លោក ប៉ាន់ខែម ប៊ុនថន (អាវខៀវកណ្តាល) ប្រធានក្រុមសម្ព័ន្ធសេនានាគ ដែលបានចេញមុខដឹកនាំបាតុកម្មប្រឆាំងលោក កឹម សុខា។ លោកធ្លាប់ដឹកនាំប្រជាពលរដ្ឋទៅស្បថនៅព្រះអង្គដងកើថាសុខចិត្តស្លាប់តៃហោង ស្លាប់ដោយគ្រោះថ្នាក់ចរាចរណ៍និងស្លាប់ដោយរន្ទះបាញ់ ដើម្បីស្មោះត្រង់ជាមួយ លោក ហ៊ុន សែន(រូបថតដោយ ទេព សូនី)
សាលារាជធានី ប្តូរ ការអះអាង ថា, បាតុកម្ម ប្រឆាំងលោក កឹម សុខា បានជូនដំណឹង ជាមុន
VOD / វីអូឌី | ២៨ តុលា ២០១៥
សាលារាជធានី ភ្នំពេញ នៅថ្ងៃពុធនេះ បានកែប្រែ ការអះអាង របស់ខ្លួន ថា, ក្រុមបាតុករ ដែលតវ៉ា ទាមទារ ទម្លាក់លោក កឹម សុខា ចេញពីតំណែង អនុប្រធាន ទី១នៃរដ្ឋសភា បានជូនដំណឹង មកសាលាក្រុង មុនពេលធ្វើ បាតុកម្ម ដែលការ លើកឡើងនេះ ផ្ទុយពីការអះអាង កាលពីមុន។
សេចក្តីថ្លែងការណ៍ របស់ សាលារាជធានី ភ្នំពេញ ចុះថ្ងៃ ទី២៨ ខែតុលា ឆ្នាំ២០១៥ ឲ្យដឹង ថា, នៅថ្ងៃ ទី២៦ ខែតុលា ឆ្នាំ២០១៦ នៅមុខវិមាន រដ្ឋសភា ប្រជាពលរដ្ឋ ប្រមាណ ៥ពាន់ នាក់ បានចូលរួម សម្តែងមតិ តាមរយៈ«បាតុកម្ម អហិង្សាមួយ” ក្នុងគោលបំណង ទម្លាក់លោក កឹម សុខា ពីតំណែង។ សេចក្តីថ្លែងការណ៍ បន្តថា៖ “សម្រាប់ ការធ្វើ បាតុកម្ម អហិង្សានេះ, សាលារាជធានី ភ្នំពេញ បានទទួល លិខិត ជូនដំណឹង ពីតំណាង ប្រជាពលរដ្ឋ នៅរសៀល ថ្ងៃទី២២ ខែតុលា ឆ្នាំ២០១៥។ ហើយ បន្ទាប់មក នៅព្រឹកថ្ងៃ ទី២៦ ខែតុលា ឆ្នាំ២០១៥ សាលារាជធានី បានកោះអញ្ជើញ តំណាង ក្រុមបាតុករ មកប្រជុំ ពិភាក្សា និងណែនាំ ពីនីតិវិធី នៃច្បាប់ ស្តីពី ការធ្វើបាតុកម្ម ដោយសន្តិវិធី។ ក្នុងនោះតំណាង បាតុករ ក៏បានបញ្ឈប់ និងរំសាយ បាតុកម្ម នៅវេលា ម៉ោង១០ និង៣០ នាទី នាខែឆ្នាំ ដដែល បន្ទាប់ ពីអ្នកតំណាងរាស្រ្ត មកទទួលញត្តិ។»
សេចក្តីថ្លែងការណ៍របស់សាលារាជធានីភ្នំពេញឲ្យដឹងទៀតថា៖ “ដោយឡែកចំពោះហេតុការណ៍ដែលបានកើតឡើងនៅវេលាម៉ោង១២និង១៥នាទី បង្កដោយជនមួយក្រុមមិនស្គាល់អត្តសញ្ញាណបានធ្វើឲ្យមានស្នាមរបួសមកលើតំណាងរាស្រ្តគណបក្សសង្រ្គោះជាតិចំនួន២រូប ដោយពុំដឹងមូលហេតុ បន្ទាប់ពីក្រុមបាតុករបានរំសាយបានរួចរាល់ហើយ”។ សេចក្តីថ្លែងការណ៍បន្ថែមថា៖ "សាលារាជធានីភ្នំពេញមានការសោកស្តាយនិងសូមថ្កោលទោសចំពោះទង្វើខាងលើដែលកើតឡើងចំពោះអ្នកតំណាងរាស្រ្ត២រូបនិងចាត់វិធានការស្រាវជ្រាវរកជនបង្កមកផ្តន្ទាទោសតាមផ្លូវច្បាប់ជាធរមាន”។
នៅរសៀលថ្ងៃទី២៦ខែតុលា បន្ទាប់ពីហិង្សាកើតឡើង នៅពេលវីអូឌី(VOD)ទាក់ទងតាមទូរស័ព្ទ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថាបាតុកម្មប្រឆាំងលោក កឹម សុខា មិនបានសុំការអនុញ្ញាតពីសាលារាជធានីនោះទេ។ លោកបន្តថានៅពេលដឹងថាបាតុកម្មកើតឡើង សាលារាជធានីបានហៅតំណាងដឹកនាំបាតុកម្មមកសាកសួរភ្លាមៗ នៅម៉ោងប្រមាណ៩និង៣០នាទី ហើយពួកគេសន្យាថានឹងរំសាយនៅម៉ោង១០និង៣០នាទី។ លោកមានប្រសាសន៍ថា៖“បាតុកម្មបានរំសាយនៅម៉ោង១០និង៣០នាទី ខ្ញុំអត់យល់ដែរថាមានមូលហេតុអីបានជាហិង្សាកើតឡើង”។
លោក ឡុង ឌីម៉ង់ បានបន្ថែមថា៖ “ក្រុមអ្នកតំណាងដឹកនាំបាតុកម្មគឺជាប្រជាពលរដ្ឋសុធសាធ មិនមែនតំណាងអង្គការណាមួយនោះទេ”។ លោកចាត់ទុកអំពើហិង្សាកើតឡើង”ជារឿងនឹកស្មានមកដល់”។
ទោះជាយ៉ាងណា លោក ឡុង ឌីម៉ង់ បានប្រាប់វីអូឌី(VOD)នៅថ្ងៃពុធ បន្ទាប់ពីសាលារាជធានីបានចេញសេចក្តីថ្លែងការណ៍ថាសាលារាជធានីភ្នំពេញបានទទួលលិខិតជូនដំណឹងពីតំណាងប្រជាពលរដ្ឋសុំធ្វើបាតុកម្ម មួយថ្ងៃមុនថ្ងៃឈប់សម្រាក២៣តុលា ដែលលោកថានេះជាមូលហេតុលោកមិនបានឃើញលិខិតស្នើសុំនោះ។ លោកបន្តថាពេលលោកមកធ្វើការនៅព្រឹកថ្ងៃទី២៦ ខែតុលា លោកក៏បានទទួលដំណឹងថាមានបាតុកម្មកើតឡើង ហើយលោកក៏បានហៅតំណាងបាតុករមកពិភាក្សា ហើយក្រុមបាតុករនោះក៏បានសម្រេចរំសាយបាតុកម្មភ្លាមៗ។
ទាក់ទងនឹងបាតុកម្មដែលចំនួនបាតុករច្រើនដល់៥ពាន់នាក់ លោក ឡុង ឌីម៉ង់ មានប្រសាសន៍ថាសាលារាជធានីភ្នំពេញមានសិទ្ធិអនុញ្ញាតឲ្យធ្វើបាតុកម្មត្រឹមចំនួន២០០នាក់ ហើយប្រសិនបើលើសពីនេះត្រូវមានការស្នើសុំគោលការណ៍ពីក្រសួងមហាផ្ទៃ។ លោកបន្ថែមថា៖ "រាល់ការស្នើសុំការធ្វើបាតុកម្មទាំងអស់នៅពេលដែលមកដល់សាលាក្រុងបើ២០០នាក់ យើងមានសិទ្ធិសម្រេច បើលើសពី២០០នាក់ ដូច៥ពាន់នាក់អ៊ីចឹង យើងត្រូវស្នើសុំគោលការណ៍ទៅក្រសួងមហាផ្ទៃតែមុននឹងស្នើសុំទៅក្រសួងមហាផ្ទៃយើងត្រូវអញ្ជើញគ្រប់ភាគីទាំងអស់ភាគីណាក៏យើងធ្វើអ៊ីចឹងដែរ។ បងសួរក្រុមសង្គ្រោះជាតិមានជំនាញធ្វើបាតុកម្មញឹកហ្នឹង បងសួរគាត់ទៅយើងក៏អញ្ជើញគាត់មកធ្វើការជជែកដែរ អ៊ីចឹងបានជានៅថ្ងៃចន្ទហ្នឹង យើងបានអញ្ជើញគាត់មកជជែកទៅ គាត់បានធ្វើបាតុកម្មហើយហ្នឹង យើងក៏បានសុំឲ្យគាត់បញ្ឈប់ ហើយគាត់ក៏បានបញ្ឈប់វិញទៅ”។
គួរបញ្ជាក់ថាបាតុកម្មទាមទារឲ្យដកតំណែងរបស់លោក កឹម សុខា កើតឡើងមួយថ្ងៃបន្ទាប់ពីការថ្លែងរបស់នាយករដ្ឋមន្រ្តី ហ៊ុន សែន នៅប្រទេសបារាំង កាលពីល្ងាចថ្ងៃទី២៥ខែតុលា។ ពីប្រទេសបារាំង ក្នុពិធីជួបសំណេះសំណាលជាមួយនិស្សិតខ្មែរនៅទីនោះ លោក ហ៊ុន សែន បានថ្លែងថាបាតុកម្មប្រឆាំងលោកនៅបារាំងគឺជាសិទ្ធិប្រជាពលរដ្ឋ ហើយលោកថាបាតុកម្មប្រឆាំងលោក កឹម សុខា ក៏ជាសិទ្ធិរបស់ប្រជាពលរដ្ឋដូចគ្នា។ លោកបន្តថាបាតុកម្មនេះអាចនឹងឲ្យលោក កឹម សុខា ធ្លាក់ពីតំណែង។ លោកមានប្រសាសន៍ថា៖“បើលេងកុំខឹង បើខឹងកុំលេង បើស្អែកគេលេងនៅភ្នំពេញវិញ កុំខឹងនឹងគេ ហើយលេងហ្នឹងប្រហែលជាអស់តំណែងអនុប្រធានសភាទៀត”។
អ្នកទូរស័ព្ទចូលក្នុងកម្មវិធីវីអូឌីកាលពីថ្ងៃទី២៧ខែតុលា ដែលមានឈ្មោះថាចិន្តា មកពីខេត្តកណ្តាល បានអះអាងថាប្អូនគាត់ជាកងកម្លាំងបានប្រាប់ថាបាតុកម្មនេះត្រូវបានបញ្ជាពីថ្នាក់លើទាំងម៉ោង១២យប់ ថ្ងៃទី២៥ ខែតុលា។ អ្នកស្រីមានប្រសាសន៍ថា៖ “ហើយខ្ញុំសូមស្នើដល់តុលាការដែរ តើតុលាការមានចំណាត់ការកន្លែងណា ហើយចាប់ឃាតកបានដែរឬអត់? ចាប់មនុស្សដែលវ៉ៃគេបានដែរឬអត់នៅពេលថ្មីៗនេះ? ហើយសូមគិតគូរឡើងវិញ សាលាក្រុង(រាជធានីភ្នំពេញ) ក្រសួងមហាផ្ទៃ ខាងព្រហ្មទណ្ឌ លោកចាត់ការ។ កុំធ្វើអីសម្រាប់គេបានដោយងាយៗ សម្រាប់ពេលខ្លួនឯងធ្វើលើគេ ចាប់អត់បាន”។
បន្ទាប់ពីធ្វើបាតុកម្មនៅមុខវិមានរដ្ឋសភា បាតុកររាប់រយនាក់បានជិះម៉ូតូទៅដល់មុខផ្ទះលោក កឹម សុខា ដែលមានទីតាំងនៅខាងក្រោយសាលាភូមិន្ទភ្នំពេញ ក្នុងសង្កាត់បឹងកក់២ ខណ្ឌទួលគោក ដើម្បីបន្តការតវ៉ា៕
No comments:
Post a Comment