បក្ស កាន់អំណាច រិះគន់ បក្សប្រឆាំង និងត្រៀម យុទ្ធសាស្ត្រ សម្រាប់ បោះឆ្នោត ឃុំ-សង្កាត់
អង្គសន្និបាត
រយៈពេល ពីរថ្ងៃ របស់ គណបក្ស កាន់អំណាច បានបញ្ចប់ ដោយមាន ការរិះគន់
ដល់គណបក្ស ជំទាស់
និងការរៀបចំ យុទ្ធសាស្ត្រ ថ្មី សម្រាប់ ការបោះឆ្នោត ឃុំ-សង្កាត់
ក្នុងពេល ខាងមុខ។
VOA / វីអូអេ | ១២ មករា ២០១៦
ភ្នំពេញ— អង្គសន្និបាត រយៈពេល ពីរថ្ងៃ របស់ គណបក្ស កាន់អំណាច បានបញ្ចប់ ដោយមាន ការរិះគន់ ដល់គណបក្ស ជំទាស់ និងការរៀបចំ យុទ្ធសាស្ត្រ ថ្មី សម្រាប់ ការបោះឆ្នោត ឃុំ-សង្កាត់ ក្នុងពេល ខាងមុខ។ ក្នុងខណៈពេល ដែលអ្នក តាមដាន នយោបាយ ក្នុងប្រទេស ចង់ឃើញ គោលនយោបាយ ថ្មីមួយ របស់ គណបក្ស កាន់អំណាច ដែលឆ្លើយតប ទៅ នឹងទុក្ខលំបាក របស់ ប្រជាពលរដ្ឋ។
នាថ្ងៃច័ន្ទនេះ អ្នកតាមដាន ការវិវឌ្ឍ នយោបាយ និងអ្នក នយោបាយ កម្ពុជា យល់ថា, គណបក្ស កាន់អំណាច របស់លោក ហ៊ុន សែន គួរតែ ធ្វើកំណែទម្រង់ ឲ្យបាន ស៊ីជម្រៅ លើបញ្ហា ប្រឈម របស់ ប្រជាពលរដ្ឋ កម្ពុជា និងធ្វើការ ផ្លាស់ប្តូរ មន្ត្រី ដែលអសកម្ម ជាជាង ការបង្កើត គោលនយោបាយ ដដែល ដោយមិនមាន សកម្មភាព នោះ។
ការលើកឡើងនេះគឺ មួយថ្ងៃក្រោយពេលដែលគណបក្សប្រជាជនកម្ពុជាដែលកាន់អំណាច ជាង៣៥ឆ្នាំ បញ្ចប់សន្និបាតគណៈកម្មាធិការកណ្តាលប្រចាំឆ្នាំរបស់ខ្លួន រយៈពេលពីរថ្ងៃក្នុងរាជធានីភ្នំពេញ។ ក្នុងនោះក៏មានការបូកសរុប សកម្មភាព ស្ថានភាពនយោបាយក្នុងនិងក្រៅស្រុកនាឆ្នាំ២០១៥កន្លងមក នឹងការរៀបចំយុទ្ធសាស្រ្តសម្រាប់ឆ្នាំ២០១៦ខាងមុខ។
យោងតាមរបាយការណ៍កម្រាស់ ៤៩ទំព័រ របស់គណបក្សប្រជាជនកម្ពុជា ដែលត្រូវបានគេចែកចាយតាមរយៈសារអេឡិកត្រូនិក ឬ Email បានឲ្យដឹងថាគណបក្សប្រជាជនកម្ពុជារបស់លោកហ៊ុន សែន បានរៀបចំយុទ្ធសាស្ត្រថា្នក់ជាតិមួយដើម្បីពង្រឹងការអនុវត្តរបស់ មន្ត្រីគណបក្សខ្លួន ទប់ទល់នឹងគណបក្សជំទាស់ ក៏ដូចជាត្រៀមខ្លួនក្នុងការបោះឆ្នោត ឃុំ-សង្កាត់ នាខែឧសភាឆ្នាំ២០១៧ផងដែរ។ ក្នុងនោះដែរ គណៈកម្មាធិការកណ្តាល គណបក្សប្រជាជនកម្ពុជា បានចោទគណបក្សប្រឆាំងថាប្រើប្រាស់ការបោះបង្គោលព្រំដែន និងរឿងព្រំដែនធ្វើជា «អាជីកម្ម នយោបាយ» បង្កឲ្យមានចលាចលសង្គមនាឆ្នាំ២០១៥ផងដែរ។
នៅក្នុងឯកសារដែល VOA បានទទួល គណបក្សកាន់អំណាចបានសរសេរក្នុងទិសដៅភារកិច្ចនាពេលខាងមុខ របស់ខ្លួនក្នុងឆ្នាំ២០១៦ យ៉ាងដូច្នេះថា៖ «ជាមួយ នឹងកត្តា អំណោយផលនានា, យើង ក៏នឹងត្រូវប្រឈមនឹងការលំបាកច្រើនដែរ ជាពិសេសភាពយឺតយ៉ាវនៃកំណែទម្រង់ឲ្យបានខ្លាំងក្លា និងកាន់តែមានប្រសិទ្ធភាពឡើង ពង្រឹងការឯកភាពទាំងទស្សនៈ គោលជំហរ និងសកម្មភាព ហើយបង្កើនស្មារតីម្ចាស់ការ និងប្រុងប្រយ័ត្ន ខ្ពស់សំដៅទប់ស្កាត់ទង្វើអាក្រក់ផ្សេងៗរបស់ក្រុមប្រឆាំង។»
របាយការណ៍ដដែលក៏បាន បញ្ជាក់ថាគណបក្សខ្លួននិងពង្រឹងការផ្សព្វផ្សាយគោលនយោបាយនិង ច្បាប់បោះឆ្នោតដល់ប្រជាជននិងមន្ត្រីរបស់ខ្លួនក្នុងថ្នាក់មូល ដ្ឋាន ជាពិសេសបង្កើតចលនាបោះឆ្នោត តាមភូមិចំណុះឃុំនិងសង្កាត់នីមួយៗក្នុងការ «កសាង ពង្រឹង ពង្រីកសមាជិកគណបក្ស និងគ្រប់គ្រងសមាជិកគណបក្សដែលមានសិទ្ធិបោះឆ្នោត។»
យ៉ាងណាក៏ដោយ លោកយឹម សុវណ្ណ អ្នកនាំពាក្យគណបក្សជំទាស់ដែលមានសំឡេងភាគតិចក្នុងរដ្ឋសភាបានយល់ ថា៖ «គណបក្សសង្គ្រោះជាតិធ្វើសកម្មភាពស្របច្បាប់ ធ្វើសកម្មភាព បម្រើផលប្រយោជន៍ជាតិធ្វើសកម្មភាពដោយស្មោះត្រង់ ហើយធ្វើការតស៊ូមតិដោយសន្តិវិធី។ យើងអត់ចាត់ទុកខ្មែរណាជាសត្រូវ ហើយយើងមិនចោទប្រកាន់ មិនលាបពណ៌ អ្នកនេះ អញ្ចេះអ្នកនោះអញ្ចុះ អ្នកនេះទង្វើអាក្រក់ អ្នកនោះទង្វើល្អ។ ខ្ញុំមិននិយាយបែបហ្នឹងទេ។ កុំចោទគណបក្សនេះអញ្ចេះ គណបក្សនោះអញ្ចុះ។ ធ្វើម៉េចក៏ដោយ ខំធ្វើសកម្មភាពតាមគោលនយោបាយរបស់គណបក្សរបស់ខ្លួនទៅ ហើយបើប្រជាពលរដ្ឋគេគាំទ្រគណបក្សណា ជារឿងរបស់គេ ជាឆន្ទៈរបស់គេ។»
លោកបន្តថាគណបក្សនយោបាយក្នុងប្រទេសកម្ពុជាគួរតែធ្វើតាម ឆន្ទៈរបស់ប្រជាពលរដ្ឋ និងតាមសេចក្តីត្រូវការរបស់ពួកគាត់ជាជាងការបង្កើតយុទ្ធសាស្ត្រ និងរៀបចំក្រុមការងាររបស់ខ្លួន គ្រប់គ្រងប្រជាពលរដ្ឋ។
«គោលនយោបាយរបស់យើង គឺយើងព្យាយាមផ្សព្វផ្សាយគោលនយោបាយរបស់យើងឲ្យទៅប្រជាពលរដ្ឋទៅ។ ក្តាប់សេចក្តីត្រូវការនិងការចង់បានរបស់ប្រជាពលរដ្ឋទៅហើយយើង ធ្វើតាមការចង់បានរបស់គាត់ និងឆន្ទៈរបស់គាត់ទៅគឺដូចជាវាគ្មានអ្វីគួឲ្យស្មុគស្មាញទេ។»
ប្រទេសកម្ពុជានឹងរៀបចំការបោះឆ្នោតឃុំសង្កាត់ នាឆ្នាំ២០១៧និងការបោះឆ្នោតសាកលដើម្បីជ្រើសរើសតំណាងរាស្ត្រនា ឆ្នាំ២០១៨ខាងមុខ។ គណបក្សនយោបាយកម្ពុជា ជាច្រើនកំពុងតែមមាញឹក ក្នុងការបានរៀបចំខ្លួននិងគោលនយោបាយរបស់ខ្លួនដើម្បីប្រកួត ប្រជែងក្នុងការបោះឆ្នោតពេលខាងមុខ។
លោក គល់ បញ្ញាប្រធានប្រតិបត្តិនៃអង្គការឃ្លាំមើលការបោះឆ្នោត ដែលហៅកាត់ថា ខុមហ្រែ្វល COMFREL បានប្រាប់ VOA ថាការដាក់ផែនការយុទ្ធសាស្រ្តរបស់គណបក្សនយោបាយគឺជារឿងល្អ សម្រាប់ការប្រកួតប្រជែង ក្នុងគោលនយោបាយ ជាមួយគណបក្សនយោបាយនានា សម្រាប់ពេលបោះឆ្នោត ខាងមុខ។
«ក៏ប៉ុន្តែគ្រាន់ថា គណបក្សប្រជាជន ភាគច្រើនមន្ត្រីដែលចូលរួមនៅការចាត់ចែងរបស់គណបក្សហ្នឹងវាទាក់ ទិននឹងមន្ត្រី ហ្នឹងដែលជាបញ្ហាមានភាពច្របូកច្របល់ នៅពេលមានការដាក់បទបញ្ជាអីផ្សេងៗហ្នឹង។ វាទាក់ទិននឹងមន្ត្រីមានសមត្ថកិច្ច ដែលធ្វើកិច្ចការងារអាជ្ញាធរដែលគ្រប់គ្រងការងាររដ្ឋបាលដែលត្រូវ បម្រើឲ្យគ្រប់គណបក្សនឹងទៅបម្រើឲ្យគណបក្ស។ កិច្ចការខ្លះហ្នឹង វាមានការំលោភបំពារបំពានទៅលើច្បាប់ ទៅលើគណបក្សផ្សេងៗទៀត។ ដោយសារអី?ដោយសារអ្នកដែលមានតួនាទី ដែលត្រូវរក្សាសុវត្ថិភាព សន្តិសុខ ឲ្យគ្រប់គណបក្សហ្នឹង បែរជាទៅការពារឲ្យគណបក្សខ្លួនឯង គណបក្ស កាន់អំណាចអញ្ចឹងទៅ។»
នៅក្នុងរបាយការណ៍៤៩ទំព័រ ដែលគេចែកចាយក្នុងអង្គសន្និបាតរយៈពេលពីរថ្ងៃ គណបក្សកាន់អំណាចបញ្ជាក់ថានឹងពង្រឹង ការអនុវត្តច្បាប់ រក្សាស្ថិរភាព សន្តិភាព បង្កើនសមិទ្ធិផលនិងសេវាសាធារណៈជំរុញការអភិវឌ្ឍសេដ្ឋកិច្ច បង្កើតប្រាក់បៀវត្សរ៍ របស់បុគ្គលិករាជការនិង កម្មករ រួមទាំងជំរុញឲ្យមានការអនុម័តច្បាប់ស្តីពីសហជីពផងដែរ នាឆ្នាំ២០១៦នេះ។
សម្រាប់ លោក អ៊ូ វីរៈ នាយកវេទិកាអនាគតដែលជាមជ្ឈមណ្ឌលស្រាវជ្រាវគោលនយោបាយក្នុងស្រុក មួយយល់ថា គោលនយោបាយយុទ្ធសាស្រ្តរបស់គណបក្សកាន់អំណាចគឺមិនមានអ្វីថ្មី សម្រាប់លោក ហើយអ្វីដែលគួរឲ្យចាប់អារម្មណ៍នោះគឺការផ្លាស់ប្តូរមន្ត្រីដែល អសកម្មក្នុងគណៈរដ្ឋមន្ត្រីនិងការកែប្រែគោលនយោបាយសង្គមមួយដែល អាចផ្តល់ផលប្រយោជន៍ដល់ប្រជាពលរដ្ឋខ្មែរ។ លោកថាគោលនយោបាយថ្មី របស់គណបក្សកាន់អំណាច បានដាក់នៅក្នុងអង្គប្រជុំខ្លួនដែលបញ្ចប់កាលពីថ្ងៃអាទិត្យនេះ មិនឆ្លុះបញ្ចាំងពីការចង់កែទម្រង់មួយនោះទេ។
«មានន័យថាគណបក្សប្រជាជនភ័យខ្លួនជាងមុន មិនដូចកាលមុនជិះសេះលែងដៃទាំងស្រុង អត់ខ្វល់ អត់អីអញ្ចឹង តែគ្រាន់តែថាឥឡូវគឺឲ្យខ្វល់ជាងមុន។ ក៏ប៉ុន្តែមិនមានអ្វីដែលដូរជារចនាសម្ព័ន្ធ ឬជាប្រព័ន្ធនោះទេ។ អ្វីដែលយើងចង់ឃើញដូរជាប្រព័ន្ធ គឺត្រូវការដូរបុគ្គលមួយចំនួននៅក្នុងថ្នាក់ដឹកនាំ ជាពិសេសគឺគណៈរដ្ឋមន្ត្រីតែម្តង ហើយបន្ទាប់ពីហ្នឹងទៅគឺត្រូវមានគោលនយោបាយឬគម្រោងច្បាស់លាស់ដែល ខុសពីឥឡូវ។ ឥឡូវនេះយើងមើល បរាជ័យនៅតុលាការយុត្តិធម៌ បរាជ័យរឿងដីធ្លី រឿងដីសម្បទានសេដ្ឋកិច្ច គ្រប់គ្រងមិនបានទេ បរាជ័យរឿងព្រៃឈើ សុទ្ធតែជារឿងគួរឲ្យឈឺក្បាលបំផុត។»
ក៏ប៉ុន្តែ របាយការណ៍សកម្មភាពភាពរបស់គណបក្សប្រជាជនកម្ពុជា លើកឡើងថា គណបក្សកាន់អំណាចរបស់ខ្លួន បានពង្រីកការអនុវត្តច្បាប់ ការគ្រប់គ្រងលើប្រព័ន្ធដីធ្លី និងការកាប់បំផ្លាញព្រៃឈើផងដែរ។ ក្រោយពេលកិច្ចប្រជុំ ២ថ្ងៃរបស់ខ្លួននាទីក្រុងក្នំពេញ លោកនាយករដ្ឋមន្ត្រី ហ៊ុន សែន បានសរសេរក្នុងទំព័រហ្វេសប៊ុកផ្ទាល់ខ្លួននាថ្ងៃច័ន្ទនេះថា៖ «ការពិភាក្សានិងការអនុម័តនូវឯកសារដ៏មានសារៈសំខាន់នេះបង្ហាញពី ការទទួលខុសត្រូវក្នុងឋានៈជាបក្សកាន់អំណាចដែលត្រូវ គិតគូរគ្រប់ជ្រុងជ្រោយ និងគ្រប់បញ្ហាដែលជាផលប្រយោជន៍របស់ជាតិ និងប្រជាជនយើង៕»
No comments:
Post a Comment