 |
| ភ្លុកដំរីដែលមន្ត្រីគយចាប់បានក្នុងកុងតឺន័រផ្ទុកអីវ៉ាន់ មួយ នាកំពង់ផែស្វយ័តក្រុងព្រះសីហនុ នៅថ្ងៃទី៥ ខែសីហា ឆ្នាំ២០១៦។ RFA/Den Ayuthyea |
គយ ខេត្តព្រះសីហនុ ចាប់បាន ភ្លុកដំរី ជាងកន្លះតោន ដែលនាំចូល កម្ពុជា តាំងពីឆ្នាំ ២០១៤
RFA | ៥ សីហា ២០១៦
មន្ត្រី សាខា គយ
និងរដ្ឋាករ កំពង់ផែ អន្តរជាតិ ខេត្តព្រះសីហនុ ចាប់បាន ភ្លុកដំរី ជាងកន្លះតោន
(៦១៣ គីឡូក្រាម) ដែលឈ្មួញ លួចដាក់បង្កប់ ក្នុងកុងតឺន័រ ដឹកពោត។ កុងតឺន័រនោះ ត្រូវ បានគេ នាំចូល តាមច្រក កំពង់ផែនេះ
កាលពីឆ្នាំ២០១៤, ហើយ ត្រូវ ម្ចាស់ ទុកចោល មិនចូលខ្លួន មកបំពេញ បែបបទ នាំចេញ អស់រយៈពេល
២ឆ្នាំ កន្លងមក។ប្រធាន សាខា គយ និងរដ្ឋាករ ប្រចាំ កំពង់ផែ អន្តរជាតិ ក្រុងព្រះ សីហនុ លោក គិន លី បានឲ្យដឹង ក្នុងសន្និសីទ កាសែត ល្ងាចថ្ងៃសុក្រ ទី៥ ខែសីហា នាសាលប្រជុំ កំពង់ផែ ថា, ស្ថាប័នលោក បានត្រួតពិនិត្យ កុងតឺន័រ ចំនួន ២ ដែលម៉ាស៊ីន ស្វ័យប្រវត្តិ ទំនើប ឬម៉ាស៊ីនស្កែន បង្ហាញសង្ស័យ មានភ្លុកដំរី បង្កប់ ក្នុងបាវពោត ដាក់ក្នុងកុងតឺន័រ។ លោក បន្តថា, ការត្រួតពិនិត្យ ជាក់ស្ដែង ដោយមាន វត្តមាន មន្ត្រីជំនាញ ស្ថាប័នពាក់ព័ន្ធ, មានតុលាការ ជាដើម, បានរកឃើញ ថា កុងតឺន័រមួយ ក្នុងចំណោម កុងតឺន័រទាំង ពីរ មានបង្កប់ ភ្លុកដំរី ជាង៦០០ គីឡូក្រាម, ហើយ ត្រូវ ម្ចាស់ទុកចោល។
លោក បញ្ជាក់ថា, ភ្លុកដំរី ដែលត្រូវ គេ ឆែកឃើញ កុងតឺន័រនេះ គឺ ត្រូវ គេ បង្កប់ក្នុងបាវ ពោត, ហើយ ត្រូវ ស្ថាប័ន សាខា គយ និងរដ្ឋាករ កំពង់ផែ អន្តរជាតិ ក្រុងព្រះសីហនុ ថតឃើញ ឬស្កែនឃើញ តាំងពីឆ្នាំ ២០១៤ មកម្ល៉េះ។
លោក គិន លី បន្ថែមថា ការទន្ទឹងរង់ចាំជួបម្ចាស់កុងតឺន័រដឹកពោត ហើយមានបង្កប់ភ្លុកដំរីនេះ គឺមានរយៈពេល ២ឆ្នាំមកហើយ ប៉ុន្តែមិនឃើញម្ចាស់ទំនិញ ឬម្ចាស់កុងតឺន័រ មានបង្កប់ភ្លុកដំរីនេះមកបំពេញបែបបទយកអីវ៉ាន់ចេញទេ ទើបពេលនេះស្ថាប័នលោកបានអនុវត្តទៅតាមនីតិវិធីបើកកុងតឺន័រនៅថ្ងៃ ទី៥ ខែសីហា ហើយរកឃើញភ្លុកដំរីជាង ៦០០គីឡូក្រាម។
លោកអះអាងថា ភ្លុកដំរីទាំងនេះ ត្រូវឈ្មួយបន្លំបង្កប់ក្នុងបាវពោតនាំចូលពីទ្វីបអាហ្វ្រិក (Africa) ដោយឆ្លងកាត់កម្ពុជា កាលពីឆ្នាំ២០១៤ ដើម្បីនាំចេញបន្តទៅកាន់ប្រទេសផ្សេងទៀត៖ «យើងបានរង់ចាំម្ចាស់ ទំនិញមកបំពេញបែបបទនាំយកទំនិញចេញពីកំពង់ផែអន្តរជាតិ ក្រុងព្រះសីហនុ អស់រយៈពេល ២ឆ្នាំ នៅតែមិនឃើញគេមកយក ទើបស្ថាប័ននេះអនុវត្តការងារឲ្យស្របតាមច្បាប់ស្ដីពីគយ ដែលនិយាយពីទំនិញនាំចូលគ្មានការទាមទារ ហើយគយក៏បានជូនដំណឹងទៅម្ចាស់ ឬក្រុមហ៊ុនឲ្យមកនាំយកទំនិញចេញ ប៉ុន្តែមិនមានតំណាងក្រុមហ៊ុន ឬម្ចាស់មកបំពេញបែបបទនាំទំនិញចេញនោះទេ។»
ភ្លុកដំរីជាងកន្លះ
តោន (៦១៣គីឡូក្រាម)
ដែលមន្ត្រីគយចាប់បានក្នុងកុងតឺន័រទុកអីវ៉ាន់មួយនាកំពង់ផែ
ស្វយ័តក្រុងព្រះសីហនុ នៅថ្ងៃទី៥ ខែសីហា ឆ្នាំ២០១៦។ RFA/Den Ayuthyea
លោក គិន លី ប្រធានសាខាគយ និងរដ្ឋាករប្រចាំកំពង់ផែអន្តរជាតិ ក្រុងព្រះសីហនុ បានឲ្យដឹងថា ទំនិញប្រភេទភ្លុកដំរីនេះ លែងឃើញនាំចូលតាមច្រកកំពង់ផែអន្តរជាតិ ក្រុងព្រះសីហនុ ទៀតទេ រហូតមកដល់ពេលនេះ បន្ទាប់ពីមន្ត្រីជំនាញស្ថាប័នលោកចាប់បានកាលពីឆ្នាំ២០១៤។
ព្រះរាជអាជ្ញារងតុលាការខេត្តព្រះសីហនុ លោក លឹម ប៊ុនហេង ដែលចូលរួមសហការឆែកកុងតឺន័រ ហើយរកឃើញភ្លុកដំរីបង្កប់ខាងក្នុងបាវពោតជាមួយថ្នាក់ដឹកនាំ ស្ថាប័នគយ និងរដ្ឋាករកំពង់ផែអន្តរជាតិ ក្រុងព្រះសីហនុ នៅល្ងាចថ្ងៃសុក្រ ទី៥ ខែសីហា។ លោកឲ្យដឹងថា ស្ថាប័ននេះនឹងចាត់ការបន្តទៅតាមនីតិវិធី ព្រោះម្ចាស់កុងតឺន័រមានបង្កប់ភ្លុកដំរីនេះ មានអាសយដ្ឋានត្រឹមត្រូវដែលអាចឈានដល់តុលាការមានពន្លឺចាត់ការបន្ត តាមនីតិវិធី។
ទាក់ទិនបញ្ហានេះ លោក គិន លី ប្រធានសាខាគយ និងរដ្ឋាករកំពង់ផែអន្តរជាតិ ក្រុងព្រះសីហនុ បានឲ្យដឹងក្នុងសន្និសីទកាសែតថា ការនាំចូលភ្លុកដំរីដូចគ្នានេះ ស្ថាប័នលោកធ្លាប់ចាប់បានម្ដងរួចមកហើយ កាលពីឆ្នាំ២០១៤ ដោយចាប់បានភ្លុកដំរីជាង ៣តោន ស្មើ ១០៨កញ្ចប់ បង្កប់ក្នុងកុងតឺន័រសណ្ដែក ដែលឈ្មួញលួចនាំចូលមកពីប្រទេសម៉ាឡេស៊ី ចូលមកប្រទេសកម្ពុជា តាមច្រកកំពង់ផែអន្តរជាតិ ខេត្តព្រះសីហនុ៕
No comments:
Post a Comment