លោក សម រង្ស៊ី បង្ហាញជំហរ ៥ចំណុច ចំពោះ បញ្ហាព្រំដែន
លោក សម រង្ស៊ី ប្រធាន គណបក្ស សង្គ្រោះជាតិ នៅថ្ងៃសៅរ៍ ទី១២ កញ្ញានេះ បានបង្ហាញ ជំហរ ចំនួន ៥ចំណុច ចំពោះ បញ្ហាព្រំដែន និងបូរណភាព ទឹកដី នៃប្រទេស កម្ពុជា។ មួយ ក្នុងចំណោម ជំហរ ទាំង៥នោះ លោក សម រង្ស៊ី បានស្នើ ឲ្យពង្រឹង ឯកភាពជាតិ, ជៀសវាង កុំចាញ់ល្បិច បំបែកបំបាក់ របស់ បរទេស ឈ្លានពាន ដែលញុះញង់ ឲ្យខ្មែរ ឈ្លោះគ្នា។ គួរ កត់សម្គាល់ ថា, ជំហរ របស់ ប្រមុខ បក្សប្រឆាំង ចំពោះ បញ្ហាព្រំដែននេះ ធ្វើឡើង តែ ៤ថ្ងៃ ប៉ុណ្ណោះ បន្ទាប់ ពីលោក នាយករដ្ឋមន្ដ្រី ហ៊ុន សែន វាយប្រហារ ខ្លាំងៗ ទៅលើ បក្សប្រឆាំង ថា, យកបញ្ហា ព្រំដែន ទៅកេងចំណេញ នយោបាយ ពីប្រជាពលរដ្ឋ កម្ពុជា។
តាមរយៈ បណ្ដាញសង្គម លោក សម រង្ស៊ី ប្រធានគណបក្សសង្គ្រោះជាតិ បានបង្ហាញពីជំហររបស់លោកចំពោះបញ្ហាព្រំដែន ដែលមិនចោទប្រកាន់ និងមិនឆ្លើយតបទៅនឹងការចោទប្រកាន់ពីបុគ្គលណា ឬគណបក្សនយោបាយណាមួយឡើយ។
ប្រមុខបក្សប្រឆាំងក៏បានឆ្លៀតឱកាសនេះ គូសបញ្ជាក់ថា បញ្ហាព្រំដែននិងបូរណភាពទឹកដីនៃប្រទេសកម្ពុជា មិនមែនជាជម្លោះនយោបាយរវាងខ្មែរនិងខ្មែរទេ។ បញ្ហាព្រំដែននិងបូរណភាពទឹកដីនៃប្រទេសកម្ពុជា បើតាមលោកសម រង្ស៊ី វាគឺជាជម្លោះទឹកដីរវាងខ្មែរ និងប្រទេសជិតខាង។ ប្រធានគណបក្សសង្គ្រោះជាតិ បានស្នើឲ្យខិតខំពង្រឹងឯកភាពជាតិ ជៀសវាងកុំចាញ់ល្បិចបំបែកបំបាក់របស់បរទេសឈ្លានពាន ដែលញុះញង់ឲ្យខ្មែរឈ្លោះគ្នា ដើម្បីលេបត្របាក់ទឹកដីខ្មែរដូចកាលពីអតីតកាល។
ជាមួយគ្នានោះ លោក សម រង្ស៊ី បានជំរុញឲ្យខិតខំស្វែងរកឯកសារ ជំនាញ និងគំនិតស្ថាបនា ដើម្បីជួយការពារទឹកដីប្រទេសកម្ពុជាបច្ចុប្បន្នឲ្យបានគង់វង្ស សម្រាប់កូនចៅខ្មែរជំនាន់ក្រោយ។
គួរកត់សម្គាល់ថា ការបង្ហាញជំហររបស់ប្រមុខបក្សប្រឆាំងចំពោះបញ្ហាព្រំដែននេះ ធ្វើឡើងតែ៤ថ្ងៃប៉ុណ្ណោះ បន្ទាប់ពីលោកនាយករដ្ឋមន្ដ្រីហ៊ុន សែន វាយប្រហារខ្លាំងៗទៅលើបក្សប្រឆាំងថា យកបញ្ហាព្រំដែនទៅកេងចំណេញនយោបាយពីប្រជាពលរដ្ឋកម្ពុជា។ នៅក្នុងសេចក្ដីថ្លែងការណ៍ពីបញ្ហាព្រំដែនកម្ពុជា-វៀតណាម ផ្សព្វផ្សាយតាមទូរទស្សន៍ជាតិកម្ពុជា កាលពីថ្ងៃទី៨ខែកញ្ញាកន្លងទៅ លោកនាយករដ្ឋមន្ដ្រីបានវាយប្រហារខ្លាំងៗទៅលើផែនទីដែលបក្ស ប្រឆាំងយកមកពីប្រទេសបារាំងកន្លងមក គឺជាផែនទីដែលសាហាវជាងអសិរពិស និងជាផែនទីដែលធ្វើឲ្យសមាជិកបក្សប្រឆាំងត្រូវជាប់ពន្ធនាគារនា ពេលកន្លងមក។ ជាមួយគ្នានោះ លោកនាយករដ្ឋមន្ដ្រីក៏មិនភ្លេចព្រមានចាត់វិធានការតាមផ្លូវច្បាប់ ចំពោះជនណា ដែលហៅផែនទីផ្លូវការរបស់រដ្ឋាភិបាល ថាជាផែនទីក្លែងក្លាយ ឬផែនទីចោរជាដើមនោះផងដែរ៕
No comments:
Post a Comment