ពលរដ្ឋ ៧៥ គ្រួសារ នៅខេត្ត ក្រចេះ ស្នើសុំ អាជ្ញាធរ ពន្លឿន ដោះស្រាយ ជម្លោះដីធ្លី
RFA / វិទ្យុ អាស៊ី សេរី | ១៧ មករា ២០១៦
សកម្មភាពពលរដ្ឋ ១២គ្រួសារដែលដឹកនាំដោយ អ្នកស្រី ឃុត ម៉ុម
សមាជិកក្រុមប្រឹក្សាស្រុកចិត្របូរី
ចុះពិនិត្យមើលដីដែលអាជ្ញាធរបានវាស់វែងឲ្យពលរដ្ឋ ៧៥គ្រួសារ
ឋិតនៅឃុំថ្មគ្រែ ស្រុកចិត្របូរី ខេត្តក្រចេះ កាលពីថ្ងៃទី២០
ខែវិច្ឆិកា ឆ្នាំ២០១៥។ Photo Provided
ពលរដ្ឋ ៧៥គ្រួសារ រស់នៅ ភូមិ ថ្មគ្រែ ស្រុក ចិត្របូរី ខេត្ត ក្រចេះ អំពាវនាវ ឲ្យអាជ្ញាធរខេត្ត ពន្លឿន ការដោះស្រាយ ជម្លោះដីធ្លី បន្ទាប់ ពីអាជ្ញាធរ ធ្លាប់បាន វាស់វែង ផ្តល់ដី សម្បទាន សង្គមកិច្ច ជូនពួកគាត់។
ការអំពាវនាវនេះ បន្ទាប់ពីសមាជិកក្រុមប្រឹក្សាស្រុកចិត្របូរី បានសាងសង់លំនៅឋានលើដីនៅតំបន់នោះ។ ចំណែកសមាជិកក្រុមប្រឹក្សាស្រុកចិត្របូរី អះអាងថា អាជ្ញាធរបានយកដីពលរដ្ឋ ១២គ្រួសារ ដើម្បីប្លែងជាដីសម្បទានសង្គមកិច្ចឲ្យពលរដ្ឋផ្សេងទៀត។
ពលរដ្ឋ ៧៥គ្រួសាររស់នៅឃុំថ្មគ្រែ ស្រុកចិត្របូរី ឲ្យដឹងនៅថ្ងៃទី១៦ មករា ថា ពួកគាត់នៅពុំទាន់ទទួលបានដីសម្បទានសង្គមកិច្ចនៅឡើយទេ ខណៈដីទាំងនោះកំពុងចម្រូងចម្រាសជាមួយសមាជិកក្រុមប្រឹក្សាស្រុក ចិត្របូរី អ្នកស្រី ឃុត ម៉ុម និងពលរដ្ឋជាង ១០គ្រួសារផ្សេងទៀតជាច្រើនឆ្នាំកន្លងមក។
តំណាងពលរដ្ឋ ៧៥គ្រួសាររស់នៅឃុំថ្មគ្រែ លោក ក្រួច ផេន ហៅ ទន់ រៀម ចោទប្រកាន់ថា សមាជិកក្រុមប្រឹក្សាស្រុកចិត្របូរី មានមហិច្ឆតាសាងសង់លំនៅឋានលើដីសម្បទានសង្គមកិច្ចរបស់ពួកគាត់ និងហ៊ុមព័ទ្ធរបងដោយសំអាងថា ជាដីកម្មសិទ្ធិពលរដ្ឋ ១២គ្រួសារគ្រប់គ្រងតាំងពីឆ្នាំ១៩៧៩។ លោកកត់សម្គាល់ថា ដីសម្បទានសង្គមកិច្ចជាង ៤០ហិកតារ ដែលអតីតមេឃុំថ្មគ្រែ លោក រាជ្យ ថេន ធ្លាប់បានផ្តល់ជូនពលរដ្ឋជាអតីតសេនាជនជាង ៦០គ្រួសារ រស់នៅតាមច្រាំងទន្លេមុនឆ្នាំ២០០២ ហើយកាលពីឆ្នាំ២០១៤ ពលរដ្ឋ ៧គ្រួសាររងគ្រោះដោយសារការបាក់ច្រាំងទន្លេ ក៏បានមកដាក់ពាក្យស្នើសុំដីសម្បទានសង្គមកិច្ចរស់នៅ៖ «ពេលចុះ ធ្វើ ពលរដ្ឋ ៧៥គ្រួសារ អ្នកស្រី ឃុត ម៉ុម មករារាំងតែម្តង។ ពួកខ្ញុំចុះមកកាប់សម្អាត ពួកគាត់មកធ្វើផ្ទះលើដីពួកពលរដ្ឋ ៧៥គ្រួសារទេ។»
កាលពីថ្ងៃទី៣០ ធ្នូ ពលរដ្ឋ ៧៥គ្រួសារ បានប្ដឹង អ្នកស្រី ឃុត ម៉ុម ទៅសាលាដំបូងខេត្តក្រចេះ ពីបទរារាំងមិនឲ្យពលរដ្ឋ ៧៥គ្រួសារបង្កបង្កើនផលនៅលើដីឡូដែលអាជ្ញាធរខេត្តធ្លាប់វាស់វែង។
ឆ្លើយតបការចោទប្រកាន់នេះ សមាជិកក្រុមប្រឹក្សាស្រុកចិត្របូរី អ្នកស្រី ឃុត ម៉ុម អះអាងថា អាជ្ញាធរបានដកហូតដីពលរដ្ឋចំនួន ១២គ្រួសារ គ្រប់គ្រងតាំងពីឆ្នាំ១៩៧៩ ដើម្បីបម្លែងជាដីសម្បទានសង្គមកិច្ចជូនពលរដ្ឋ ៧៥គ្រួសារបំពានដីធ្លីអាស្រ័យផលពលរដ្ឋ។ អ្នកស្រីថា អាជ្ញាធរបានកាត់ឆ្វៀលដីសម្បទានសង្គមកិច្ចជូនពលរដ្ឋបានតែ ១គ្រួសារទេ។ ចំណែកពលរដ្ឋ ១១គ្រួសារផ្សេងទៀតមានជាង ១០ហិកតារ អាជ្ញាធរពុំទាន់ជូនដំណឹងស្ដីពីការកាត់ឆ្វៀលនៅឡើយទេ៖ «គាត់ មិនទាន់កាត់ដីឲ្យពួកខ្ញុំទេ បែរមកដេញពួកខ្ញុំចេញវាស់វែង ដីពួកខ្ញុំទៅធ្វើដីសម្បទានសង្គមកិច្ច។ គេឆ្វៀលឲ្យខ្ញុំតែមួយគ្រួសារទេ ១១គ្រួសារទៀតគេអត់ឆ្វៀលឲ្យទេ។»
គម្រោង ផ្តល់ដី សម្បទាន សង្គមកិច្ច របស់ អាជ្ញាធរ ស្រុក ចិត្របូរី ជូនពលរដ្ឋ ចំនួន ៧៥គ្រួសារ រស់នៅ ឃុំ ថ្មគ្រែ ស្រុក ចិត្របូរី ចាប់ផ្តើម តាំងពីឆ្នាំ ១៩៩៧ ក្នុងទំហំ ដី ចំនួន ៦៨ ហិកតារ ដោយក្នុង មួយគ្រួសារ ទទួលបានដី ១២ម៉ែត្រ គុណ នឹងបណ្តោយ ១៥០ម៉ែត្រ ទៅ ២០០ម៉ែត្រ។
អភិបាលស្រុកចិត្របូរី លោក ហង់ ចាន់ឌី ឲ្យដឹងថា អាជ្ញាធរបានឆ្វៀលដីជាង ២០ហិកតារ ដើម្បីកាត់ផលប៉ះពាល់ដល់ពលរដ្ឋកំពុងអាស្រ័យផលជាក់ស្តែងចំនួន ១១គ្រួសារ។ ដោយឡែកដីដែលនៅសេសសល់ចំនួនជាង ៤០ហិកតារ អាជ្ញាធរបានវាស់វែងផ្តល់ជាដីសម្បទានសង្គមកិច្ចជូនពលរដ្ឋរស់នៅ ភូមិថ្មគ្រែ ដល់អតីតសេនាជនភូមិ និងពលរដ្ឋដែលរស់នៅតាមច្រាំងទន្លេចំនួន ៧៥គ្រួសារ។ លោកអះអាងថា អាជ្ញាធរបានកំណត់ផែនទីជាក់លាក់ស្ដីពីគម្រោងផ្តល់ដីសម្បទាន សង្គមកិច្ច និងបានជូនដំណឹងបញ្ហានេះដល់អ្នកពាក់ព័ន្ធ៖ «អ្នកស្រី ឃុត ម៉ុម គាត់ក៏បានផ្ដិតមេដៃជាមួយនឹងអាជ្ញាធរដែរ។ គាត់មានស្នាមមេដៃត្រឹមត្រូវក្នុងការប្រគល់ដីឲ្យរដ្ឋគ្រប់គ្រង ហើយខ្ញុំពិបាក ដែលខាងហ្នឹងគាត់ចូលចិត្តតែធ្វើមិនមានការទទួលខុសត្រូវ ចូលចិត្តធ្វើមិនមានលក្ខណៈផ្លូវច្បាប់។»
មេឃុំ សំបុក លោក ហ៊ឹម ស្រង អះអាង ថា, កន្លងទៅ អាជ្ញាធរ ខេត្ត បានកំណត់ ថា, ដី ជាង ៦០ហិកតារ គឺ ជាដីសម្បទាន សង្គមកិច្ច បន្ទាប់ ពីរកឃើញ ថា, ដី នៅតំបន់នោះ មួយផ្នែក ធំ ជាតំបន់ ព្រៃ ឬដី សាធារណៈ របស់រដ្ឋ៕
No comments:
Post a Comment