មេបញ្ជាការ កងទ័ព ជើងទឹក កម្ពុជា រំពឹង ថា, ចិន នឹងផ្ដល់ នាវាចម្បាំង ២គ្រឿង
RFA / វិទ្យុ អាស៊ី សេរី | ២៤ កុម្ភៈ ២០១៦
បញ្ជាការដ្ឋានកងទ័ពជើងទឹក ស្ថិតក្នុងខណ្ឌជ្រោយចង្វារ រាជធានីភ្នំពេញ។ រូបថតថ្ងៃទី២៤ កុម្ភៈ ឆ្នាំ២០១៦ / RFA/Rann Samnang
ក្នុងជំនួប ជាមួយ គណៈប្រតិភូ នៃកងនាវា កងទ័ព ប្រជាជន ចិន នារាជធានី ភ្នំពេញ នៅថ្ងៃពុធ ទី២៤ ខែកុម្ភៈ នេះ, មេបញ្ជាការ កងទ័ព ជើងទឹក កម្ពុជា ឧត្ដមនាវីឯក ទៀ វិញ រំពឹង ថា, នៅពេល ខាងមុខ ក្រសួង ការពារជាតិ ចិន នឹងអាចជួយ ផ្ដល់កម្ពុជា នូវនាវាចម្បាំង ពីរគ្រឿង ដើម្បី ការពារ ដែនសមុទ្រ ខ្មែរ។ ទោះជាយ៉ាងណា សំណើនេះ កំពុង ស្ថិតនៅក្នុង កិច្ចចរចាគ្នា។
ទាក់ទង នឹងជម្លោះ សមុទ្រ ចិន ខាងត្បូងវិញ លោក ទៀ វិញ ស្នើឲ្យមានការដោះស្រាយបញ្ហានេះដោយសន្តិវិធី បើទោះបីជាកិច្ចប្រជុំកងទ័ពជើងទឹកអាស៊ាន កន្លងមក បានជំរុញឲ្យកម្ពុជា លើកឡើងពីបញ្ហានេះក៏ដោយ។ លោក ទៀ វិញ បញ្ជាក់ប្រាប់មេបញ្ជាការប្រចាំការដែនសមុទ្រចិន ខាងត្បូង ឧត្ដមនាវីទោ យូ ម៉ាន់ជាំង (Yu Manjiang) ថា កម្ពុជា នៅតែប្រកាន់ជំហរចិន តែមួយ។
ទាក់ទងនឹងការហ្វឹកហាត់រួមគ្នារវាងកងទ័ពនៃប្រទេសទាំងពីរលើ ដែនសមុទ្រខ្មែរ នៅថ្ងៃទី២៥ ខែកុម្ភៈ វិញ អគ្គបញ្ជាការរងកងទ័ពជើងទឹកកម្ពុជា លោក វណ្ណ ប៊ុននាង បានថ្លែងប្រាប់ទីភ្នាក់ងារសារព័ត៌មាន អេ.ភី (AP) ថា ទាហានជើងទឹកកម្ពុជា ៧០នាក់ នឹងចូលរួមក្នុងការហ្វឹកហាត់ជាមួយទាហានជើងទឹកចិន ប្រមាណជាង ៧០០នាក់ នៅលើនាវាចម្បាំងចិន ៣គ្រឿង ដែលបានចតនៅកំពង់ផែព្រះសីហនុ។
លោក វណ្ណ ប៊ុននាង អោយដឹងថា ការហ្វឹកហាត់នេះ គឺជាកិច្ចសហប្រតិបត្តិការដ៏ធំមួយ និងជាយុទ្ធនាការរួមគ្នាដើម្បីបង្កើនការត្រៀមខ្លួនក្នុងករណីមាន ហេតុការណ៍លិចកាណូត ឬមានគ្រោះមហន្តរាយកើតឡើង។
កងនាវាកងទ័ពប្រជាជនចិន ៣គ្រឿង មកដល់កម្ពុជា នៅបន្ទាប់ពីកងនាវាយោធាការពារដែនសមុទ្ររបស់ជប៉ុន ៣គ្រឿង ចាកចេញពីកម្ពុជា តែពីរបីថ្ងៃប៉ុណ្ណោះ។ ជប៉ុនមានជម្លោះព្រំដែនសមុទ្រជាមួយចិន ហើយប្រទេសទាំងពីរត្រូវគេមើលឃើញថា កំពុងតែប្រជែងគ្នាដើម្បីមានឥទ្ធិពលមកលើប្រទេសក្នុងតំបន់អាស៊ី៕
No comments:
Post a Comment