សមាជិក ព្រឹទ្ធសភា បក្សប្រឆាំង ពហិការ មិនចូលប្រជុំ អនុម័ត សេចក្ដីព្រាងច្បាប់ ថវិកា ជាតិ ឆ្នាំ២០១៦
VOD / វីអូឌី | ៧ ធ្នូ ២០១៥
សមាជិក ព្រឹទ្ធសភា មកពីគណបក្ស សម រង្ស៊ី ធ្វើពហិការ
មិនចូលរួម ប្រជុំពិនិត្យ និងផ្ដល់យោបល់ លើច្បាប់ ស្ដីពី ហិរញ្ញវត្ថុ សម្រាប់
ការគ្រប់គ្រង ឆ្នាំ២០១៦ ដោយអះអាង ថា ច្បាប់នេះ ត្រូវ បានអនុម័ត ជាឯកបក្ស
ដោយមាន ចេតនា នយោបាយ។
នៅព្រឹក
ថ្ងៃចន្ទនេះ ព្រឹទ្ធសភា បើកកិច្ចប្រជុំ ដើម្បី ពិនិត្យ និងឲ្យយោបល់ លើសេចក្តីព្រាងច្បាប់
ស្តីពី ហិរញ្ញវត្ថុ សម្រាប់ ការគ្រប់គ្រង ឆ្នាំ២០១៦ (ច្បាប់ថវិកា ជាតិ ឆ្នាំ២០១៦)
និងសេចក្តីព្រាងច្បាប់ ស្តីពី ទូរគមនាគមន៍។ ច្បាប់ទាំងពីរ ត្រូវ បានអនុម័ត ដោយសំឡេង
៤៦ លើ៤៦ ដោយគ្មាន វត្តមាន សមាជិក មកពីគណបក្ស ប្រឆាំង នោះទេ។
សេចក្ដីថ្លែងការណ៍ របស់ ក្រុមសមាជិក ព្រឹទ្ធសភា មកពីគណបក្ស
សម រង្ស៊ី ចេញនៅថ្ងៃនេះ លើកឡើង ថា, ក្រុមសមាជិក សម្រេច
មិនចូលរួម ក្នុងការពិនិត្យ និងផ្ដល់យោបល់ លើសេចក្ដីព្រាងច្បាប់ ស្ដីពី ហិរញ្ញវត្ថុ
សម្រាប់ ការគ្រប់គ្រង ឆ្នាំ២០១៦។ សេចក្ដីថ្លែងការណ៍
បន្តថា៖ ក្រុមសមាជិក
ព្រឹទ្ធសភា គណបក្ស សម រង្ស៊ី
សោកស្ដាយដែលច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦នៅរដ្ឋសភាកាលពីថ្ងៃទី៣
ខែធ្នូ ឆ្នាំ២០១៦ នាសម័យប្រជុំរដ្ឋសភាលើកទី៥ នីតិកាលទី៥មានការពិភាក្សា
អនុម័តជាឯកបក្ស ដោយមានចេតនានយោបាយ។
អ្នកនាំពាក្យ ព្រឹទ្ធសភា លោក ម៉ម នាង មានប្រសាសន៍ ក្រោយកិច្ចប្រជុំ នៅព្រឹកនេះ ថា, សមាជិក មកពីគណបក្ស សម រង្ស៊ី ចូលរួម ឬមិនចូលរួមប្រជុំជាសិទ្ធិរបស់ពួកគាត់។
នៅក្នុង សេចក្ដីថ្លែងការណ៍ ដដែល
ក្រុមសមាជិកព្រឹទ្ធសភាបក្សប្រឆាំងក៏បានលើកឡើងពីការដកតំណែងលោក កឹម សុខា
ពីអនុប្រធានរដ្ឋសភា ការបញ្ចប់តួនាទីជាតំណាងរាស្ត្ររបស់លោក សម រង្ស៊ី
អំពើហិង្សាលើតំណាងរាស្ត្របក្សប្រឆាំង និងការចាប់ខ្លួនសមាជិកព្រឹទ្ធសភា លោក
ហុង សុខហួរ ផងដែរ
ដោយក្រុមសមាជិកព្រឹទ្ធសភាបក្សប្រឆាំងចាត់ទុកករណីទាំងនេះថាជា ចេតនាកំចាត់កំចាយស្ថានភាពពហុបក្សនៅថ្នាក់កំពូលរបស់ជាតិផង
និងរារាំងរបបប្រជាធិបតេយ្យសេរី។
ក្រុមសមាជិកព្រឹទ្ធសភាបក្សប្រឆាំងក៏បានអំពាវនាវដល់បណ្ដាប្រទេស
និងស្ថាប័នអន្តរជាតិជួយអន្តរាគមន៍បញ្ចប់ស្ថានភាពតានតឹងទាំងនេះ
និងឲ្យគណបក្សនយោបាយទាំងពីរដែលមានអាសនៈក្នុងសភា
បន្តអនុវត្តកិច្ចព្រមព្រៀងថ្ងៃទី២២ ខែកក្កដា ឆ្នាំ២០១៤
និងវប្បធម៌សន្ទនារវាងថ្នាក់ដឹកនាំគណបក្សទាំងពីរ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន
ច្រានចោលការលើកឡើងរបស់ក្រុមសមាជិកព្រឹទ្ធសភារបស់គណបក្សប្រឆាំងដោយលោកអះអាងថា
ករណីលោក សម រង្ស៊ី លោក កឹម សុខា និងលោក ហុង សុខហួរ គឺជាការអនុវត្តច្បាប់
មិនមែនជាការកំចាត់គណបក្សប្រឆាំងពីស្ថាប័នកំពូលរបស់រដ្ឋនោះទេ។
លោកមានប្រសាសន៍ថា គ្មានអ្នកណាកំចាត់កំចាយគាត់ទេ
គឺគាត់ជាអ្នកកំចាត់កំចាយខ្លួនឯង។ បើគាត់អនុវត្តឲ្យត្រឹមត្រូវតាមច្បាប់
គាត់កុំនិយាយបរិហារកេរ្តិ៍គេអ្នកផ្សេងទៅវាមានគេអនុវត្តច្បាប់ឯណា? អាហ្នឹងត្រូវរកដើមភ្លើង អ្នកណាអ្នកដុតភ្លើង
គឺថាឯកឧត្ដម សម រង្ស៊ី ឯកឧត្ដម កឹម សុខា ជាអ្នកដុតភ្លើង។
គួរបញ្ជាក់ថា
សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦
និងសេចក្តីព្រាងច្បាប់ទូរគមនាគមន៍ ត្រូវបានរដ្ឋសភាអនុម័តកាលពីថ្ងៃទី៣០
ខែវិច្ឆិកា ដោយមានតែវត្តមានតំណាងរាស្ត្រគណបក្សប្រជាជនកម្ពុជា។
តំណារាស្ត្រគណបក្សប្រឆាំងបានធ្វើពហិការមិនចូលរួមប្រជុំ ដោយអះអាងថា
ដោយសារមិនទាន់ស្វែងរកជនដៃដល់បន្ថែមទៀតករណីវាយតំណាងរាស្ត្រគណបក្សប្រឆាំង
ការបោះឆ្នោតទម្លាក់លោក កឹម សុខា ពីអនុប្រធានទី១នៃរដ្ឋសភា
និងករណីដីកាចាប់ខ្លួន លោក សម រង្ស៊ី ដែលនាំឲ្យមានការលុបឈ្មោះលោក សម រង្ស៊ី
ពីបញ្ជីតំណាងរាស្ត្រ៕
No comments:
Post a Comment