សាលាដំបូង ខែត្រ ក្រចេះ សម្រេចឃុំខ្លួន វៀតណាម ២នាក់ ទាក់ទង ការកាប់ ព្រៃឈើ
RFA / វិទ្យុ អាស៊ី សេរី | ៦ វិច្ឆិកា ២០១៥
សកម្មភាពប្រជាសហគមន៍ស្រុកស្នូល ខេត្តក្រចេះ
ដុតបំផ្លាញឈើប្រណិតរបស់ជនល្មើស
ក្នុងដែនជម្រកអភិរក្សសត្វស្រុកស្នួល កាលពីថ្ងៃទី៤ ខែមេសា
ឆ្នាំ២០១៣។ CCHR
ព្រះរាជអាជ្ញា ខែត្រ ក្រចេះ ឲ្យដឹង ថា, ជនជាតិ វៀតណាម ពីរនាក់ ត្រូវ បញ្ជូនទៅ ឃុំខ្លួន នៅពន្ធនាគារ បណ្ដោះអាសន្ន បន្ទាប់ ពីពួកគេ ចូលព្រៃ កាប់ឈើប ម្រុងទុក អចិន្ត្រៃយ៍ ក្នុងដី កម្ពុជា និងប្រើប្រាស់ អាវុធ ខុសច្បាប់។
ស្នងការរងទទួលបន្ទុកផែនការអាវុធជាតិផ្ទុះ ខែត្រក្រចេះ ឲ្យដឹងនៅថ្ងៃទី៦ ខែវិច្ឆិកា ថា ជនជាតិវៀតណាម ទាំងពីរនាក់នោះ រស់នៅភូមិតឹងហៀប ឃុំតាងថាន ស្រុកប៊ូដុប ខែត្រប៊ិញភឿក បានឆ្លងដែនមកកម្ពុជា តាមច្រកឡាបាខេ ដើម្បីស៊ីឈ្នួលអារឈើនៅចំណុចអូរគគីរ ភូមិស្រែថ្មី ឃុំឃ្សឹម ស្រុកស្នួល ខែត្រក្រចេះ កាលពីថ្ងៃទី៥ ខែវិច្ឆិកា។
ស្នងការរងទទួលបន្ទុកផែនការអាវុធជាតិផ្ទុះ លោក ជ្រឹង ផល្លី និយាយថា ជនជាតិវៀតណាម ទាំងពីរនាក់នោះ បានលួចចូលកាប់ឈើក្នុងព្រៃបម្រុងទុកអចិន្ត្រៃយ៍របស់រដ្ឋ កាលពីថ្ងៃទី៥ ខែវិច្ឆិកា ហើយត្រូវសមត្ថកិច្ចស្រុកស្នួល ឃាត់ខ្លួន និងរឹមអូសបានអាវុធអាកា៤៧ មួយដើម រួមទាំងម៉ាស៊ីនអារឈើស្វ័យប្រវត្តិ ២គ្រឿង និងម៉ូតូ ២គ្រឿង។
លោកបញ្ជាក់ថា ជនជាតិវៀតណាម ទាំងនោះអះអាងថា ពួកគេស៊ីឈ្នួលកាប់ឈើលក់ឲ្យយោធាវរៈព្រំដែន ២០៤ ឈ្មោះ នឹម ហួត ក្នុងតម្លៃ ៣០ម៉ឺនដុង ស្មើប្រមាណ ៦ម៉ឺនរៀលក្នុង១ម៉ែត្រគូប៖ «គាត់ អត់មានតដៃជាមួយសមត្ថកិច្ចទេ។ យើងចុះទៅត្រួតពិនិត្យឃើញគាត់នៅក្នុងខ្ទម ហើយមានអាវុធមានអី យើងក៏សម្រេចឃាត់ខ្លួនតែម្ដង។»
វិទ្យុអាស៊ីសេរី មិនអាចទាក់ទងយោធាព្រំដែន ២០៤ លោក នឹម ហួត ដើម្បីសុំការបំភ្លឺបានទេ នៅថ្ងៃទី៦ ខែវិច្ឆិកា។
ទាក់ទងបញ្ហានេះព្រះរាជអាជ្ញាធរអមសាលាដំបូងខែត្រក្រចេះ លោក ទី សុវណ្ណថាល់ បង្ហើបយ៉ាងខ្លីថា ជនជាតិវៀតណាម ទាំងនោះ ត្រូវចោទប្រកាន់ ២បទល្មើសផ្សេងគ្នា ទី១ ប្រើប្រាស់អាវុធខុសច្បាប់ ទី២ ប្រើប្រាស់ត្រង់ស៊ឺន័រក្នុងព្រៃដែនបម្រុងទុកអចិន្ត្រៃយ៍របស់រដ្ឋ។
កាលពីដើមឆ្នាំ២០១៥ សមត្ថកិច្ចស្រុកស្នួល ធ្លាប់ចាប់បានជនជាតិវៀតណាម ចំនួន ៣នាក់ រឹមអូសរថយន្តដឹកឈើ ១គ្រឿង ដែលលូចចូលកាប់ឈើប្រភេទសុក្រំ នៅក្នុងព្រៃបម្រុងទុកអចិន្ត្រៃយ៍របស់រដ្ឋ និងបញ្ជូនទៅតុលាការខែត្រក្រចេះ អនុវត្តច្បាប់។
ករណីនេះដែរ មន្ត្រីជាន់ខ្ពស់នៃអង្គការការពារសិទ្ធិមនុស្សលីកាដូ លោក អំ សំអាត គាំទ្រការអនុវត្តនីតិវិធីរបស់សាលាដំបូងខែត្រក្រចេះ។ តែលោកយល់ថា ជនជាតិវៀតណាម ទាំងនោះ អាចពាក់ព័ន្ធលួចឆ្លងដែនចូលទឹកដីកម្ពុជា ខុសច្បាប់ ដែលសាលាដំបូងខែត្រក្រចេះ គួរតែចោទប្រកាន់ ៣បទល្មើសផ្សេងគ្នា៖ «ទោះបីជាចាប់ជនជាតិវៀតណាមក៏ដោយ ក៏នៅក្នុងសមត្ថកិច្ចស៊ើបអង្កេតរបស់តុលាការជាបន្ត ហើយបើរកទៅឃើញថា អ្នកបញ្ជានៅពីក្រោយខ្នង ឬក៏អ្នកផ្ដើមគំនិតហ្នឹង អ៊ីចឹងអ្នកហ្នឹងត្រូវមានការទទួលទោសដូចអ្នកប្រព្រឹត្តដែរ។»
ច្រកព្រំដែនឡាបាខេ ឋិតភូមិតឹងហៀប ឃុំតាងថាន ស្រុកប៊ូដុប ខែត្រប៊ិញភឿក ប្រទេសវៀតណាម ជាប់ព្រំប្រទល់ភូមិស្រែថ្មី ឃុំឃ្សឹម ស្រុកស្នួល ខែត្រក្រចេះ។ ព្រៃឈើបម្រុងអចិន្ត្រៃយ៍របស់រដ្ឋលាតសន្ធឹងតាមព្រំដែនប្រទេសទាំង ពីររហូតដល់ខែត្រមណ្ឌលគិរី៕
No comments:
Post a Comment