លោក នាយករដ្ឋមន្ត្រី ហ៊ុន សែន អះអាង ថា, ប្រទេស កម្ពុជា មានពីរ
RFA / វិទ្យុ អាស៊ី សេរី | ១៦ មីនា ២០១៦
លោកនាយករដ្ឋមន្ត្រី ហ៊ុន សែន
ថ្លែងក្នុងពិធីសម្ពោធស្ថានីយអ្នកដំណើរថ្មី
នៃអាកាសយានដ្ឋានអន្តរជាតិភ្នំពេញ នៅព្រឹកថ្ងៃទី១៦ ខែមីនា
ឆ្នាំ២០១៦។ RFA/Brach Chev
ប្រមុខ រដ្ឋាភិបាល កម្ពុជា លោក ហ៊ុន សែន លើកឡើង ម្តងហើយ ម្តងទៀត ក្នុងសុន្ទរកថា រយៈពេល ជាង៣០ នាទី របស់លោក ថា, កម្ពុជា សព្វថ្ងៃនេះ មានពីរប្រភេទ គឺ កម្ពុជាពិត និងកម្ពុជា នៅលើទំព័រ សារព័ត៌មាន។
លោក ហ៊ុន សែន ពន្យល់ទៅកាន់មន្ត្រីរដ្ឋាភិបាល ប្រមុខការទូត មន្ត្រីអង្គការអន្តរជាតិ និងអ្នកវិនិយោគថា កម្ពុជាពិត គឺជាប្រទេសដែលមានការអភិវឌ្ឍ និងមានការវិនិយោគ ផ្ទុយពីការចុះផ្សាយរបស់សារព័ត៌មានមួយចំនួន ដែលបង្ហាញតែអំពីចំណុចអវិជ្ជមានរបស់កម្ពុជា។
ប្រសាសន៍របស់ លោក ហ៊ុន សែន នៅពេលនេះ ត្រូវបានអ្នកជំនាញផ្នែកសារព័ត៌មានយល់ឃើញថា ជាការលើកឡើងមួយដែលមិនមានភាពពេញលេញ។
នាយកវិទ្យាស្ថានកម្ពុជា សម្រាប់ការសិក្សាសារព័ត៌មាន លោក មឿន ឈានណារិទ្ធ បញ្ជាក់ថា សារព័ត៌មានមានសិទ្ធិចុះផ្សាយទាំងរឿងវិជ្ជមាន ឬអវិជ្ជមានរបស់សង្គម។ លោក មឿន ឈានណារិទ្ធ បន្តថា នៅក្នុងសង្គមប្រជាធិបតេយ្យ សារព័ត៌មានដែលមានលក្ខណៈវិជ្ជាជីវៈ ដើរតួសំខាន់ក្នុងការឆ្លុះបញ្ចាំងការពិតនៃសង្គម។
លោក មឿន ឈានណារិទ្ធ បន្ថែមទៀតថា ការផ្សាយតែអំពីរឿងអវិជ្ជមានក្នុងសង្គម អាចមកពីកតា្តបុគ្គល ឬនិន្នាការរបស់ស្ថាប័ន។
អ្នកជំនាញផ្នែកសារព័ត៌មានរូបនេះមើលឃើញថា បញ្ហាក្នុងវិស័យសារព័ត៌មាននៅកម្ពុជា បណ្ដាលមកពីការខ្វះខាតវិជ្ជាជីវៈ ដោយសារតែមានអ្នកសារព័ត៌មានខ្លះគាំទ្រ ឬប្រឆាំងរដ្ឋាភិបាលខ្លាំងពេក ចំណែកអ្នកសារព័ត៌មានដែលគោរពវិជ្ជាជីវៈនៅមានចំនួនតិចនៅឡើយ។
កាលពីចុងឆ្នាំ២០១៥ កន្លងទៅ អង្គការអ្នករាយការណ៍គ្មានព្រំដែន (Reporters Without Borders) រក ឃើញថា វិស័យប្រព័ន្ធផ្សព្វផ្សាយនៅកម្ពុជា កំពុងជួបហានិភ័យ ដោយសារភាពជាម្ចាស់កម្មសិទ្ធិនៃប្រព័ន្ធផ្សព្វផ្សាយមានលក្ខណៈ ប្រមូលផ្ដុំខ្លាំង ធ្វើឲ្យវិស័យនេះស្ថិតក្នុងសភាពគ្រោះថ្នាក់។ ក្នុងចំណោមម្ចាស់ក្រុមហ៊ុនប្រព័ន្ធផ្សព្វផ្សាយទាំង២៧ ដែលអង្គការនេះស៊ើបអង្កេត មាន ៩នាក់ជាឧកញ៉ា ឬជាអ្នកមានឥទ្ធិពល ដែលជិតស្និទ្ធនឹងគណបក្សកាន់អំណាច មានន័យថា ពួកគេមានជាប់ពាក់ព័ន្ធជាមួយមុខជំនួញផ្សេងទៀតក្រៅពីសកម្មភាព ក្នុងប្រព័ន្ធផ្សព្វផ្សាយរបស់ពួកគេ រាប់ចាប់ពីវិស័យកសិកម្ម ពាណិជ្ជកម្មទូទៅ រហូតដល់អចលនទ្រព្យ។
ទោះបីជាយ៉ាងណា សម្រាប់អ្នកសារព័ត៌មានដែលមានវិជ្ជាជីវៈប្រកបដោយក្រមសីលធម៌ តួនាទីរបស់ពួកគេ គឺផ្សាយព័ត៌មានពិត ឥតលម្អៀង បើទោះបីជារឿងពិតនោះធ្វើឲ្យមន្ត្រីគ្រប់គ្រងរដ្ឋ មិនសប្បាយចិត្តក៏ដោយចុះ៕
No comments:
Post a Comment