តុលាការ​ ចេញដីកា ឲ្យ​លោក សម រង្ស៊ី ចូលខ្លួន​ មកតុលាការ ពាក់​ព័ន្ធ​ នឹងសំណុំរឿង ​លោក ហុង សុខហួរ​​ | Court issues summons for Sam Rainsy to appear re Hong Sok Huor case

ប្រធានគណបក្ស​សង្រ្គោះជាតិ លោក សម រង្ស៊ី កាលពីកន្លងទៅ​(រូបថតដោយ

ស្តាប់សំឡេង៖​

ចម្លងទុក

តុលាការ​ ចេញដីកា ឲ្យ​លោក សម រង្ស៊ី ចូលខ្លួន​ មកតុលាការ ពាក់​ព័ន្ធ​ នឹងសំណុំរឿង ​លោក ហុង សុខហួរ​​

VOD / វីអូឌី | ២០ វិច្ឆិកា ២០១៥

ចៅក្រម ​ស៊ើបសួរ ​នៃ​សាលាដំបូង រាជធានីភ្នំពេញ លោក កៅ វណ្ឌី​ នៅថ្ងៃសុក្រនេះ បា​ន​ចេញ ដីកា បង្គា​ប់​ ឲ្យ​​ប្រធាន គណបក្ស សង្រ្គោះជាតិ លោ​ក សម រង្ស៊ី ដែលកំពុង​ នៅក្រៅប្រទេស​ ចូល​ខ្លួន​ មកតុលាការ នៅ​ដើមខែក្រោយ​ ពាក់ព័ន្ធ​ នឹង​សំណុំរឿង អតីត សមាជិក ​ព្រឹទ្ធសភា លោក ហុង សុខហួរ ករណី​ ក្លែង​បន្លំ ឯកសារ។​

លោក ហុង សុខហួរ ត្រូវ បានឃុំខ្លួន បណ្តោះអាសន្ន នៅពន្ធនាគារ ព្រៃ ស តាមការ ចោទប្រកាន់ ៣ករណី, គឺ៖ បទក្លែង ​ឯ​កសារ​ សាធារណៈ, ប្រើប្រាស់ ឯកសារ សាធារណៈ ក្លែងក្លាយ, និងញុះញង់ បង្ក ឲ្យមាន ភាពវឹកវរ ធ្ងន់ធ្ងរ​ ដល់សន្តិសុខ សង្គម។

បើ ​តាម​ដីកានោះ លោក សម រង្ស៊ី ដែល​កំពុង​ ប្រឈម ​នឹង​ដីកា ចាប់ខ្លួន ក្នុងសំណុំរឿង កាលពី៧ឆ្នាំ មុន​ ត្រូវ ចូល​ខ្លួន​ មកតុលា​ការ​ នៅថ្ងៃ​ ទី​៤ ខែធ្នូ ឆ្នាំ​២០១៥ វេលា ម៉ោង​៨ និង៣០ នាទី​ព្រឹក។ ​ ដីការ ​បញ្ជាក់ថា៖ «ក្នុងករណី មិន​ ចូល​ខ្លួន​ តាម​កាលកំណត់​ ខាងលើ​នេះ​ទេ, យើង​ នឹង​ចេញ ដីកា​ បង្គាប់​ ឲ្យ​នាំ​ខ្លួន​ ឬ​ដីកា បង្គាប់ ​ឲ្យ​ចាប់ខ្លួន​ ទៅតាមច្បាប់។»   

បើ តាមដីកានេះ​ ការ​ចូល​ខ្លួន​ មក​តុលាការ​ ទាក់ទង ​នឹង​បទសមគំនិត ក្នុងអំពើ​ ក្លែង​បន្លំ​ ឯក​សារ​ សាធារណៈ,​ ប្រើប្រាស់​ ឯកសារ​ សាធារណៈ ក្លែង, ​និងញុះញង់​ បង្ក​ ឲ្យ​មាន ​វឹងកវរ ធ្ងន់​ ដល់សន្តិសុខ សង្គម ប្រព្រឹត្ត ទៅកាល ពីថ្ងៃ ទី​១២ និង​១៣ ខែសីហា ឆ្នាំ​២០១៥​។  ដីកា​ បន្ត​ថា​, អំពើ​ ដែលមាន បញ្ញត្តិ នឹង​ផ្តន្ទាទោស ​​តាមមាត្រា ​២៩,​ ៦២៩, ​​៦៣០​ និង​​៤៩​៥​ នៃ​ក្រមព្រហ្មទណ្ឌ។​

ពីទីក្រុង ប៉ារីស ប្រទេស ​បារាំង កាលពីថ្ងៃ ទី​២៥ ខែតុលា លោក នាយករដ្ឋមន្រ្តី ហ៊ុន សែន បាន​ព្រមាន ថា, ​លោក​ សម រង្ស៊ី​ អាច នឹង​​ជាប់ ពន្ធនាគារ ដោយ​លោក ​ថា, ប្រធាន គណបក្ស​ ប្រឆាំង រូបនេះ ​បានឲ្យ​ទំព័រ ហ្វេសប៊ុក​ របស់លោក​​ ក្នុង​ការ ​បង្ហោះ ​ឯក​សារ ​របស់ ​អតីត ​​សមាជិក ​ព្រឹទ្ធសភា គណបក្ស​ សម រង្ស៊ី លោក ហុង សុខហួរ។​​  លោក ហ៊ុន សែន បាន​ថ្លែង ​ធ្ងន់ៗ ​ករណី​ លោក ហុង សុខហួរ ថា​, បានប្រព្រឹត្ត​ បទល្មើស ជាក់ស្តែង ដោយ​សារ​ តែ​​​ លោក​ បាន​ធ្វើ អ​ត្ថាធិប្បា​យ ភ្ជា​​ប់ ជាមួ​យ ​​ឯកសារ ​លើ​ប្រ​ ព័ន្ ធសង្គម ហ្វេសប៊ុក។

លោក​ មានប្រសាសន៍ ថា៖ «ហើយ​ អាម្ចាស់ Page [ទំព័រ] ជានរណា ជា​រង្ស៊ីហ្មង [សម រង្ស៊ី]។  អញ្ចឹង​ទេ អាច ដល់ម្នាក់ហ្នឹង, ហើយ បើ ដល់ម្នាក់​ហ្នឹង,​ ម្តងនេះ ខ្ញុំ ឈប់​លើក លែងទោស ឲ្យ​ហើយ។  ខ្ញុំ លើក​លែងទោស​ ឲ្យម្នា​ក់នេះ ពីរដង រួច មកហើយ​។   លើកនេះ អត់ទេ។  លើកនេះ អត់ទេ។  ព្រៃ ស។   អត់មាន ទទួលស្គាល់ អ្នកណា ថាស្អី នេះទេ។» 

លោក​ បន្ថែម​ថា៖ «និយាយ អញ្ចឹងថា, ​អាងគុក, អាង​ច្រវាក់, អាងទាហាន, អាងប៉ូលិស។  ចឹង​​ កា​ន់អំណាច។  បើ​ មិន​ឲ្យ​ អាងអាហ្នឹង,​ អាងអីគេ?  ឥឡូវ​សួរ, គាត់ កាន់អំណាច, គាត់ អាងអី?  វា មិនដែល ម៉ែអាណា កាន់អំណាច ឲ្យ​ អាងទានធូបទេហី។» ​

វីអូឌី មិនទាន់ អាច ទាក់ទង​ លោក សម រង្ស៊ី ដើម្បី​ សុំ​ ការឆ្លើយត បភ្លាមៗ ​លើបញ្ហានេះ ​បាន​ នៅ​ឡើយទេ។  តំណាងរាស្រ្ត គណបក្ស សង្រ្គោះជាតិ អ៊ូ ច័ន្ធ​ឫទ្ធិ ចាត់ទុក ចំណាត់ការ របស់ តុលាការ​ ជារឿង នយោបាយ, ហើយ​ លោក អំពាវនាវ ឲ្យអ្នក នយោ​បាយ​​ យក​បញ្ហា​នេះ​ មកដោះស្រាយ រួមគ្នា ជាជាង ចំណាត់ការ របស់ តុលាការ។​

អ្នកនាំពាក្យ​ គណបក្ស ប្រជាជនកម្ពុជា លោក សុខ ឥសាន ចាត់ទុក ថា, ​នេះ ​ជា​ចំណាត់ការ របស់ តុលាការ​ មិន​ ពាក់​ព័ន្ធ​ នឹង​រឿង នយោ​បាយ នោះទេ។

លោក ហុង សុខហួរ ត្រូវ បានសមត្ថកិច្ច ចាប់ខ្លួន ពីរថ្ងៃ បន្ទាប់ ពីលោក នាយករដ្ឋមន្ត្រី ហ៊ុន សែន បានចេញបញ្ជា ឲ្យចាប់ខ្លួន ដោយ​ចោទ ថា, ក្លែង ឯកសារ សន្ធិសញ្ញា កម្ពុជា និងវៀតណាម នៅឆ្នាំ១៩៧៩។  ប៉ុន្តែ គណបក្ស សង្គ្រោះជាតិ បានចាត់ទុក ករណីនេះ ជា​រឿង នយោបាយ មិនមែន ជាបទល្មើស ជាក់ស្តែង និងជាការសម្តែង មតិ របស់ សមាជិក ព្រឹទ្ធសភា។  សង្គមស៊ីវិល មួយចំនួន និងគណបក្ស សង្រ្គោះជាតិ ចាត់ទុក ករណី​ នេះ ជារឿង នយោបាយ។

កន្លងទៅ លោក ហ៊ុន សែន ក៏បាន​ថ្លែង​​ ឲ្យ​អ្នក​ ដែល​រត់ គេចខ្លួន​ ទៅ​ក្រៅ​ប្រទេស​ ពាក់​ព័ន្ធ​ នឹងករណី លោក ហុង សុខហួរ ដែល​ត្រូវ​ បាន​ចោទប្រកាន់ ​ថា ​ក្លែង​ឯក​សារ ចូលខ្លួន​​ មក​សារភាព​ នៅពេលនេះ៕