លោក
ហ៊ីង ប៊ុនហៀង សុំទោស ពលរដ្ឋ ករណី កងអង្គរក្ស បានផឹកស៊ី ប៉ះទង្គិច
បាញ់បោះ
| ២៩ តុលា ២០១៥
ភ្នំពេញ៖ លោក នាយឧត្តមសេនីយ៍ ហ៊ីង ប៊ុនហៀង មេបញ្ជាការ កងអង្គរក្ស សម្តេច នាយករដ្ឋមន្ត្រី ហ៊ុនសែន បានធ្វើការ សុំទោស ជាសាធារណៈ ដល់លោក អភិបាល អភិបាលរង រាជធានីភ្នំពេញ និងអភិបាលខណ្ឌ ទាំង១២ ជាពិសេស ប្រជាពលរដ្ឋ នៅរាជធានី ភ្នំពេញ ចំពោះ នាយពលទាហាន អង្គរក្ស ក្រោមឱវាទ របស់លោក ដែលចំណុះ កងអង្គរក្ស ដែលមាន ពេលខ្លះ បានផឹកស៊ី, ប៉ះទង្គិច, បាញ់បោះ, និងបើករថយន្តលឿន និងវ៉ាជែង ក្នុងពេល កន្លងមក។
ក្នុងពិធី សម្ពោធ អគារ ស្នាក់នៅ និងរោងរថក្រោះ នៅបញ្ជាការដ្ឋាន អង្គរក្ស កាលពីព្រឹក ថ្ងៃទី២៩ ខែតុលា ឆ្នាំ២០១៥នេះ, លោក នាយឧត្តមសេនីយ៍ ហ៊ីង ប៊ុនហ៊ាង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងអង្គរក្ស បានមានប្រសាសន៍ថា "ឯកឧត្តម ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ បានអនុគ្រោះនូវរាល់សកម្មភាព ហើយមានពេលខ្លះ ក៏សុំឲ្យខ្ញុំសុំទោស ក្នុងនាមឯកឧត្តមនាយឧត្តមសេនីយ៍អគ្គមេបញ្ជាការនៃកងយោធពលកង ខេមរភូមិន្ទ ហើយក្នុងនាមនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ផងដែរ ដោយសារមានពេលខ្លះ នាយពលទាហាន នៅមានកម្រិត អាចធ្វើការប៉ះទង្គិច បាញ់បោះ ឬក៏ស្រវឹងផឹកស៊ីលិចកើត ជៀសមិនផុតទេ"។
លោកនាយឧត្តមសេនីយ៍ ហ៊ីង ប៊ុនហៀង បានបញ្ជាក់ថា "ការគ្រប់គ្រងមនុស្សនេះ គឺបានពិគ្រោះយោបល់ និងបានជម្រាបជូនឯកឧត្តមតំណាងដ៏ខ្ពង់ខ្ពស់សម្តេចនាយករដ្ឋមន្ត្រី រួចហើយ ឲ្យខ្ញុំសុំទោសផងដែរ មានពេលខ្លះបើកបររថយន្តគ្រប់ប្រភេទ ដោយចង់ឈ្នះចង់ចាញ់ ឬក៏ចង់លឿនយឺត បានប៉ះទង្គិតដល់អារម្មណ៍របស់ប្រជាពលរដ្ឋ ក្នុងរាជធានីភ្នំពេញ"។
លោក ហ៊ីង ប៊ុនហៀង ក៏បានអរគុណលោកអភិបាលរងរាជធានីភ្នំពេញ និងអភិបាលខណ្ឌទាំង ១២ ដែលមានទឹកចិត្តសហប្រតិបត្តិការ ហើយជួយបង្កលក្ខណៈយោគយល់ ដល់លោក និងលោកមេបញ្ជាការរងគ្រប់ថ្នាក់។
លោកបានបន្ថែមថា "ការគ្រប់គ្រង មិនលាក់លៀមទេ យើងប្រៀបធៀបថា ជួនកាលពេលខ្លះ កូនយើងតែ ៥ នាក់ មានការជួបការលំបាក ចុះទម្រាំរាប់ពាន់នាក់ វាជួបការលំបាកណាស់ វាមានតក់ វាមាននាឡិ ដូចសុភាសិតបុរាណ បានពោលថា "តែងតែមានតក់ មាននាឡិ" ហើយនៅកន្លែងខ្លះ ដែលខ្ញុំ និងឯកឧត្តម ហ៊ុយ ពិសិដ្ឋ និងមេបញ្ជាការរងទាំងអស់ អប់រំនាយពលទាហាន នៅថ្នាក់ក្រោម នៅមានកម្រិត"៕
No comments:
Post a Comment