«ព្រៃឡង់ នៅតែ រងការ កាប់បំផ្លាញ ក្រោយ ពីប្រកាស ដាក់ជាព្រៃ អភិរក្ស»
RFA / វិទ្យុ អាស៊ី សេរី | ៨ មេសា ២០១៦
សន្និសីទកាសែតរបស់តំណាងសហគមន៍ព្រៃឡង់ ស្ដីអំពី
“ការវាយប្រហារមកលើកញ្ញា ផន សុភ័ក្រ
និងការដាក់ព្រៃឡង់ជាព្រៃអភិរក្ស” នារាជធានីភ្នំពេញ នៅថ្ងៃទី៨
ខែមេសា ឆ្នាំ២០១៦។ RFA/Sorn Chanratha
តំណាង សហគមន៍ ព្រៃឡង់ នៅព្រឹក ថ្ងៃទី៨ ខែមេសា នេះ អះអាង ថា, ព្រៃឡង់ នៅតែ រងការ កាប់បំផ្លាញ បើ ទោះបី ជាលោក នាយករដ្ឋមន្ត្រី បានប្រកាស ថា ដាក់ព្រៃឡង់ ជាព្រៃ អភិរក្ស ក៏ដោយ។ [Going NATO again! No Action, Talk Only!]
មន្ត្រី សង្គមស៊ីវិល ថា, ការប្រកាសនេះ នឹងមិនមាន ប្រសិទ្ធភាពទេ ប្រសិនបើ មានតែ ច្បាប់, ហើយ មិនមាន ការរឹតបន្តឹង លើការអនុវត្ត។
តំណាងសហគមន៍ព្រៃឡង់ លើកឡើងបែបនេះនៅក្នុងសន្និសីទសារព័ត៌មានមួយដែលរៀបចំឡើងក្រោម ប្រធានបទ “ការវាយប្រហារមកលើកញ្ញា ផន សុភ័ក្រ និងការដាក់ព្រៃឡង់ជាព្រៃអភិរក្ស” សន្និសីទនេះ រៀបចំឡើងនៅក្នុងផ្ទះមេត្តា (Metta House) ស្ថិតក្នុងរាជធានីភ្នំពេញ បន្ទាប់បណ្ដាញសហគមន៍ព្រៃឡង់ម្នាក់ ត្រូវបានជនមិនស្គាល់អត្តសញ្ញាណលួចកាប់អំឡុងពេលល្បាតព្រៃឡង់ កាលពីពេលថ្មីៗកន្លងទៅ។
តំណាងសហគមន៍ព្រៃឡង់ លោក ហឿន សុភាព អះអាងថា លោកបានប្រទះឃើញភស្តុតាងមួយចំនួនដែលបញ្ជាក់ថា សកម្មភាពកាប់បំផ្លាញព្រៃឡង់ នៅតែបន្តកើតមានអំឡុងពេលក្រុមរបស់លោកដើរល្បាតនៅក្នុងព្រៃឡង់ នៅថ្ងៃទី២ ដល់ថ្ងៃទី៤ ខែមីនា។
លោក ហឿន សុភាព៖ «យើងបានឃើញសកម្មភាពនេះកើនឡើងខ្លាំងមែនទែន ដោយសារទីមួយ យើងឃើញមានឧបករណ៍ដឹកឈើ ឧបករណ៍ដឹកឈើខុសច្បាប់ គឺគោយន្ត។ គោយន្តរាប់រយគ្រឿងតែម្ដង នៅពេលដែលយើងដេកជិតផ្លូវនោះ គឺមានគោយន្តជាច្រើនអត់ដឹកឈើទេ ដោយសារបែកការជាមួយក្រុមពួកខ្ញុំ ហើយចូលទៅក្នុងព្រៃដែលមានគ្នាជិត ២០នាក់ជាង អ៊ីចឹងគោយន្តរាប់រយគ្រឿងបរស្ទើរតែមួយយប់ទល់ភ្លឺ ហើយអ្នកអារឈើឌុបរណាយន្តចេញក្រៅ ឬអ្នកខ្លះលាក់ទុកក្នុងព្រៃ ដោយមានឯកសណ្ឋាន ប្រភេទអ្នកអារឈើ គឺយើងស្គាល់ច្បាស់ណាស់ មានរូបរាងខុសពីអ្នកការពារឈើ។»
លោកថា ភស្តុតាងទាំងនេះ ស្ដែងអោយឃើញពីកំណើននៃការកាប់បំផ្លាញព្រៃឡង់ ក្រោយពេលមានការប្រកាសដាក់ព្រៃឡង់ ជាព្រៃអភិរក្ស។ លោកនាយករដ្ឋមន្ត្រីកាលពីថ្ងៃទី៣១ ខែមីនា បានប្រកាសដាក់ព្រៃឡង់ ជាព្រៃអភិរក្ស នៅក្នុងពិធីបិទសន្និបាតអប់រំយុវជន និងកីឡា ឆ្នាំ២០១៦៖ «យើងដាក់ព្រៃមួយចំនួនជាព្រៃអភិរក្សតែម្ដង ដូចព្រៃឡង់ហ្នឹងឯង! ទុកវាធ្វើអីទៀត ត្រូវដាក់វាជាព្រៃការពារ អ្នកណាដែលទៅបំបួសអី ទាំងសង្គមស៊ីវិល ទាំងអ្នកណាដែលទៅរុំឈើហ្នឹង ឱ្យចូលរួមក្នុងចលនាការពារព្រៃឈើតែម្ដង។»
តំណាងសហគមន៍ព្រៃឡង់ លោក ហឿន សុភាព រិះគន់រដ្ឋបាលព្រៃឈើដែលមិនបង្ក្រាប និងហាក់មិនអើពើចំពោះការកាប់បំផ្លាញព្រៃឈើ។ លោកថា ទីតាំងកាប់បំផ្លាញព្រៃឈើខ្លះ ស្ថិតនៅមិនឆ្ងាយពីទីស្នាក់ការរបស់រដ្ឋបាលព្រៃឈើឡើយ។
អ្នកនាំពាក្យក្រសួងបរិស្ថាន លោក សៅ សុភាព ប្រាប់វិទ្យុអាស៊ីសេរី ថា បច្ចុប្បន្ន ក្រសួងបរិស្ថាន គ្រោងរៀបចំសិក្ខាសាលាពិគ្រោះយោបល់ជាមួយដៃគូអភិវឌ្ឍន៍ សង្គមស៊ីវិល និងសហគមន៍ ដើម្បីជជែកពីការដាក់ព្រៃផ្ដល់ផលទៅជាព្រៃអភិរក្ស។
លោកបន្ថែមថា ខាងក្រសួងបរិស្ថាន ក៏កំពុងសរសេរគម្រោងស្នើថវិកាទៅរដ្ឋាភិបាល ប៉ុន្តែលោកមិនទាន់ដឹងពីទំហំទឹកប្រាក់ពិតប្រាកដនោះទេ។ លោកក៏ស្នើឲ្យដៃគូពាក់ព័ន្ធទាំងអស់ចូលរួមជាមួយក្រសួងបរិស្ថាន ដើម្បីអនុវត្តផែនការនេះ៖ «រហូតមកទល់ពេលនេះ គឺយើងកំពុងរៀបចំឯកសារពាក់ព័ន្ធទាំងអស់ ហើយនៅក្នុងហ្នឹងយើងក៏មានរៀបចំឱ្យមានជាលក្ខណៈកិច្ចប្រជុំ ឬក៏សិក្ខាសាលាពិគ្រោះយោបល់មួយ។»
ទោះជាយ៉ាងណា តំណាងបណ្ដាញសហគមន៍ព្រៃឡង់ ថ្លែងសាទរចំពោះការសម្រេចដាក់បញ្ចូលព្រៃឡង់ ជាព្រៃអភិរក្ស។ លោក ហឿន សុភាព អំពាវនាវសុំឱ្យរដ្ឋាភិបាលសូមដាក់បញ្ចូលសមាសភាពក្រុមបណ្ដាញសហគមន៍ ព្រៃឡង់ ជាមួយក្រុមអភិរក្សរបស់រាជរដ្ឋាភិបាលដើម្បីរួមគ្នាការពារព្រៃ និងបង្ក្រាបបទល្មើសព្រៃឈើក្នុងតំបន់ព្រៃឡង់៖ «តំបន់ការពារមួយ មានការគ្រប់គ្រងពីស្ថាប័នមួយ គឺវាមិនស្រួលប៉ុន្មានទេ វាមានចំណុចសំខាន់ៗដែលគេត្រូវហាម មិនឱ្យប្រជាជនចូលទៅក្នុងតំបន់ស្នូល ឬក៏អ្វីដែលយើងអត់ដឹងផ្សេងទៀត នេះគឺជាការយល់ឃើញរបស់ក្រុមយើង ដែលយើងគិតឃើញថា នៅពេលដែលរាជរដ្ឋាភិបាល ដាក់តំបន់ព្រៃការពារ វានឹងមានបញ្ហាជាច្រើនជះឥទ្ធិពលដល់ក្រុមបណ្ដាញព្រៃឡង់។»
ប្រធានក្រុមកិច្ចការពិសេសសិទ្ធិមនុស្សនៅកម្ពុជាលោក អ៊ូច ឡេង មានប្រសាសន៍ថា ការសម្រេចដាក់ព្រៃឡង់ ជាព្រៃអភិរក្សនេះ នឹងគ្មានប្រសិទ្ធភាពនោះទេ ព្រោះគ្មានការចាត់វិធានការតឹងរ៉ឹង។
លោកថា ដើម្បីរក្សាព្រៃឈើក្នុងប្រទេសកម្ពុជា ឱ្យបានគង់វង្ស រាជរដ្ឋាភិបាលត្រូវបញ្ឈប់រាល់អាជ្ញាប័ណ្ណក្រុមហ៊ុនរកស៊ីឈើទាំង អស់ បិទរោងសិប្បកម្មកែច្នៃឈើ និងសុំបញ្ឈប់ការនាំចេញឈើទៅប្រទេសចិន និងប្រទេសវៀតណាម៕
No comments:
Post a Comment