ប្រធាន គណបក្ស សង្រ្គោះជាតិ លោក សម រង្ស៊ី កាលពីកន្លងទៅ
លោក សម រង្ស៊ី ថា, លោក ហេង សំរិន គ្មាន មូលដ្ឋាន ប្តឹងរូបលោក ពីបទបរិហាកេរ្តិ៍
VOD / វីអូឌី | ៣ ធ្នូ ២០១៥
តំណាងអយ្យការ អមសាលាដំបូង រាជធានីភ្នំពេញ លោក វង្ស ប៊ុនវិសុទ្ធ អញ្ជើញលោក សម រង្ស៊ី ចូលមកកាន់ អយ្យការ អមសាលាដំបូង រាជធានីភ្នំពេញ នៅថ្ងៃ ទី៤ ខែមករា ឆ្នាំ២០១៦ វេលាម៉ោង ៨ និង៣០ នាទីព្រឹក សាកសួរ ពីរឿងបរិហាកេរ្តិ៍ តាមពាក្យបណ្តឹង របស់លោក គី តិច មេធាវីលោក ហេង សំរិន។ កាលពីថ្ងៃ ទី១៧ ខែវិច្ឆិកា ឆ្នាំ២០១៥ លោក សម រង្ស៊ី បានសរសេរ នៅលើហ្វេសប៊ុក របស់លោក ភ្ជាប់ជាមួយ វីដេអូមួយ ថា៖ «យើង ចងចាំថា របប កើតថ្ងៃ ៧ មករា ១៩៧៩ បានឲ្យតុលាការ របស់គេ កាត់ទោស ប្រហារជីវិត សម្តេចព្រះ នរោត្តម សីហនុ ដោយចោទព្រះអង្គ ថា ជាជន ក្បត់ជាតិ។»
លោក សម រង្ស៊ី ប្រាប់វីអូឌី តាមរយៈ អ៊ីម៉េល នៅថ្ងៃព្រហស្បតិ៍នេះ ថា, ការសរសេរ របស់លោក នៅលើហ្វេសប៊ុក មិនបាន លើកឡើង ពីឈ្មោះ របស់លោក ហេង សំរិន នោះទេ។ លោក បន្តថា, សម្តេច សីហនុ បាននិយាយ ពីឈ្មោះលោក ហេង សំរិន នៅក្នុងវីដេអូ ដែលលោក បង្ហោះភ្ជាប់ ជាមួយ សារ លើហ្វេសប៊ុក នោះ។
លោក សម រង្ស៊ី បានបញ្ជាក់ ថា៖ «ដូច្នេះ លោក ហេង សំរិន ពុំ មានមូលដ្ឋាន ណាមួយ ក្នុងការប្តឹង ប្រឆាំងខ្ញុំ ពីព្រោះ ខ្ញុំ បង្ហោះវីដេអូក្លីប ដែលគេ បង្ហោះ នៅលើប្រព័ន្ធ អ៊ិនធើណែត យូធ្យូប (YouTube) ជាង៣០ឆ្នាំ មកហើយ។»
នៅរសៀល ថ្ងៃព្រហស្បតិ៍នេះ លោក សម រង្ស៊ី បានបង្ហោះ សារ នៅលើ ហ្វេសប៊ុក របស់លោក ដោយអំពាវនាវ ឲ្យប្រជាពលរដ្ឋ ចូលរួម ពិនិត្យខ្លឹមសារ នៃការបង្ហោះ របស់លោក។
លោក បានសរសេរ ថា៖ «ដោយសារ តែ ខ្ញំុ បានបង្ហោះ វីដេអូ ខាងក្រោមនេះ, សម្តេច ហេង សំរិន បានប្តឹងខ្ញំុ ថា, ខ្ញំុ បានបរិហាកេរ្តិ៍លោក។ សូម បងប្អូន មើលចុះ៖ តើ ខ្ញំុ បាននិយាយអ្វី ខ្លួនខ្ញុំ ដែលប៉ះពាល់ សម្តេច ហេង សំរិន? អត់ ទាល់តែសោះ!»
លោក បន្ថែមថា៖ «វីដេអូនេះ ថតនៅឆ្នាំ ១៩៨៣ គឺក្នុងសម័យ "សាធារណរដ្ឋ ប្រជាមានិត កម្ពុជា" ដែលមានលោក ហេង សំរិន ជាប្រមុខរដ្ឋ។ ក្នងការលើកតម្កើងពាក្យ "សាធារណរដ្ឋ" គឺ គេ បានសម្លាប់ ស្តេច តាមផ្លូវ នយោបាយ និងផ្លូវចិត្ត រួចទៅហើយ។»
បើ តាមលោក សម រង្ស៊ី វីដេអូដែលលោកបង្ហោះលើហ្វេសប៊ុកនោះត្រូវបានថតក្នុងឆ្នាំ១៩៨៣ នៅពេលអតីតព្រះមហាក្សត្រសីហនុបានធ្វើដំណើរទៅប្រទេសអូស្រ្តាលី ដើម្បីប្រមែប្រមូលការគាំទ្រចលនាប្រឆាំងនឹងវៀតណាម។
អ្នកនាំពាក្យគណបក្សសង្រ្គោះជាតិ លោក យឹម សុវណ្ណ ចាត់ទុកករណីនេះជារឿងនយោបាយ។ លោកបន្តថាលោក សម រង្ស៊ី នឹងមិនចូលមកតុលាការតាមការកំណត់នោះទេ។
លោក គី តិច មេធាវីរបស់លោក ហេង សំរិន ប្រាប់វីអូឌីថាការចោទប្រកាន់បទបរិហាកេរ្តិ៍នេះពាក់ព័ន្ធនឹងការសរសេររបស់ លោក សម រង្ស៊ី។ លោកបន្តថាក្នុងរបប៧មករា ១៩៧៩ ពុំមានការកាត់ទោសសម្តេចសីហុនថាក្បត់ជាតិនោះទេ ដោយថាមានតែការអញ្ជើញសម្តេចសីហនុឲ្យយាងចូលស្រុកវិញ។ លោកបញ្ជាក់ថាវីដេអូដែលលោក សម រង្ស៊ី បង្ហោះជាការបំភាន់មតិសាធារណ ដោយថារបបនោះមានពាក់ព័ន្ធនឹងការបញ្ចូលកងទ័ពវៀតណាមទៅជាមួយ កងទ័ពរបស់លោក ហេង សំរិន។
លោក មានប្រសាសន៍ ថា៖ «បាទ, ចាំ បង មើលខ្លឹមសារ ហ្នឹងទៅ យើង ប្តឹងទៅលើ ខ្លឹមសារហ្នឹង ពីព្រោះ ស្ពតហ្នឹង គាត់ គ្រាន់ តែ ចាក់ទៅ បំភាន់មតិ សារធារណៈហ្នឹង កាត់ ច្រឡំ ថា, សម្តេច សីហនុ ចោទប្រកាន់ របបហ្នឹង ការពារយួន, ការពារវៀតណាម អ៊ីចឹងទៅ បានជាយកសម្តេច ព្រះ នរោត្តម សីហនុ ទៅកាត់ទោស តាមពិត ការចាក់ បំភាន់, បំភាន់ទេ។»
គួររំឭកថា លោក សម រង្ស៊ី ក៏ត្រូវបានតុលាការចេញដីកាឲ្យចូលខ្លួនមកមកតុលាការនៅថ្ងៃទី៤ខែធ្នូ ពាក់ព័ន្ធនឹងសំណុំរឿងអតីតសមាជិកព្រឹទ្ធសភា លោក ហុង សុខហួរ ទាក់ទងនឹងបទសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែងនិងញុះញង់បង្កឲ្យមានវឹងកវរធ្ងន់ ដល់សន្តិសុខសង្គម ប្រព្រឹត្តទៅកាលពីថ្ងៃទី១២និង១៣ខែសីហា ឆ្នាំ២០១៥។ ដីកាបន្តថាអំពើដែលមានបញ្ញត្តិនឹងផ្តន្ទាទោសតាមមាត្រា២៩ មាត្រា៦២៩ មាត្រា៦៣០និងមាត្រា៤៩៥នៃក្រមព្រហ្មទណ្ឌ។ លោកក៏ត្រូវបានតុលាការចេញដីកាចាប់ខ្លួន ពាក់ព័ន្ធនឹងការបរិហាកេរ្តិ៍លោក ហោ ណាំហុង រដ្ឋមន្រ្តីក្រសួងការបរទេសកម្ពុជាផងដែរ៕
No comments:
Post a Comment