សមត្ថកិច្ច កំពុង ស្រាវជ្រាវ រកជន ពាក់ព័ន្ធ ករណី ឡានទាហាន ដឹកឈើប្រណិត នៅខេត្ត ត្បូងឃ្មុំ
RFA / វិទ្យុ អាស៊ី សេរី | ១៤ មិថុនា ២០១៦
ផែនទីខេត្តត្បូងឃ្មុំ
Photo: RFA
ស្ដាប់ ឬ ទាញយកសំឡេង
00:00/00:00
មន្ត្រី នាំពាក្យ កងរាជអាវុធហត្ថ លើផ្ទៃប្រទេស ឲ្យដឹង ថា, សមត្ថកិច្ច កំពុង ស្រាវជ្រាវ ករណី រថយន្ត ទាហាន ពីរគ្រឿង និងរថយន្ត សារ៉ែន ដែលត្រូវ បានសមត្ថកិច្ច ចាប់ នៅស្រុក ពញាក្រែក ខេត្តត្បូងឃ្មុំ ពាក់ព័ន្ធ ករណី ដឹកឈើ ប្រណិត។ ការលើកឡើងនេះ បន្ទាប់ ពីសមត្ថកិច្ច បង្ក្រាប បានរថយន្ត បីគ្រឿង ដែលផ្ទុកឈើ ប្រណិត ប្រភេទ គ្រញូង និងធ្នង់ ជាច្រើនរយដុំ បម្រុង ដឹកចេញ ទៅប្រទេស វៀតណាម កាលពីព្រឹក ថ្ងៃទី១៣ មិថុនា។
សមត្ថកិច្ចកំពុងស្រាវជ្រាវរកជនពាក់ព័ន្ធ និងគ្រោងបញ្ជូនសំណុំរឿងដឹកជញ្ជូនឈើប្រណិតដោយប្រើប្រាស់មធ្យោបាយ រដ្ឋទៅតុលាការ ដើម្បីចាត់វិធានការតាមផ្លូវច្បាប់។ ការលើកឡើងនេះ ក្រោយពេលអាជ្ញាធរខេត្តត្បូងឃ្មុំ ឃាត់រថយន្តទាហានពីរគ្រឿង និងរថយន្តសារ៉ែនមួយគ្រឿង បានបង្កប់ឈើប្រណិតប្រភេទគ្រញូង និងធ្នង់ បម្រុងដឹកចេញទៅប្រទេសវៀតណាម។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី មានប្រសាសន៍នៅថ្ងៃទី១៤ មិថុនា ថា សមត្ថកិច្ច និងមន្ត្រីជំនាញរដ្ឋបាលព្រៃឈើខេត្តត្បូងឃ្មុំ បានឃាត់រថយន្តបីគ្រឿង ក្នុងនោះរថយន្តទាហានកងពលដឹកជញ្ជូន៩៩ ចំនួនពីរគ្រឿង។ ចំណែករថយន្តសារ៉ែនមួយគ្រឿងដែលមានទម្រង់ជារថយន្តសមត្ថកិច្ចនោះ គឺជារថយន្តមានស្លាកលេខក្លែងក្លាយរបស់ក្រុមជនល្មើសប៉ុណ្ណោះ។ លោកបន្តថា ចំពោះរថយន្តទាហានកងពលដឹកជញ្ជូន៩៩ សមត្ថកិច្ចកំពុងស៊ើបអង្កេតបន្ថែមទៀតរកអ្នកពាក់ព័ន្ធ ដើម្បីដាក់ទោសទណ្ឌតាមវិន័យយោធា និងដាក់ទោសតាមច្បាប់ព្រៃឈើ៖ «បាទ! ហ្នឹង គាត់ត្រូវទទួលរងពិន័យទៅតាមបទវិន័យទូទៅរបស់កងយោធពលខេមរភូមិន្ទ ហើយយើងមើលបទពិន័យហ្នឹង គឺដាក់តាមកំហុសរបស់គាត់។»
រថយន្តទាហាន និងឡានសារ៉ែនទាំងបីគ្រឿងនោះ មានផ្ទុកឈើប្រភេទគ្រញូង និងធ្នង់ជាង ២០០ដុំ ប៉ុន្តែសមត្ថកិច្ចនៅមិនទាន់កំណត់ជាម៉ែត្រគូបនៅឡើយទេ។ ឈើ និងរថយន្ត ត្រូវរក្សាទុកនៅស្នាក់ការមន្ត្រីជំនាញខេត្តត្បូងឃ្មុំ។ លោក អេង ហ៊ី ឲ្យដឹងថា បេសកកម្មបង្ក្រាបកាលពីថ្ងៃទី១៣ មិថុនា នោះ ក្រុមជនល្មើសបានរត់គេចខ្លួនបាត់។ ដូច្នេះ គេមិនទាន់ដឹងថា ឈើនោះមានទិសដៅពីណាទៅណាប្រាកដទេ។ មន្ត្រីនាំពាក្យដដែលអះអាងថា បទល្មើសរត់ពន្ធឈើខុសច្បាប់ចេញទៅវៀតណាម ជាទ្រង់ទ្រាយធំ គឺមិនមានទៀតឡើយ លើកលែងតែករណីលួចលាក់តាមច្រករបៀងខ្លះប៉ុណ្ណោះ។
ទាក់ទងបញ្ហានេះ សមាជិកក្រុមប្រឹក្សាខេត្តត្បូងឃ្មុំ មកពីគណបក្សសង្គ្រោះជាតិ និងជាអ្នករស់នៅក្បែរព្រំដែនកម្ពុជា-វៀតណាម លោក ស៊ូ យាន មើលឃើញថា សកម្មភាពរត់ពន្ធឈើឆ្លងដែនចេញទៅវៀតណាម ទ្រង់ទ្រាយធំ គឺមិនសូវមានមែន ប៉ុន្តែបទល្មើសក្រោមរូបភាពលួចលាក់នៅតែជាក្តីបារម្ភរបស់ពលរដ្ឋ។ លោកបន្តថា បទល្មើសអាចកើតឡើង គឺដោយសារមានអំពើពុករលួយជាប្រព័ន្ធ៖ «អភិបាល ខេត្ត ដែលជាគណៈ មេបញ្ជាការ ឯកភាព របស់ ខេត្ត មានវិធានការទប់ស្កាត់ទៅតាមប្រសាសន៍របស់លោកនាយករដ្ឋមន្ត្រី ប៉ុន្តែយើងលើកតែលើក។ លើកក្នុងកិច្ចប្រជុំ គឺវាមិនមានប្រសិទ្ធភាព។»
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្ត ត្បូងឃ្មុំ លោក នាង សុវ៉ាត សាទរចំពោះចំណាត់ការរបស់សមត្ថកិច្ចក្នុងការបង្ក្រាបរថយន្តដឹកឈើ របស់ទាហាន និងលើកទឹកចិត្តឲ្យមន្ត្រីពាក់ព័ន្ធ ធ្វើការងារនេះបន្ថែមទៀត ព្រមទាំងត្រូវបង្ក្រាបឲ្យបានស្មើភាពគ្នា ពីព្រោះលោកយល់ថា ករណីនេះអាចជាទំនាស់ផលប្រយោជន៍ច្រើនជាង៖ «ទោះ បង្កើត គណៈកម្មការ ប៉ុន្មាន ទៀត ក៏ដោយ បើសិន ខ្វះមនសិការ, ខ្វះឆន្ទៈ ក្នុងការ ធ្វើហើយ, គឺ គេ ធ្វើ ទៅលើ អ្នកណា ដែលមិន បានផ្តល់ ប្រយោជន៍ ឲ្យគេទេ។»
លោកបន្ថែមថា សកម្មភាពបង្ក្រាបបទល្មើសឈើប្រណិតធំៗ កម្រឃើញចាប់បានជនល្មើសយកមកផ្ដន្ទាទោសណាស់ បើទោះបីបទល្មើសទាំងនោះជាក់ស្តែងយ៉ាងណាក៏ដោយ។ លោកថា ដើម្បីឲ្យការអនុវត្តច្បាប់មានប្រសិទ្ធភាព អាជ្ញាធរ ឬតុលាការ ត្រូវចាប់ជនល្មើស រួមមានមន្ត្រី ឧកញ៉ាធំៗដែលជាប់ពាក់ព័ន្ធករណីស្តុកទុក និងរកស៊ីឈើកន្លងមក។ លោកមើលឃើញថា តាំងពីគណៈកម្មការជាតិ ទប់ស្កាត់ និងបង្ក្រាបបទល្មើសព្រៃឈើ ត្រូវបានបង្កើតឡើងកាលពីខែមករា គឺនៅមិនទាន់ឃើញមានការចាប់ខ្លួន ឬដាក់ទោសទណ្ឌដល់ឧកញ៉ារកស៊ីឈើនៅឡើយ បានត្រឹមតែបញ្ជូនសំណុំរឿងទៅតុលាការប៉ុណ្ណោះ៕
No comments:
Post a Comment