅពីក្រោយខ្នង គឺមិនអាចស្ងប់ចិត្តបានឡើយ។ ជាងនេះទៀត ពួកគេទាំងនោះ គឺបង្កការលំបាកដល់កិច្ចការងាររបស់រដ្ឋាភិបាលទៀតផង។
ទោះបីយ៉ាងណាក៏ដោយ អ្នកស្រាវជ្រាវបញ្ហាសង្គម លោកបណ្ឌិត កែម ឡី មានប្រសាសន៍ថា បញ្ហាផែនទីក្តី បញ្ហាព្រំដែនក្តី ដែលរដ្ឋាភិបាលកំពុងធ្វើបច្ចុប្បន្ននេះ គឺមិនអាចធ្វើឱ្យជនរួមជាតិស្ងប់ចិត្តបានទេ ព្រោះវាមិនមានតម្លាភាព។ ជាក់ស្ដែងមានមនុស្សជាច្រើនកំពុងភ័យខ្លាចចំពោះរឿងនេះ និងមានមួយចំនួនត្រូវជាប់ពន្ធនាគារ ដោយសារតែការលើកឡើងពីបញ្ហាផែនទី និងបញ្ហាព្រំដែននោះ។
លោកថា ដើម្បីឱ្យពលរដ្ឋអាចស្ងប់ចិត្តបាន រដ្ឋាភិបាលត្រូវធ្វើរឿងនេះ ឱ្យមានតម្លាភាពបំផុត និងស្វែងរកកិច្ចអន្តរាគមន៍ទៅភាគីទីបី ដើម្បីឱ្យគេជួយសម្របសម្រួលលើបញ្ហាទាំងនេះ ឬក៏អាចប្ដឹងទៅអង្គការសហប្រជាជាតិតែម្ដង៖ «រដ្ឋាភិបាលអាចប្ដឹង ទៅអង្គការសហប្រជាជាតិ ឬប្រទេសមហាអំណាចទាំងប្រាំ ព្រោះគេអាចមានមធ្យោបាយពីរ ទីមួយ គេអាចឱ្យក្រុមប្រឹក្សាអាជ្ញាកណ្ដាលគេមកសម្របសម្រួល ឬមន្ត្រីជំនាញ។ ទីពីរ អាចផ្ដល់ឱកាសដល់តុលាការអន្តរជាតិ។»
លោកបន្ថែមទៀតថា ស្ថានភាពរំលោភបំពានរបស់ភាគីវៀតណាម មកលើកម្ពុជា គឺមានច្រើនជាងបញ្ហាកើតឡើងជាមួយប្រទេសថៃ កន្លងមក។ ដូចនេះ ប្រសិនបើអាច រដ្ឋាភិបាលកម្ពុជា ត្រូវប្រមូលភស្តុតាងដែលវៀតណាម រំលោភបំពានមកលើកម្ពុជា តាំងពីក្រោយសម័យខ្មែរក្រហមប្ដឹងទៅអន្តរជាតិតែម្ដង នោះទើបធានាថា បញ្ហាទាំងឡាយអាចដោះស្រាយបាន។
ចំណែកក្រុមប្រជាពលរដ្ឋសម្ដែងក្តីព្រួយបារម្ភថា បើសិនរដ្ឋាភិបាលពុំមានយន្តការដោះស្រាយបញ្ហាព្រំដែនច្បាស់លាស់ទេ ដីស្រែរបស់ពួកគាត់ដែលប្រើប្រាស់តាំងពីជីដូនជីតាមកនោះ នឹងកាន់តែបាត់បង់ជាមិនខាន ដោយសារតែការឈ្លានពានពីភាគីវៀតណាម៕
When will the lightning strike this Khmer traitor Hun Sen ?
ReplyDeleteWhen will the cheap KI's administrators stop serving Hun Sen by allowing Khmer people to make comments freely?