 |
| ប្រធានគណបក្សសង្គ្រោះជាតិ លោក សម រង្ស៊ី ថ្លែងក្នុងវេទិកាអាស៊ីសេរី កាលពីយប់ថ្ងៃទី១៥ ខែមិថុនា ឆ្នាំ២០១៦ នារដ្ឋធានីវ៉ាស៊ីនតុន សហរដ្ឋអាមេរិក។ RFA |
លោក សម រង្ស៊ី ថា, រដ្ឋាភិបាល មួលបង្កាច់លោក ចំពោះ ការស្នើ អឺរ៉ុប បិទទីផ្សារ កម្ពុជា
RFA / វិទ្យុ អាស៊ី សេរី | ២១ កក្កដា ២០១៦
ព័ត៌មាន ជុំវិញ ការអំពាវនាវ ឲ្យសហភាព អឺរ៉ុប បិទទីផ្សារ នាំចេញ សម្លៀកបំពាក់ ពីកម្ពុជា នោះ ត្រូវ បានប្រធាន បក្សប្រឆាំង លោក សម រង្ស៊ី ឆ្លើយតប នៅថ្ងៃ ទី២១ កក្កដា ថា, រដ្ឋាភិបាល មួលបង្កាច់លោក, ហើយ កំពុងតែ ភូតកុហក ប្រជាពលរដ្ឋ ជាពិសេស កម្មករ ទៅវិញ។លោក សម រង្ស៊ី ប្រធាន គណបក្ស សង្គ្រោះជាតិ ចេញសេចក្ដីថ្លែងការណ៍ ឆ្លើយតប នៅក្នុងទំព័រ ហ្វេសប៊ុក (Facebook) របស់លោក ដោយបដិសេធ ថា, លោក មិនបាន អំពាវនាវ ឲ្យសហភាព អឺរ៉ុប បិទទីផ្សារ របស់គេ មិនឲ្យនាំចូល សម្លៀកបំពាក់ ពីកម្ពុជា ទេ។
ខ្លឹមសារ ដែលលោក សរសេរ លើហ្វេសប៊ុក នៅថ្ងៃ ទី២១ កក្កដា អមដោយឃ្លីប វីដេអូខ្លី ជាភាសា បារាំង ផង មានសេចក្ដី ថា, រដ្ឋាភិបាល កំពុងតែ ភូតកុហក ប្រជាពលរដ្ឋ ជាពិសេស កម្មករ ដោយមួលបង្កាច់លោក ក្នុងបញ្ហានេះ៖ «វីដេអូនេះ ជាការថត សំឡេង នៅពេល ដែលខ្ញុំ និយាយ ជាភាសាបារាំង នៅចំពោះមុខ តំណាងរាស្ត្រ សភាអឺរ៉ុប កាលពីថ្ងៃ ១៣ កក្កដា ២០១៦។ បន្ទាប់ ពីបញ្ជាក់ ថា, ក្រុមហ៊ុន កាត់ដេរ នៅប្រទេស កម្ពុជា ចំណេញលុយ ច្រើនណាស់, ហើយ មួយផ្នែក នៃប្រាក់ចំណេញនេះ ត្រូវ ផ្ទេរជាសំណូក សូកប៉ាន់ ឲ្យទៅមេដឹកនាំ ពុករលួយ នៅស្រុកយើង។ ខ្ញុំ ក៏បាន លើកឡើង ថា, បើ អស់លោកអ្នក តំណាងរាស្ត្រ សភាអឺរ៉ុប ធ្វើឲ្យ អាជ្ញាធរ ប្រទេសកម្ពុជា យល់ថា, ទីផ្សារ សម្លៀកបំពាក់នេះ មិនមែន បើកចំហ ជានិច្ចកាល ដោយគ្មាន លក្ខខណ្ឌ នោះទេ, ពួកគេ ទាំងនោះ អាចចាប់ផ្ដើម គិតគូរ ពីការគោរព សិទ្ធិមនុស្ស និងលទ្ធិប្រជាធិបតេយ្យ នៅកម្ពុជា។ ដូច្នេះ ខ្ញុំ មិនបាន អំពាវនាវ ទាល់តែសោះ ឲ្យសហគមន៍ អឺរ៉ុប បិទទីផ្សារ របស់គេ តែម្ដង។ នេះ បង្ហាញថា, រដ្ឋាភិបាល កំពុងតែ ឃោសនា យ៉ាងអកុសល ដោយបកប្រែ ពាក្យសម្ដី របស់ខ្ញុំ ពីភាសាបារាំង មកភាសាខ្មែរ ខុសស្រឡះ ទាំងស្រុង។»
លោក បញ្ជាក់បន្ថែមថា អ្វីដែលលោកបានលើកឡើងនោះ ក៏មិនខុសពីអ្វីដែលសហជីពធំៗនៅប្រទេសកម្ពុជា បានលើកឡើងជាមួយក្រុមហ៊ុនអន្តរជាតិធំៗជាអ្នកបញ្ជាទិញ ឬ Buyers ដើម្បី ទាក់ទាញអារម្មណ៍ក្រុមហ៊ុនបរទេសទាំងនោះ ឲ្យគិតគូរអំពីលក្ខខណ្ឌការងារដ៏លំបាកវេទនារបស់កម្មករខ្មែរនៅ ប្រទេសកម្ពុជា។ លោកបន្តថា ការលើកឡើងបែបនេះ គឺជាវិធីសាស្ត្រក្នុងការចរចា ដើម្បីស្នើសុំឲ្យអ្នកបញ្ជាទិញ ឬ Buyers ដាក់ សម្ពាធទៅលើថៅកែរោងចក្រកាត់ដេរនៅប្រទេសកម្ពុជា ឲ្យដំឡើងប្រាក់ខែ និងកែលំអលក្ខខណ្ឌការងារសម្រាប់ជួយដល់កម្មករខ្មែរ។
សារឆ្លើយតបរបស់លោក សម រង្ស៊ី នៅពេលនេះ គឺធ្វើឡើងបន្ទាប់ពីក្រសួងការងារ និងបណ្ដុះបណ្ដាលវិជ្ជាជីវៈ នៅយប់ថ្ងៃទី១៩ កក្កដា ចេញសេចក្ដីប្រកាសថ្កោលទោសលោក ដោយចាត់ទុកថា ការអំពាវនាវបែបនេះជាអំពើអមនុស្សធម៌ ខ្វះការទទួលខុសត្រូវ និងធ្វើឲ្យប៉ះពាល់ធ្ងន់ធ្ងរដល់ផលប្រយោជន៍កម្មករនិយោជិតជាង ៧០ម៉ឺននាក់ដែលកំពុងទទួលបានផលកម្រៃដោយផ្ទាល់ និងប្រជាពលរដ្ឋប្រមាណជាង ២លាននាក់ផ្សេងទៀត កំពុងទទួលផលដោយប្រយោលពីឧស្សាហកម្មនេះដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ឃើញអំពីផលប៉ះពាល់ដូចគ្នានេះដែរ ហើយលោកចាត់ទុកការអំពាវនាវបែបនេះ ថាជាការសម្លាប់ពលរដ្ឋខ្មែរ។ លោកបានហៅការអំពាវនាវរបស់លោក សម រង្ស៊ី ថាមានចរិតនយោបាយពិសពុល ខុសស្រឡះពីចរិតមេដឹកនាំគណបក្សនៅប្រទេសដទៃ៖ «ដូចជាអ្នកស្រី អ៊ុងសាន ស៊ូជី (Aung San Suu Kyi) អ៊ីចឹង ដែលគាត់ប្រៀបធៀបយក អ៊ុងសាន ស៊ូជី ជាខ្នាតវាស់របស់គាត់ហ្នឹង តាមពិតមិនអាចវាស់កើតទេ។ គេនោះគេមានតែអំពាវនាវរកវិនិយោគិនឲ្យចូលមកអភិវឌ្ឍនៅក្នុងប្រទេសគេ ឯងនេះមានតែរុញច្រានគេចេញ បន្លាចគេមិនឲ្យចូល សុទ្ធតែថៅកែចិត្តខ្មៅ។ អាហ្នឹងហើយ វាឆ្លុះបញ្ចាំងអំពីចរិតពិសពុលរបស់គណបក្សប្រឆាំង។ អ៊ីចឹងទេ បងប្អូនកម្មករនិយោជិតល្មមយល់បញ្ហាហើយថា អ្វីទៅដែលមេបក្សប្រឆាំងចង់បាននោះ គឺចង់សម្លាប់កម្មករនិយោជិតហ្នឹងឯង។»
លោក សម រង្ស៊ី លើកហេតុផលថា ប្រសិនបើសហភាពអឺរ៉ុប បិទទីផ្សារសម្លៀកបំពាក់ ការប៉ះពាល់ចម្បង គឺមេដឹកនាំពុករលួយថ្នាក់ធំៗដែលរកចំណូលបានជាច្រើនលើសលប់ពី វិស័យឧស្សាហកម្មកាត់ដេរសម្លៀកបំពាក់នេះ។ លោកថា កម្មករមិនសូវប៉ះពាល់ទេ។
ទាក់ទងបញ្ហានេះ នាយកមជ្ឈមណ្ឌលសិក្សាគោលនយោបាយ ដែលជាអ្នកជំនាញខាងសេដ្ឋកិច្ច លោក ច័ន្ទ សុផល មានប្រសាសន៍ថា មានភាគរយតិចណាស់ដែលសហភាពអឺរ៉ុប បិទទីផ្សារនាំចូលសម្លៀកបំពាក់ពីកម្ពុជា សម្រាប់ស្ថានភាពដូចបច្ចុប្បន្ននេះ លើកលែងតែប្រទេសកម្ពុជា មានស្ថានភាពវិបត្តិនយោបាយធ្ងន់ធ្ងរ ឬការរំលោភឃ្លាតចាកប្រជាធិបតេយ្យខ្លាំង។ លោកយល់ថា បើសិនជាសហភាពអឺរ៉ុប បិទទីផ្សារកម្ពុជា មែន អ្នកប៉ះពាល់មុនគេ គឺកម្មករ ៨សែននាក់៖ «បន្ទាប់មកទៀត ថៅកែ រោងចក្រ ប៉ះពាល់ ខាតការ វិនិយោគខ្លះ។ ប៉ុន្តែ ជាទូទៅ ពួកគេ មិនមែន ក្រទេ។ គេ ខាតខ្លះ ក៏មិនអីដែរ។ គេ ច្រើនតែ មានរោងចក្រ នៅប្រទេស ផ្សេងៗ ទៀតដែរ។ គេ អាចរំកិល រោងចក្រគេ បន្តិចទៅ។ ឯ ចំណែក រដ្ឋាភិបាល, បើ ថា ឱ្យខាត ដោយសារតែ ការប្រមូលពន្ធ មិនខាត ប៉ុន្មានទេ, ព្រោះ រដ្ឋាភិបាល បានប្រកាន់យក គោលនយោបាយ មួយ មិនយកពន្ធ។ ការអនុគ្រោះ ពន្ធ ចំពោះ បរទេស សមស្រប ដែលបង្កើត ការងារច្រើន។»
ប្រធានបទស្ដីពីសហភាពអឺរ៉ុប បិទទីផ្សារនាំចូលសម្លៀកបំពាក់ពីកម្ពុជា បានធ្វើឲ្យមជ្ឈដ្ឋាននានា ប្រតិកម្ម និងព្រួយបារម្ភអំពីការប៉ះពាល់ជីវភាពពលរដ្ឋកម្ពុជា។ រហូតមកដល់ពេលនេះ សហភាពសហជីពកម្មករ ក៏បានចេញសេចក្ដីថ្លែងការណ៍អំពីការព្រួយបារម្ភរបស់ខ្លួន ហើយអំពាវនាវដល់សហភាពអឺរ៉ុប ឲ្យពិនិត្យពិចារណាឡើងវិញ ដោយសុំកុំឲ្យផ្ដាច់កូតានាំចេញសម្លៀកបំពាក់ពីកម្ពុជា៕
A good Hun Sen is a deposed Hun Sen!
ReplyDelete