រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ (ពីឆ្វេងទី៣)
ថ្លែងក្នុងវេទិកាប្រចាំឆ្នាំស្ដីពីការផ្សារភ្ជាប់ទំនាក់ទំនងរវាង
អ្នកសារព័ត៌មានអាជីព ពលរដ្ឋអ្នកសារព័ត៌មាន និងនិស្សិតអ្នកសារព័ត៌មាន
កាលពីថ្ងៃទី៨ ខែវិច្ឆិកា ឆ្នាំ២០១៥។ RFA/Sereymuny
លោក ខៀវ កាញារីទ្ធ ជំរុញ ឲ្យស្ថាប័ន ទាំងអស់ ត្រូវ ផ្ដល់ព័ត៌មាន ដល់អ្នក សារព័ត៌មាន
RFA / វិទ្យុ អាស៊ី សេរី | ៨ វិច្ឆិកា ២០១៥
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ថ្លែងថា ជនដៃដល់សម្លាប់អ្នកសារព័ត៌មាន ក្រសួងមានសមត្ថកិច្ចត្រូវតែចាប់យកមកផ្ដន្ទាទោសតាមផ្លូវច្បាប់។ ទន្ទឹមនឹងនេះដែរ លោកក៏ជំរុញឲ្យស្ថាប័នទាំងអស់ ត្រូវផ្ដល់ព័ត៌មានដល់អ្នកសារព័ត៌មាន។
ការថ្លែងរបស់ លោក ខៀវ កាញារីទ្ធ នេះ ស្ថិតនៅក្នុងវេទិកាប្រចាំឆ្នាំស្ដីពីការផ្សារភ្ជាប់ទំនាក់ទំនង រវាងអ្នកសារព័ត៌មានអាជីព ពលរដ្ឋអ្នកសារព័ត៌មាន និងនិស្សិតអ្នកសារព័ត៌មាន ដែលរៀបចំដោយមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យនៅក្រុងភ្នំពេញ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មានប្រសាសន៍ថា មន្ត្រីអាជ្ញាធរគ្រប់ជាន់ថ្នាក់ ត្រូវតែផ្តល់ព័ត៌មានដល់អ្នកកាសែតអាជីព និងពលរដ្ឋអ្នកសារព័ត៌មាន នៅពេលដែលមានរឿងអ្វីមួយកើតឡើង ដោយមិនត្រូវមើលងាយ និងជេរប្រមាថអ្នកសារព័ត៌មាននោះទេ។ ដើម្បីឲ្យព័ត៌មានមានតម្លាភាពត្រឹមត្រូវ និងភាពសុចរិតនៅពេលចេញផ្សាយជាសាធារណៈ គឺទាមទារឲ្យមានអ្នកពាក់ព័ន្ធ ត្រូវផ្តល់កិច្ចសម្ភាសន៍ ជាពិសេសអាជ្ញាធរមានសមត្ថកិច្ច៖ «អ្នកដែលត្រូវសម្លាប់ និយាយរួមមិនថាតែអ្នកកាសែតទេ នរណាក៏ដោយ ឲ្យសម្លាប់មនុស្ស គឺត្រូវមានទោស ប៉ុន្តែរាល់ថ្ងៃនេះ យើងមិនទាន់បិទសំណុំរឿងទាំងនោះទេ។»
លោកអះអាងថា ក្រសួងព័ត៌មាន និងអង្គការសង្គមស៊ីវិលជាច្រើននៅកម្ពុជា កំពុងធ្វើសេចក្តីព្រាងច្បាប់ស្ដីពីសិទ្ធិទទួលបានព័ត៌មាន ដើម្បីការពារអ្នកសារព័ត៌មាន និងដាក់ទោសមន្ត្រីអាជ្ញាធរទាំងឡាយណា ដែលបដិសេធមិនព្រមផ្តល់ព័ត៌មានដល់អ្នកសារព័ត៌មាន។
ពលរដ្ឋអ្នកសារព័ត៌មាននៅខេត្តពោធិ៍សាត់ លោក ម៉ាប់ សុយ និយាយថា កាលពីប៉ុន្មានថ្ងៃកន្លងទៅថ្មីៗនេះ លោកត្រូវបានមន្ត្រីប៉ូលិសចរាចរណ៍ក្រុងពោធិ៍សាត់ គំរាមធ្វើបាប និងគំរាមចាប់ដាក់គុក នៅពេលដែលលោកបានឈរថតសកម្មភាពមិនប្រក្រតីនៃការផាកពិន័យរបស់ មន្ត្រីប៉ូលិសចរាចរណ៍លើអ្នកបើកបរក្នុងពេលធ្វើដំណើរ៖ «ពេលដែល ខ្ញុំមកហ្នឹង គឺមានការផាកខុសប្រក្រតី ផាកលើសចំនួនកំណត់។ ខ្ញុំក៏លួចថតបាន ចឹងហើយគេក៏ចាប់យកទូរស័ព្ទដៃទារលុបរូបថត ហើយបើយើងមិនលុបទេ គេងនឹងប្ដឹងខ្ញុំ ហើយអាចចាប់ដាក់គុកបាន។»
ជុំវិញបញ្ហានេះ នាយកប្រតិបត្តិនៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង មានប្រសាសន៍ថា ពលរដ្ឋគ្រប់រូបមិនត្រូវបានរឹតត្បិតសេរីភាពនៃការផ្សាយព័ត៌មានដោយ ច្បាប់នោះទេ ប៉ុន្តែការប្រឈមមុខនឹងអាជ្ញាធរ គឺជារឿងដែលពលរដ្ឋអ្នកសារព័ត៌មានតែងជួបប្រទះ និងរងនូវការមាក់ងាយពីមន្ត្រីអ្នកមានអំណាចមួយចំនួន ដែលមិនសូវយល់ពីតម្លៃព័ត៌មាន និងសិទ្ធិក្នុងការទទួលបានព័ត៌មាន៖ «ប្រឈម ពិបាកដែរជាមួយនឹងអាជ្ញាធរ ពេលគាត់ទៅសម្ភាសទៅយកព័ត៌មានចឹងទៅ គេនិយាយថា ស្អីហា! មកពីណា? មានលិខិតសម្គាល់ទេ? តាមពិតចឹងៗមិនចាំបាច់មានលិខិតទេ ព្រោះជាសិទ្ធិសេរីភាពនៃការយកព័ត៌មាន។»
នៅទីក្រុងភ្នំពេញ មានអង្គការសង្គមស៊ីវិលជាង ២០ស្ថាប័ន (២២ស្ថាប័ន) បានរួមគ្នាធ្វើយុទ្ធនាការបញ្ឈប់និទ្ទណ្ឌភាព ឬភាពគ្មានទោសពៃរ៍នៅកម្ពុជា រយៈពេល ៧ថ្ងៃ គឺចាប់ពីថ្ងៃទី២ ដល់ថ្ងៃទី៨ ខែវិច្ឆិកា និងស្នើដល់រដ្ឋាភិបាល ត្រូវចាត់វិធានការចំពោះជនសង្ស័យដែលសម្លាប់អ្នកកាសែតកន្លងមក។
អង្គការសង្គមស៊ីវិលលើកឡើងថា អ្នកសារព័ត៌មានតែងប្រឈមនឹងការគំរាម ការប្រើអំពើហិង្សាដោយសារវិជ្ជាជីវៈរបស់ពួកគេ។ អ្នកសារព័ត៌មានចំនួន ១៣នាក់ ត្រូវឃាតកបាញ់សម្លាប់តាំងពីឆ្នាំ១៩៩៤។ ជុំវិញករណីសម្លាប់អ្នកកាសែតនេះ មានតែ ២ករណីប៉ុណ្ណោះដែលតុលាការលើកមកកាត់ក្ដី។
កាលពីថ្ងៃទី៣០ តុលា កន្លងទៅ អ្នកយកព័ត៌មានប្រចាំខេត្តបន្ទាយមានជ័យ ចំនួន ២រូប ដែលអ្នកសារព័ត៌មានក្នុងស្រុកអះអាងថា ពួកគេត្រូវបានមន្ត្រីប៉ូលិសការពារព្រំដែនម្នាក់ឈ្មោះ លោក ប្រុស ហៅ ម៉ាប់ ប្រចាំការនៅច្រករបៀងចំបក់ ស្រុកម៉ាឡៃ យកកាំបិតផ្គាក់ដេញកាប់ និងបោកកាមេរ៉ាថតរូបខូចអស់មួយគ្រឿង នៅពេលចុះយកព័ត៌មាន។
អ្នកកាសែតនោះ បានដាក់ពាក្យប្ដឹងទៅសាលាដំបូងខេត្តបន្ទាយមានជ័យ ឲ្យចាត់វិធានការផ្លូវច្បាប់ទៅលើអ្នកប្រព្រឹត្តិ ប៉ុន្តែមកទល់ពេលនេះ ពុំទាន់មានដំណោះស្រាយទេ។
អង្គការសង្គមស៊ីវិលលើកឡើងថា រយៈពេលចុងក្រោយនេះ អ្នកសារព័ត៌មានអាជីព និងពលរដ្ឋអ្នកសារព័ត៌មានមួយចំនួន ត្រូវបានគេមើលឃើញថា រងការគំរាមកំហែងពីអាជ្ញាធរអ្នកមានអំណាច និងមានលុយមួយចំនួន ប៉ុន្តែរដ្ឋាភិបាលហាក់មិនមានចេតនាណាមួយជាក់លាក់ក្នុងការដោះស្រាយ និងចាប់ជនសង្ស័យមកផ្ដន្ទាទោសតាមផ្លូវច្បាប់នោះឡើយ៕
No comments:
Post a Comment