រដ្ឋសភា នឹងផ្ដល់ គ្រឿង ឥស្សរិយយស ដល់សមាជិក សភា ទាំងអស់, រួមទាំងលោក សម រង្ស៊ី ផង
RFA / វិទ្យុ អាស៊ី សេរី | ២១ ធ្នូ ២០១៥
លោក យ៉ែម បុញ្ញឫទ្ធិ ប្រធានគណៈកម្មការអប់រំយុវជន កីឡា ធម្មការ
កិច្ចការសាសនា វប្បធម៌ និងទេសចរ ទទួលញត្តិពីព្រះសង្ឃ
ទាមទារបញ្ឈប់លក់ដីអាគារវិទ្យាស្ថានពុទ្ធសាសនបណ្ឌិត្យ នៅថ្ងៃទី
ថ្ងៃទី ០៣ តុលា ២០១៤។ RFA/Brach Chev
សមាជិក រដ្ឋសភា ទាំងអស់ រួមទាំងលោក សម រង្ស៊ី ផង នឹងទទួលបាន គ្រឿងឥស្សរិយយស ពីព្រះមហាក្សត្រ ជាលើក ទី១ ក្នុងនីតិកាល ទី៥ នេះ។
អ្នកនាំពាក្យរដ្ឋសភាពីខាងគណបក្សសង្គ្រោះជាតិ លោក យ៉ែម បុញ្ញឫទ្ធិ ឲ្យដឹងនៅថ្ងៃទី២២ ធ្នូ ថា មូលហេតុដែលមានឈ្មោះប្រធានគណបក្សសង្គ្រោះជាតិ លោក សម រង្ស៊ី ក្នុងបញ្ជីទទួលគ្រឿងឥស្សរិយយសដែរនោះ ដោយសារក្នុងពេលដែលសភាស្នើសុំទៅព្រះមហាក្សត្រ គឺធ្វើឡើងមុនពេលរដ្ឋសភាបានដកបេក្ខភាពតំណាងរាស្រ្តរបស់លោក សម រង្ស៊ី។
លោក យ៉ែម បុញ្ញឫទ្ធិ បញ្ជាក់ថា តំណាងរាស្ត្រទទួលបាន នូវគ្រឿងឥស្សរិយយសនេះ ដោយសារពួកគេបានបំពេញការងារមួយចំនួនក្នុងនាមជា តំណាងរាស្ត្រក្នុងពេលកន្លងមក៖ «ទី១ ពាក់ព័ន្ធនឹងការសិក្សា ធ្វើសេចក្ដីស្នើច្បាប់ ឬពិភាក្សាអនុម័តសេចក្ដីព្រាងច្បាប់ ក៏ដូចវិសោធនកម្មច្បាប់ ទី២ ការបំភ្លឺការងារ តាមដាននិងឃ្លាំមើលការអនុវត្តច្បាប់របស់រាជរដ្ឋាភិបាល ទី៣ គឺជាភាពជាតំណាងរបស់ប្រជារាស្ត្រ ដែលចុះជួបប្រជារាស្ត្រដោយផ្ទាល់ និងយកមកអន្តរាគមន៍ដើម្បីដោះស្រាយជូនរាស្ត្រ។»
ការប្រគល់គ្រឿងឥស្សរិយយសដល់សមាជិករដ្ឋសភា ត្រូវធ្វើឡើង២ដង ក្នុងមួយអាណត្តិ ហើយការប្រគល់លើកទី១នេះ នឹងធ្វើឡើងនាវិមានរដ្ឋសភា នៅថ្ងៃទី២៤ ធ្នូ ក្រោមអធិបតីភាពប្រធានរដ្ឋសភា លោក ហេង សំរិន។
លោក យ៉ែម បុញ្ញឫទ្ធិ បញ្ជាក់ថា សមាជិករដ្ឋសភាពីប្រឆាំងអាចនឹងអវត្តមានមួយចំនួន ដោយសារអ្នកខ្លះមានភារកិច្ចនៅបរទេស ចំណែកលោក សម រង្ស៊ី ត្រូវបានរដ្ឋសភាដកអភ័យឯកសិទ្ធិ តាមអំណាចសាលដីកាសាលាឧទ្ធរណ៍ លើបណ្ដឹងបទបរិហារកេរ្តិ៍ របស់រដ្ឋមន្ត្រីការបរទេសកម្ពុជា លោក ហោ ណាំហុង កាលពី៧ឆ្នាំមុន។
រហូតមកដល់ពេលនេះ លោក សម រង្ស៊ី នៅមិនទាន់ច្បាស់ថា នឹងវិលត្រឡប់មកកម្ពុជាវិញថ្ងៃណាឡើយ ទោះបីជាតំណាងបក្សទាំងពីរបានជួបចរចាគ្នា រកដំណោះស្រាយនយោបាយកាលពីថ្ងៃទី១០ ធ្នូ និងឈានដល់ការបង្កើតក្រុមការងារ ត្រួតពិនិត្យលទ្ធភាពតំឡើងកម្រិតវប្បធម៌សន្ទនាក្ដី៕
No comments:
Post a Comment