អ្នកនាំពាក្យ គណបក្ស ប្រជាជន កម្ពុជា ថា, គណបក្ស មិនត្រូវ ការអនុសាសន៍ ពីអ្នកក្រៅទេ
RFA / វិទ្យុ អាស៊ី សេរី | ១៩ មិថុនា ២០១៦
អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ
ថ្លែងក្នុងវេទិកាយុវជននៅថ្ងៃទី១៩ ខែមិថុនា ឆ្នាំ២០១៦។ RFA/Yang
Chandara
ស្ដាប់ ឬ ទាញយកសំឡេង
00:00/00:00
នៅចំពោះមុខយុវជន និងអ្នកចូលរួមជាង ២០០នាក់ អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ ប្រកាសយ៉ាងម៉ឺងម៉ាត់ថា គណបក្សប្រជាជនកម្ពុជា គ្មានភាពចាំបាច់ណាមួយដែលត្រូវទទួលយកមេរៀន ឬអនុសាសន៍ពីអ្នកក្រៅនោះទេ។ លោកថា គណបក្សរបស់លោកកំពុងផ្ដោតលើនយោបាយបន្តជំនាន់ ជាមួយនឹងភាពជាក់លាក់នៃគោលនយោបាយយុវជន៖ «គណបក្ស ប្រជាជនកម្ពុជា ក៏ពុំមានភាពចាំបាច់ជាដាច់ខាតក្នុងការទទួលយកអនុសាសន៍ ឬមេរៀនពីគណបក្សដទៃ ព្រោះយើងក៏អត់ផ្តល់មេរៀនទៅគេ គេក៏អត់ចាំបាច់ផ្តល់មេរៀនឲ្យយើង ឬអ្នកណាដែលពុំមានជាប់សិទ្ធិ និងកាតព្វកិច្ចជាមួយគណបក្សប្រជាជនកម្ពុជា គឺយើងអត់ត្រូវការទេ។ យើងត្រូវការទស្សនៈនយោបាយរបស់សមាជិក។»
លោកថ្លែងដូចនេះនៅក្នុងវេទិកាយុវជនស្ដីពី "យន្តការប្រជាធិបតេយ្យរបស់គណបក្សនយោបាយ សម្រាប់លើកកម្ពស់ការចូលរួមរបស់យុវជន" ដែលរៀបចំឡើងដោយអង្គការកម្មវិធីអភិវឌ្ឍន៍ធនធានយុវជន ហៅកាត់ថា វ៉ាយ.អ.ឌី.ភី (YRDP) នៅសណ្ឋាគារអ៊ីមភើរៀល ព្រឹកថ្ងៃទី១៩ មិថុនា។
លោក ឈឹម ផលវរុណ ថ្លែងទៀតថា ជំហររបស់គណបក្សប្រជាជនកម្ពុជា គឺសន្តិភាព មិនមែនជាប្រជាធិបតេយ្យនោះទេ៖ «ជំហរ យើង គឺសន្តិភាពជាអាទិភាព មិនមែនជាប្រជាធិបតេយ្យទេ។ ដូច្នេះ យើងមិនបណ្តោយឲ្យប្រជាធិបតេយ្យ ឬផ្នែកណាមួយនៃប្រជាធិបតេយ្យ ចាប់សន្តិភាពធ្វើជាចំណាប់ខ្មាំងជាដាច់ខាត។ បើមានស្ថានភាពបែបនេះ យើងត្រូវតែចៀរប្រជាធិបតេយ្យ ឬផ្នែកណាមួយនៃប្រជាធិបតេយ្យនៅកន្លៀត ឬនៅក្នុងបន្ទប់ទឹក។»
ផ្ទុយពីការលើកឡើងបែបនេះរបស់លោក ឈឹម ផលវរុណ តំណាងគណបក្សសង្គ្រោះជាតិ អ្នកវិភាគ និងយុវជនមួយចំនួនដែលមានវត្តមានក្នុងវេទិកានោះ បានប្រតិកម្មថា វាមិនមែនជាជំហរត្រឹមត្រូវដែលគណបក្សប្រជាជនកម្ពុជា គួរប្រកាន់យកនោះទេ។
ប្រធានចលនាយុវជន
គណបក្សសង្គ្រោះជាតិ លោក ហ៊ីង សុខសាន្ត
ថ្លែងក្នុងវេទិកាយុវជននៅថ្ងៃទី១៩ ខែមិថុនា ឆ្នាំ២០១៦។ RFA/Yang
Chandara
ទាក់ទងនឹងរឿងសន្តិភាពវិញ អ្នកវិភាគ និងជាអ្នកស្រាវជ្រាវការអភិវឌ្ឍសង្គម លោក កែម ឡី បកស្រាយថា គ្មានសង្គ្រាមតែមួយមុខ មិនរាប់ថាជាសន្តិភាពនោះទេ។ លោកថា សន្តិភាពត្រូវតែផ្សារភ្ជាប់ជាមួយការគោរពសិទ្ធិមនុស្ស និងគោលការណ៍ប្រជាធិបតេយ្យ ធ្វើបែបនេះទើបអាចឲ្យពលរដ្ឋមានសន្តិភាពក្នុងចិត្ត៖ «ពាក្យ ថាសន្តិភាពហ្នឹង មិនមែនតែសន្តិភាពសង្គមទេ វាត្រូវសន្តិភាពមនុស្សជាតិទៅទៀត។ បើវាមានអំពើហិង្សា វាអត់មានប្រជាធិបតេយ្យ មនុស្សកាន់តែធុញថប់អារម្មណ៍ មនុស្សកាន់តែខឹង មនុស្សត្រូវបានគេរំលោភបំពានកាន់តែច្រើន នោះវានឹងធ្វើឲ្យមនុស្សអត់សន្តិសុខមនុស្សជាតិទេ។ កាលណាអត់មានសន្តិសុខមនុស្សជាតិទេ វាធ្វើឲ្យអសន្តិសុខជាតិ។ កាលណាអសន្តិសុខជាតិ វាធ្វើឲ្យអត់មានសន្តិភាព។ អាហ្នឹងវាត្រូវចេញពីមនុស្ស។»
ចំណែកក្រុមយុវជនវិញយល់ឃើញថា កម្ពុជា សព្វថ្ងៃមានតែសន្តិភាពខាងក្រៅតែប៉ុណ្ណោះ មិនមានសន្តិភាពខាងក្នុងនោះទេ ដ្បិតប្រជាពលរដ្ឋនៅតែបន្តរងគ្រោះដោយសារការរំលោភយកដីធ្លី និងការរឹតត្បិតសិទ្ធិសេរីភាពជាដើម៖ «នៅ តាមបណ្ដាខេត្តមួយចំនួន យើងឃើញថាប្រទេសអត់មានភាពវឹកវរទេ ប៉ុន្តែសន្តិភាពដែលនៅក្នុងចិត្តរបស់ពួកគាត់ហ្នឹង គឺអត់មានទេ ដោយសារបញ្ហាច្រើនកើតឡើងសម្រាប់ពួកគាត់ ដូចជាបញ្ហាដីធ្លី បញ្ហាព្រៃឈើ ជាដើម ដែលប៉ះពាល់ដល់ជីវភាពរបស់ពួកគាត់។ សម្រាប់ខ្ញុំ ប្រទេសកម្ពុជា សព្វថ្ងៃ អត់ទាន់ទទួលបានសន្តិភាពពេញលេញទេ។ ពេលដែលមានការបោះឆ្នោត ឬមានចលនាអ្វីមួយកើតឡើង ប្រទេសកម្ពុជា តែងមានហិង្សាកើតឡើងចំពោះប្រជាពលរដ្ឋ រវាងថ្នាក់ដឹកនាំ អាជ្ញាធរទៅកាន់ប្រជាពលរដ្ឋ ធ្វើឲ្យពួកគាត់ទទួលរងនូវអំពើហិង្សា ដូចជាការចាប់ពួកគាត់ដាក់គុក ជាដើម។»
បន្ថែមពីលើនេះ ពួកគេលើកឡើងស្រដៀងគ្នាថា ជំហរមិនទទួលយកទស្សនៈ ឬអនុសាសន៍ពីខាងក្រៅ គ្មានផលចំណេញអ្វីដល់គណបក្សប្រជាជនកម្ពុជា នោះទេ៖ «ភាគ ច្រើនអង្គការសង្គមស៊ីវិល ឬស្ថាប័នផ្សេងទៀត គាត់បានសិក្សាស្រាវជ្រាវច្បាស់លាស់អំពីបញ្ហាទាំងឡាយ មានទិន្នន័យចំពោះការសិក្សាទៅដល់ប្រជាជន។ ដូច្នេះបក្សប្រជាជន គួរតែយកទិន្នន័យទាំងនោះដើម្បីមកសិក្សាស្រាវជ្រាវបន្ថែម ដោយមិនសំអាងថាខ្លួនមាននូវបញ្ញវ័ន្ត ឬក៏មានអ្នកចេះដឹងច្រើនក្នុងបក្ស ដោយមិនគិតអំពីសមត្ថភាពរបស់អ្នកដទៃ។ នេះវាជារឿងខុសឆ្គងមួយ។ គាត់គួរតែទទួលយក ព្រោះវាជាឱកាសមួយដែលផ្តល់ឲ្យយុវជន និងអ្នកដទៃអាចចូលរួមផ្តល់មតិយោបល់បាន។ បើគាត់ធ្វើអ៊ីចឹង យុវជនមិនហ៊ានបញ្ចេញមតិយោបល់ គំនិត ឬទស្សនៈផ្សេងៗទៀតទេ។»
ទាំងអ្នកវិភាគ និងក្រុមយុវជន សុទ្ធតែលើកឡើងដូចគ្នាថា ការបើកចំហទទួលយកពហុគំនិត ការគោរពសិទ្ធិមនុស្ស និងអនុវត្តគោលការណ៍ប្រជាធិបតេយ្យ គឺជាអ្វីដែលគណបក្សប្រជាជនកម្ពុជា ត្រូវធ្វើ ដើម្បីកសាងទំនុកចិត្តរបស់ម្ចាស់ឆ្នោត ពិសេសយុវជន ឲ្យបន្តបោះឆ្នោតជូនគណបក្សនេះតទៅទៀត៕
No comments:
Post a Comment