ដីសម្បទាន សេដ្ឋកិច្ច របស់ ក្រុមហ៊ុន វៀតណាម នៅជាប់ព្រំដែន នឹងត្រូវ ដកហូត
RFA / វិទ្យុ អាស៊ី សេរី | ១៨ មីនា ២០១៦
ផែនទីខេត្តរតនគិរី។ Photo: RFA
ដី ចម្ការ កៅស៊ូ ក្រុមហ៊ុន សម្បទាន សេដ្ឋកិច្ច របស់ វៀតណាម ឈ្មោះ ដាយ ដុង យឿង ខមឺសល យ៉ញ ស្ដុក (Dai Dong Yoeurng Commercial Yornh Stock Co., Ltd.) ជាង ៨០០ ហិកតារ មានទីតាំង នៅតំបន់ ព្រំដែន ស្រុក អូរយ៉ាដាវ ខេត្ត រតនគិរី ជាប់ នឹងស្រុក ដាក់កឺ ប្រទេស វៀតណាម នឹងត្រូវ ដកហូត តាមលិខិត ជូនដំណឹង របស់ ទីស្ដីការ គណៈរដ្ឋមន្ត្រី។
មន្ត្រីកសិកម្ម ខេត្ត រតនគិរី ឲ្យដឹង នៅថ្ងៃ ទី១៨ ខែមីនា ថា, អនុក្រឹត្យ ស្ដីពី ការដកហូត ដីសម្បទាន របស់ ក្រុមហ៊ុន វៀតណាម មួយនេះ អាជ្ញាធរខេត្ត បានទទួលហើយ កាលពីដើម ខែមីនា, ក៏ប៉ុន្តែ បែបបទ នៃការ ដកហូត ដីនោះ មិនទាន់ ដឹងនៅឡើយ។
ប្រធាន មន្ទីរ កសិកម្ម ខេត្តរតនគិរី លោក សយ សូណា មានប្រសាសន៍ ថា មន្ទីរ កសិកម្ម បានទទួលលិខិត ជូនដំណឹងនេះ ពីអាជ្ញាធរខេត្តក្នុង នោះដីចម្ការកៅស៊ូដែលក្រុមហ៊ុនបានដាំដុះរួចជាង ៨០០ហិកតារនឹងត្រូវដកហូត។ លើសពីនេះទៀត រាជរដ្ឋាភិបាលមានគោលការណ៍សងប៉ះប៉ូវតម្លៃវិនិយោគរបស់ក្រុមហ៊ុនដែល បានចំណាយ ក៏ប៉ុន្តែទំហំទឹកប្រាក់កម្រិតណាមិនមានលិខិតបទដ្ឋានបញ្ជាក់ឲ្យ ទាន់ដឹងនៅឡើយ៖ «មានអនុក្រឹត្យមួយសេចក្ដីជូនដំណឹងទីស្ដីការគណៈរដ្ឋមន្ត្រី ដាយ ដុង យឿង នៅ ៨០០ហិកតារយើងប៉ះប៉ូវសង។»
ក្រុមហ៊ុនវៀតណាម ឈ្មោះ ដាយ ដុង យឿង កាលពីឆ្នាំ២០០៨ បានស្នើសុំដីសម្បទានសេដ្ឋកិច្ចនៅស្រុកអូរយ៉ាដាវ មានផ្ទៃដីជិត ៥.០០០ហិកតារ ដើម្បីដាំកៅស៊ូ ស្វាយចន្ទីរ និងចិញ្ចឹមសត្វ ក៏ប៉ុន្តែរហូតបច្ចុប្បន្នរាជរដ្ឋាភិបាលបានកាត់ចេញដីមានផល ប៉ះពាល់ និងរក្សាទុកដីដែលក្រុមហ៊ុនដាំកៅស៊ូបានជាក់ស្ដែងប្រមាណ ៨០០ហិកតារសម្រាប់ការវិនិយោគរបស់ក្រុមហ៊ុនបន្ទាប់ពីក្រុមហ៊ុននេះ មានរឿងអាស្រូវចោទប្រកាន់ជាច្រើនករណី។
វិទ្យុអាស៊ីសេរី មិនអាចទាក់ទងតំណាងក្រុមហ៊ុន ដាយ ដុង យឿង សុំអធិប្បាយជុំវិញការសម្រេចដកហូតដីសម្បទានរបស់រាជរដ្ឋាភិបាល នេះទេ នៅថ្ងៃទី១៨ ខែមីនា។
ទាក់ទិនការដកហូតដីសម្បទាននេះដែរ អភិបាលរង និងជាអ្នកនាំពាក្យសាលាខេត្តរតនគិរី លោក ញ៉ែម សំអឿន ទទួលស្គាល់ថា លោកបានឃើញអនុក្រឹត្យដកដីសម្បទានក្រុមហ៊ុន ដាយ ដុង យឿង ដែរ ក៏ប៉ុន្តែលោកមិនមានព័ត៌មានជាក់លាក់ពីចំណាត់ការបែបណាទៅលើ អនុក្រឹត្យនោះទេ៖ «ខ្ញុំមិនច្បាស់ដែរទេ ខ្ញុំឃើញកូនចៅវាត់អាប់ wathsApp ឲ្យដែរទេ ខ្ញុំសួរនាំ។»
តំណាងរាស្ត្រគណបក្សសង្គ្រោះជាតិ ដែលកំពុងនិរទេសនៅសហរដ្ឋអាមេរិក លោក អ៊ុំ សំអាន កាលពីថ្ងៃទី៤ ខែមីនា បានផ្ញើលិខិតទីពីរតាមរយៈប្រធានរដ្ឋសភាលោក ហេង សំរិន លើកឲ្យលោកនាយករដ្ឋមន្ត្រី ហ៊ុន សែន បំភ្លឺសំណួរហេតុអ្វីបានជាកងទ័ពប្រជាជនវៀតណាម ទទួលបានការគ្រប់គ្រងដីសម្បទានសេដ្ឋកិច្ចនៅខេត្តរតនគិរី? តើមានវត្តមានកងទ័ពវៀតណាម នៅគ្រប់គ្រងដីសម្បទានសេដ្ឋកិច្ចនៅខេត្តរតនគិរី ឬទេ? តើរាជរដ្ឋាភិបាលមានគម្រោងដកហូតដីសម្បទានសេដ្ឋកិច្ចដែលគ្រប់គ្រង ដោយកងទ័ពប្រជាជនវៀតណាម នៅខេត្តរតនគិរី ឬទេ?
ឆ្លើយតប ករណីនេះ រដ្ឋលេខាធិការ និងជាអ្នកនាំពាក្យ ទីស្ដីការ គណៈរដ្ឋមន្ត្រី លោក ផៃ ស៊ីផាន ថ្លែងបញ្ជាក់ ថា, ទីស្ដីការ គណៈរដ្ឋមន្ត្រី បានឆ្លើយតប បែបរដ្ឋបាល ទៅសភា រួចហើយ ចំណែកសំណួរ របស់ តំណាងរាស្ត្រ គណបក្ស សង្គ្រោះជាតិ មន្ត្រីជាន់ខ្ពស់ ទីស្ដីការ គណៈរដ្ឋមន្ត្រី នឹងពិនិត្យ ស្រាវជ្រាវ មុន នឹងឆ្លើយតប បែបណា៖ «ផ្នែករដ្ឋបាល គេ ឆ្លើយតបភ្លាម បានគេ ស្វែងរក ឯកសារ, ហើយ ពិនិត្យមើល។ ចំណែក ការបំភ្លឺ បែបណា ជាការសម្រេច របស់ សម្ដេច។»
ទោះជាយ៉ាងណាក៏ដោយ នាយខណ្ឌរដ្ឋបាលព្រៃឈើខេត្តរតនគិរី លោក កែប កត់ បញ្ជាក់ឲ្យដឹងថា រហូតមកទល់នឹងថ្ងៃទី១៨ ខែមីនា នេះ មន្ត្រីខណ្ឌរដ្ឋបាលព្រៃឈើមិនទាន់ទទួលបានលិខិតបទដ្ឋានទាក់ទិនទៅ នឹងវិធានការដកហូតដីសម្បទានក្រុមហ៊ុន ដាយ ដុង យឿង នៅឡើយ។ លោកបន្តថា ក្រុមហ៊ុន ដាយ ដុង យឿង ក៏មិនមានសកម្មភាពដាំដុះនៅលើដីសម្បទាននោះទេ៕
No comments:
Post a Comment