អ្នកនាំពាក្យ ទីស្តីការ គណៈរដ្ឋមន្រ្តី លោក ផៃ ស៊ីផាន
លោក ផៃ ស៊ីផាន បដិសេធ ព័ត៌មាន ថា, រដ្ឋាភិបាល ហាម មិនឲ្យ លក់សំបុត្រ យន្តហោះ ឲ្យលោក សម រង្ស៊ី
VOD / វីអូឌី | ១៥ វិច្ឆិកា ២០១៥
អ្នកនាំពាក្យ
រដ្ឋាភិបាល បានបដិសេធ នឹងព័ត៌មាន ថា, រដ្ឋាភិបាល បានហាមឃាត់ កុំឲ្យមាន
ការលក់សំបុត្រ យន្តហោះ ដល់ប្រធាន គណបក្ស សង្រ្គោះជាតិ លោក សម រង្ស៊ី
ក្នុងការ វិលត្រឡប់ មក កម្ពុជាវិញ។
អ្នកនាំពាក្យ ទីស្តីការ គណៈរដ្ឋមន្រ្តី លោក
ផៃ ស៊ីផាន
បានសរសេរ នៅលើ ហ្វេសប៊ុក របស់លោក ថា, បណ្តាញ សារព័ត៌មាន មួយចំនួន បានសួរលោក ពីព័ត៌មាន ថា, រដ្ឋាភិបាល បានហាមប្រាម ដល់ភ្នាក់ងារ ទេសចរណ៍
ទាំងអស់ ក្នុងការ លក់សំបុត្រ យន្តហោះ ឲ្យលោក សម រង្ស៊ី។ លោក បន្តថា,
ព័ត៌មាន នេះ ក៏បានទទួល ស្គាល់ ដោយមន្ត្រី ជាន់ខ្ពស់ របស់ គណបក្សសង្រ្គោះជាតិ
ផងដែរ។
លោក ផៃ ស៊ីផាន បានបញ្ជាក់ ថា៖ «នៅក្នុងព័ត៌មាន ប្រឌិតនេះ រាជរដ្ឋាភិបាល កម្ពុជា ពុំមាន បំណង ឬទិសដៅ នៃមធ្យោបាយ ណាមួយ
ដែលបង្ក ឧបសគ្គ និងដំណើការ របស់ តុលាការ ឬមន្ត្រី យុត្តិធម៌ និងអាជ្ញាធរ ដែលពាក់ព័ន្ធ នៃការអនុវត្ត សាលក្រម ស្ថាពរ របស់ តុលាការ នេះឡើយ។ ព័ត៌មាននេះ គឺ ជាយុទ្ធនាការ បំពុល បរិយាកាស តែប៉ុណ្ណោះ។»
តាមគម្រោងលោក សម រង្ស៊ី នឹងត្រឡប់មកដល់ព្រលានយន្តហោះអន្តរជាតិភ្នំពេញ នៅល្ងាចថ្ងៃទី១៦ ខែវិច្ឆិកានេះ។
វីអូឌីមិនទាន់អាចសុំការឆ្លើយតបពីមន្រ្តីគណបក្សសង្រ្គោះជាតិបាននៅឡើយទេ។
ពីប្រទេសកូរ៉េ លោក សម រង្ស៊ី
កាលពីថ្ងៃសៅរ៍
បានថ្លែងថាលោកនឹងត្រឡប់មកប្រទេសកម្ពុជាតាមគម្រោងរបស់លោក
បើទោះជាមានការចាប់ខ្លួនក៏ដោយ ដោយបញ្ជាក់ថាបើទោះលោកត្រូវស្លាប់
ក៏លោកនឹងត្រឡប់មកកម្ពុជាវិញ។ លោកមានប្រសាសន៍ថា៖ «យើងអត់តក់ស្លុតទេក្មួយ
យើងត្រូវរក្សាជំហរយើងឲ្យរឹងមាំ។ ឥឡូវក្មួយម្នាក់សួរខ្ញុំ
ថាគេតាមចាប់សម រង្ស៊ី សម រង្ស៊ី ខា្លចទេ អត់ខ្លាចទេ។ សម រង្ស៊ី កឹម
សុខា ដូចកូនខ្មែរទាំងអស់ សុខចិត្តបូជាជីវិតឲ្យតែជាតិបានរស់…។ ដូច្នេះខ្ញុំអត់ខ្លាចទេ ចង់យកខ្ញុំទៅធ្វើអីធ្វើទៅ
តែទោះជាយ៉ាងណាក៏ដោយ ព្រលឹងខ្ញុំនៅតែស្រឡាញ់ខ្មែរ
តាមការពារខ្មែរជានិច្ច។»
លោកបន្ថែមថា៖ «…ខ្ញុំត្រូវតែចូល
ទៅវិញ ដើម្បីទៅសង្រ្គោះជាតិរបស់យើង ឲ្យទាល់តែបាន។
គម្រោងខ្ញុំអត់មានការផ្លាស់ប្តូរទេ បើត្រូវស្លាប់ក៏ស្លាប់
ប៉ុន្តែស្លាប់ជាខ្មែរ មិនស្លាប់ជាអ្នកបម្រើបរទេសដាច់ខាត។»
លោក សម រង្ស៊ី
ត្រូវបានតុលាការចេញដីកាបង្គាប់ឲ្យសមត្ថកិច្ចចាប់ខ្លួនដាក់
ពន្ធនាគារ២ឆ្នាំ ពីបទបរិហាកេរ្តិ៍ជាសាធារណៈនិងញុះញង់ឲ្យមានការរើសអើង
ដែលប្តឹងដោយ លោក ហោ ណាំហុង រដ្ឋមន្រ្តីក្រសួងការបរទេសកម្ពុជា
បន្ទាប់ពីលោក សម រង្ស៊ី ថ្លែងនៅសារមន្ទីរជើងឯកកាលពីឆ្នាំ២០០៨ថាលោក ហោ
ណាំហុង ជាអតីតមេគុកបឹងត្របែកសម័យខ្មែរក្រហម។
ថ្មីៗនេះ លោក ហ៊ុន សែន បានហៅលោក សម រង្ស៊ី ថាជា «កូនអាក្បត់ជាតិ», ហើយ លោកក៏បានព្រមានប្រើប្រព័ន្ធច្បាប់ចាត់ការមេបក្សប្រឆាំងរូបនេះ
ទាក់ទងនឹងការចោទប្រកាន់ថាលោកមានបំណងបង្អាក់ការបោះឆ្នោតនៅកម្ពុជា។
លោក ផៃ ស៊ីផាន បានបដិសេធថារដ្ឋាភិបាលមិនជាប់ពាក់ព័ន្ធនឹងចំណាត់ការផ្លូវច្បាប់លោក សម រង្ស៊ី នោះទេ។ លោកបញ្ជាក់ថា៖ «ចំណាត់ការរបស់តុលាការគឺជាករណីបុគ្គលនិងបុគ្គលសុទ្ធសាធ
ហើយមិនមែនជាការបញ្ចេញមតិឬការងារនយោបាយទេ។
ករណីចំណាត់ការរបស់តុលាការគឺជាហេតុផលនៃយុត្តិធម៌រវាងអង្គហេតុនិងអង្គច្បាប់។ ករណីអភ័យឯកសិទ្ធិគឺជារឿងដាច់ដោយឡែកមួយទៀតដែលជាការទទួលខុសត្រូវរបស់រដ្ឋសភា៕»
No comments:
Post a Comment