លោក កឹម សុខា រិះគន់ រដ្ឋាភិបាល ដែលអួត ថា, គោរព ស្រឡាញ់ របប រាជានិយម
RFA / វិទ្យុ អាស៊ី សេរី | ១៥ តុលា ២០១៥
លោក កឹម សុខា (អាវខ្មៅ) អនុប្រធានទី១ រដ្ឋសភា
និងជាអនុប្រធានគណបក្សសង្គ្រោះជាតិ
ក្នុងពិធីបង្សុកូលឧទ្ទិសកុសលថ្វាយព្រះបរមរតនកោដ្ឋ នរោត្ដម សីហនុ
កាលពីព្រឹកថ្ងៃទី១៥ ខែតុលា ឆ្នាំ២០១៥។ RFA/Morm Moniroth
មន្ត្រី រដ្ឋាភិបាល ប្រតិកម្ម ប្រឆាំង ការថ្លែងរិះគន់ របស់ ប្រធានស្ដីទី គណបក្ស ជំទាស់ ដែលទម្លាក់ ការទទួលខុសត្រូវ មកលើរដ្ឋាភិបាល ដោយលើកឡើង ថា, អួតខ្លួន ដង្ហែតាម ព្រះរាជតម្រិះ របស់ ព្រះករុណា, ប៉ុន្តែ មិនអនុវត្តតាម។ មន្ត្រីនាំពាក្យ អង្គភាព ព័ត៌មាន និងប្រតិកម្ម រហ័ស នៃទីស្ដីការ គណៈរដ្ឋមន្ត្រី ចាត់ទុក ថា, នេះ ជាយុទ្ធនាការ ធ្វើនយោបាយ មុនអាណត្តិ របស់ គណបក្ស ប្រឆាំង។
អនុប្រធានគណបក្សជំទាស់ដ៏ធំនៅកម្ពុជា បានចំអកដោយមិនសំដៅចំឈ្មោះថា ការដឹកនាំប្រទេសនាពេលបច្ចុប្បន្ន គឺផ្ទុយគ្នាស្រឡះពីអ្វីដែលអួតអាងថា ប្រតិបត្តិតាមមាគ៌ារបស់ព្រះករុណា ក៏ប៉ុន្តែពេលខ្លះបានប្រមាថ និងមាក់ងាយដល់អង្គព្រះមហាក្សត្រទៅវិញ។
ការថ្លែងរិះគន់របស់ប្រធានស្ដីទីគណបក្សជំទាស់ លោក កឹម សុខា នៅពេលនេះ ធ្វើឡើងក្នុងពេលដែលលោកចូលរួមខួបគម្រប់ ៣ឆ្នាំនៃការយាងសោយទិវង្គតព្រះបាទសម្ដេច នរោត្តម សីហនុ កាលពីព្រឹកថ្ងៃទី១៥ តុលា នៅទីស្នាក់ការកណ្ដាលគណបក្សសង្គ្រោះជាតិ ចាក់អង្រែលើ។
លោក កឹម សុខា បានចំអកដោយមិនសំដៅចំឈ្មោះ ប៉ុន្តែគេដឹងហើយថា ទំនងជា លោក កឹម សុខា ចង់សំដៅឲ្យរដ្ឋាភិបាលដែលដឹកនាំដោយលោកនាយករដ្ឋមន្ត្រី ហ៊ុន សែន ថាមានអំនួត ថាខ្លួនគោរពស្រឡាញ់ និងថែរក្សារាជបល្ល័ង្ក ប៉ុន្តែមិនដែលអនុវត្តតាមទេ។ លោកបន្តថា «ព្រះករុណាតែងតែប្រើ នយោបាយបង្រួបបង្រួមជាតិ ផ្សះផ្សាជាតិ។ បង្រួបបង្រួមជាតិ និងផ្សះផ្សាជាតិ មានន័យថា ចង់ឲ្យខ្មែររួមគ្នាដោះស្រាយបញ្ហាជាមួយគ្នា។ កុំក្អេងក្អាងតែម្នាក់ឯង។ ដូច្នេះហើយ នេះជាចំណុចមួយដែលល្អណាស់។ យើងមានមេរៀនរួចហើយ អួតថាយើងដង្ហែតាមព្រះករុណា ប៉ុន្តែយើងឥតយកចំណុចរបស់ព្រះអង្គមកធ្វើតាម។»
ជុំវិញរឿងនេះ កាលពីឆ្នាំ២០០៥ លោកនាយករដ្ឋមន្ត្រី ហ៊ុន សែន ធ្លាប់ព្រមានលុបចោលរបបរាជានិយម ទៅជារបបសាធារណៈម្ដងរួចហើយ ប្រឆាំងព្រះមហាក្សត្រ ប្រសិនបើទ្រង់មិនព្រមឡាយព្រះហស្តលេខាលើសន្ធិសញ្ញាបំពេញបន្ថែម ព្រំដែនរវាងកម្ពុជា-វៀតណាម នោះទេ។ កាលណោះ លោក ហ៊ុន សែន គំរាមថា បើព្រះមហាក្សត្រនៅតែអល់អែកទៀត ដែលនាំឲ្យរំខានដល់កិច្ចការរបស់ខ្លួន របបរាជានិយមនឹងមិនមានន័យខ្លឹមសារអ្វីនោះទេ។ លោកបន្តថា «ខ្ញុំ និយាយជាមួយសម្ដេចក្រុមព្រះហើយ ខ្ញុំថាព្រះអង្គ និយាយប្រាប់ឯកឧត្ដម ស៊ុន ចាន់ថុល កុល ផេង អ៊ឹង កន្ថាផាវី និង ស៊ីសុវត្ថិ កណ្ណិថា នៅលើយន្តហោះ។ ខ្ញុំប្រាប់សម្ដេចក្រុមព្រះតាមទូរស័ព្ទថា ព្រះអង្គបើលើកនេះវាពិបាកស៊ីញេ ត្រូវពិនិត្យឡើងវិញ យើងគួរទុករាជានិយម ឬធ្វើសាធារណរដ្ឋ ឲ្យវាមានប្រធានាធិបតីតែម្ដង ឬយ៉ាងហោចណាស់ដាក់បញ្ចូលក្នុងរដ្ឋធម្មនុញ្ញមាត្រាណាមួយ។ កាលណាដាក់ទៅក្នុងរង្វង់ប៉ុន្មានថ្ងៃត្រូវចុះហត្ថលេខា ឬឡាយព្រះហស្តលេខា បើមិនចុះហត្ថលេខា ឬឡាយព្រះហស្តលេខាទេ គឺនឹងចូលជាធរមាន។»
បើទោះជាបែបណា នៅក្នុងមាត្រា៧ នៃរដ្ឋធម្មនុញ្ញ កថាខណ្ឌទី៣ ចែងថា អង្គព្រះមហាក្សត្រ មិនអាចនរណារំលោភបំពានបានឡើយ។
ផ្ទុយពីនេះ លោក កឹម សុខា យល់ឃើញថា ការដឹកនាំក្នុងពេលបច្ចុប្បន្ននេះ គឺហាក់ផ្ទុយស្រឡះពីអ្វីដែលមានចែងក្នុងក្របខ័ណ្ឌនៃច្បាប់ ជាពិសេសរដ្ឋធម្មនុញ្ញ ដែលជាច្បាប់កំពូលរបស់ប្រទេស។ លោកបន្តថា ក្នុងសម័យសង្គមរាជានិយម ព្រៃឈើ រ៉ែ សម្បត្តិធនធានធម្មជាតិ គឺព្រះបរមរតនកោដ្ឋ រក្សាទុកបានយ៉ាងគង់វង្សសម្រាប់មនុស្សជំនាន់ក្រោយរបស់ព្រះអង្គ។ ម្យ៉ាងវិញទៀត ក្នុងសម័យនោះ ព្រះមហាក្សត្រ ទ្រង់បានបើកឲ្យមានសមាជជាតិ ដែលជាមូលដ្ឋានគ្រឹះនៃលទ្ធិប្រជាធិបតេយ្យថែមទៀតផង ក៏ប៉ុន្តែសព្វថ្ងៃនេះវិញ លោក កឹម សុខា យល់ឃើញថា រដ្ឋាភិបាលពុំដែលបានអនុវត្តម្ដងណាឡើយ បើទោះជាមានបញ្ញត្តដោយច្បាប់ក៏ដោយចុះ។
មាត្រា១៤៧ និងមាត្រា១៤៨ថ្មី នៃរដ្ឋធម្មនុញ្ញចែងថា សមាជជាតិបើកឲ្យប្រជារាស្ត្រជ្រាបដោយផ្ទាល់ អំពីកិច្ចការផ្សេងៗដែលជាប្រយោជន៍ជាតិ ហើយលើកបញ្ហា និងសំណូមពរជូនរដ្ឋអំណាចដោះស្រាយ។ ប្រជារាស្ត្រខ្មែរទាំងពីរភេទ មានសិទ្ធិចូលរួមនៅក្នុងសមាជជាតិ។ សមាជជាតិ ប្រជុំម្ដងក្នុងមួយឆ្នាំនៅដើមខែធ្នូ តាមការកោះអញ្ជើញរបស់នាយករដ្ឋមន្ត្រី។
សាស្ត្រាចារ្យផ្នែកវិទ្យាសាស្ត្រនយោបាយ លោក សូ ចន្ថា យល់ឃើញថា ប្រមុខរដ្ឋាភិបាលជាញឹកញាប់ តែងប្រើអំណាចដើម្បីធ្វើឲ្យដៃគូចុះខ្សោយ ជាពិសេសច្បាប់ដែលមានហើយ គឺកម្រឃើញអនុវត្តណាស់។ លោកបន្តថា «ប្រសាសន៍របស់លោកនាយក រដ្ឋមន្ត្រី ហ៊ុន សែន មួយចំនួនមានការអនុវត្តផ្ទុយពីអ្វីដែលមានចែងនៅក្នុង រដ្ឋធម្មនុញ្ញ និងច្បាប់នានា។ មានន័យថា ក្នុងរដ្ឋធម្មនុញ្ញបានចែងយ៉ាងច្បាស់ថា គ្មានអ្នកណាអាចប៉ះពាល់ព្រះមហាក្សត្របានទេ ប៉ុន្តែយើងឃើញប្រមុខរដ្ឋាភិបាលកន្លងមក គំរាមដល់ព្រះករុណា ជាដើម។»
ប្រតិកម្មនឹងការលើកឡើងនេះ លោក ទិត្យ សុធា មន្ត្រីនាំពាក្យអង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ត្រី ចាត់ទុកថា នេះជារបៀបរបស់គណបក្សប្រឆាំង តែងតែពុំទទួលស្គាល់ការពិត ពីអ្វីដែលរដ្ឋាភិបាលសម្រេចបាននូវសមិទ្ធផលម្ដងណាឡើយ ជាពិសេសតែងរកគ្រប់មធ្យោបាយ ដើម្បីទម្លាក់កំហុសប្រឆាំងរដ្ឋាភិបាល ក្នុងន័យដើម្បីចំណេញផលប្រយោជន៍របស់ខ្លួន។
អ្នកវិភាគនយោបាយ កត់សម្គាល់ថា ទម្លាប់បានក្លាយជាកម្មវត្ថុធំជាងច្បាប់នៅកម្ពុជា ពិសេសជាញឹកញាប់ បញ្ហានេះច្រើនតែអ្នកធំមានឥទ្ធិពលទៅលើច្បាប់។ ទាំងនេះ បានក្លាយជាភាពចម្រូងចម្រាសនៅក្នុងជីវិតនយោបាយ ដែលនៅតែពុំទាន់អាចរកចំណុចរួមបាន បើទោះគណបក្សជាប់ឆ្នោតទាំងពីរ បង្កើតឲ្យមានវប្បធម៌សន្ទនាហើយក្ដី។ ព្រះមហាវីរក្សត្រ នរោត្តម សីហនុ មុនយាងចូលទិវង្គត ព្រះអង្គតែងប្រាថ្នាចង់ឃើញអ្នកនយោបាយធ្វើការរួមគ្នា និងឯកភាពជាតិតែមួយ។
បើទោះជាបែបណា នៅក្នុងពិធីគម្រប់ខួប ៣ឆ្នាំ នៃការយាងសោយទិវង្គតរបស់ព្រះបរមរតនកោដ្ឋ លោក កឹម សុខា បានបដិសេធពីបំណងដែលថា គណបក្សជំទាស់កំពុងរកមធ្យោបាយជួបសម្ដេចក្រុមព្រះ ដើម្បីរួមបក្សតែមួយ ប៉ុន្តែទន្ទឹមនឹងនេះ លោក កឹម សុខា បើកចំហឲ្យមានការឯកភាពអ្នកប្រជាធិបតេយ្យមួយដ៏ពិតប្រាកដពីគ្រប់ គណបក្សនយោបាយ៕
Leave that Khmer traitor Sihanouk alone. He has been the root cause of current Khmer suffering.
ReplyDelete