លោក ហ៊ុន សែន ថា, លោក ទៅពិនិត្យ ជំងឺ នៅបរទេស មិនមែន មិនទុកចិត្ត គ្រូពេទ្យ នៅកម្ពុជា ទេ
RFA / វិទ្យុ អាស៊ី សេរី | ១៨ មករា ២០១៦
លោកនាយករដ្ឋមន្ត្រី ហ៊ុន សែន (រូបមុខ) មកដល់ប្រទេសកម្ពុជា
វិញបន្ទាប់ពីបំពេញទស្សនកិច្ចនៅប្រទេសបារាំង នៅថ្ងៃទី២៨ ខែតុលា
ឆ្នាំ២០១៥។ RFA/Brach Chev
លោក នាយករដ្ឋមន្ត្រី ហ៊ុន សែន នៅថ្ងៃ ទី១៨ មករា បានធ្វើ ដំណើរ ទៅកាន់ ប្រទេស សិង្ហបុរី (Singapore) ដើម្បី ពិនិត្យសុខភាព ប្រចាំឆ្នាំ របស់លោក។ លោក ហ៊ុន សែន មានប្រសាសន៍ ថា, ការ ដែលលោក ទៅពិនិត្យ សុខភាព នៅបរទេស នេះ មិនមែន មានន័យ ថា, លោក មិនទុកចិត្ត គ្រូពេទ្យ នៅកម្ពុជា នោះទេ។
ការធ្វើដំណើរទៅពិនិត្យ ឬព្យាបាលជំងឺនៅបរទេស គឺជារឿងធម្មតាទៅហើយសម្រាប់មន្ត្រីធំៗ និងពលរដ្ឋខ្មែរដែលមានជីវភាពធូរធារ ដោយសារពួកគេមិនទុកចិត្តគុណភាពសេវាសុខាភិបាល និងវិជ្ជាជីវៈរបស់គ្រូពេទ្យនៅកម្ពុជា។
ប៉ុន្តែ លោក ហ៊ុន សែន បញ្ជាក់ថា ការដែលលោកទៅពិនិត្យជំងឺនៅបរទេសពេលនេះ មិនមែនលោកមិនទុកចិត្តគ្រូពេទ្យខ្មែរនោះឡើយ។
លោក ហ៊ុន សែន សរសេរនៅលើទំព័រហ្វេសប៊ុក (Facebook) របស់លោកនៅថ្ងៃទី១៨ មករា ថា បើទោះជាលោកទៅពិនិត្យសុខភាពនៅប្រទេសសិង្ហបុរី លោកពុំមានជំងឺអ្វីធ្ងន់ធ្ងរដែលត្រូវព្យាបាលនោះទេ ប៉ុន្តែវាជាការតម្រូវរបស់គ្រូពេទ្យ ដែលកំណត់ឲ្យលោកត្រូវពិនិត្យសុខភាពជាប្រចាំក្នុងមួយឆ្នាំម្តង។ ម្យ៉ាងវិញទៀត លោកថា មួយរយៈពេលចុងក្រោយនេះ លោកមានការងារច្រើនដែលត្រូវដោះស្រាយទាំងយប់ទាំងថ្ងៃ ស្ទើររកពេលសម្រាកមិនបាន។
យ៉ាងណាក៏ដោយចុះ លោក ហ៊ុន សែន បញ្ជាក់ថា ការដែលលោកទៅពិនិត្យសុខភាពនៅប្រទេសសិង្ហបុរី មិនមែនមានន័យថា លោកមិនទុកចិត្តគ្រូពេទ្យនៅកម្ពុជា នោះទេ។ លោកថា ជាទូទៅ គឺគ្រូពេទ្យខ្មែរនេះឯងជាអ្នកពិនិត្យសុខភាពលោកជារៀងរាល់ខែ ហើយលោកចេញទៅពិនិត្យសុខភាពនៅក្រៅប្រទេសនេះ ក៏ដោយសារតែមានការណែនាំ និងស្នើពីគ្រូពេទ្យកម្ពុជា ផងដែរ ដើម្បីធ្វើឲ្យប្រាកដនូវប្រភេទជំងឺខ្លះដែលពេទ្យកម្ពុជា ខ្វះឧបករណ៍។
លោក ហ៊ុន សែន មិនបានបញ្ជាក់ពីប្រភេទជំងឺដែលលោកទៅពិនិត្យ ថាជាប្រភេទជំងឺអ្វីឡើយ ដោយគ្រាន់តែឲ្យដឹងថា លោកនឹងវិលត្រឡប់មកប្រទេសកម្ពុជា វិញ នៅថ្ងៃទី២១ មករា ប្រសិនបើគ្រូពេទ្យអនុញ្ញាត។
ការចាកចេញរបស់ លោក ហ៊ុន សែន ទៅពិនិត្យសុខភាពនៅក្រៅប្រទេស ជួនចំពេលដែលភាពចម្រូងចម្រាសរវាងគណៈវិជ្ជាជីវៈសុខាភិបាលកម្ពុជា និងនាយកសាលារៀនអន្តរទ្វីបអាមេរិកាំង លោកវេជ្ជបណ្ឌិត គួច ម៉េងលី កំពុងកើតមាននៅឡើយ ដោយសារតែ លោក គួច ម៉េងលី មិនព្រមសុំទោសគណៈវិជ្ជាជីវៈសុខាភិបាលកម្ពុជា ជាសាធារណៈ ទាក់ទងនឹងការរិះគន់របស់លោកទៅលើវិជ្ជាជីវៈរបស់គ្រូពេទ្យកម្ពុជា កាលពីពេលថ្មីៗនេះ ដែលថា ក្នុងចំណោមគ្រូពេទ្យខ្មែរ ១០នាក់ គឺមាន ៩នាក់ហើយដែលមិនប្រកាន់ខ្ជាប់នូវក្រមសីលធម៌វិជ្ជាជីវៈរបស់ខ្លួន។
បើទោះជា លោក គួច ម៉េងលី បានឆ្លើយតបទៅកាន់គណៈវិជ្ជាជីវៈសុខាភិបាលកម្ពុជា រួចហើយថា អ្វីដែលលោកលើកឡើង គឺគ្មានចេតនាបំផ្លើស បន្តុះបង្អាប់ ឬធ្វើឲ្យខូចកិត្តិយសសេចក្តីថ្លៃថ្នូររបស់គ្រូពេទ្យ និងវិជ្ជាជីវៈសុខាភិបាលក៏ដោយ តែគណៈវិជ្ជាជីវៈសុខាភិបាលកម្ពុជា នៅតែបន្តទាមទារឲ្យ លោក គួច ម៉េងលី សុំទោសជាសាធារណៈ។
ក្នុងលិខិតរបស់គណៈវិជ្ជាជីវៈសុខាភិបាលកម្ពុជា ផ្ញើទៅកាន់ លោក គួច ម៉េងលី កាលពីថ្ងៃទី១៦ ខែមករា គណៈវិជ្ជាជីវៈសុខាភិបាលកម្ពុជា បញ្ជាក់ថា ទង្វើរបស់ លោក គួច ម៉េងលី បានបង្កការខូចខាតដល់កិត្តិយស និងសេចក្តីថ្លៃថ្នូរនៃអ្នកប្រកបរបរវិជ្ជាជីវៈសុខាភិបាលនៅកម្ពុជា និងវិជ្ជាជីវៈសុខាភិបាលទាំងមូល។
យ៉ាងណា លោក គួច ម៉េងលី មានប្រសាសន៍ថា អ្វីដែលលោកលើកឡើង គឺគ្រាន់តែជាការបញ្ចេញមតិជាបុគ្គល ជាការរិះគន់ក្នុងចេតនារួមចំណែកកែទម្រង់ ធ្វើឲ្យសង្គមកម្ពុជា ប្រសើរឡើងប៉ុណ្ណោះ។
ជុំវិញរឿងនេះដដែល លោក គួច ម៉េងលី បានសរសេរនៅលើទំព័រហ្វេសប៊ុករបស់លោកនៅថ្ងៃទី១៨ មករា ថា សូមឲ្យគេចាត់ទុកការលើកឡើងរបស់លោកនេះ ថាជាការសំណូមពរដល់គ្រូពេទ្យដែលពុំទាន់មានក្រមសីលធម៌ ឲ្យចាប់ផ្ដើមមើលពីតម្លៃអាយុជីវិតរបស់អ្នកជំងឺ និងកែប្រែរាល់ចំណុចមិនល្អទាំងឡាយនាពេលកន្លងមក។
យ៉ាងណា ការលើកឡើងរបស់ លោក គួច ម៉េងលី នេះ ត្រូវបានអ្នកវិភាគការអភិវឌ្ឍសង្គម លោកបណ្ឌិត កែម ឡី ថ្លែងអំណរគុណ។ លោកបណ្ឌិត កែម ឡី បានបញ្ចេញទស្សនៈនៅលើទំព័រហ្វេសប៊ុកថា គុណភាពសេវាសុខាភិបាលនៅកម្ពុជា មិនមែនធ្វើត្រឹមកំណែទម្រង់នោះទេ គឺត្រូវការធ្វើបដិវត្តន៍តែម្តង។ លោកថា គុណភាពសេវាសុខាភិបាលសាធារណៈកម្ពុជា នៅទាបបំផុត បើប្រៀបធៀបទៅនឹងមន្ទីរពេទ្យគន្ធបុប្ផា និងមន្ទីរពេទ្យរបស់បណ្ដាប្រទេសក្នុងតំបន់។
លោកបណ្ឌិត កែម ឡី អះអាងថា មានកត្តាមួយចំនួនដែលធ្វើឲ្យគុណភាពសុខាភិបាលកម្ពុជា នៅទាប។ កត្តាទាំងនោះមានដូចជា ស្តង់ដារថ្នាំពេទ្យដែលប្រើប្រាស់នៅទាប គ្រូពេទ្យល្អៗត្រូវដាក់ឲ្យនៅកកកុញតែក្នុងពេទ្យធំៗ កង្វះសម្ភារៈបរិក្ខារពេទ្យ អាកប្បកិរិយាគ្រូពេទ្យមិនល្អ នីតិវិធី និងដំណើរការព្យាបាលស្មុគស្មាញ ការបង្កើតក្រុមគ្រូពេទ្យព្យាបាលចល័ត ដើម្បីបម្រើប្រយោជន៍នយោបាយ និងប្រាក់បៀវត្សរ៍ទាប ជាដើម៕
No comments:
Post a Comment