អ្នកក្រុងតាខ្មៅ អះអាង ថា, អ្នក ប្រើហិង្សា លើតំណាងរាស្ត្រ ម្នាក់ ជាកងអង្គរក្ស
RFA / វិទ្យុ អាស៊ី សេរី | ២៥ វិច្ឆិកា ២០១៥
ជនជាប់ចោទវាយតំណាងរាស្ត្របក្សសង្គ្រោះជាតិ
ពេលបញ្ជូនចេញពីសាលាដំបូងរាជធានីភ្នំពេញ នៅថ្ងៃទី៤ ខែវិច្ឆិកា
ឆ្នាំ២០១៥ (ពីឆ្វេង៖ ម៉ៅ ហឿន សុត វណ្ណនី និង ចាយ សារិទ្ធ)។ RFA/Brach Chev
ក្រុមគ្រួសារ ជនជាប់ចោទ ម្នាក់ នៅខេត្ត ព្រៃវែង ដែលសារភាព ថា, ជាអ្នក វាយតំណាងរាស្ត្រ បក្សប្រឆាំង កាលពីថ្ងៃ ទី២៦ ខែតុលា នោះ បដិសេធ ថា, មិន សូវដឹងឮ អ្វី ពីការងារ លោក ម៉ៅ ហឿន ជិត ១០ឆ្នាំ មកហើយ បន្ទាប់ ពីលោក ចាកចេញ ពីផ្ទះ នៅភូមិកំណើត ទៅរស់នៅ និងធ្វើការ ក្នុងទីក្រុង ភ្នំពេញនោះ។ យ៉ាងណា នេះក្ដី, ប្រជាពលរដ្ឋ នៅក្រុង តាខ្មៅ មួយចំនួន អះអាង ថា, លោក ម៉ៅ ហឿន គឺ ជាកងអង្គរក្ស របស់ លោក នាយករដ្ឋមន្ត្រី ហ៊ុន សែន ដែលកាលណោះ ត្រូវ បានគេ ដឹកទៅ ចូលរួម បាតុកម្ម ទម្លាក់លោក កឹម សុខា និងឈាន ដល់ការ ប្រើអំពើហិង្សា លើតំណាងរាស្ត្រ។
លោក ម៉ៅ ហឿន គឺ ជាជនដៃដល់ ម្នាក់ ដែលចេញមុខ សារភាព នៅចំពោះ សមត្ថកិច្ច ថា, បានវាយ តំណាងរាស្ត្រ បក្សប្រឆាំង ពីររូប ឲ្យរងបួស ធ្ងន់ នៅជាប់ របង រដ្ឋសភា។
មានមាឌមាំ ដំបង ស្ថិតក្នុងវ័យ ៣៤ឆ្នាំ លោក ម៉ៅ ហឿន មានស្រុកកំណើតនៅភូមិ៥ ឃុំព្រែកខ្សាយ”ខ”’ ស្រុកពាមរ ខេត្តព្រៃវែង។ ប្អូនប្រុសបង្កើតជនជាប់ចោទ គឺលោក ម៉ៅ លីន ដែលមានសាក់រូបនាគនៅលើស្មាខាងស្ដាំ ស្លៀកកន្សែងអង្គុយក្រោមផ្ទះឈើចាស់តូចមួយ បានរៀបរាប់ថា លោក ម៉ៅ ហឿន បានចាកចេញពីផ្ទះទៅរស់នៅ និងធ្វើការក្នុងទីក្រុងភ្នំពេញ ជិត ១០ឆ្នាំហើយ បន្ទាប់ពីភរិយាស្លាប់។
លោក ម៉ៅ លីន ប្រាប់ថា អ្នកផ្ទះពិតជាមិនដឹងថា លោក ម៉ៅ ហឿន រស់នៅភ្នំពេញ ម្ដុំណា ហើយធ្វើការងារអ្វីនោះទេ ព្រោះគាត់មិនសូវទាក់ទងមកគ្រួសារនៅខែត្រឡើយ។ សូម្បីតែកូនលោក ក៏លោក ម៉ៅ ហឿន មិននឹកដើមដង្ហើមដល់ និងផ្ញើលុយឲ្យចាយ ឬសម្រាប់រៀនសូត្រដែរ៖ «គាត់ ចេញទៅ ធ្វើការ រកស៊ី នៅភ្នំពេញ, តែ ខ្ញុំ មិនដឹងថា, គាត់ រកស៊ី អីដែរ ព្រោះ នៅតែ ផ្ទះអ៊ីចឹង។ កាលនៅអ្នកលឿង, គាត់ ហៅម៉ូយឡាន។»
ប្អូនប្រុសបង្កើតរបស់
ជនជាប់ចោទ ឈ្មោះ ម៉ៅ ហឿន ឈ្មោះ លោក ម៉ៅ លីន
ផ្ដល់បទសម្ភាសន៍ដល់វិទ្យុអាស៊ីសេរី នៅឯខេត្តព្រៃវែង
កាលពីថ្ងៃទី១០ វិច្ឆិកា ឆ្នាំ២០១៥។ RFA/Tha Kitya
ចំពោះ ព័ត៌មាន ដែលផ្សព្វផ្សាយ ថា, បងប្រុសរបស់លោកវាយដំតំណាងរាស្ត្រគណបក្សសង្គ្រោះជាតិនោះ ធ្វើអោយក្រុមគ្រួសារមានការភ្ញាក់ផ្អើល។ លោក ម៉ៅ លីន ថា ពេលដឹងថា ម៉ៅ ហឿន ជាប់ពន្ធនាគារនោះ ពួកគាត់ក៏ចង់ទៅជួបសួរនាំរឿងនេះដែរ ប៉ុន្តែគ្មានលទ្ធភាពឡើយ ដោយសារជីវភាពខ្សត់ខ្សោយ៖ «ស្មានមិនដល់ ហើយមិនដឹងគ្មានពាក្យនិយាយ បើគាត់ធ្វើអ៊ីចឹងហើយ។ បើនៅផ្ទះជាមួយគ្នារាល់ថ្ងៃ យើងដឹងចិត្ត ហើយបើបែកគ្នាអ៊ីចឹងហើយ ខ្ញុំមិនដឹងអីទេ។»
ជាមួយគ្នានេះ មេភូមិ និងអ្នកជិតខាង ក៏អះអាងប្រហាក់ប្រហែលលោក ម៉ៅ លីន ដែរថា កាលពី ១០ឆ្នាំមុន គឺពួកគាត់ស្គាល់លោក ម៉ៅ ហឿន ច្បាស់ណាស់ថា គាត់ជាមនុស្សស្លូតត្រង់ធម្មតា ប៉ុន្តែ ១០ឆ្នាំចុងក្រោយនេះ ពួកគាត់មិនដឹងថា លោក ម៉ៅ ហឿន ផ្លាស់ប្ដូរអត្តចរិត និងមានការងារអ្វីនោះដែរ។
កាលពីថ្ងៃទី៣ ខែវិច្ឆិកា លោក ម៉ៅ ហឿន និងជនដៃដល់ ២នាក់ដែលរស់នៅក្រុងតាខ្មៅ ខេត្តកណ្ដាល បានចេញមុខសារភាពអំពីទង្វើវាយដំទាត់ធាក់លើតំណាងរាស្ត្រគណបក្ស សង្គ្រោះជាតិ ក្រោយពីលោកនាយករដ្ឋមន្ត្រី ហ៊ុន សែន បានប្រកាសអោយចូលខ្លួនសារភាពដោយខ្លួនឯង។ សាធារណជនទាមទារអោយសមត្ថកិច្ចបញ្ជាក់ជនជាប់ចោទទាំងនោះ ថាជាអ្នកណាពិតប្រាកដ។
បញ្ហានេះ អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា លោកមិនបានដឹងពីតួនាទី ឬការងាររបស់ជនជាប់ចោទទាំង ៣នាក់នោះឡើយ ព្រោះលោកមិនចាប់អារម្មណ៍ពីរឿងនេះ៖ «ចំពោះអ្វីដែលប្រកាសតាមក្រសួងមហាផ្ទៃ ក្មួយយកប៉ុណ្ណឹងទៅ។»
មានមតិជាច្រើនដាក់ការសង្ស័យថា ការចេញមុខសារភាពរបស់ជនដៃដល់ទាំងបីនាក់នោះ គឺមានអ្នករៀបចំ ព្រោះថា ពួកគេបានចេញមុខមកសារភាពក្នុងពេលតែមួយ ខណៈពួកគេមានទីលំនៅឆ្ងាយពីគ្នា និងបន្ទាប់ពីលោកនាយករដ្ឋមន្ត្រី ហ៊ុន សែន ប្រកាសឲ្យសមត្ថកិច្ចតាមចាប់ខ្លួនជនដៃដល់។
វិទ្យុអាស៊ីសេរី មិនអាចសុំការបំភ្លឺពីរដ្ឋលេខាធិការក្រសួងមហាផ្ទៃ លោក ឯម សំអាន ដែលជាសមាជិកមួយរូបនៃគណៈកម្មការស៊ើបអង្កេតករណីប្រើអំពើហិង្សា នេះបានទេ នៅថ្ងៃទី២៤ ខែវិច្ឆិកា ដោយលោកបញ្ជាក់យ៉ាងខ្លីថា លោកនៅក្រៅប្រទេស។
បើទោះបីជា សមត្ថកិច្ចមិនបញ្ជាក់លម្អិតពីជនជាប់ចោទទាំងនោះក្តី ប៉ុន្តែអ្នករត់ម៉ូតឌុប អ្នកលក់ដូរ និងពលរដ្ឋនៅក្រុងតាខ្មៅ មួយចំនួនអះអាងថា ពួកគាត់ស្គាល់អ្នកទាំង៣នោះច្បាស់ណាស់ ជាពិសេសលោក ម៉ៅ ហឿន គឺជាកងអង្គរក្សរបស់លោកនាយករដ្ឋមន្ត្រី ហ៊ុន សែន នៅក្នុងបន្ទាយអង្គរក្សក្រុងតាខ្មៅ។
អ្នករត់ម៉ូតូឌុបម្នាក់ សុំមិនបញ្ចេញឈ្មោះប្រាប់ថា គាត់តែងតែឃើញ ម៉ៅ ហឿន ពាក់ឯកសណ្ឋានជាកងអង្គរក្សជាញឹកញយ។ លុះពេលកើតហេតុ ហើយគេបង្ហោះតាមហ្វេសប៊ុក ទើបពួកគាត់មានការភ្ញាក់ផ្អើល៖ «ឧស្សាហ៍ចេញចូលនៅបន្ទាយអង្គរក្ស និងមកតាខ្មៅអីហ្នឹង ស្លៀកពាក់ខោអាវអង្គរក្សពណ៌អាចម៍សេះ។ មុនមានរឿងយើងមិនស្គាល់អី ប៉ុន្តែពេលមានរឿងរ៉ាវ ទើបគេដឹង អូ! អាមួយហ្នឹងហើយ។»
ចំណែកប្រជាពលរដ្ឋម្នាក់ទៀតប្រាប់ថា លោកមិនប្រាកដថា ជនជាប់ចោទទាំងនោះនៅក្នុងបន្ទាយណាទេ ប៉ុន្តែច្បាស់ថា លោក ម៉ៅ ហឿន គឺជាអង្គរក្ស ដោយសារធ្លាប់ឃើញជិះម៉ូតូពាក់អាវអង្គរក្ស៖ «ភាគ ច្រើនយើងស្គាល់ថា ជាអង្គរក្សអ៊ីចឹងតែម្ដង ព្រោះប្រជាការពារភូមិដែលគេដឹកយកទៅបាតុកម្មកាលណោះ ក្នុងមួយភូមិ ៣នាក់ ប្រាប់ខ្ញុំអ៊ីចឹងដែរ។ គេស្គាល់តែអ្នកខ្លះមិនហ៊ាននិយាយទេ ព្រោះគេការពារសុវត្ថិភាព។»
ផ្ទះគ្រួសារជនជាប់
ចោទឈ្មោះ ម៉ៅ ហឿន នៅភូមិ៥ ឃុំព្រែកខ្សាយ”ខ”’ ស្រុកពាមរ ខេត្តព្រៃវែង។
រូបថតថ្ងៃទី១0 ខែវិច្ឆិកា ឆ្នាំ២០១៥។ RFA/Tha Kitya
វិទ្យុអាស៊ីសេរី មិនអាចទាក់ទងលោកព្រះរាជអាជ្ញារង មាស ច័ន្ទពិសិដ្ឋ ដែលកាន់សំណុំរឿងនេះបានទេ នៅថ្ងៃទី២៤ ខែវិច្ឆិកា។
តំណាងរាស្ត្របក្សប្រឆាំងដែលរងគ្រោះ គឺលោក ញ៉យ ចំរើន អះអាងថា អ្នកប្រើហិង្សាលើលោកយ៉ាងកម្រោលនោះ គឺជាកងអង្គរក្ស ពោលគឺមិនមែនជាប្រជាពលរដ្ឋធម្មតាឡើយ៖ «ខ្ញុំជឿថា ជាប៉ូលិស ទាហាន ជាអាជ្ញាធរ ព្រោះតាមធម្មតា ប្រសិនបើជាបាតុករសាមញ្ញ ភាគច្រើនមានមកប្រុសស្រី ក្មេងចាស់ តូចធំ ប៉ុន្តែអ្នកដែលវាយខ្ញុំ គឺសុទ្ធតែប្រុសស្រាង កម្លាំងពេញដៃតែម្ដង។»
រូបភាពវីដេអូបង្ហោះលើបណ្ដាញសារព័ត៌មាន និងបណ្ដាញសង្គមហ្វេសប៊ុក បង្ហាញច្បាស់ថា ក្រុមអ្នកប្រើហិង្សាដែលអូសតំណាងរាស្ត្រទាំងពីររូបទម្លាក់ពីលើ រថយន្ត ហើយវាយធ្វើបាបនោះ ភាគច្រើនមានកន្សែង ឬក្រមារុំចង្កេះ ខ្លះរុំមុខ គឺស៊ីចង្វាក់គ្នាទៅនឹងភិនភាគរៀបរាប់ដោយសាក្សីអ្នកបើកឡានដឹកកង អង្គរក្សរបស់លោកនាយករដ្ឋមន្ត្រី ហ៊ុន សែន ចេញពីបន្ទាយនៅខេត្តកណ្ដាល។
ម្ចាស់ឡានឈ្នួលទាំងនោះលើកឡើងថា កងអង្គរក្សរបស់លោក ហ៊ុន សែន ទាំងនោះ ស្លៀកពាក់ស៊ីវិលបន្លំខ្លួនជាប្រជាពលរដ្ឋធម្មតា ដែលពួកគាត់ដឹកចេញពីបន្ទាយឈ្មោះថា "បញ្ជាការដ្ឋានកងអង្គរក្សសម្ដេច ហ៊ុន សែន" ឬហៅថា "បន្ទាយពោងលឿង" ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ មកបាតុកម្មជាមួយអ្នកគាំទ្រគណបក្សប្រជាជនកម្ពុជា រាប់ពាន់នាក់ទៀត៖ «ដឹកពីបន្ទាយពោងលឿង ទាំងអស់ សុទ្ធតែទាហានទាំងអស់...។ ប្រុសៗ ក្មេង អាយុ ៣០ចុះ។ អ្នកជិះក្នុងឡានគេមិននិយាយជាមួយយើងទេ គេទាក់ទងតែគ្នាទេ។»
ក្រុមអង្គការសង្គមស៊ីវិលលើកឡើងថា រឿងនេះប្រសិនបើអាជ្ញាធរ និងតុលាការចង់បង្ហាញភាពស្អាតស្អំរបស់ខ្លួនថា មិនបានជួយលាក់បាំងជនល្មើស និងមិនឋិតនៅក្រោមសម្ពាធនយោបាយរបស់បក្សណាមួយនោះ អាជ្ញាធរត្រូវតែវែកមុខនាំជនល្មើសបន្ថែមទៀត ព្រោះជនជាប់ចោទទាំង៣នោះ ស្ថិតក្នុងចំណោមមនុស្សប្រហែលជាង ២០នាក់នៅកន្លែងបាតុកម្មគាំទ្រគណបក្សប្រជាជនកម្ពុជា ដែលបានវាយសមាជិកសភាមកពីបក្សប្រឆាំង។
តំណាងរាស្ត្រគណបក្សសង្គ្រោះជាតិ ចំនួន ២រូប គឺលោក ញ៉យ ចំរើន និងលោក គង់ សភា បានដាក់ពាក្យប្ដឹងក្រុមបាតុករតាមរយៈមេធាវីរបស់ខ្លួនទៅសាលា ដំបូងរាជធានីភ្នំពេញ នៅថ្ងៃទី១០ ខែវិច្ឆិកា ពីបទប៉ុនប៉ងឃាតកម្មគិតទុកជាមុន និងធ្វើឲ្យខូចខាតទ្រព្យសម្បត្តិដោយចេតនា មានស្ថានទម្ងន់ទោស ព្រមទាំងទាមទារសំណងជាទឹកប្រាក់ម្នាក់ៗចំនួន ១០០លានរៀល៕
No comments:
Post a Comment