រដ្ឋសភា ពន្យារពេល ពិគ្រោះ សេចក្ដីព្រាងច្បាប់ សហជីព បន្ទាប់ ពីជំនួប បក្សទាំងពីរ
RFA / វិទ្យុ អាស៊ី សេរី | ១០ ធ្នូ ២០១៥
ប្រធានរដ្ឋសភា លោក ហេង សំរិន (ជួរមុខ កណ្ដាល)
ក្នុងពិធីបើកសិក្ខាសាលាស្ដីពីការឈ្វេងយល់ពីច្បាប់
និងការអនុវត្តច្បាប់ស្ដីពីការប្រឆាំងអំពើពុករលួយនាវិមានរដ្ឋសភា
នៅថ្ងៃទី២៦ ឧសភា ឆ្នាំ២០១៥។ RFA/Tha Kitya
រដ្ឋសភា ពន្យារពេល ពិគ្រោះយោបល់ សេចក្ដីព្រាងច្បាប់ សហជីព ទៅថ្ងៃមុខ ដោយមិនទាន់ កំណត់ពេល បន្ទាប់ ពីជំនួប របស់ បក្សជាប់ឆ្នោត ទាំងពីរ កាលពីថ្ងៃ ទី១០ ធ្នូ។
សេចក្ដីជូនដំណឹងរបស់រដ្ឋសភាចុះថ្ងៃទី១១ ធ្នូ បញ្ជាក់ថា ការលើកពេលនេះ ដោយសារគណៈកម្មការរៀបចំសិក្ខាសាលានេះ ត្រូវការពេលបន្ថែមទៀតដើម្បីត្រៀមលក្ខណៈរៀបចំឲ្យបានល្អ។
តាមគម្រោងពិគ្រោះយោបល់សេចក្ដីព្រាងច្បាប់សហជីពនេះ រដ្ឋសភាថានឹងធ្វើនៅថ្ងៃទី១៥ ធ្នូ នៅវិមានរដ្ឋសភា។
កាលពីថ្ងៃទី១០ ធ្នូ ប្រធានក្រុមតំណាងរាស្ត្រភាគច្រើនរដ្ឋសភា លោក ស ខេង និងប្រធានស្ដីពីបក្សសង្គ្រោះជាតិ លោក កឹម សុខា បានជួបគ្នាពិភាក្សាផ្ដោតទៅលើការផ្ដល់យោបល់សេចក្ដីព្រាងច្បាប់សហជីព និងពង្រឹងវប្បធម៌សន្ទនា។ ការ ពិភាក្សានោះក៏សម្រេចបង្កើតគណៈកម្មការ ចំពោះកិច្ចដែលចូលរួមដោយបក្សទាំងពីរ ដើម្បីពិនិត្យ និងផ្ដល់យោបល់លើសេចក្ដីព្រាងច្បាប់សហជីព។
សេចក្ដីព្រាងច្បាប់ស្ដីពីសហជីព ត្រូវបានរដ្ឋាភិបាលរៀបចំឡើងតាំងពីឆ្នាំ២០០៨ ដែលមាន១៧ជំពូក និង១០០មាត្រា មានវិសាលភាពគ្របដណ្ដប់លើសហគ្រាស គ្រឹះស្ថាន និងជនទាំងឡាយណាដែលស្ថិត នៅក្នុងសហគ្រាស ឬគ្រឹះស្ថានក្រោមបទប្បញ្ញត្តិ នៃច្បាប់ស្ដីពីការងារ។ ច្បាប់នេះក៏គ្របដណ្ដប់ចំពោះបុគ្គលិកធ្វើការតាមផ្លូវអាកាស និងផ្លូវសមុទ្រផងដែរ។
សេចក្ដីព្រាងច្បាប់សហជីពត្រូវបានគណៈរដ្ឋមន្ត្រីអនុម័ត កាលពីថ្ងៃទី១៣ វិច្ឆិកា និងបញ្ជូនមករដ្ឋសភាដើម្បីពិគ្រោះយោបល់ និងអនុម័ត៕
No comments:
Post a Comment