លោក ហុង សុខហួរ សុខចិត្ត តម្កល់ លិខិតឆ្លងដែន និងប្រាក់ ជាថ្នូរ បាននៅក្រៅឃុំ
RFA / វិទ្យុ អាស៊ី សេរី | ២៦ កុម្ភៈ ២០១៦
សមាជិកព្រឹទ្ធសភាបក្សប្រឆាំង លោក ហុង សុខហួរ ពេលនាំខ្លួនចេញពីតុលាការកំពូល កាលពីព្រឹកថ្ងៃទី២៦ ខែកុម្ភៈ ឆ្នាំ២០១៦។ RFA/Rann Samnang
ចៅក្រម តុលាការ កំពូល នៅព្រឹកថ្ងៃ ទី២៦ ខែកុម្ភៈ សម្រេច លើកពេលប្រកា សសាលដីកា សំណុំរឿង សូម នៅក្រៅឃុំ របស់ សមាជិក ព្រឹទ្ធសភា មកពីគណបក្ស សម រង្ស៊ី លោក ហុង សុខហួរ ទៅថ្ងៃ ទី៤ ខែមីនា។
នៅក្នុងសវនាការ លោក ហុង សុខហួរ បញ្ជាក់ ថា, លោក សុខចិត្ត តម្កល់ លិខិតឆ្លងដែន និងបង់ប្រាក់ ធានា មួយចំនួន ទៀត ជាថ្នូរ នឹងការសូម នៅក្រៅឃុំនេះ។
នៅក្នុងបន្ទប់សវនាការ ដែលសួរ ដេញដោល រយៈពេល ជិត ១ម៉ោង នៅព្រឹកថ្ងៃទី២៦ ខែកុម្ភៈ នៅមុខចៅក្រមនៃតុលាការកំពូល លោក ហុង សុខហួរ អះអាងពីការមិនរត់គេចខ្លួនរបស់លោក និងសុខចិត្តតម្កល់ប្រាក់ធានា និងលិខិតឆ្លងដែនទាំងអស់របស់លោក។
ថ្លែងក្នុងបរិវេណតុលាការកំពូល នៅក្រោយសវនាការ មេធាវីការពារ លោក ហុង សុខហួរ គឺលោក ជូង ជូងី មានប្រសាសន៍អះអាងថា កូនក្ដីរបស់លោកនឹងមិនចេញទៅណាឡើយ និងយល់ព្រមធ្វើតាមនីតិវិធីដែលតុលាការត្រូវការ។
លោក ជូង ជូងី លើកឡើងទៀតថា ការបន្តឃុំខ្លួនលោក ហុង សុខហួរ បន្តទៀត គឺពុំមានលទ្ធផលល្អឡើយ។
លោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ត្រូវបានសមត្ថកិច្ចចាប់ខ្លួនកាលពីថ្ងៃទី១៤ ខែសីហា បន្ទាប់ពីលោក ហ៊ុន សែន បញ្ជាឲ្យចាប់ខ្លួន ដោយចោទប្រកាន់ថា លោក ហុង សុខហួរ ក្បត់ជាតិ ដែលហ៊ានលួចក្លែងឯកសារសន្ធិសញ្ញាព្រំដែនកម្ពុជា-វៀតណាម ឆ្នាំ១៩៧៩ ថាជាសន្ធិសញ្ញារំលាយព្រំដែនប្រទេសទាំងពីរ។ ប៉ុន្តែបន្ទាប់ពីត្រូវចាប់ខ្លួន ចៅក្រមស៊ើបសួរសាលាដំបូងរាជធានីភ្នំពេញ ចោទប្រកាន់លោកចំនួន ៣បទចោទ គឺបទក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់ឲ្យមានការប្រព្រឹត្តបទឧក្រិដ្ឋ។
ឆ្លើយតបនឹងការលើកឡើងរបស់មេធាវីការពារលោក ហុង សុខហួរ នេះ តំណាងរាស្ត្រ និងជាអ្នកនាំពាក្យគណបក្សដឹកនាំរដ្ឋាភិបាល លោក សុខ ឥសាន មានប្រសាសន៍បន្ទរតាមពាក្យរបស់មេបក្សរបស់លោកថា លោក ហុង សុខហួរ មានទោសក្បត់ជាតិ ដែលទំនងថា តុលាការនឹងមិនដោះលែងលោកអោយនៅក្រៅឃុំឡើយ។
នៅក្នុងសវនាការសុំក្រៅឃុំដដែលនេះ លោក ហុង សុខហួរ បានលើកឡើងថា មូលហេតុនៃការសុំនៅក្រៅឃុំរបស់លោក ដោយសារលោកកំពុងមានជំងឺលើសឈាម និងមានបញ្ហាក្រពះដែលត្រូវទទួលការព្យាបាលឲ្យបានដិតដល់។
ភរិយាលោក ហុង សុខហួរ អ្នកស្រី គន្ធ លំអង មានប្រសាសន៍ថា ស្ថានភាពក្នុងពន្ធនាការពុំបានជួយអោយសុខភាពប្ដីអ្នកស្រីបានធូរ ស្រាលឡើយ។
បន្ទាប់ពីសវនាការ លោក ហុង សុខហួរ ត្រូវនាំត្រឡប់ទៅឃុំខ្លួននៅពន្ធនាគារព្រៃសវិញ ជាទីដែលលោកត្រូវឃុំខ្លួនអស់រយៈពេល ៦ខែមកហើយ៕
Mr. Hong Sok Huor, as one of your Khmer compatriot, we wish you speedy release and full freedom back to normal life!
ReplyDelete