ពលរដ្ឋ មួយចំនួន ថា, ការផ្អាក ព្រះរាជពិធី បុណ្យអុំទូក គឺ ខ្លាច មានបាតុកម្ម ប្រឆាំង រដ្ឋាភិបាល
RFA / វិទ្យុ អាស៊ី សេរី | ២ វិច្ឆិកា ២០១៥
ព្រះរាជពិធីបុណ្យអុំទូក មុខព្រះបរមរាជវាំង នៅថ្ងៃទី៥ ខែវិច្ឆិកា ឆ្នាំ២០១៤។ Photo: RFA
ការប្រកាស ផ្អាក ព្រះរាជពិធី បុណ្យអុំទូក, បណ្ដែតប្រទីប, សំពះព្រះខែ, និងអកអំបុក នោះ ត្រូវ បានប្រជាពលរដ្ឋ រិះគន់ថា, ការផ្អាកនេះ រដ្ឋាភិបាល ធ្វើឡើង ក្នុងហេតុផល នយោបាយ ច្រើនជាង ហេតុផល ទឹកទន្លេ ឆ្នាំនេះតូច និងធ្វើ ឲ្យប្រជាកសិករ ប្រឈម នឹងការខ្វះទឹក ធ្វើស្រែ ឬគ្រោះ រាំងស្ងួត។ ប៉ុន្តែ ប្រមុខ រដ្ឋាភិបាល កម្ពុជា ប្រកាស ថា, ការផ្អាក ពិធីបុណ្យ អុំទូក គឺ មិនមាន ពាក់ព័ន្ធ នឹងហេតុផល នយោបាយ នោះឡើយ។
ប្រជាពលរដ្ឋមួយចំនួនលើកឡើងថា មូលហេតុពិតប្រាកដដែលរដ្ឋាភិបាលប្រកាសផ្អាកប្រារព្ធពិធីបុណ្យអុំ ទូក បណ្ដែតប្រទីប សំពះព្រះខែ និងអកអំបុកនោះ គឺដោយសាររដ្ឋាភិបាលខ្លាចប្រជាពលរដ្ឋមកពីតាមបណ្ដាខេត្តផ្សេងៗ ប្រមូលផ្តុំគ្នានៅក្រោយពិធីបុណ្យអុំទូកបញ្ចប់ និងធ្វើបាតុកម្មទម្លាក់ លោក ហ៊ុន សែន ពីតំណែងនាយករដ្ឋមន្ត្រី។
និស្សិតឆ្នាំទី៣ ផ្នែកគីមីវិទ្យានៃសាកលវិទ្យាល័យមួយនៅភ្នំពេញ លោក ឡុង មង្គល បញ្ចេញមតិថា ការផ្អាកព្រះរាជពិធីបុណ្យអុំទូកម្តងហើយម្តងទៀត ក្រោមហេតុផលតិចតួចនេះ អាចបណ្ដាលឲ្យវប្បធម៌ប្រពៃណីរបស់ខ្មែរបាត់បង់នៅថ្ងៃណាមួយជាក់ជា មិនខាន។ លោកបន្ថែមថា ការផ្អាកព្រះរាជពិធីបុណ្យអុំទូកនេះ គឺប្រហែលស្ថិតនៅក្រោមសម្ពាធនយោបាយរបស់គណបក្សកាន់អំណាច និងប្រហែលជាគណបក្សកាន់អំណាច ខ្លាចប្រជាពលរដ្ឋដែលមកចូលរួមបុណ្យអុំទូក ធ្វើការតវ៉ាប្រឆាំងតបវិញ បន្ទាប់ពីត្រូវបានគេសង្ស័យថា បាតុកម្មតវ៉ាទម្លាក់ លោក កឹម សុខា ពីអនុប្រធានទី១ នៃរដ្ឋសភា កាលពីថ្ងៃទី២៦ តុលា មានបក្សកាន់អំណាចនៅពីក្រោយខ្នង៖ «យើងឃើញថា ការផ្អាកហ្នឹងមានច្រើនដងដែរ។ ហេតុផលដែលយើងគិតថា គួរតែផ្អាកមែន ប៉ុន្តែមានហេតុផលមិនទាន់ទទួលយកបាន។»
ស្រដៀងនឹងការលើកឡើងនេះដែរ និស្សិតម្នាក់ផ្សេងទៀត លោក សាត សិលាដាវិត លើកឡើងថា ព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកនេះ គឺបានផ្តល់នូវផលប្រយោជន៍ជាច្រើនសម្រាប់ប្រជាពលរដ្ឋខ្មែរគ្រប់រូប និងជាបុណ្យជាតិដ៏ធំក្នុងចំណោមពិធីបុណ្យជាតិដទៃទៀត មានពិធីបុណ្យចូលឆ្នាំ ជាដើម។
ទន្ទឹមនឹងនេះដែរ នៅលើបណ្ដាញទំនាក់ទំនងសង្គមហ្វេសប៊ុក (Facebook) វិញ ក៏មានការរិះគន់ជាច្រើនជុំវិញការផ្អាកព្រះរាជពិធីបុណ្យអុំទូក នេះដែរ។ បណ្ដាញទំនាក់ទំនងសង្គមហ្វេសប៊ុកខ្លះសរសេរថា ប្រហែលជារដ្ឋាភិបាលសន្សំលុយទុកសម្រាប់ឲ្យសកម្មជនគណបក្សប្រជាជន កម្ពុជា ធ្វើបាតុកម្មប្រឆាំងនឹងគណបក្សសង្គ្រោះជាតិ ហើយមើលទៅ បានជាមិនព្រមប្រារព្ធព្រះរាជពិធីបុណ្យអុំទូកឆ្នាំនេះ។
សង្គមហ្វេសប៊ុកឈ្មោះថា វិឆ្ឆិកា រីច មានមតិថា «បើផ្អាក ហ៊ុន សែន ហ្នឹងមិនប្រាប់ឲ្យគេដឹងយ៉ាងតិចបំផុត ៣ខែមុន កីឡាករប្រឹងហ្វឹកហាត់ចង់ងាប់ ទើបតែជិតដល់ប្រាប់ថាផ្អាកទៅវិញ។»
សង្គមហ្វេសប៊ុកឈ្មោះ ជាតឹក លាង (Chea Tekleang) សរសេរថា «ចង់អុំៗ ចង់ឈប់ៗស្រេចក្បាលចិត្ត លែងចាត់ទុកព្រះមហាក្សត្រក្នុងចិត្តហើយ ព្រោះបុណ្យនេះ គឺជាព្រះរាជពិធីរបស់ស្ដេច។»
រីឯសង្គមហ្វេសប៊ុក កូកា ណាតាលី (Coca Nataly) និយាយថា «បុណ្យជាតិ ទាំងមូល តាំងពីបុរាណមក តាំងពីស្រុកនៅក្រនៅប្រារព្ធពិធីនេះ ដល់ពេលស្រុកសម្បូរសប្បាយ បែរជាមានហេតុផលនេះហេតុផលនោះមកបង្អាក់ពិធី តិចទៀតក្មេងជំនាន់ក្រោយលែងស្គាល់បុណ្យនេះហើយ។ មួយឆ្នាំចំណាយម្តងសោះ ចាំបាច់ធ្វើអ៊ីចឹង ទឹកតិចតែនៅអុំបាន មិនមែនទន្លេរីងទឹកណា។»
សង្គមហ្វេសប៊ុកមួយទៀតឈ្មោះ គាយ រាក (Guy Rak) សរសេរថា «ចង់ធ្វើអីធ្វើទៅ ប្រទេសនេះមិនមែនរបស់ប្រជាជនខ្មែរទេ ជារបស់ផ្តាច់មុខលោកហើយ លោក ហ៊ុន សែន លោកអស្ចារ្យ!»
កាលពីព្រឹកថ្ងៃទី១ វិច្ឆិកា ក្នុងពិធីជួបសំណេះសំណាលជាមួយយោធិនពិការនៅខេត្តកំពត លោកនាយករដ្ឋមន្ត្រី ហ៊ុន សែន ថ្លែងបញ្ជាក់ថា ដោយសារកម្ពស់ទឹកទន្លេមានកម្រិតទាបពេក ស្របពេលកំពុងជួបប្រទះគ្រោះរាំងស្ងួត ដែលទាមទារឲ្យរដ្ឋាភិបាលត្រូវប្រមូលផ្ដុំកម្លាំង និងមធ្យោបាយដោះស្រាយបញ្ហាខ្វះខាតទឹកសម្រាប់ស្រូវប្រាំងជូនប្រជា កសិករ។
ករណីនេះ រដ្ឋាភិបាលសម្រេចផ្អាកការរៀបចំព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកនៅតាមដងទន្លេសាប ខាងមុខព្រះបរមរាជវាំង ដែលពិធីនេះគ្រោងនឹងធ្វើឡើងនៅថ្ងៃទី២៤ ២៥ និងថ្ងៃ២៦ ខែវិច្ឆិកា។ ប៉ុន្តែពិធីនេះ នឹងប្រព្រឹត្តទៅជាធម្មតានៅតាមបណ្ដាខេត្តនានាទៅតាមលទ្ធភាពនៃ អាជ្ញាធរខេត្តដែលជាអ្នករៀបចំ ហើយការឈប់សម្រាករបស់មន្ត្រីរាជការ និយោជិត កម្មករចំនួន ៣ថ្ងៃក្នុងព្រះរាជពិធីនេះនៅរក្សាដដែល។
លោក ហ៊ុន សែន៖ «បញ្ហាស្ថិតនៅត្រង់អ៊ីចឹង ជាទម្លាប់យើងអុំទូកនៅទីក្រុងភ្នំពេញយ៉ាងហោចទឹក ៧ម៉ែត្រទៅ ៨ម៉ែត្រ ប៉ុន្តែទឹកនៅទីក្រុងភ្នំពេញនៅថ្ងៃនេះមានត្រឹមតែ ៥,០៧ម៉ែត្រ។ ស្អែកនៅសល់ត្រឹមតែ ៤,៩៨ម៉ែត្រ ខានស្អែកនឹងនៅសល់ ៤,៩២ម៉ែត្រ។ តាមការសួរបញ្ជាក់ទៅរដ្ឋមន្ត្រីក្រសួងធនធានទឹក និងឧតុនិយមថា រហូតដល់ថ្ងៃដែលយើងអុំទូក គឺ ២៤ ២៥ និង២៦ ខែវិច្ឆិកា ទឹកអាចនៅតែត្រឹម ៤,២០ម៉ែត្រតែប៉ុណ្ណោះ ដូច្នេះទឹកនេះមិនអាចអុំបានទេ។»
ទាក់ទងនឹងការប្រារព្ធព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក លោកអាចារ្យម្នាក់នៃក្រសួងធម្មការ និងសាសនា លោកអាចារ្យ វ៉ាយ វិបុល មានប្រសាសន៍ថា ព្រះរាជពិធីនេះប្រារព្ធធ្វើឡើងដើម្បីរំឭកគុណម្ចាស់ទឹកម្ចាស់ដី បឹងបួគិរីបុព្វតា ដែលនាំដីភក់ដីល្បាប់ដែលមានជីជាតិល្អសម្រាប់ប្រជាពលរដ្ឋក្នុង ការធ្វើស្រែចម្ការ។ ម្យ៉ាងវិញទៀត ព្រះរាជពិធីនេះធ្វើឡើងដើម្បីរំឭកគុណចំពោះកងទ័ពជើងទឹក ដែលបានយកជ័យជម្នះលើខ្មាំងសត្រូវដែលបានមកវាយប្រហារដណ្ដើមទឹកដី កម្ពុជា។
លោកបន្ថែមថា ការប្រណាំងទូកនៅពេលធ្វើព្រះរាជពិធីបុណ្យអុំទូកនេះ ក៏មានគោលបំណងក្នុងការបណ្ដុះស្មារតីមេដឹកនាំខ្មែរគ្រប់រូប ឲ្យចេះស្រឡាញ់ប្រជារាស្ត្រខ្មែរ និងបង្ហាញពីការបង្រួបបង្រួមសាមគ្គីគ្នាក្នុងការធ្វើកិច្ចការ អ្វីមួយដើម្បីទទួលបានជោគជ័យ៖ «ក្នុងខេត្តនីមួយៗដែលអុំទូក ហ្នឹងត្រឡប់មកវិញ ត្រូវដឹកនាំខេត្តរបស់ខ្លួនកុំឲ្យមានអំពើពុករលួយកុំឲ្យស៊ី សំណូកសូកប៉ាន់ បាត់ចោរកម្ម បាត់ការជួញដូរគ្រឿងញៀន ជួញដូរផ្លូវភេទជាដើមហ្នឹង គឺខេត្តហ្នឹង ស្រុកហ្នឹង ឃុំហ្នឹងល្បី ប៉ុន្តែមនុស្សមិនបានគិតចឹង ទៅមើលការអុំដឹងតែឈ្នះ និងចាញ់ បានត្រឹមតែអស់លុយ ហើយមិនដឹងថាមកវិញយកការដឹកនាំតាមរបៀបនៃការប្រណាំងទូកនោះទេ។»
លោកបន្តថា ពិធីបុណ្យអុំទូក បណ្ដែតប្រទីប និងអកអំបុក សំពះព្រះខែ ជាប្រពៃណីទំនៀមទម្លាប់ ជាវប្បធម៌ ជាប្រវត្តិសាស្ត្រ ជាការរីករាយរួមគ្នាប្រចាំឆ្នាំរបស់ប្រជាពលរដ្ឋមកពីគ្រប់ទិសទី នៃព្រះរាជាណាចក្រកម្ពុជា។
ស្រដៀងនឹងការពន្យល់របស់លោកអាចារ្យ វ៉ាយ វិបុល សង្គមហ្វេសប៊ុកឈ្មោះ គង់ វណ្ណារិទ្ធ (Kong Vannarith) លើកឡើងថា «សោកស្ដាយ ចំពោះការផ្អាកមិនធ្វើបុណ្យអុំទូកក្នុងឆ្នាំ២០១៥ នេះ។ ពិធីនេះជាធាតុសំខាន់មួយនៃអត្តសញ្ញាណជាតិ ដែលទាមទារការអភិរក្ស ថែរក្សាឲ្យមាននិរន្តរភាពពីសំណាក់ប្រជាពលរដ្ឋទូទាំងប្រទេស ជាពិសេសពីសំណាក់អ្នកដឹកនាំប្រទេស ព្រោះវាជាមរតកវប្បធម៌អរូបិយ (ដូចជាល្បែង របាំ ចម្រៀង) ពោលគឺបើមនុស្សមិនថែរក្សាទេ វានឹងគ្មានរូបរាង វានឹងសាបរលាបទៅៗ ហើយជាតិយើងអាចនឹងបាត់បង់អត្តសញ្ញាណមួយរបស់ខ្លួន (អត្តសញ្ញាណជាតិសំខាន់ៗរួមមាន ទឹកដី មនុស្ស ប្រវត្តិសាស្ត្រ ភាសា វប្បធម៌ ប្រពៃណី ទំនៀមទម្លាប់។»
ជុំវិញការលើកឡើងរបស់ប្រជាពលរដ្ឋនេះ អ្នកឃ្លាំមើលផ្នែកអភិវឌ្ឍន៍ លោកបណ្ឌិត កែម ឡី មានប្រសាសន៍ថា ការផ្អាកព្រះរាជពិធីបុណ្យអុំទូកនេះ ដោយសារបក្សកាន់អំណាចខ្លាចស្រមោលខ្លួនឯង ចំពោះការធ្វើបាតុកម្មទម្លាក់ លោក កឹម សុខា និងឈានដល់ការប្រើអំពើហិង្សាលើតំណាងរាស្ត្រគណបក្សសង្គ្រោះជាតិ ពីររូប គឺលោក ញ៉យ ចំរើន និងលោក គង់ សភា បណ្ដាលឲ្យរងរបួសធ្ងន់កាលពីថ្ងៃទី២៦ តុលា។ លោកបន្ថែមថា តាមពិតប្រជាពលរដ្ឋកម្ពុជា មិនមានគំនិតទុទ្ទិដ្ឋិនិយមអាក្រក់បែបនេះទេ ម្ល៉ោះហើយការធ្វើបាតុកម្មប្រឆាំងតវ៉ាចំពោះបក្សកាន់អំណាច មិនអាចកើតឡើងនោះឡើយ៖ «នយោបាយបើយើងមើល វាគ្រាន់តែជាការភ័យជ្រុលទេ បើមានប្រជាពលរដ្ឋប្រមូលផ្តុំធ្វើបាតុកម្មអី វាអត់មានទេក្នុងភាពបច្ចុប្បន្ន។»
រដ្ឋាភិបាលធ្លាប់ប្រកាសផ្អាកព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក នៅរាជធានីភ្នំពេញ រយៈពេល ៣ឆ្នាំ គឺចាប់ពីឆ្នាំ២០១១ ដល់ឆ្នាំ២០១៣ បន្ទាប់ពីមានហេតុការណ៍រត់ជាន់គ្នានៅលើស្ពានកោះពេជ្រ កាលពីយប់ថ្ងៃទី២២ ខែវិច្ឆិកា ឆ្នាំ២០១០ ធ្វើឲ្យមនុស្សស្លាប់ជាង ៣០០នាក់ (៣៥៣នាក់) និងរបួសជិត ៤០០នាក់ (៣៩៣នាក់) ដែលមកទល់ពេលនេះ អាជ្ញាធររដ្ឋាភិបាលមិនបានទទួលខុសត្រូវលើការស្លាប់ ដោយសារការផ្អើលជាន់គ្នានេះនៅឡើយទេ។ អ្នករងគ្រោះទាំងនោះ បានត្រឹមតែសំណងជាលុយតែប៉ុណ្ណោះ។
ព្រះរាជពិធីនេះ ត្រូវបានប្រារព្ធឡើងវិញកាលពីឆ្នាំ២០១៤ ដោយមានការរឹតបន្តឹងសុវត្ថិភាពតាមរយៈការដាក់ពង្រាយកងកម្លាំង ប្រដាប់អាវុធរាប់ពាន់នាក់នៅតាមរាជធានីភ្នំពេញ ពិសេសទីប្រមូលផ្ដុំមនុស្សច្រើន។ ការរឹតបន្តឹងនេះ ក៏ត្រូវបានអ្នកឃ្លាំមើលស្ថានការណ៍នយោបាយលើកឡើងដែរថា ក្នុងរូបភាពរដ្ឋាភិបាលខ្លាចមានក្រុមប្រជាពលរដ្ឋប្រមូលផ្ដុំគ្នា ធ្វើបាតុកម្មប្រឆាំងនឹងរដ្ឋាភិបាល នៅខណៈស្ថានការណ៍នយោបាយមិនទាន់មានស្ថិរភាពស្រួលបួលដែរនោះ៕
No comments:
Post a Comment