 |
| ផែនទីខេត្តស្វាយរៀង។ |
សង្គមស៊ីវិល អំពាវនាវ ឲ្យអភិបាល ថ្មី ខេត្ត ស្វាយរៀង ដោះស្រាយ បញ្ហាប្រឈម របស់ ពលរដ្ឋ
RFA / វិទ្យុ អាស៊ី សេរី | ២៤ មីនា ២០១៦
ក្រុម អង្គការ សង្គមស៊ីវិល ស្នើ ដល់អភិបាល ថ្មី ខេត្ត ស្វាយរៀង ឲ្យដោះស្រាយ បញ្ហាចោទ មួយចំនួន ដែលបន្សល់ទុក ពីអភិបាលខេត្ត ចាស់។ ការអំពាវនាវនេះ ធ្វើឡើង ក្រោយពេល លោក ម៉ែន វិបុល ត្រូវ បានតែងតាំង ជាអភិបាលថ្មី ខេត្ត ស្វាយរៀង នៅថ្ងៃ ទី២៤ ខែមីនា ជំនួស លោក ជៀង អំ ដែលត្រូវ បានផ្ទេរ ទៅកាន់ ការងារ ជារដ្ឋលេខាធិការ ក្រសួង ការពារជាតិ។
ក្រុមមន្ត្រី អង្គការ សង្គមស៊ីវិល ប្រចាំ ខេត្ត ស្វាយរៀង ជំរុញ ឲ្យអភិបាល ថ្មី ខេត្ត ស្វាយរៀង ជួយដោះស្រាយ បញ្ហាប្រឈម សំខាន់ៗ របស់ ប្រជាពលរដ្ឋ។ បញ្ហាទាំងនោះ រួមមាន, បញ្ហា៖ព្រំដែន, ជន អន្តោប្រវេសន៍ វៀតណាម ខុសច្បាប់, នាំចូលទំនិញខូចគុណភាព, ទំនាស់ ដីធ្លី រវាង ពលរដ្ឋ និងអ្នក មានលុយ មានអំណាច, សន្តិសុខ ទីផ្សា រកសិកម្ម ហេដ្ឋារចនាសម្ព័ន្ធ, និងចំណាកស្រុក។
មន្ត្រីសម្របសម្រួលនៃអង្គការលីកាដូ (LICADHO) ប្រចាំ ខេត្តស្វាយរៀង លោក នុត បូពិណ្ណារ័ត្ន មានប្រសាសន៍ថា បញ្ហាក្ដៅដែលកំពុងកើតឡើង និងប៉ះពាល់ដល់ការរស់នៅរបស់ប្រជាពលរដ្ឋក្នុងខេត្តស្វាយរៀង គឺទំនាស់ដីធ្លី និងបញ្ហាជនអន្តោប្រវេសន៍វៀតណាម ដែលលក់ទំនិញ និងលក់សន្លឹកឆ្នោតយ៉ាងអនាធិបតេយ្យ។ លោកបន្តថា ពលរដ្ឋក្នុងស្រុកមួយចំនួននៃខេត្តនេះ ត្រូវបានអ្នកមានលុយ និងមានអំណាច រំលោភយកដីធ្លីរបស់ពួកគាត់។ ទន្ទឹមគ្នានេះ បញ្ហាការរំលោភសិទ្ធិកម្មកររោងចក្រ ក៏ជារឿងសំខាន់ដែរ ដែលអភិបាលខេត្តថ្មីត្រូវពិនិត្យដោះស្រាយ៖ «យើង តែងតែមានកង្វល់ពាក់ព័ន្ធនឹងរឿងដីធ្លីដែលបន្សល់ទុកតាំងពីមុន ដែលមិនទាន់បានដោះស្រាយ ជាពិសេសពាក់ព័ន្ធនឹងក្រុមហ៊ុនរបស់ឥណ្ឌា ចម្ការអំពៅក្រុមហ៊ុន អាន ម៉ារ៉ាឌី នៅស្រុករមាសហែក ស្រុកស្វាយជ្រុំ អីហ្នឹង។ យើងសង្ឃឹមថា អភិបាលខេត្តនឹងដោះស្រាយ។»
ក្រៅពីបញ្ហាដីធ្លីនោះ នាយិកាអង្គការជំនួយជនបទ (Rural Aid Organzation) ប្រចាំ ខេត្តស្វាយរៀង អ្នកស្រី ព្រំ បុប្ផា មានប្រសាសន៍ថា បញ្ហាប្រឈមបំផុតដែលអាជ្ញាធរមើលរំលងនោះ គឺការនាំចូលទំនិញខូចគុណភាពពីវៀតណាម និងស្វែងរកទីផ្សារសម្រាប់កសិផលរបស់ពលរដ្ឋខ្មែរ។ អ្នកស្រីមានសង្ឃឹមថា អភិបាលខេត្តថ្មីនឹងដោះស្រាយបញ្ហាប្រឈមទាំងនេះឲ្យបានប្រសើរ និងបន្ថែមល្បឿនអភិវឌ្ឍន៍ខេត្តឲ្យរីកចម្រើន៖ «ការលំហូរចូលសារធាតុគីមីផ្លែឈើគីមី ចំណីអាហារគីមីទាំងអស់ ចូលមកពីខាងកើតហ្នឹង ហើយឥឡូវនេះគេហៅថាអាវុធគីមីហើយ។ បើ មិនយកចិត្តទុកដាក់លើបញ្ហានេះទេ គឺដោះស្រាយមិនចេញឡើយ ហើយមួយទៀត បើគាត់មិនរកទីផ្សារ និងទប់ស្កាត់ការហូរចូលទាំងអស់នេះទេ គឺទំនិញក្នុងស្រុកខ្មែរ ក៏នៅតែងើបមុខមិនរួចដែរ។»
អភិបាលថ្មីខេត្តស្វាយរៀង លោក ម៉ែន វិបុល ត្រូវបានតែងតាំងជាផ្លូវការនៅព្រឹកថ្ងៃទី២៤ ខែមីនា ក្រោមអធិបតីភាពរបស់ លោក ស ខេង រដ្ឋមន្ត្រីក្រសួងមហាផ្ទៃ។
នៅចំពោះមុខមន្ត្រីអ្នកមុខអ្នកការជាច្រើននៅសាកលវិទ្យាល័យ ស្វាយរៀង លោក ម៉ែន វិបុល ប្ដេជ្ញាចិត្តថា នឹងខិតខំដោះស្រាយរាល់បញ្ហា និងរាល់សំណូមពររបស់ប្រជាពលរដ្ឋ។
រីឯរដ្ឋមន្ត្រីក្រសួងមហាផ្ទៃ លោក ស ខេង ក៏បានផ្តែផ្តាំថា បញ្ហាទំនាស់ដីធ្លីជារឿងមួយដ៏សំខាន់ ដែលមន្ត្រីគ្រប់ជាន់ថ្នាក់ត្រូវដោះស្រាយជូនប្រជាពលរដ្ឋ ព្រមទាំងទប់ស្កាត់ និងបង្ក្រាបគ្រឿងញៀនដែលកំពុងតែរីកសាយភាយគ្រប់ច្រកល្ហក។ លោក ស ខេង ចង់ឃើញវិវាទដីធ្លីរវាងពលរដ្ឋ និងអ្នកមានលុយមានអំណាច ត្រូវបានដោះស្រាយឲ្យនៅសល់តិចតួចបំផុត និងឈានដល់ការបញ្ចប់ទាំងស្រុងតែម្ដងនៅពេលខាងមុខ។
ទោះបីជាយ៉ាងណា ក្រុមអង្គការសង្គមស៊ីវិល ក៏សោកស្ដាយដែល លោក ស ខេង ពុំបាននិយាយដល់បញ្ហាសំខាន់ៗមួយចំនួនទៀត ដូចជាបញ្ហាអធិបតេយ្យភាព និងបញ្ហាជនអន្តោប្រវេសន៍ខុសច្បាប់វៀតណាម ជាដើម៕
No comments:
Post a Comment