ពលរដ្ឋ ខេត្ត ត្បូងឃ្មុំ បារម្ភខ្លាច វិធានការ បង្ក្រាបឈើ របស់ អាជ្ញាធរ មិនមាន តម្លាភាព
RFA / វិទ្យុ អាស៊ី សេរី | ១៩ មករា ២០១៦
កំណាត់ឈើក្នុងបរិវេណដីសម្បទានសេដ្ឋកិច្ចចិន ឈ្មោះ ហ្វូឡាយ
ឈុន គ្រុប (FU LAI CHUN GROUP) ឋិតនៅឃុំរលួស ស្រុកសំបូរ ខេត្តក្រចេះ
នៅថ្ងៃទី១៨ ខែមករា ឆ្នាំ២០១៦។ RFA/Men Sothyr
ប្រជាពលរដ្ឋ នៅស្រុក មេមត់ និងសង្គមស៊ីវិល លើកឡើង ថា, ករណី បង្ក្រាប ការរត់ពន្ធ ឈើ ចេញទៅប្រទេស វៀតណាម នៅខេត្ត ត្បូងឃ្មុំ រហូត ហ៊ុមព័ទ្ធ ឃ្លាំងស្តុក ឈើប្រណីត ធំៗ របស់ ឧកញ៉ា មួយចំនួន គឺ ជារឿង ដ៏ល្អមួយ, ប៉ុន្តែ ពួកគាត់ យល់ថា វិធានការនោះ នឹងអាចធ្វើ គ្រាន់តែ ល្អមើល ប្រសិន អាជ្ញាធរ មិន បានបំពេញ ការងារ ឲ្យមាន តម្លាភាព ទេនោះ។
ប្រជាពលរដ្ឋនៅឃុំដារ ស្រុកមេមត់ ស្នើឲ្យអាជ្ញាធរខេត្ត រួមទាំងគណៈកម្មាធិការចម្រុះរបស់រាជរដ្ឋាភិបាល បំពេញការងាររបស់ខ្លួនក្នុងការបង្ក្រាបបទល្មើសរត់ពន្ធឈើចេញទៅ ប្រទេសវៀតណាម ឲ្យបានទូលំទូលាយ និងត្រូវដាក់បង្ហាញជាសាធារណៈ ជៀសវាងមានការឃុបឃិតណាមួយកើតឡើង។
ពលរដ្ឋនៅឃុំដារ មួយរូប គឺលោក ធឿន វុត្ថា មើលឃើញថា វិធានការរបស់អាជ្ញាធរ នឹងអាចមានប្រសិទ្ធភាពក្នុងរយៈពេលខ្លីប៉ុណ្ណោះ ប្រសិនអាជ្ញាធរមិនបានបង្ហាញសមិទ្ធផលការងាររបស់ពួកគេជាសាធារណៈ ឲ្យប្រជាពលរដ្ឋបានដឹងទេនោះ។ ម្យ៉ាងលោកបារម្ភថា បទល្មើសរត់ពន្ធឈើចេញទៅប្រទេសវៀតណាម នឹងកើតមានឡើងបន្តទៀត ក្រោយពេលសកម្មភាពបង្ក្រាបរបស់អាជ្ញាធរស្ងប់ស្ងាត់៖ «គណៈកម្មាធិការ បង្កើតដើម្បីត្រួតពិនិត្យហ្នឹង គឺអាចបានរយៈពេលតូច ឬខ្លីទេ ព្រោះតម្លាភាពមិនអាចទៅរួចទៅនឹងការឃុបឃិតជាមួយអាជ្ញាធរ ឬថ្នាក់ណាមួយ។»
ការលើកឡើងរបស់ប្រជាពលរដ្ឋនេះ ក្រោយពេលកម្លាំងចម្រុះរបស់អាជ្ញាធរខេត្តត្បូងឃ្មុំ កំពុងចាត់វិធានការបង្ក្រាបករណីរត់ពន្ធឈើចេញទៅប្រទេសវៀតណាម យ៉ាងសកម្ម ក្នុងនោះអាជ្ញាធររកឃើញកន្លែងស្តុកឈើប្រណីតធំៗរបស់ឧកញ៉ា លឹម ប៊ុណ្ណា ហៅ ខ្នា នៅឃុំដារ ស្រុកមេមត់ ឃ្លាំងស្តុកឈើរបស់ឧកញ៉ា ស៊ឹង សំអុល និងចាប់បានរថយន្តយីឌុបដឹកឈើរបស់ឧកញ៉ា ថៃ ព្រមទាំងរកឃើញឈើដែលស្តុកទុកនៅផ្ទះឧកញ៉ា ថៃ នៅស្រុកអូររាំងឪ ទៀតផង។
វិទ្យុអាស៊ីសេរី មិនអាចសុំការពន្យល់បន្ថែមពីសំណាក់អភិបាលខេត្តត្បូងឃ្មុំ លោក ប្រាជ្ញ ច័ន្ទ ជុំវិញបញ្ហានេះបានទេ ដោយអ្នកទទួលទូរស័ព្ទប្រាប់ថា លោកជាប់ប្រជុំនៅថ្ងៃទី១៩ មករា។
កាលពីថ្ងៃទី១៨ មករា ប្រធានគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសព្រៃឈើ លោក សៅ សុខា អមដោយមន្ត្រីរាជរដ្ឋាភិបាលជាច្រើនរូបទៀត ចុះទៅដល់ឃ្លាំងស្តុកឈើរបស់ឧកញ៉ា លឹម ប៊ុណ្ណា ហៅ ខ្នា ប៉ុន្តែគេនៅមិនទាន់ដឹងថា ឈើរាប់ពាន់ដុំ និងរាប់រយដើមនោះ មានចំនួនប៉ុន្មានម៉ែត្រគូប ហើយជាប្រភេទឈើស្របច្បាប់ ឬខុសច្បាប់នៅឡើយទេ។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តត្បូងឃ្មុំ លោក នាង សុវ៉ាត មានប្រសាសន៍ថា ការងារនេះ គឺស្ថិតនៅក្នុងភាពអាថ៌កំបាំង ព្រោះឈើប្រណីតដែលនាំចេញ ឬស្តុកទុកកន្លងមក គឺគ្មាននរណាដឹងថា ជាឈើស្របច្បាប់ ឬខុសច្បាប់ឡើយ។ មួយវិញទៀត ប្រជាពលរដ្ឋនឹងមិនអាចជឿជាក់លើសកម្មភាពរបស់មន្ត្រីរដ្ឋាភិបាលពេល នេះបានទេ ដរាបណាពួកគេមិនបានបង្ហាញភាពស្មោះត្រង់ដល់ប្រជាពលរដ្ឋនោះ៖ «បង្ហាញ មកថា របាយការណ៍ដែលត្រូវធ្វើចំពោះឈ្មួញឈើ ឧកញ៉ា មាននរណាខ្លះ ហើយបង្ហាញពីទិន្នន័យពីការដឹកជញ្ជូនកន្លែងស្តុក កន្លែងណាខ្លះៗ ប្រាប់ឲ្យច្បាស់មក ប្រជាពលរដ្ឋជឿហើយ។»
ទាក់ទងការបង្ក្រាបបទល្មើសឈើពេលនេះ គេហទំព័រសារព័ត៌មានក្នុងស្រុកមួយចុះផ្សាយកាលពីថ្ងៃទី១៨ មករា ដោយដាក់ចំណងជើងថា លទ្ធផលចុងក្រោយ ឈើទាំងអស់នឹងធ្លាក់ក្នុងដៃឧកញ៉ា ទ្រី ភាព តែម្នាក់ឯង សម្រាប់នាំចេញទៅទីផ្សារស្រុកចិន។ នៅពេលទីផ្សារឈើនៅស្រុកចិន ជាប់គាំងកាលពីប៉ុន្មានឆ្នាំមុន បានបង្ហាញនូវវត្តមានគំនរឈើនៅលើទឹកដីវៀតណាម ជាប់ព្រំដែនខ្មែរយ៉ាងសន្ធឹកសន្ធាប់ ប្រៀបដូចជាភ្នំ។ ឈើទាំងនោះ ត្រូវបានក្រុមឈ្មួញដឹកជញ្ជូនចេញពីកម្ពុជា តាមគ្រប់រូបភាព ហើយមានការពាក់ព័ន្ធយ៉ាងជិតស្និទ្ធជាមួយឧកញ៉ា ស៊ឹង សំអុល និងឧកញ៉ា លឹម ប៊ុណ្ណា ហៅ ខ្នា ដែលគេស្គាល់ថា ជាមនុស្សស្និទ្ធនឹង លោក ហ៊ុន ណេង ជាអ្នកតំណាងរាស្ត្រគណបក្សប្រជាជនកម្ពុជា មណ្ឌលកំពង់ចាម និងត្រូវជាបងប្រុសបង្កើតរបស់លោកនាយករដ្ឋមន្ត្រី ហ៊ុន សែន។
ស្របពេលសមត្ថកិច្ចកំពុងបង្ក្រាបបទល្មើសឈើរបស់ឧកញ៉ាមួយចំនួន លោក ទ្រី ភាព ក៏អាចត្រៀមចាំប្រមូលឈើខុសច្បាប់ពីឧកញ៉ាទាំងនោះសម្រាប់ ក្រុមហ៊ុនខ្លួនឯង ដើម្បីនាំចេញបន្តទៅកាន់ទីផ្សារស្រុកចិន ដោយប្រែរូបភាពពីឈើខុសច្បាប់ ទៅជាឈើស្របច្បាប់ តាមរយៈការដេញថ្លៃយកឈើដែលសមត្ថកិច្ចបង្ក្រាបបានទាំងនោះ៕
No comments:
Post a Comment