«លោក អ៊ុំ សំអាន ត្រូវ សមត្ថកិច្ច រឹតបន្តឹង សិទ្ធិសេរីភាព នៅក្នុង ពន្ធនាគារ ព្រៃ ស»
RFA / វិទ្យុ អាស៊ី សេរី | ២៦ មេសា ២០១៦
តំណាងរាស្ត្រ និងជាមន្ត្រីជាន់ខ្ពស់គណបក្សសង្គ្រោះជាតិ
លោក សុន ឆ័យ ផ្ដល់បទសម្ភាសន៍នៅមុខពន្ធនាគារព្រៃស កាលពីថ្ងៃទី២៦
ខែមេសា ឆ្នាំ២០១៦ ខណៈលោកទៅសួរសុខទុក្ខតំណាងរាស្ត្រ អ៊ុំ សំអាន។ RFA/Cheu Sideth
ប្រធាន អភិបាល នៃគណៈអភិបាល ដែលគ្រប់គ្រង សមាជិក សភា នៃគណបក្ស សង្គ្រោះជាតិ លោក សុន ឆ័យ បញ្ជាក់ ថា, សិទ្ធិសេរីភាព របស់លោក អ៊ុំ សំអាន ដែលជាសមាជិក សភា តំណាងរាស្ត្រ បក្សប្រឆាំង ត្រូវ បានគេ រឹតត្បិត យ៉ាងធ្ងន់ធ្ងរ នៅក្នុង ពន្ធនាគារ ព្រៃ ស។ លោក សុន ឆ័យ ចាត់ទុក សកម្មភាព បែបនេះ ថា, ជាការរំលោភ អំណាច ទាំងបំពាន ដែលពុំ ធ្លាប់មាន នៅក្នុង ប្រវត្តិសាស្ត្រ កម្ពុជា។
អង្គការផ្នែកសិទ្ធិមនុស្សយល់ឃើញថា សំណុំរឿងលោក អ៊ុំ សំអាន មិនដល់ថ្នាក់កំហិតសេរីភាពដូចនេះឡើយ ដោយសារពុំទាន់មានសាលក្រមណាមួយដែលរកឃើញថា សមាជិកសភារូបនេះ ត្រូវមានទោសនៅឡើយ។ មន្ត្រីនាយកដ្ឋានពន្ធនាគារនៃក្រសួងមហាផ្ទៃ បញ្ជាក់ថា ដោយសារលោក អ៊ុំ សំអាន ជាមនុស្សដែលមានមនោគមន៍វិជ្ជា និងជាករណីពិសេស ហេតុនេះត្រូវតែដាក់ឲ្យស្ថិតនៅដាច់ដោយឡែកយ៉ាងដូច្នេះ។
ការចំណាយពេលជួបលោក អ៊ុំ សំអាន ដែលប្រើពេលមិនដល់ ៤០នាទីស្រួលបួលផង លោក សុន ឆ័យ អះអាងថា លោកនឹងស្វះស្វែងរកគ្រប់មធ្យោបាយដើម្បីស្នើឲ្យតុលាការ និងខាងពន្ធនាគារដកបម្រាមនេះចេញ។
ថ្លែងក្រោយចេញពីពន្ធនាគារ នៅព្រឹកថ្ងៃទី២៦ ខែមេសា តំណាងរាស្ត្រគណបក្សប្រឆាំងលោក សុន ឆ័យ ឲ្យដឹងថា ករណីលោក អ៊ុំ សំអាន នេះវាបានប្រែក្លាយទៅជាសំណុំរឿងដ៏ស្មុគស្មាញមួយដែលពុំធ្លាប់ មាន។ លោកបន្តថា ក្នុងចំណោមអ្នកជាប់ឃុំទាំងអស់ គឺមានតែលោក អ៊ុំ សំអាន មួយគត់ដែលត្រូវបានគេដាក់កម្លាំងការពារនៅក្នុងពន្ធនាគារគ្រប់ វិនាទី។បន្ថែមពីលើនេះ លោកអះអាងថា ការចាប់ដាក់ឃុំគឺជារនាំងមួយទៅហើយ ប៉ុន្តែរបាំងមួយជាន់បន្ថែមពីលើនេះទៀតនោះគឺការដាក់កម្រិត សិទ្ធិសេរីភាពក្នុងការជួបជុំ និងការធ្វើដំណើរនៅក្នុងពន្ធនាគារជាដើម ដែលខុសពីអ្នកទោសដទៃទៀត។
លោកបន្តថា៖ «យើងក៏បានស្ដាប់ពីការលំបាករបស់គាត់ពីមន្ទីរ ឃុំឃាំងព្រៃសនេះ យ៉ាងច្រើនករណីដែរ។ យើងនឹងចាត់វិធានការតាមអ្វីដែលយើងអាចធ្វើបាន យ៉ាងហោចណាស់ឲ្យមានលទ្ធភាពរស់នៅក្នុងមន្ទីរឃុំឃាំងនេះ។ ធ្ងន់ធ្ងរជាងអ្នកជាប់ពន្ធនាគារដទៃទៀត។ស្ថានភាពដែលយើងដឹងគឺគាត់ មានការធ្វើទុក្ខបុកម្នេញច្រើន។»
លោក អ៊ុំ សំអាន ត្រូវបានកម្លាំងនគរបាលចាប់ខ្លួនកាលពីយប់ថ្ងៃទី១១ ខែមេសា នៅខេត្តសៀមរាប។ តំណាងរាស្ត្រដែលសកម្មក្នុងរឿងព្រំដែនរូបនេះ ត្រូវបានសមត្ថកិច្ចចាប់ខ្លួន ហើយឃុំបណ្ដោះអាសន្ននៅនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃក្រសួងមហាផ្ទៃ។ មួយថ្ងៃបន្ទាប់នៃការចាប់ខ្លួនលោក អ៊ុំ សំអាន ត្រូវបានចៅក្រមស៊ើបសួរនៃតុលាការក្រុងភ្នំពេញ លោក តុប ឈុនហេង ចេញដីកាឲ្យឃុំខ្លួនបណ្ដោះអាសន្ននៅគុកព្រៃសភ្លាមដែរ។
ឆ្លើយតបរឿងនេះ អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ឲ្យដឹងថា ការដាក់កម្រិតនេះ វាគឺជាគោលការណ៍ដើម្បីចៀសវាងបញ្ហាដែលអាចកើតឡើងជាយថាហេតុណាមួយ។ ម្យ៉ាងទៀត នេះពុំមែនជាការបំបិទសិទ្ធិសេរីភាពអ្វីនោះឡើយ ប៉ុន្តែជាការការពារសុវត្ថិភាព និងសន្តិសុខរបស់លោក អ៊ុំ សំអាន ទៅវិញទេ។
បន្ថែមពីលើ សំណុំរឿងរបស់លោក អ៊ុំ សំអាន នេះទៀតសោត គឺជាករណីពិសេស ដែលចាំបាច់ត្រូវតែយាមការពារដូច្នេះ៖ «គាត់ ជាតំណាងរាស្ត្រផង ដល់អ៊ីចឹងយើងការពារគាត់ក្រែងលោមានបញ្ហាពីណាលួចមកធ្វើនេះធ្វើ នោះហើយចោទដាក់រដ្ឋាភិបាលបង្ករបួសស្នាម និយាយទៅក្នុងគោលបំណងល្អទេ។ ខ្ញុំគិតទៅ ពីព្រោះនៅក្នុងហ្នឹងជនជាប់ឃុំយើងដឹងស្រាប់ហើយមានជាង ៤ពាន់ហើយ។»
ផ្ទុយពីនេះវិញលោក សុន ឆ័យ ចាត់ទុកថា នេះជាការរំលោភសិទ្ធិយ៉ាងធ្ងន់ធ្ងរ ខណៈលោក អ៊ុំ សំអាន ត្រូវបានឃុំខ្លួនទាំងនៅមានអភ័យឯកសិទ្ធិសភានៅឡើយ។ ក្រៅពីនេះវិញ គណបក្សសង្គ្រោះជាតិ បានហៅការចាប់ខ្លួនផ្ទួនៗ មកលើបក្សប្រឆាំង និងគំរាមអ្នកវិភាគ ព្រមទាំងអង្គការមិនមែនរដ្ឋាភិបាលខ្លះផង នៅពេលនេះថា ជាភាពអាសន្នផ្នែកនយោបាយ។
យ៉ាងនេះក្ដីអ្នកនាំពាក្យគណបក្សប្រជាជនកម្ពុជា លោក សុខ ឥសាន ធ្លាប់ថ្លែងការពារថា នេះជាការអនុវត្តច្បាប់ ហើយស្ថានភាពនយោបាយក៏ពុំមានឡើងកម្ដៅអ្វីនោះដែរ។
ជុំវិញបញ្ហានេះ ក្នុងថ្ងៃជាមួយគ្នានេះដែរ នាយកដ្ឋានពន្ធនាគារនៃក្រសួងមហាផ្ទៃ បានបង្កកលិខិតលោក កឹម សុខា ដែលស្នើសុំជួបលោក មាជ សុវណ្ណារ៉ា នៅពេលរសៀល។ លោក នុត សវនា មន្ត្រីនាំពាក្យនាយកដ្ឋានពន្ធនាគារក្រសួងមហាផ្ទៃ អះអាងថា បម្រាមនេះគឺដើម្បីរក្សាកម្ដៅនយោបាយ ដែលកំពុងតែមានបញ្ហានៅពេលនេះ ហើយការអនុញ្ញាតឲ្យលោក កឹម សុខា ចូលជួបនៅពេលណានោះ គេមិនទាន់ពិចារណានៅឡើយទេ។
ដោយឡែកសមាជិកសភាពដែលសកម្មក្នុងរឿងព្រំដែនជាមួយលោក អ៊ុំ សំអាន ដែរគឺលោក រៀល ខេមរិន្ទ្រ វិញបញ្ជាក់ថា លោកពុំខ្លាចញញើតចំពោះការចាប់ខ្លួនព្រោះបញ្ហាទឹកដីឡើយ។ មិនតែប៉ុណ្ណោះលោកក៏មិនរត់ភៀសខ្លួន ប្រសិនបើមានការចាប់ខ្លួន។
អង្គការផ្នែកសិទ្ធិមនុស្សយល់ឃើញថា ការអនុវត្តចំពោះសំណុំរឿងរបស់លោក អ៊ុំ សំអាន នេះគឺជាករណីមួយជំហានទៀតដែលបញ្ជាក់យ៉ាងច្បាស់ថា រដ្ឋាភិបាលពុំបានយកច្បាប់ជាធំឡើយ។
លោក អំ សំអាត អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការលីកាដូ មានប្រសាសន៍ថា វាជាការដាក់កម្រិតដ៏តឹងតែងពេកណាស់ ប្រឆាំងលោក អ៊ុំ សំអាន នៅពេលនេះ។ លោកយល់ឃើញថា ជាធម្មតាអ្នកដែលពុំទាន់មានទោស វាគួរណាស់ត្រូវបានផ្ដល់សេរីភាពពេញលេញជាងអ្នកដទៃ។ ម្យ៉ាងវិញទៀត ចាប់ខ្លួននេះជាការអនុវត្តទាំងបំពានថែមទៀតផង។
លោក អ៊ុំ សំអាន ដែលជាប់ចោទពីបទញុះញង់ឲ្យប្រព្រឹត្តិអំពើឧក្រិដ្ឋ និងញុះញង់ឲ្យមានការរើសអើងជាអាទិ៍នៃក្រុមព្រហ្មទណ្ឌនោះ ត្រូវបានតុលាការក្រុងភ្នំពេញ បដិសេធការសុំនៅក្រៅឃុំម្ដងរួចមកហើយ របស់មេធាវីការពារក្ដីលោក ជូង ជូងី។ ១ថ្ងៃបន្ទាប់នៃការបដិសេធសំណើសុំឲ្យដោះលែង ដែលមេធាវីដាក់កាលពីថ្ងៃទី២១ ខែមេសា ត្រូវបានអង្គការសង្គមស៊ីវិលចាត់ទុកថា នេះជាការលូកដៃផ្នែកនយោបាយ ដូច្នេះលុះត្រាតែត្រូវបញ្ចប់តាមផ្លូវនយោបាយជាមុនសិន ទើបអាចមានដំណោះស្រាយក្នុងសំណុំរឿងនេះ៕
No comments:
Post a Comment