មនុស្ស ៣៤នាក់ ស្លាប់ ក្នុងគ្រោះថ្នាក់ ចរាចរណ៍ រយៈពេល បីថ្ងៃ ក្នុងពិធីបុណ្យ ភ្ជុំបិណ្ឌ
RFA / វិទ្យុ អាស៊ី សេរី | ១៣ តុលា ២០១៥
រថយន្តដឹកកម្មករដែលរងគ្រោះថ្នាក់នៅខេត្តស្វាយរៀង កាលពីព្រឹកថ្ងៃទី១៩ ខែឧសភា ឆ្នាំ២០១៥។ Licadho Photo
សង្គមស៊ីវិល លើកឡើង ថា, ការរឹងបន្តឹងច្បាប់ ឱ្យមាន ប្រសិទ្ធភាព និងការបង្រៀន ប្រជាពលរដ្ឋ យល់ដឹង ពីច្បាប់ ចរាចរណ៍ ផ្លូវគោក ថ្មី គឺ ជាអ្វី ដែលរដ្ឋាភិបាល កម្ពុជា ត្រូវតែ បង្កើន ការយកចិត្តដាក់។ មន្ត្រីប៉ូលីស ចរាចរណ៍ និយាយ ថា, ដើម្បី អាចកាន់បន្ថយ គ្រោះថ្នាក់ ចរាចរណ៍បាន លុះត្រាណា ប្រជាពលរដ្ឋ អ្នកបើកបរ គោរពច្បាប់ ចរាចរណ៍។
មនុស្ស ៣៤នាក់ ស្លាប់ និងរបួស ១៤៧នាក់ ក្នុងគ្រោះថា្នក់ ចរាចរណ៍ ៧៤ករណី នៅទូទាំងប្រទេស នាពិធីបុណ្យ ភ្ជុំបិណ្ឌ រយៈពេល ៣ថ្ងៃ, ប៉ុន្តែ ថយចុះ ៣ករណី បើ ប្រៀបធៀប ទៅនឹងឆ្នាំ ២០១៤ ក្នុងរយៈពេល ៣ថ្ងៃ ដូចគ្នា។
របាយការណ៍អគ្គស្នងការដ្ឋាននគរបាលជាតិ ចេញផ្សាយនៅថ្ងៃទី១៣តុលាថា មូលហេតុដែលបង្កឱ្យមានគ្រោះថ្នាក់ចរាចរណ៍គិតត្រឹមរយៈពេល៣ថ្ងៃ ក្នុងពិធីបុណ្យភ្ជុំបិណ្ឌ គឺបើក លើសល្បឿនកំណត់៣១ករណី មិនគោរពសិទ្ធិអាទិភាព១៦ករណី ប្រជែងគ្រោះថ្នាក់ ៨ករណី មិនប្រកាន់ស្តាំ៥ករណី ស្រវឹង៦ករណីនិងបត់ឆ្វេង ស្តាំមិនប្រុងប្រយ័ត្ន៨ករណី។
មន្ត្រីកម្មវិធីសុវត្ថិភាពចរាចរណ៍ផ្លូវគោក នៃអង្គការសុខភាពពិភពលោក លោកវេជ្ជបណ្ឌិត សៅ សុវណ្ណរតនៈ មានប្រសាសន៍ថា ការអន្តរាគមន៍របស់មន្ត្រីប៉ូលីសចរាចរណ៍ និងការរៀបចំប៉ូលិសនៅតាមគោលដៅ ដែលងាយប្រឈមមុខនឹងគ្រោះថ្នាក់ចរាចរណ៍ អាចជាផ្នែកមួយជួយកាត់បន្ថយអត្រានៃគ្រោះថ្នាក់ចរាចរណ៍។
ការរឹងបន្តឹងច្បាប់ចរាចរណ៍ផ្លូវគោកឱ្យមានប្រសិទ្ធភាព និងការបង្រៀនប្រជាពលរដ្ឋយល់ដឹងពីច្បាប់ចរាចរណ៍ផ្លូវគោកថ្មី គឺជាអ្វីដែលរដ្ឋាភិបាលកម្ពុជាត្រូវតែបង្កើនការយកចិត្តដាក់ឱ្យបាន ខ្ជាប់ខ្ជួនជាពិសេសពេលមានបុណ្យជាតិធំៗ។
លោកវេជ្ជបណ្ឌិត សៅ សុវណ្ណរតនៈ បញ្ជាក់ថា៖ «ប៉ុន្តែប្រទេសយើងក្នុងថ្ងៃបុណ្យទានហ្នឹងមិនអាចធ្វើបានទេ។ ខ្ញុំមើលឃើញថាមិនមានកម្លាំងចុះទប់ស្កាត់ទេ បើស្រុកគេ គេមានត្រង់ចំណុចនេះគឺជាការខ្វះខាតរបស់យើង។»
មន្ត្រីប៉ូលិសប្រចាំការនៅផ្លូវព្រះមុនីវង្សម្នាក់ និយាយថា ភាគច្រើននៃអ្នកបើកបរទាំងទីក្រុង និងតាមបណ្តាលខេត្តនានា បើកបរលឿនលើសល្បឿនកំណត់ ដោយច្បាប់ចរាចរណ៍ផ្លូវគោក។
លោកបញ្ជាក់ថា ភាគច្រើននៃអ្នកប្រឈមមុខនឹងគ្រោះថ្នាក់ចរាចរណ៍ គឺអ្នកបើកបរស្ថិតក្នុងភាពស្រវឹង។ គ្រោះថ្នាក់ចរាចរណ៍អាចកាត់បន្ថយបាន លុះត្រាណាអ្នកបើកបរមានការប្រុងប្រយ័ត្ន ចេះអធ្យាស្រ័យ ឱ្យគ្នាទៅវិញទៅមកក្នុងពេលបើកបរ និងបើកបរតាមគន្លងផ្លូវដែលបានកំណត់៖ «ជួនកាលអ្នកដែលមិនសូវគោរពច្បាប់ចរាចរណ៍ហ្នឹង អ្នកដឹង មិនមែនអ្នកមិនដឹងទេ ប៉ុន្តែបំពាន។»
លោកបន្តថា ការបើកបរក្នុងឆ្នាំនេះ មានសណ្តាប់ធ្នាប់ល្អជាងឆ្នាំមុនៗ ដូចជាការដឹកទំនិញសំពីងសំពោង និងដឹកអ្នកដំណើរនៅលើកដំបូលមានការកាត់បន្ថយ ហើយភាគច្រើននៃអ្នកដំណើរហាក់ផ្តល់តម្លៃចំពោះជីវិតខ្លួនឯងជាងលុយ ថ្លៃឡានឈ្នួល។
លោកអំពាវនាវដល់អ្នកបើកបរទាំងអស់ គោរពច្បាប់ចរាចរ ឲ្យបានខ្ជាប់ខ្ជួន ដើម្បីជៀសវាងគ្រោះថ្នាក់ ជាពិសេសត្រូវពាក់ខ្សែក្រវ៉ាត់ពេលបើកឡាន និងអ្នកបើកបរម៉ូតូត្រូវតែពាក់មួកសុវត្ថិភាព។
របាយការណ៍អគ្គស្នងការដ្ឋាននគរបាលជាតិបញ្ជាក់ថា ខេត្តដែលស្លាប់ដោយគ្រោះថ្នាក់ចរាចរណ៍ច្រើនជាងគេ គឺខេត្តកណ្តាល មានរហូត៦ករណី និងស្លាប់៤នាក់ ខេត្តតាកែវ មាន៩ករណីស្លាប់៣នាក់ និងខេត្តដែលមានអ្នករងរបួស ដោយគ្រោះថ្នាក់ចរាចរណ៍ច្រើនជាងគេ គឺខេត្តកំពត ចំនួន៨ករណី របួស១៨នាក់ និងស្លាប់១នាក់។
មន្ត្រីសង្គមស៊ីវិលលើកឡើងថា រដ្ឋាភិបាលកម្ពុជាត្រូវតែបង្កើតយន្តការ ឱ្យជាក់លាក់ណាមួយក្នុងការទប់ស្កាត់គ្រោះថ្នាក់ចរាចរណ៍ និងត្រូវដាក់ពង្រាយកម្លាំងសមត្ថកិច្ចឱ្យបានច្រើននៅពេលមានបុណ្យជាតិធំៗ ដើម្បីអាចជួយសម្រួលការកកស្ទះ ចរាចរណ៍ និងឃ្លាំមើលរាល់ការបើកបរដែលមិនគោរពច្បាប់ និងការបើកបរក្នុងស្ថានភាពស្រវឹង ពិសេសគឺពង្រឹងការអនុវត្តច្បាប់ឲ្យមានប្រសិទ្ធិភាព៕
No comments:
Post a Comment