លោក សម រង្ស៊ី សម្ដែង ការសោកស្ដាយ ដែលមាន អ្នកប្រមាថ ក្រុមគ្រួសារ នាយករដ្ឋមន្ត្រី
RFA / វិទ្យុ អាស៊ី សេរី | ១៤ មិថុនា ២០១៦
ប្រធានគណបក្សសង្គ្រោះជាតិ លោក សម រង្ស៊ី
ក្នុងកម្មវិធីទូរទស្សន៍អាស៊ីសេរី នារដ្ឋធានីវ៉ាស៊ីនតោន សហរដ្ឋអាមេរិក
កាលពីយប់ថ្ងៃទី៥ កុម្ភៈ ឆ្នាំ២០១៦។ Photo: RFA
លោក សម រង្ស៊ី ប្រធាន គណបក្ស សង្គ្រោះជាតិ ដែលកំពុង ធ្វើ បេសកកម្ម នៅសហរដ្ឋ អាមេរិក បានសម្ដែង ការសោកស្ដាយ ចំពោះ ជនណា ដែលចោទប្រកាន់ កូនប្រុស លោកនាយករដ្ឋមន្រ្តី ហ៊ុន សែន ថា មិនមែន ជាកូនបង្កើត របស់គាត់។
នៅក្នុងលិខិត របស់លោក សម រង្ស៊ី ផ្ញើទៅកាន់ លោក ហ៊ុន សែន កាលពីថ្ងៃអង្គារ ទី១៤ ខែមិថុនា, លោក បានចូលរួម រំលែក ការឈឺចាប់ ជាមួយ គ្រួសារ របស់លោក ហ៊ុន សែន, ហើយ ថ្កោលទោស ចំពោះ ទង្វើ អសីលធម៌ ទាំងឡាយណា ដែលធ្វើ ឲ្យប៉ះពាល់ ដល់ កិត្តិយស និងសេចក្ដីថ្លៃថ្នូរ នៃគ្រួសារ លោកនាយករដ្ឋមន្ត្រី។
កាលពីថ្ងៃ ទី១៣ ខែមិថុនា, លោក ហ៊ុន សែន សម្ដែង ការខឹងសម្បា ជាខ្លាំង ចំពោះ ការចោទប្រកាន់ កូនប្រុស របស់លោក, គឺ លោក ហ៊ុន ម៉ាណែត ថា ជាកូន របស់ អតីត មេដឹកនាំ កុម្មុយនិស្ត វៀតណាម ឈ្មោះ ឡេ ឌឹកថូ ជាមួយ នឹងអ្នកស្រី ប៊ុន រ៉ានី។ លោក ហ៊ុន សែន ក៏បាន ប្រកាស ចង់បើកផ្លូវ ដោះស្រាយ វិបត្តិនយោបាយ នេះដែរ ដោយលោក ទាមទារ ឲ្យមេដឹកនាំ បក្សប្រឆាំង ត្រូវ ហ៊ានប៉ះប៉ូវ តម្លៃ ដ៏ធំ មួយ សម្រាប់ គ្រួសារ របស់លោក។
លោក ហ៊ុន សែន៖ «ពីមុន ខ្ញុំ ត្រៀមខ្លួន ដើម្បី ចុះហត្ថលេខា មួយចំនួន សម្រួល ឲ្យបរិយាកាស ខ្លះ។ អាខ្លះ វា ជាប់គុក បន្តិចបន្តួច; អាខ្លះ វា អាចសូម នៅក្រៅឃុំ។ សំឡេង របស់ខ្ញុំ អាចសម្រួល បានខ្លះ, ស្នើសុំ ទៅកាន់ តុលាការ ដើម្បី សូម ឲ្យនៅក្រៅឃុំ។ តាមច្បាប់ ពន្ធនាគារ អនុញ្ញាត ឲ្យនាយករដ្ឋមន្ត្រី ធ្វើសំណើ ទៅព្រះមហាក្សត្រ លើកលែងទោស ពេលណា ក៏បានដែរ។ ប៉ុន្តែ ឥឡូវនេះ ខ្ញុំ មិនបាន ត្រៀមខ្លួន ធ្វើអ្វី ទាំងអស់ ពីព្រោះ ក្រុម របស់ អ្នកឯង ជាក្រុម តែមួយ។ នៅពេល ដែលអ្នកឯង វ៉ៃក្បាលខ្ញុំ, ហើយ ប្រើខ្ញុំ ឲ្យដងឲ្យ, អ្នកឯង ផឹកទៀត,កុំ សង្ឃឹម។ អ្នកឯង ត្រូវ មានការប៉ះប៉ូវ មួយ ដ៏ធំ សម្រាប់ ហ៊ុន សែន និងក្រុម គ្រួសារ របស់ ហ៊ុន សែន។ អ្នកឯង ត្រូវ ស្ដាប់ ឲ្យច្បាស់។»
លិខិត របស់លោក សម រង្ស៊ី បញ្ជាក់ទៀតថា គោលនយោបាយគណបក្សសង្គ្រោះជាតិ ប្រឆាំងដាច់ខាតនូវការប្រើប្រាស់អំពើហិង្សា ការលាបពណ៌ ការប្រមាថ និងអំពើទាំងឡាយណាដែលនាំឲ្យមានការឈឺចាប់ដល់អ្នកដទៃ។
កាលពីពាក់កណ្ដាលខែឧសភា គណបក្សប្រឆាំងបានសម្រេចបណ្ដេញសមាជិករបស់ខ្លួនមួយរូប គឺលោក យ៉ង់ ណុយ ហៅ ប្រេតឌី យ៉ាំង (Brady Young) ចេញពីបក្សដោយសារលោកបានបង្ហោះវីដេអូឃ្លិបជាបន្តបន្ទាប់ ទាមទារឲ្យលោក ហ៊ុន សែន ពិនិត្យ DNA កូនប្រុសច្បងរបស់លោក គឺលោក ហ៊ុន ម៉ាណែត ថាតើជាកូនប្រុសបង្កើតរបស់លោក ហ៊ុន សែន ឬមួយជាកូនប្រុសរបស់មេដឹកនាំវៀតណាម ឈ្មោះ ឡេ ឌឹក ថូ ជាមួយអ្នកស្រី ប៊ុន រ៉ានី នោះ៕
No comments:
Post a Comment