សាលាក្រុង ត្រៀមរៀបចំ សណ្ដាប់ធ្នាប់ ចរាចរណ៍ សម្រាប់ ពិធីបុណ្យ ឯករាជ្យជាតិ
RFA / វិទ្យុ អាស៊ី សេរី | ៨ វិច្ឆិកា ២០១៥
ព្រះមហាក្សត្រ សម្ដេចព្រះបរមនាថ នរោត្តម សីហមុនី
ប្រទានភ្លើងជ័យ និងដាក់កម្រងផ្កា នៅឯវិមានឯករាជ្យ រាជធានីភ្នំពេញ
នៅព្រឹកថ្ងៃទី ៩ វិច្ឆិកា ២០១៤។ RFA/Leng Maly
កម្ពុជា នឹងរៀបចំ ខួប អនុស្សាវរីយ៍ លើក ទី៦២ នៃទិវាបុណ្យ ឯករាជ្យជាតិ នៅថ្ងៃ ទី៩ ខែវិច្ឆិកា។ បើ ទោះជា ពិធីនេះ ត្រូវ បានប្រារព្ធ ធ្វើឡើង នៅទូទាំង ប្រទេសក្តី, ប៉ុន្តែ ពិធីថ្នាក់ជាតិ នឹងប្រារព្ធឡើង នៅទីតាំង វិមាន ឯករាជ្យ រាជធានី ភ្នំពេញ។
ដើម្បី រៀបចំពិធីនេះ សាលារាជធានីភ្នំពេញប្រកាសថា នឹងធ្វើការសម្រួលចរាចរណ៍ជាបណ្ដោះអាសន្ន ដោយមិនឲ្យយានជំនិះគ្រប់ប្រភេទ ឆ្លងកាត់ផ្លូវដែលនៅក្បែរទីតាំងវិមានឯករាជ្យ ដូចជាកំណាត់វិថីព្រះសីហនុ វិថីសម្ដេចសុធារស ផ្លូវសម្ដេចព្រះសុរាម្រិត និងកំណាត់ផ្លូវមួយចំនួនទៀតដែលនៅក្បែរៗនោះ។
ចំពោះកម្មវិធីវិញ សាលារាជធានីភ្នំពេញឲ្យដឹងថា នៅថ្ងៃទី៨ ខែវិច្ឆិកា មានពិធីដាក់កម្រងផ្កា និងគោរពវិញ្ញាណក្ខន្ធនៅវិមានឯករាជ្យ និងគោរពព្រះវិញ្ញាណក្ខន្ធសម្ដេចព្រះនរោត្តម សីហនុ ព្រះបរមរតនកោដ្ឋ ចាប់ពីម៉ោង ២ រហូតដល់ម៉ោង ៤រសៀល។
ចំណែកនៅថ្ងៃទី៩ ខែវិច្ឆិកា ព្រះរាជពិធីប្រទានភ្លើងជ័យ ចាប់ផ្ដើមពីម៉ោង ៥ព្រឹក រហូតដល់ម៉ោង ១១ថ្ងៃត្រង់ ហើយនៅថ្ងៃទី១១ វិច្ឆិកា ព្រះរាជពិធីពន្លត់ភ្លើងជ័យ នឹងចាប់ផ្ដើមពីម៉ោង ១រសៀលដល់ម៉ោង ៦ល្ងាច។
ប្រទេសកម្ពុជា បានស្ថិតនៅក្រោមអាណានិគមនិយមបារាំង រយៈពេល ៩០ឆ្នាំ គឺពីឆ្នាំ១៨៦៣ រហូតដល់ឆ្នាំ១៩៥៣។
ក្នុងខួប ៦២ឆ្នាំនៃទិវាឯករាជ្យជាតិនេះដែរ លោកប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) កាលពីថ្ងៃទី៣ វិច្ឆិកា បានផ្ញើលិខិតថ្វាយព្រះមហាក្សត្រខ្មែរ សម្ដេចព្រះបរមនាថ នរោត្តម សីហមុនី ដើម្បីចូលរួមអបអរសាទរថ្ងៃបុណ្យឯករាជ្យរបស់កម្ពុជា។ លោក បារ៉ាក់ អូបាម៉ា បានជូនពរពលរដ្ឋកម្ពុជា ទទួលនូវសេចក្តីសុខ ហើយថ្លែងថា សហរដ្ឋអាមេរិក នឹងបន្តពង្រឹងចំណងមិត្តភាពជាមួយប្រទេសកម្ពុជា ដើម្បីលើកកម្ពស់នូវវិបុលភាពរវាងប្រជាជាតិនៃប្រទេសទាំងពីរ។
ថ្ងៃទី៩ ខែវិច្ឆិកា ឆ្នាំ១៩៥៣-៩ ខែវិច្ឆិកា ឆ្នាំ២០១៥ ក៏ជាខួបលើទី៦២ឆ្នាំ នៃទិវាកំណើតកងយោធពលខេមរភូមិន្ទ។ កន្លងមក ក្រសួងការពារជាតិកម្ពុជា ក៏តែងប្រារព្ធពិធីនេះផ្លូវការជារៀងរាល់ឆ្នាំផងដែរ៕
No comments:
Post a Comment